Skip to content
BibleKenya

Sheshi Kham

मर्कुसं 14

येशुजन सएन्या सड्यन्त्र

मत्ती २६:१-१६; लूका २२:१-६

इकाल नेंयोअ छिन्ट निस्तार सनर मासोदाला भरेईल पर्ब लेऊ। मुख्या पुजाउरोयाङ सनर शास्त्रीयाङ येशुजन कोलोअस्यु झुकाइस्यु सएन्या मौका रोअज्यावाङ। नकाङै ऐलेवाङ, “पर्बल बेलाक माङडी, मानकन्ता रुयाङ हल्ला मच्चाईरा।”1

बेथानियाल येशुल अबिसेक

लूका ७:३७-३८

येशु बेथानियाला सिमोन कोर लागिन्याल झिमल याए ज्याव नाल्ट चुङज्याव, ओटन तोलोअ मेएमा चोखा चान्या जटामसीलं बअकरन्या अत्तर तल्किन्या लुङल शिसा हिनस्यु रांऔ, ओटन नका हिनस्यु सिऊनमन्या अत्तर येशुल ङएल तुईस्यु अबिसेक आढोव।2 तर काङ्का-काङ्काङ रारिऊ उठिस्यु रारांल ऐलेऊ तअसिवाङ, “ईका तिइजन दानाङ ऐलेस्यु खेर जाएज्या? दानाङभन्या ईका अत्तरजन तिन सय चान्दील ध्याअ तन बै भ्याई तबरल यएस्यु गरिबयाङजन भाकौ दुदुसिया।” नैताइस्यु नकाङै नामेएमाजन रासज्याकौ। तर येशुले नकाङजन ऐआढोवाङ, “राइचिते, जे इकाजन दानाङ हलाअ जाएज्याच्यो? ईका मेएमा ले ङाजन तीइ ठिइस्यु चान्या काम आढोव। दानाङभन्या गरिबयाङ सदाई ज जे सकाए लिज्यारा, ओटन जोजन ज्वाए बेला इच्छ्या लागि नवाए बेला भलाई ढाऔ ढुदुच्या, तर ङा ता सदाई जे सकाए मालेङदी।3 ईका मेएमाले जो ढाऔ आढुदुऊ ओइज आढोव। इकाले ङाबुलजन रींनौ हादेए अत्तरले ठिइस्यु तयार आजाएङु। ङा जेजन मछ्यु ऐढाच्या, सोगल जगतल जोङ-जोङ ईका चान्याथाई प्रचार ताह, नङं ईका मेएमाले जो आढोव, इकाल याद ढान्या लेसिया।”

यहूदाले येशुजन धोखा आयांन्या

मत्ती २६:१७-२५; लूका २२:७-१४; यहुन्ना १३:२१-३०

नवाए बेला बारं सिइयाङ तन तोलोअ यहूदा इस्करियोतले, येशुजन कोलोकौ परिङ्ङा लेस्यु मुख्या पुजाउरोयाङ ल्योङ हिनौ। ओयाङ ईका थएस्यु हेसाङवाङ, ओटन नकाजन पैसा यांन्या बाचा रांढोव, ओटन येशुजन कैलेस्यु कोलोअन्या ऐलेस्यु नकाङै मौका रोंकौ तअसिवाङ।

येशु सनर आसिइयाङसं निस्तार पर्बल भोस आज्यान्या

मत्ती २६:१७-३६; लूका २२:७-२३

बिनासोडाला भरेईल पर्बल छिम्क, जब नकाङ निस्तार-पर्बल थुमा बलि चराइराज्यावाङ, ओटन येशुल आसिइयाङै येशुजन रांगिनौ, “नमी इच्छ्या नैति लेऊ? गे काङ हिनस्यु न नाल्ट निस्तार पर्बल भोस तयार जातई?”4

