Sheshi Kham
मर्कुसं 13
येशुले मन्दिर बिनाशल बारेल भबिस्यबानी
मत्ती २४:१-५१; लूका २:५-३६
जब येशु मन्दिरलन पलिईज्या, तब ओलं सिइयाङ तन तोलोअले येशुजन ऐआढोव, “औ गुरु खिम्ते, ख्वाए घिघिन्या लुङयाङ सनर ख्वाए घिन्या झिमयाङ।” येशुले नकाङजन ऐआढोवाङ, “नैति जे ईका घिघिन्या झिमयाङ जेरङचिऊ, नल तोलोअ लुङल यर्त छुट्टै लुङ मालज्यादी, तर सोगलैजन थाएन्या लेसिया।”
दुख सनर सटावट
मत्ती २४:३-१४; लूका २१:७-१९
ओटन येशु मन्दिरलं प्रार्थना ढास्यु जैतुन डान्डाल सामन्दी आचुङज्याऔक, पत्रुस, याकूब, यहुन्ना सनर अन्द्रियास रांबाठए हिनस्यु ओलजन रांगिनौ, “गेजन पानस्यासिन्ते, कि ईका घटनाङ खक ताइन्या वाला लेवाङ? ओटन ईका सोगल छेन पुरा ताइन्याल नाल्ट नैति अचम्मला कामयाङ ताइन्या लेऊ?” येशुले नकाङजन ऐआढोवाङ, “होससकाए लिज्याचिते, काङ्काईले जेजन ताग्वारचिरत्या। तबर रुयाङ ङा मिनत ‘ङा ओइज ज्या’ ऐलेस्यु रारां, ओटन नकाङ तबर रुयाङजन ग्वारस्यु छ्योङरा। जब जे यिसिन्याङ सनर खप्सिन्याङलं हल्ला थएच्यो तब ताछ्याएच्यो, ऐटाइन्या घटनाङ ताइन्या आबस्यक जै लेया। तर आखिरी दिन रांङाई लिज्याया। दानाङभन्या जातिल बिरोदत जाति, सनर देसलं बिरोदत देस राज्यल बिरोदत राज्य खप्सिरा। सोगल पोल भुईचाल हिनन्यालेया, ओटन अनिकाल ताहा। ईका ता मेएमाङजन जतकाल दुख सुरु आताइरावमन ज्या।” “जे जेबारेल होसस लिज्याचिते, नकाङै जेजन अदालत ज्युउल लाङचिरा। जेजन आराधना झिमजिऊल टुपचिरा। ओटन हाकिमयाङ सनर रययाङल सामन्दी ङा कारनले जेजन गवाइ यांन्याल नाल्ट जेजन सच्यानन्या लेचिरा।”1 तर अनत्य ताइङा आलेऊ हादेए सोगलै जातियाङजन चान्याथाई प्रचार ढान्या लेसिया। जब रुयाङै जेजन कोलोअस्यु लाङस्यु मुद्दा झोअस्याचिर, तब नै छ्योङन्या होला ऐलेस्यु हादेएज ताआतिच्यो। तर नका बेला जो जेजन यांसि, नकाई छ्योङचिते, दानाङभन्या छ्योङन्या वाला जे माङडी, तर पबित्र आत्माईज लेया। “तोलोअ भाईले छुट्टै भाईजन सएन्याल नाल्ट सुम्पिरा, ओटन नामन जै बौले आज़ाजन। ओटन ज़ायाङै आमा बौयाङल बिरोद त च्याङन्या लेरा ओटन नकाङजन सटौ परिङरा। ओटन ङा मिनल कारन जेजन सोगलैले हेलाइ ढास्यु घिनाइचिरा, तर जो छिन्ङै समन सनस्युई लिज्या नकाईजन जोगाइसिया।”2
माहा दुखल बेला
जब जे बिनाश जाएन्या ढरघिन्ला जन्तुजन जोङ मालेऊ परिन्या नङै आच्याङन्या रङच्या। (परीन्याले ग्याबुजिऊत्या), तब जो यहूदियाल लिज्यान्याङ डान्डा देए ग्याढोङरत्या।3
लूका १७:३१
झिमल मैराअ त लिज्यान्या, वान्लं तालाइत्या न त आझिमलन कोबाअ पलिइन्याल नाल्ट भितरलं पसि।4 ओटन जो खेएल लिज्या, नकाले आखाइटो चिनाङा लेस्यु झिमदेए तावलत्या। तर नका दिनल थयहय, गुरभ्यानियाङ सनर नुन ओएसिज्यान्या ज़ाअमाङजन! नैताइस्यु परमेस्वरतं प्रार्थना ढोचिते, नका हिउदाक ताटाइत्या ऐलेस्यु। तयोअ ऐटाइन्या लेया जो कि खकै मायिङसिन्या घटना ताइन्यालेया, परमेस्वरले सुरु स्रिस्टीतन आकअ समन न ऐताइस्यु ले, न त खकै ताइन्या ले।