Sheshi Kham
मर्कुसं 15
पिलातसले येशुजन आगिनौ
मत्ती २७:१; २:११-१४; लूका २३:२-५; यहुन्ना १८:२८-३८
छकाल्या आताहौ चोएटै मुख्या पुजाउरोयाङ, सोझा अगवाङ शास्त्रीयाङ ओटन सोगलै महासभाले रारां सल्ला ढास्यु येशुजन पोअस्यु रालाङौ, ओटन पिलातसजन जिम्मा रांयोव। पिलातसले येशुजन आगिनौ, “नैति नङ यहूदीयाङल रय रों?” ओले नकाजन जबाक आयोव, “नङजै रय ऐढाज्याङना।” मुख्या पुजाउरोयाङै येशुजन भ्याई छिन्ङन दोस रांलाहौ। पिलातसले ओलजन फरि बै आगिनौ, “नैति नङ सकाए नैज जबाक मालेव? ब्याएते, न बिरोद त नकाङै ख्वाए छिन्ङन दोस रालाइज्यानु।” तर येशुले फरि नैज जबाक मायोडा, आवाए समन कि पिलातस बै हलाअ ताइदा।
येशुजन सएन्या सजाय रायांन्या
मत्ती २७:१५-२६; लूका २३:१३-२५; यहुन्ना १८:३९; १९:१६
ओ बेला पिलातसल चलन अनुसार बर्सकं त पाला निस्तार1-पर्बल बेलाक पिलातसले रुयाङल निई अनुसार तोलोअ कैदीजन ओयाङल नाल्ट राइस्योउरा। बिद्रोहल बेलाक हत्या ढान्या बिरोदीयाङ कैदल लेवाङ। जोयाङ तन बारब्बा मिनला तोलोअ रु नल लिज्याऔ। रुयाङल हुल नङ रा:स्यु, पिलातसजन गे चलन अनुसार गे नाल्ट ढास्यासिन ऐलेस्यु बिन्ति ढाऔ तअसिवाङ। पिलातसले ऐलेस्यु नकाङजन आगिन्वाङ, “नैति ङा जे नाल्ट यहूदीयाङल रयजन ग्याराहौत्या लेन्या जेचाहिचिऊ रों?” दानाङभन्या रिईल गर्दा मुख्या पुजाउरोयाङै येशुजन कोलोकौ रांपरिङौ ज्या, ऐलेन्या पिलातसले चान्यासै सनस्युआनाटौ। मुख्या पुजाउरोयाङै येशुजन माङडी, तर बारब्बाजन गे नाल्ट राइते ऐलेस्यु रुयाङल हुलजन रामच्चाहौ। पिलातसले फरि ओयाङजन आगिन्वाङ, “नैताहकन जोजन जे यहूदीयाङल रय ऐजेल्चिऊ, तब ओजन ङा कै ढोङवन?” नकाङ फरि कलिऊस्यु ऐलेवाङ, “नकाजन क्रूसतं केपचिते।” पिलातसले ओयाङजन ऐआढोवाङ, “दानाङ? नकाले नैति अपराद आढोव का?” ओटन नकाङ झन्जै जोरसै कलिऊस्यु ऐलेवाङ, “नकाजन क्रूसतं केपचिते।” ओटन पिलातसले हुलजन सन्तुस्टी जाएन्या इच्छ्याले नकाङल नाल्ट बारब्बाजन आराहौ, ओटन येशुजन कोर्ला लाइस्यु क्रूसतं केपौ आपरिङवाङ।
सिपाइयाङै येशुल अपमान राढान्या
मत्ती २७:२७-३१; यहुन्ना १९:२-३