ओटन येशुले आ सिइयाङ मध्य नेंलोअजन ऐलेस्यु आपरिङौने, “सहरल हिन्चिन्ते ओटन गाग्रील री छेन्स्यु लाङन्या वाला तोलोअ रुले झेनसं डोएचिन्वा, ओटन झेन ओलं छिन्ट लागिचिन्ते। नका रु जो झिमल हिनौ झिमला खसमजन ऐढोचिन्ते, ‘गुरुज्यूले ऐलेऊ ङासिइयाङ सकाए निस्तार-पर्बल भोस ज्यान्याल नाल्ट, ङामि पाहुनाङ कोठा काङ लेऊ?’” ओटन नकाले झेनजन सजाईस्यु तयार जाएसिन्या टङटाल्ला तोलोअ घिन्या कोठा थनस्याचिन्वा ओटन नङं जे गे नाल्ट भोस तयार जाएचिते। तब ना आ सिइने सहरल पसिऊने, ओटन येशुले नेंजन आपानस्योवका मन्जै ना रु सकाए डोएसिऊने, ओटन नकाङै निस्तार पर्बल भोस तयार रांजाटौ। ओईका बेला येशु आमि बारं गोटा सिइयाङस रांऔ। ओयाङ चुङस्यु रांज्याज्याऔ बेला येशुले ऐलेऊ, “मछ्यु ङा जेजन पानस्याच्या, जे तन ङा सकाए ज्याज्यान्या वाला तोलोअले ङाजन शत्तुरयाङल कुईत कोलोकौ परिङवा।”5 ओटन आ सिइयाङ दुखी ताइस्यु पालो पालोस ऐलेवाङ, “नैति नका ङा रों?” ऐलेस्यु गिनौ तअसिवाङ।

येशुले नकाङसं ऐलेऊ, “बारं गोटातन तोलोअ। जोले ङासं थालल भरेई छोएज्याऔ। दानाङभन्या पबित्र शास्त्रल सरसिन्या अनुसार ङा रुल ज़ा हो, तर थयहय जोले ङाजन शत्तुरयाङ ल्योङ कोलोकौ परिङस्यु सटौ आपरिङ्ङु, ङा ख्वाए दुख डोएन्यालेङा। नका रु ता आजर्मिन्याल भन्याता आमाजर्मिन्याई जाति लेऊ।”

प्रभु सिइयाङ सकाए भोस

मत्ती २६:२६-३०; लूका २२:१४-२०; १कोरिन्थी ११:२३-२५

ओयाङ रांज्याज्याऔक येशुले तोलोअ भरेई हिनस्यु, धन्याबाद आयोव, ओटन आकलाटौ ओटन आसिइयाङजन आयांज्याऔक ऐआढोवाङ, “हअ ईका ङा बुल हो।” ओटन खुरी हिनस्यु धन्याबाद आयांऔ छिन्ट येशुले आसिइयाङजन आयोवाङ, ओटन नकाङ नकालन सोगलैले रांओव। ओटन येशुले ऐलेऊ, “ईका छार बाचाला ङा जी हो, जो पापीयाङल पाप छेमा नाल्ट बगाइङा ङालन्या छार बाचाला प्रमान हो।6 ङा जेजन मछ्यु ऐढाच्या, ङा अङ्गुरल रसङन नका दिन समन माओङदी, जब समन परमेस्वरलं राज्यल ईका छार ताइस्यु माओङ।” ओटन तोलोअ भजन रेएसिस्यु ओयाङ पलिईस्यु जैतुन डान्डा देए हिन्वाङ।

येशुले पत्रुसलं भबिस्यबानी आढान्या

मत्ती २६:३१-३५; लूका २२:३१-३४; यहुन्ना १३:३६-३८

येशुले आसिइयाङजन ऐआढोवाङ, “जे सोगलै छिन्देए हतिच्या, दानाङभन्या ऐटाइन्या पबित्र शास्त्रल सरसिन्या लेऊ, ङा ग्वालाजन सतङरा, ओटन भेडाङ हुदेए अदेए तत्तर बित्तर ताइन्यालेरा।7 तर ङा जिङदा ताइस्यु सोङा पाइना जे हादेए जै ङा गालील हिन्ङा।”8 पत्रुसले येशुजन ऐआढोव, “यदि सोगलैले नङजन राहन्‌रकन बै ङा नङजन राइन्या मालेन्दी।”