5 यदि परमेस्वरले नका दिनयाङ आमाघटाइन्या ताहकन, काङ्काई परानी बै बान्चिऊ माढुदुऊदी, तर जोजन ओले आछेल्वाङ नकाङल गर्दा नका दिनयाङ आघटाइवाङ। “नवाए बेला काङ्काङै जेजन ‘खिम्चिते, ख्रीस्ट आङं लिज्याऔ’ या ‘नङं लिज्याऔ’ ऐलेरकन जे बिस्वास ताढोच्यो। दानाङभन्या ग्वारवा बिस्वासीयाङ सनर ग्वारवा अगमबक्ताङ च्याङन्या लेरा, ओटन राढुदुउ समन, परमेस्वरले आछेलन्याङजन भरमित जाटौ, नाल्ट नकाङै अचम्मला कामयाङ सनर अचम्मला कामयाङ थनन्यालेरा। तर जे जोगाइस्यु लेचिते। ङा जेजन सोगलै छेन हाकन्जै पानस्याज्याच्या।”
रुल ज़ा रांन्या
मत्ती २४:२४
“तर ना दुखल बेला लाअक नम्युउ बै काईकाई चिऊन्या ताहा, ओटन ह्यावएले होएन्या मायौदी,6 ओटन नमतन हरवएयाङ तेइरा ओटन नमत सक्तियाङ हल्लिरा। ओटन नका बेला रुयाङै रुल ज़ाजन सक्ति सनर महिमा सकाए बादलल आरांज्यान्या रङरा।7 तब परमेस्वरले स्वर्गदुतयाङजन परिङौरा ओटन पिरथ्बील आवङ ङन नमल आवङ समन चार दिसाङन ओलं आछेलन्या रुयाङजन दुकौरा।
ड्यूल टुङल आहान
मत्ती २४:३२-३५; लूका २१:२९-३३
“ड्यूल टुङतन तोलोअ आहान ह्युउसिचिते, नकाल आहाङ्गा बालअ ताइस्यु ल्हापटा पलिहौ तअसिया पाइना घाम साहा नेरा रांज्याया रैस, ऐलेस्यु जे सनन्या लेच्या। ऐलेस्यु जै जे, जब ईका घटनाङ राटाइज्यान्या रङच्यो, तब ना नेराकै लेया, झलापल लेऊकै लिज्याया ऐलेस्यु सन्चिते। मछ्यु ङा जेजन पानस्याच्या, जब ईका सोगल छेन ताइन्या माले तब समन ईका बेलाका पुस्ताङ सिन्या मालेरदी। स्वर्ग सनर पिरथ्बी मास्युहिना, तर ङा बचन खकै मांन्यामाल्दी।”
ना दिन ना बखत काङ्काईले मासनौदी
मत्ती २४:३६
“तर नका दिन सनर नका बेलाल बारेङन काङ्काईले मासनौदी, सिरिप बौले जाई सन्वा, न त स्वर्गला दुतयाङै न ज़ा ले।8 नैताइस्यु जोगाइस्यु लेचिते, सन्सिस्यु चुङचिते, प्रार्थना ढोचिते, दानाङभन्या नका बेला खक रांन्या हो, नका जे मासन्चिदी। ईका ता तोलोअ रुले आमि नोक्करयाङजन झिमला सोगल काम सनर अढिकार सकाए जिम्मा यांस्यु पाल्याङजन मारुउन्या आग्या यांस्यु परदेस देए आहिनौमन ज्या।”9 “ऐताइस्यु जे बै होसस लेचिते, दानाङभन्या झिमल खसम ओईक, या आधा रिउल, या भाल्या आकोव बेला या छकाल्या, खक रांन्या हो, ना जे मासन्चिदी। मानकन्ता ना ख्वाएबेला आरांऔक नकाले जेजन जेम्वाइज्यान्या डोएरिइचिवा। जो ङा ऐलेङ, ना सोगलैजन पानस्याच्या, सन्सिज्याचिते।”
Source notes (9)
- Cross-reference मत्ती १०:१७-२०; लूका १२:११-१२
- Cross-reference मत्ती १०:२२
- Cross-reference दानियल ९:२७; ११:३१; १२:११
- Cross-reference लूका १७:३१
- Cross-reference दानियल १२:१; प्रकाश ७:१४
- Cross-reference यशैया १३:१०; इजकिएल ३२:७; योएल २:१०-३१; ३:१५; प्रकाश ६:१२
- Cross-reference दानियल ७:१३; प्रकाश १:७
- Cross-reference मत्ती २४:३६
- Cross-reference लूका १२:३६-३८
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.