सिपाइयाङै येशुजन राजपालल दरबारल ठरबाङ भितरलं राहोनौ, जोजन प्रेटोरियन बै ऐढोरा, ओटन नकाङै पुरै सेनाङल बगालजन बै रांखुल्वाङ। ओटन नका रुयाङै येशुजन 2ढुङल्याइन्या रङला क्वा रा:क्वाटौ, ओटन ज़ुईज़ु लेन्या मुकुट लएस्यु आङएत रा:जाटौ, ओटन “यहूदीयाङल रयजन जय” ओमनलेऊयन नकाङै गिलल्याइस्यु, येशुजन तबर जुगजुगल नाल्ट लिज्यान्ते लेस्यु ढोक रा:योव। ओटन नकाङै येशुजन ओलं ङएट सराले स्वापौयन ओलजन रा:ठिलौ, ओटन घुन्डा टिकिस्यु ओलजन ढोक रा:योव। ओटन येशुजन रा:गिलल्याहौ छिन्ट नकाङै ढुङल्याइन्या क्वा रा:फिरस्यौ, ओटन आक्वाईज रा:क्वाटौ। ओलं छिन्ट नकाङै येशुजन क्रूसतं केपौ नाल्ट पाखाङ रा:लाङौ।
येशुजन क्रूसतं राकेपौ
मत्ती २७:३२-४४; लूका २३:३३-४३; यहुन्ना १९:१६-२७
सिमोन जो अलेक्जेन्डर सनर रुफसल बौ हो, ओटन नका कुरेनील लिज्यान्या वाला हो, जो नङ्गरलन सहरदेए आहिनज्याऔक सेनाङै नाजन जबरजस्ति कोलोअस्यु येशुल क्रूस वुरौ रांपरिङौ।3 नाल छिन्ट नकाङै येशुजन गलगथाला पोल राहोनौ गलगथाल मतलब खप्परल पो। ओटन नकाङै येशुजन आस्युउनम बराएसिन्या अङ्गुर रस रांयोव। तर येशुले ना ग्रहन माढोदा। ओयाङै येशुजन क्रूसतं राकेपौ। ओटन काङ्काले आक्वाल कैताइन्या बठा डोएन्या लेस्यु ना पक्का जाएन्याल नाल्ट चिठ्ठा झोअस्यु ओलं क्वायाङ राभाकौ।4 नकाङै येशुजन क्रूसतं राकेपौ बेला छकाल्याका नौ बजिस्यु लेऊ। ओलं दोस पत्रल “यहूदीयाङल रय” ओमनलेन्या सरसिन्या लेऊ। नकाङै येशु सकाए नेंलोअ गोएनेजन बै क्रूसतं राकेपौ ओटन तोलोअजन येशुल दाइन्याङन, छुट्टैजन आदाबऱ्याङन।5 पबित्र शास्त्रल बचन ऐलेस्यु पुरा ताहौ, “येशु अपरादियाङ बराबर गनिसिऊ।”
नकन हिनन्या रुयाङै राढेङ हल्लाइस्यु ऐलेस्यु येशुजन रांगिलल्याहौ, “ओ! स्वाई मन्दिर थएस्यु तिन दिनक निब्जाइन्या वाला,6 क्रूसतन लांइस्यु रांन्ते, ओटन नङ नङझन्जै जोगाइते।” नैलेस्युजै मुख्या पुजाउरोयाङ बै शास्त्रीयाङस ऐलेस्यु रारांल येशुल गिलल्याइन्या रांढोव, “इकाले अपुऱ्याङजन आबचाइवाङ, तर ओलं ओलझन्जै जोगाहौ माढुदुडा। नङ मछ्यु ख्रीस्ट, इस्राएलला रय ताहकन, आब क्रूसतन लांइस्यु रांन्ते ओटन नङजन रङस्यु गे बिस्वास ढोया।” ओलसं क्रूसतं केप्सिज्यान्यानेले बै ओलजन नेंगिलल्याहौ।
येशु आसिन्या
मत्ती २६:४५-५६; लूका २३:४४-४९; यहुन्ना १९:२८-३०
बारं बजेतन तिन बजे समन सोगलै देसजन च्युऊन्याले आकपौ। तिन बजेदेए ऐलेस्यु येशु घिन्या ग़ाले कलिकौ, “इलोई इलोई, लामा सबखथनी?” जोल अर्थ हो, “औ ङा परमेस्वर, औ ङा परमेस्वर, नङ ङाजन दानाङ राहङ?”7