तब येशुले नकाजन ऐआढोव, “मछ्यु जै, ङा नङजन ऐढाना, आछिमकाई रिउल भाल्या नेंपाला आकोव हादेए नङ ङाजन तिन पाला मासहङदी9 ऐलेना।”

तर पत्रुसले येशुजन ऐआढोव, “ङा नङजन मासहन्दी खकै मालेङदी, बरु नङ सकाए ङा सिऊज परिकन बै ङा नङजन राइन्या मालेङदी।” ओटन नकाङ सोगलैले नैज लेवाङ।

गेतसमनील येशुल प्रार्थना

मत्ती २६:३६-४६; लूका २२:३९-४६

नकाल छिन्ट ओयाङ गेतसमनी मिनला पोल हिन्वाङ, ओटन येशुले आसिइयाङजन ऐआढोवाङ, “ङा प्रार्थना ङाढाज्याव समन जे इङै चुङज्याचिते।” तब येशुले पत्रुस, याकूब सनर यहुन्नाजन ओलसं आलाङवाङ ओटन भ्याईजै अन्टातोल सनर म्यालमेल ताहौ। ओटन येशुले नकाङजन आढोवाङ, “ङा आतिइले भ्याई सिऊसमन्जै हलाअ ताइदुङा, जे इलै चुङज्याचिते ओटन सन्सिज्याच्यो।” तचिइ हुदिन्क हिनस्यु ओले नामल गोम लेस्यु प्रार्थना ढाऔ तअसिऊ, यदि ताहौ ढुदुउकन आका समाय ओल्योङन ग्याटलित्या ऐलेस्यु प्रार्थना आढोव। ओटन येशुले ऐलेऊ, “बौ10 न नाल्ट सोगलै छेन सम्भब लेया। ईका दुखल खुरी ङाल्योङन हताइस्याङते। तब बै ङा इच्छ्याङन माङडी, न इच्छ्याङन ग्याताइत्या।”

येशु फरि आरांऔक नकाङजन रारुउज्यान्या आडोएरिइवाङ ओटन पत्रुसजन ऐआढोव, “सिमोन, नैति नङ नरुउज्यानु? नैति तघन्टा बै सनसिज्याऔ नमाढुदुनु? सन्सिस्यु लिज्याचिते, ओटन प्रार्थना ढोचिते, ओटन जे परिक्छ्याल तापरिच्यो। आत्मा ता तयार लेया, तर बुल कमजोर लेया।”

येशु फरि हिनौ ओटन नाइ छेन दोहोऱ्याइस्यु प्रार्थना आढोव। येशु फरि आरांऔक आसिइयाङजन रारुउज्यान्याई आडोएवाङ, दानाङभन्या नकाङल मिऊरुइले झुलामाला ताइवाङ, ओटन नकाङ येशुजन नै जबाक यांन्या हो। ना रा:मासनौ।

येशु फरि बै तिन पालाक रांऔ, ओटन आसिइयाङजन ऐआढोवाङ, “नैति जे अझ बै जेरुउज्याचिऊ ओटन जे नानसिज्याचिऊ? आब बेला ताइदा खिम्चिते, रुल ज़ा पापीयाङल कुई त कोलोअसिन्या वाला लेया। सोचिते, बाचिते। ब्याएचिते, ङाजन कोलोअन्या वाला नेराकै ताप्‌रा:स्यु लिज्याया।”

