Rô-ma 2

1Đóng hayơq, nô manưih tôôh, dhơ dhangaai buôn đóók praaq xêi, amei kah ve taai hau rauriq chóóm ting paq, taai dhiq hau rau hơq amei praaq xêi lơt manưih lââng, nek amei tư yuur xêi lơt ađêi; taai amei nek manưih xêi lơt, kung têêng lơt nôôq tarnêêng achêk. 2Dyơq nôôq he ơi n'nal kơi rau paraaq xanêi ưng Yaang Pleng nek glap palơq paraaq dhalam makhich lóóiq nôôq manưih têêng lơt nôôq tarnêêng kơi achêk. 3Bơơi, nô manưih tôôh, nek manưih xêi lơt nôôq ngaai têêng lơt nôôq tarnêêng kơi chêk hơq chênh ađêi kung têêng nôôq tarnêêng kơi chêk, ve alua amei kanóq leq rau ađô, kơi amei e klươch lơh rau paraaq xanêi ưng Yaang Pleng? 4Môôiq nek amei kađiq lơơi rau karvaan kabhôôq ưng lóóm m'pheep, lơq lóóm jruôn parngau, palơq rau đơơp parngau ưng Ađó, taai kah n'nal kơi lóóm m'pheep ưng Yaang Pleng đââng chơơng amei tơk rau klôôq lóóm? 5Bơơi ganương ting rau nhâng-nhóóq ưng amei lơq tââq lóóm kah đơơp dhơ klôôq, amei xók tư karong ha-ơu rau pagrâ janah đóng ađêi kalóóng tangêi pagrâ janah lơq đóng pakah leq rau xêi xanêi dhalam m'pơng ưng Yaang Pleng, 6nek Yaang e chróót đóng ting chanak manưih ting kơi nôôq tarnêêng têêng ưng manưih achêk: 7Mưi hót nek rau mamông tơk nh'chró pakoom đóng nôôq ngaai achêk lalei cha-iil tabah lơq bhi chap palơq janaaq kiiq dyơq taluôn ting rau mưng lóóm ưng tarnêêng liêm, 8Hayơq hót tôôh nek rau pagrâ janah palơq ganhuh pagrâ papươnh pakoom đóng nôôq manưih taai n'thaam kiêng mưi ađêi lơq kah xâng paraaq dhalam hơq bâân malóóch môôiq ting rau kah liêm. 9Bhrê hư lơq jarnah xarngaat tơơt dhiq dyóp ravaai ưng manưih têêng rau môôp, ưng manưih Jo Thaaiq laloom tââm, palơq ưng manưih Hi-laap. 10Bơơi cha-iil tabah lơq bhi chap palơq yươq rauha pakoom đóng dyóp manưih têêng rau liêm, đóng manưih Jo Thaaiq laloom tââm, palơq đóng manưih Hi-laap. 11Taai yươq ve rau paq katơq dhiq ve mat ưng Yaang Pleng. 12La nôôq ngaai ơi têêng matu ting kơi kah ve gani, nek kung e chêt bil ting kơi kah ve gani, lơq hơq nôôq ngaai ơi têêng matu dhiq m'pơng gani, nek e bâân xêi xanêi palơq gani. 13Taai eh rau nôôq manưih xâng gani nek bhơt liêm toom mat Yaang Pleng, bơơi nôôq manưih têêng ting gani nek e bâân đóók manưih liêm. 14Taai xók nôôq dhanuôr katiêk lââng, nek nôôq manưih dhanuôr kah ve gani, ting kơi kaxu têêng nôôq rau ưng gani, nek dhơ kah ve gani, piđó nek gani đóng chênh ađêi, 15achêk nek nôôq manưih đóng lêi nôôq tarnêêng ưng gani bâân xaraq kalóóng lóóm piđó, xók kalóóng lóóm piđó truuih đuui, lơq nôôq karnóq lóóm takaauq môôiq patơk mơ praaq paq m'pơng chênh palơq xóng piđó 16kalóóng tangêi hơq Yaang Pleng e xêi xanêi nôôq rau kadrêi lââp ưng akóón manưih tapâng dhiq Jê-su Chuôq Paq Manưih, ting kơi Taruuih Liêm ưng aku.

17Dyơq la amei đââng dhanóók nek manưih Jo Thaaiq, ganơơm leq gani, pakah pajơơr kalóóng Yaang Pleng, 18bâân n'nal karnóq kiêng Ađó, n'nal pâng lơt nôôq rau n'tua lơh bâân pató pachóóm tââq kalóóng gani, 19dhơ kơi ađek, amei tư đóng ađêi nek manưih đââng kalơng manưih kabaang, kalaaq brương đóng nôôq ngaai tơơt kalóóng bóng kanam, 20manưih praaq móón kabhuh ngôôk khơl, thêi pachóóm kabhuh manưih kah n'nal, taai ve pakala dyaang chadhaq ưng tarbech galang lơq ưng paraaq dhalam kalóóng gani, 21kơi achêk nek, nô manưih pató pachóóm manưih lââng tôôh, amei kah pachóóm chênh ađêi kala alua? Nô manưih truuih pachóóm óóq tatông tôôh, amei ve tatông kah. 22Nô manưih móón kah chóóm têêng tapiing tôôh, amei ve têêng tapiing kah? Nô manưih harek haper nôôq yaang kabhêi tôôh, amei ve tông ađô nôôq ping klo kah? 23Amei laach ađêi nek manưih tơơt kalóóng gani, amei ve praaq kađiq Yaang Pleng palơq tarnêêng têêng lơt gani kah? 24Ơi tââq “dhanóók Yaang Pleng bâân praaq tamôôp dhiq m'pơng nôôq dhanuôr katiêk lââng taai nôôq pe” nham kơi paraaq ơi bâân xaraq. 25Alua, dhơ pheep iêt ng'kar đââng tơk malơơi liêm la amei ve chóóm ting đuui gani, bơơi la amei nek manưih têêng lơt gani, nek tarnêêng iêt ng'kar ưng amei ơi val xar kah iêt ng'kar. 26Kơi chêk nek, la mưi chanak kah ơi iêt ng'kar xâng jư nôôq paraaq kayua ưng gani, nek eh rau tarnêêng kah iêt ng'kar ưng manưih ađek e bâân lêi kơi tarnêêng ơi iêt ng'kar alua? 27Lơq xók têêng paxong gani manưih kah ơi iêt ng'kar dhiq achak araang xók đôk e xêi lơt amei, nek manưih tââq bha-aar xaraq lơq pheep iêt ng'kar nek manưih têêng lơt gani. 28Ơi eh rau mưi manưih tââq dyaang achak hót nguôi nek manưih Jo Thaaiq, kung eh rau đu tơơt hót nguôi dhiq achak araang nek pheep iêt ng'kar, 29klóóih dhiq ađek, manưih Jo Thaaiq nek kanóq lóóm tơơt dhiq lââp kadrêi hót kalóóng, lơq pheep iêt ng'kar nek ưng tala lóóm tââq Yaang Liêm, eh rau palơq bha-aar xaraq; hơq rau đaang haanh ưng manưih ađek eh rau tââq akóón manưih bơơi nek tââq Yaang Pleng.