Sheshi Kham
मर्कुसं 16
येशुल पुनरुत्थान
मत्ती २८:१-८; लूका २४:१-१२; यहुन्ना २०:१-१०
शबाथ दिनल छिन्काछिम मरियम मग्दलिनी सनर याकूबल आमा मरियम ओटन सलोमीले आस्युउनमन्या तीइ1 येशुल कलाङल थिटौ नाल्ट नेंहोनौ। हप्ताल पहेला दिन छकाल्याई घाम आपलिहौ छिन्ट नकाङ ऊई लेन्या पोल हिन्वाङ। ओटन नकाङै रारांल छ्योङवाङ, “गे नाल्ट ऊईला झलापता घिन्या लुङ काङ्काले हताइस्यायिउ?” ओटन नकाङै यादेए रांखिमौक ऊईला ना लुङ हताइसिन्या रांरङौ। ना लुङ बअघिन्या लेऊ। ओटन ऊईल भितर रापसिऊक नकाङै पालन्या क्वा क्वाएसिन्या तोलोअ धापा रुजन दाइन्याङन आचुङज्यान्या रांरङौ, ओटन नकाङ अचम्म ताइवाङ। ओले नकाङजन आपानस्योवाङ, “अचम्म तामानिच्यो, जे नासरतला येशुजन जेरोअज्याचिऊ ज्या, जो क्रूस त राकेपौ। ओ जिङदा ताइस्यु सोस्यु लेया। ओ आल माल्दी। ओजन नाएसिन्या पो आकाई ज्या। हिन्चिते, ओटन ओलं सिइयाङ सनर पत्रुसजन पानस्योचिरते, कि ओ जे हा-हा गालील हिनज्याऔ। ओले जेजन आपानस्यान्या अनुसार जे ओजन नङ रङच्या।”2 नका मरियम मग्दलिनी सनर याकूबल आमा मरियम ओटन सलोमीयाङ अचम्म ताइस्यु राछ्याहै वुउस्यु येशुल ऊईलन पलिईस्यु चोएवाङ, ओटन नकाङै काङ्काईजन नैज मापानस्योदुरा। दानाङभन्या नकाङ छ्याएस्यु लेवाङ।
मरियम सनर मग्दलिनी नें येशुल दर्शन नेंडोटौ
मत्ती २८:९-२०; लूका २४:१३-५३; यहुन्ना २०:१-२३; प्रेरित १:९-२०
हप्ताल पहेला दिन छकाल्या आताहौ पाइनाई ओ बान्चिस्यु सोस्यु पहेला मरियम मग्दलिनी जोल्योङन ओले साट वटा दुस्टआत्माङ आपलिइवाङ, नका ल्योङ थनसिऊ। मरियमले हिनस्यु येशुल आसिइयाङजन सनर अपुर रुयाङजन ईका थाई आयोवाङ। नवाए बेला सिइयाङ रां सोगलै हारमानिस्यु व्रज्यावाङ। तर जब येशु जिङदा ताहौ ओटन मरियम ल्योङ रंनौ ऐलेन्या छेन राथटौ, तब नकाङै बिस्वास रांमाढोव।
येशुजन नेलोअ आ सिइने नेरङन्या
लूका २४:१३-३५
नाल छिन्ट नेंलोअ आ सिइने नङ्गर देए नेंहिनज्याऔ बेलाक नकाने ल्योङ येशु छुट्टै भेसतं त डोएसिऊ। ओटन नकाने वलस्यु हिनस्यु अपुर सिइयाङजन नेपानस्योवाङ। तर ओयाङै नकानेल छेन बै बिस्वास माढोदुरा।
येशु एघारगोटा सिइयाङ ल्योङ आरंनन्या
मत्ती २८:१६-२०; लूका २४:३६-४९; यहुन्ना २०:१९-२३; प्रेरित १:६-८
ओलं छिन्ट येशु एघारगोटा आ सिइयाङ ल्योङ ज्यान्या ज्योङा लेस्यु राचुङज्याऔ बेलाक थनसिऊ। ओटन नकाङल अबिस्वास सनर रायिङला चिमत्याई नाल्ट ओले नकाङजन आसज्याअवाङ। दानाङभन्या ओ सिन्यातन जिङदा ताइस्यु आसोव छिन्ट ओलजन रङन्या वालाङल छेन नकाङै बिस्वास रांमाढोव। ओटन येशुले नकाङजन ऐआढोवाङ, “सोगलै सङ्सारलं हिनस्यु सोगलै स्रिस्टीजन प्रचार ढोचिते।3 बिस्वास ढान्या वालाङ सनर बप्तिस्मा होनन्या वालाङै उद्दार डोएरा, तर बिस्वास माढान्या वालाङ दोसी ठहराइसिरा। ओटन बिस्वास ढान्या वालाङसकाए ईका अचम्मला कामयाङ ताइरा ङा मिनङन नकाङै दुस्टआत्माङजन पलिइरा, छार छेनल छ्योङरा, नकाङ डाङयाङ कोलोअरा ओटन बिइ लेन्या जो जन्तु बै ओरकन नकाङल नैज नोक्सान माढोवदी। नकाङै नाएबोरन्याङ यर्त राकुई नाएरा ओटन नकाङ बेलरा।”
येशु स्वर्गदेए हिनौ
लूका २४:५०-५३; प्रेरित १:९-११
तब ऐलेस्यु नकाङसं आछ्योङौ छिन्ठक्क प्रभु येशु स्वर्गदेए हिनौ, ओटन परमेस्वरलं दाइन्याङन सर्बोच्चल बिराजमान ताहौ।4 ओटन नका आसिइयाङै हिनस्यु सोगलै पोल बचन प्रचार रांढोव। ओटन प्रभुले नकाङ सकाए अचम्मला कामङन अचम्मला काम ढाऔयन ढाज्याव, ओटन ईका बचन प्रचार सत्य ज्या ऐलेस्यु प्रमानित आजाटौ। आमेन।
Source notes (4)
- Footnote चान्यास्युनमन्या=आस्युउनमन्या; द्रब्य=तखाल्या तीइ
- Cross-reference मत्ती २६:३२; मर्कुस १४:२८
- Cross-reference प्रेरित १:८
- Cross-reference प्रेरित १:९-११
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.