येशुजन राकोलोअन्या

मत्ती २६:४६-५६; लूका २२:४७-५३; यहुन्ना १८:३-११

येशु आछ्योङज्याऔक बारं सिइयाङ मध्यलन तोलोअ यहूदा मिनला आ सिइ ओचोएटै ओक रंनौ। ओटन मुख्या पुजाउरोयाङ, सनर शास्त्रीयाङ जनताङल नेताङै रापरिङन्या तबगाल तरवाल सनर झुई हिनस्यु ओलसं नल रांवाङ। येशुजन कोलोकौ परिङन्या बिमानिले ऐटाइन्या तोलोअ सयान यांस्यु आनाएवाङ, “जोजन ङा, म्वाहङ नका रु ओइ ज्या, नकाजन कोलोअचिते ओटन खार्ल झोअस्यु लाङचिते।”

ओटन सोझै येशु ल्योङ हिनस्यु यहूदाले ऐलेऊ, “औ बौ,” ऐलेस्यु येशुजन आम्वाहौ। तब नकाङै येशुजन राकोलोकौ ओटन रांपोकौ। नल नेराक च्याङन्याङ तन तोलोअ वालाले तरवाल सेलस्यु प्रधान पुजाउरोल सेवाऱ्याजन आराइस्योव, ओटन नकाल ना च्वाट्टै आपलस्यौ। येशुले नकाङजन आढोवाङ, “नैति जे ङाजन तोलोअ गोएजन कोलोअन्यामन तरवाल सनर झुई समेत होनस्यु जेरांचिऊ? दिनकाईज मन्दिरलं ङाह्युउज्याऊक ङा जे सकाए जै लिज्याङा, ओटन जे ङाजन मापोअदुङच्या। तर पबित्रशास्त्रलं बचन पुरा ग्याताइत्या।”11 ओटन सोगलै सिइयाङ येशुजन राइस्यु ढोङस्यु हिन्दुरा।

ओटन आकलाङजन तोलोअ सुतिल क्वाले याएज मलिङसिन्या तोलोअ धापा ओलं छिन्ट लागिऊ, नकाङै ना धापाजन राकोलोकौ। तर नकाले आखाइटो बनाएस्यु क्वा मालन्या ढोङौ।

येशु महासभालं लेऊल

मत्ती २६:५७-६८; लूका २२:६६-७१; यहुन्ना १८:१३-१४; १९:२४

तब येशुजन प्रधान पुजाउरो ल्योङ रालाङौ। ओटन नङं सोगलै मुख्या पुजाउरोयाङ, सोझा अगवाङ सनर शास्त्रीयाङ दुउसिस्यु लेवाङ। पत्रुस लोएङन मुख्या पुजाउरोल ठरबाङ भितर येशुल छिनछिन लागिऊ, ओटन नङ सिपाइयाङ सकाए चुङस्यु नका मी मुनसिऊ तअसिऊ। आब मुख्या पुजाउरो सनर सोगलै महासभाले येशुजन सएन्याल नाल्ट ओलं बिरोदत दोसलं प्रमान रारोकौ, तर नैज माडोएदुरा। भ्याई रुयाङै येशुल बिरोदत ग्वारस्यु बयन रांयोव। तर नकाङै रायांन्या बयनले मामिलिदा। काङ्का-काङ्काङ सोस्यु येशुल बिरोदत ऐलेस्यु ग्वारस्यु बयन रांयोव, “इकाले आपानन्या गे गेथएयिउ, ‘रुल कुईले जाएसिन्या आका मन्दिर ङा थाएङा, ओटन ङा छुट्टै मन्दिर तिन दिनक बिना कुतै निब्जाइङा।’”12 तर नकाङल बयन तोलोअ जै माताइदा। तब प्रधान पुजाउरोयाङै खार्ल च्याङस्यु येशुजन रांगिनौ, “नङ दानाङ नैज छेन माहोलन? खिम्ते इकाङ न बिरोदल बयन रायांन्या नैति?” तर येशु छपक्कै दिङज्याऔ, ओटन नैज बै जबाक मायोदुऊरा। फरि प्रधान पुजाउरोले येशुजन आगिनौ, “नैति नङ परमधन्यल ज़ा ख्रीस्ट रों?” येशुले जबाक आयोव, “औ ङाई ज्या, ओटन जे रुल ज़ाजन सर्बसक्तिमानल दाइन्या घोनत आचुङज्यान्या सनर नमता बादलयाङ सकाए आरांज्यान्या रङच्या।”13 तब प्रधान पुजाउरोले आक्वा चेईस्यु ऐलेऊ, “आब गेजन अपुर साचीयाङ नैकाम परिऊका? जे ईस्वर बाए ता थएदुच्या। जेमि नै बिचार लेऊ?” ओटन नकाङ सोगलैले येशुजन सएन्या सजायल दवलला राठहऱ्याहौ।14 नकाजन काङ्का-काङ्काङै रांठिलौ, ओटन आहां कप्स्यास्यु लप्टा राइस्यास्यु ऐराढोव “पान्ते काङ्काले आटुप्नू” ओलं छिन्ट पाल्याङै ओलजन राजिम्मात हिनस्यु मुट्किले राटुपौ।

