Rô-ma 3

1Kơi achêk nek, karơ lơh ưng manưih Jo Thaaiq nek harau? Môôiq malơơi malaai ưng tarnêêng iêt ng'kar nek hau? 2Lóng bơk leq dyóp rauriq! Taai laloom tabhơt, ađek nek piđó ơi bâân pajaau đóng nôôq taruuih paraaq ưng Yaang Pleng. 3Hau ngi têêng la maphơn manưih kah ve lóóm huuiq? Ve kơq lóóm kah huuiq ưng piđó e têêng đóng rau yươq tadhơ ưng Yaang Pleng xar kơi kah tating. 4Chiên ađek kah mơ chóóm vaaih. Palâh lóóiq, phaai bhi Yaang Pleng nek pâng dhalam, hayơq dyóp manưih nek manưih galơơk chachââr. Kơi ơi bâân xaraq kơi ađô:

“Đóng dhơ dhakơi nek Ađó đóng dhơ dhakơi ơi bâân gluh pakah nek bhơt liêm kalóóng nôôq paraaq praaq ưng Ađó,

lơq Ađó e đươk lơh xók Ađó đơơp xêi xanêi.”

5Bơơi la rau môôp ưng nôôq he pakah rau bhơt liêm ưng Yaang Pleng, nek nôôq he e praaq harau? Ve kơq Yaang Pleng kah dhalam xók n'toh ganhuh janah ưng Ađó? (Aku xók praaq ting kơi akóón manưih.) 6Chiên ađek kah mơ chóóm vaaih! Ơi la kơi achêk nek ng'kơi têêng Yaang Pleng e xêi xanêi manưih talaang katiêk? 7Dyơq la rau paraaq dhalam ưng Yaang Pleng ơi têêng đóng cha-iil tabah Ađó yuur grơơt dhaang lơh dhiq rau chââr galơơk ưng aku, nek hau kơq aku bhiêk dyơq bâân taxêi xanêi kơi mưi manưih matu? 8Lơq eh rau (nham kơi nôôq yi bâân baauq uôn lơq kơi ve nôôq ngaai móón dhakơi dhalam nôôq yi praaq kơi) “Nôôq he kơng têêng rau aak, buôn rau liêm ve chóóm vaaih tơk” kah lua? Tanóóm ưng piđó nek đaang dhalam.

9Kơi achêk hayơq ng'kơi? Nôôq he ve liêm lơh kah? Maar dyóp kah. Hơq nôôq yi ơi kaauq patu miq manưih Jo Thaaiq palơq manưih Hi-laap, hayơq tabhơt phaai tơơt raal matu lơt. 10Kơi ơi bâân xaraq kơi ađô:

“Kah ve ngaai bhơt liêm, patơk mơ mưi nak kung kah.

11Kah ve ngaai n'nal rarau.

Kah ve ngaai achêk lêi Yaang Pleng.

12Tabhơt ơi vôôiq lơt hót. Piđó palơq xóng piđó val xar kah malơơi.

Kah ve ngaai têêng rau liêm, tơk mơ kah ve mưi ngaai.”

13“Marlóng piđó nek bóng garha tarlóng.

Palơq n'taak ađêi, piđó bhiêk yuur gluh paraaq galơơk chachââr.

Chapââr ưng kaxênh dhuur tơơt dhiq bưưr piđó,”

14“bóóp piđó kađôôq bing paraaq tóh đua lơq ahaaq atang.”

15“Tapaang dyung piđó tarhơnh têêng tantoh ahaam.

16Rau têêng pahư lơq jarnah ka-ai dhiq nôôq kalơng vôôiq ưng piđó.

17Lơq piđó kah n'nal kalơng khe liêm.”

18“Kah ve rau bhi kakhin Yaang Pleng toom mat piđó.”

19Kơi lââng, nôôq he n'nal kơi la rau dhơơm hơq gani truuih pachóóm nek praaq palơq nôôq ngaai tơơt kalóóng gani, buôn đóng ting beq bóóp bâân bơq parngau, lơq tabhơt manưih hóng katiêk đơơp matu lơt dhiq rau xêi xanêi tââq Yaang Pleng. 20Ơi taai, toom mat Ađó, kah ngaai ngâ akóón manưih ng'kar m'bech bâân đóók bhơt liêm tââq nôôq tarnêêng têêng ting kơi gani. Taai rau đơơp n'nal matu lơt nek dhiq gani.

21Bơơi xók đôk, rau bhơt liêm ưng Yaang Pleng ơi bâân pakah giit nguôi gani, xók bâân truuih đuui tââq gani lơq nôôq manưih đââng taruuih, 22hơq rau bhơt liêm ưng Yaang Pleng, nek tââq lóóm huuiq dhiq Jê-su Chuôq Paq Manưih, hơq nek pakoom đóng dyóp ngaai huuiq, ơi yươq ve rau ađó pantua. 23Taai dyóp ngaai ơi têêng matu lơt lơq bâân tabhuch bil cha-iil tabah ưng Yaang Pleng, 24hơq yươq kơng chróót ađó janaaq rauriq xók bâân đóók nek bhơt liêm tââq ơơn phươk liêm ưng Ađó tapâng dhiq rau paq pók kalóóng Jê-su Chuôq Paq Manưih. 25Yaang hơq Yaang Pleng ơi kanóq loom kơi mưi bhanuôih pók matu lơt đươi tââq lóóm huuiq dhiq ahaam Yaang achêk, buôn nek têêng pan-nal leq rau bhơt liêm ưng Ađó, ơi taai rau palơh lơơi nôôq matu lơt biêh ơi ve n'loom hei 26tââq lóóm đơơp jruôn ưng Yaang Pleng, malóóm tơk tarnêêng buôn pakah rau bhơt liêm ưng Ađó kalóóng klaang đơơi xók đôk, buôn đóng Ađó nek bhơt liêm, lơq đóók bhơt liêm đóng ngaai tââp vaaih tââq lóóm huuiq dhiq Chuôq Jê-su.

27Kơi achêk nek, rau tarhơơnh liêm tơơt n'đó dhiq? Ađó ơi bâân m'peq lơơi. Tââq n'đó gani? Gani ưng tarnêêng têêng alua? Eh rau! Bơơi nek tââq gani ưng lóóm huuiq. 28Taai nôôq he chamet lêi mưi nak bâân đóók bhơt liêm tââq lóóm huuiq, eh tââq nôôq tarnêêng têêng ting gani. 29Môôiq Yaang Pleng chapiên nek ưng manưih Jo Thaaiq hơq giêl? Kah alua kung nek ưng dhanuôr manưih katiêk lââng alua? Ơơq, kung nek ưng dhanuôr manưih katiêk lââng, 30ơi lalua chapiên ve mưi Yaang Pleng, nek Yaang e đóók bhơt liêm manưih đơơp iêt ng'kar tââq lóóm huuiq, palơq manưih kah iêt ng'kar đươi lóóm huuiq achêk.

31Kơi chêk nek, nôôq he ve têêng đóng gani bil tiêng palơq lóóm huuiq achêk kah? Chiên ađek kah mơ chóóm vaaih. Palâh lóóiq, nôôq he têêng tamưng gani.