नावङ ज्युउल च्याङज्यान्या वालाङ तन काङ्का-काङ्का रुयाङै ईका थएस्यु ऐलेवाङ, “खिम्चिते, इकाले एलियाजन खुलज्याऔ।” ओटन तोलोअले चोएस्यु हिनस्यु तोलोअ रुवाल अङ्गुरल रस पुरै आबुदाहौ ओटन सरात8 नाएस्यु येशुजन आओटौ, “ब्याए या, किगर्दाङ एलिया नकाजन क्रूसतन ल्हाएरांऔ सन्।”9 तब येशुले घिन्या ग़ा पलिईस्यु परान आराहौ। ओटन मन्दिरलं पर्दा टुप्पाङन वान्ङ समन चेईस्यु नें भाअ ताहौ।10 येशुले ऐलेस्यु परान आराइन्या रङस्यु आलेऊक च्याङज्यान्या सिपाइयाङल कप्तानले ऐलेऊ, “पक्का ईका रु परमेस्वरलं ज़ा लेऊरैस।” नल लोएतन ब्याएन्या वाला ख्वाएयाए मेएमाङ बै लेवाङ। नकाङ तन मरियम मग्दलिनी ओटन इङन्या याकूब सनर योसेफल आमा मरियम ओटन सलोमी लेवाङ।11 जब येशु गालीलल आलिज्याऔक, नका सोगल मेएमाङ, आछिन्ट रांवाङ, ओटन ओलं सेवा ढाज्यावाङ, अपुऱ्याङ बै भ्याई मेएमाङ ओलसं यरुशलेम सहरल रा:स्यु लेवाङ।
येशुजन रारीनन्या
मत्ती २६:५६-६१; लूका २३:५०-५६; यहुन्ना १९:३८-४२
जब ओइ ताहौ, तयारील दिन लेऊ, जो नानसिन्या-दिनल तयोअ पहेला लेऊ। महासभाला मानिसिन्या सदस्य अरिमाथियाला योसेफ, जोले परमेस्वरलं आराज्यला छेनल यम वुइज्याव, नकाले हिकमत सकाए पिलातस ल्योङ हिनस्यु येशुल बुल नीऊ। येशु हादेए जै आसिन्या थएस्यु पिलातस हलाअ ताहौ, ओटन सिपाइयाङल कप्तानजन आल्योङ खुल्स्यु आगिनौ, नैति येशु आसिन्या ख्वाए बेला ताहौ। येशु सिया पाइना पिलातसले सिपाइयाङल कप्तानङन बुजिस्यु येशुल सिन्या बुल योसेफजन आसुम्पिऊ। ओटन योसेफले मलमललं क्वा आलङौ, ओटन येशुजन क्रूसतन वान्ल ल्हाएस्यु पालन्या क्वाले आमलिङौ, ओटन चम खुलिस्यु आजाएन्या तोलोअ ऊईल आनाटौ। नकाल छिन्ट ऊईल याह्ल नकाले तोलोअ घिन्या लुङले आकपौ। मरियम मग्दलिनी ओटन योसेफल आमा मरियमने येशुजन नाएसिन्या पो रङस्यु लेऊने।
Source notes (11)
- Footnote निस्तार पर्ब=अन आमीनौका पर्ब
- Footnote ढुङल्याइन्या=ढुङल्याइन्या
- Cross-reference रोमी १६:१३
- Cross-reference भजनसङ्ग्रह २२:१८
- Cross-reference यशैया ५३:१२
- Cross-reference भजनसङ्ग्रह २२:७; १०९:२५; मर्कुस १४:५८; यहुन्ना २:१९
- Cross-reference भजनसङ्ग्रह २२:१
- Footnote स्पन्ज=रुवा; अङ्गुरल रस=सिरन्या अङ्गुर रस; चल्=चल्
- Cross-reference भजनसङ्ग्रह ६९:२१
- Cross-reference प्रस्थान २६:३१-३३
- Cross-reference लूका ८:२-३
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.