पत्रुसले येशुजन आराइन्या

मत्ती २६:६९-७५; लूका २२:५६-६२; यहुन्ना १८:१५-१८,२५-२७

पत्रुस वान्ल ठरबाङल लिज्याऔ, प्रधान पुजाउरोल नोक्कर्नियाङ तन तोलोअ नङ रांऔ, ओटन पत्रुसजन मी आमुन्सिज्यान्या रङस्यु नकाजन एकसोऱ्या ब्याएस्यु ऐलेऊ, “नङ बै येशु नासरी सकाए नलिज्यानु ज्या।” तर नकाले ऐलेस्यु माभनौ, “नङ नै नपानज्यानु न सनङ न बुजिङ।” ओटन नका पाखाङन्ता मुल झलाप देए हिनौ। ओटन भाल्या कोव। नल च्याङज्यान्या रुयाङजन नोक्कर्निले ऐआढोवाङ, “ईका ता नकाङ मध्यला तोलोअ हो।” तर पत्रुसले फरि माभनौ, ओटन तचिइ छिन्ठक्क पत्रुसले नेंपाला आराहौ, तर तचिइ छिन्ट ओलं जिऊला च्याङज्यान्या रुयाङै फरि रांगिनौ, “नङ पक्का नकाङ भितरला तोलोअ ज्या, दानाङभन्या नङ गालीली बै ज्या।” ओटन पत्रुसले किऱ्या ज्यास्यु ऐलेऊ तअसिऊ, “जोल बारेङन जे जेपानज्याचिऊ, नका रुजन ङा मासहङदी।” ओटन ओचोएटै नेंपाला भाल्या कोव, ओटन येशुले ऐआढान्या छेन पत्रुसले आयिङौ, “भाल्या नेंपाला आकोव हादेए नङ ङाजन तिन पाला राहङना।” ओटन ना छेन यिङसिस्यु नका धरधर व्‌रौ।

Source notes (14)
  1. Cross-reference प्रस्थान १२:१-२७
  2. Cross-reference लूका ७:३७-३८
  3. Cross-reference ब्यबस्था १५:११
  4. Cross-reference प्रस्थान १२:६; प्रस्थान १२:१५
  5. Cross-reference भजनसङ्ग्रह ४१:९
  6. Cross-reference प्रस्थान २४:८; यर्मिया ३१:३१-३४
  7. Cross-reference जकरिया १३:७
  8. Cross-reference मत्ती २८:१६
  9. Footnote इन्कार=माभनन्या
  10. Footnote बौ
  11. Cross-reference लूका १९:४७; २१:३७
  12. Cross-reference यहुन्ना २:१९
  13. Cross-reference दानियल ७:१३
  14. Cross-reference लेवी २४:१६

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.