Rô-ma 12

1Kơi achêk, adhi anó ơơi, tââq rau kayô ka-er ưng Yaang Pleng, aku mââl bhơơl adhi anó đââng tapôông đóng Yaang Pleng achak araang ađêi kơi mưi bhanuôih mamông, tabah liêm, iêm lóóm Ađó. Hơq nek rau bhuôih haanh pâng dhalam ưng adhi anó. 2Lơq óóq ralap tađuui ting đơơi ađôk, bơơi phaai bâân paxar kơi rau raxal tame ưng lóóm karnóq, buôn adhi anó bâân lêi lalua hau rau nek karnóq kiêng liêm kre, iêm lóóm, lơq bhơt liêm ưng Yaang Pleng.

3Ơi, đươi ơơn phươk liêm ơi bâân đóng leq aku, aku nhan móón palơq dyóp ngaai tơơt dhiq m'pơng kalóóng adhi anó óóq vaaih kanóq leq ađêi yaal lơh rau phaai kanóq. Klóóih dhiq ađek nek kanóq lêi buôn đâh n'nal pakala, ting kơi Yaang Pleng ơi blah nh'xóóng mơ dheng đơq lóóm huuiq đóng ting chanak. 4Ơi patơk mơ kơi nôôq he ve bơk dyung têi moh mat kalóóng mưi achak, bơơi tabhơt nôôq dyung têi moh mat kah ve makơi mưi tarnêêng têêng, 5nek ting kơi tarvaai ađek, bơk ngaai nôôq he, nek mưi achak kalóóng Chuôq Paq Manưih, hơq ting dyóp chanak nek dyung têi moh mat ưng xóng ađêi. 6Bơơi nôôq he ve nôôq kaliim kliim ơơn liêm n'tua kơi ting mơ ơơn phươk liêm ơi bâân đóng leq ađêi: la ve nek ơơn đââng taruuih Yaang Pleng, nek yuur praaq ting mơ ve lóóm huuiq; 7Ve alua nek ơơn têêng yaauq, nek pei têêng kalóóng tarnêêng têêng yaauq; ve alua nek ơơn pató pachóóm, nek pei têêng kalóóng tarnêêng pató pachóóm; 8la ve nek ơơn tabhơơl lóóm, nek pei têêng kalóóng tarnêêng tabhơơl lóóm; ơơn đóng kliim, nek têêng pakah palơq đóng yươq xêi chróót; ơơn têêng takóh, nek têêng pakah palơq rau bhơt lóóm; ơơn pakah lóóm kayô ka-er, nek têêng pakah palơq rau bhuui marhaal.

9Tanhơr nek yươq paliêm dhiq bóóp, taai harek haper rau môôp, jư ađêi tabóq tamưng palơq rau liêm; 10nek rau tanhơr pakoom đóng xóng ađêi kalóóng lóóm tanhơr adhi anó; têêng xamil đóng xóng ađêi kalóóng rau bhi chap; 11nek kah kadhơq kayơng paangra kalóóng rau jêi tarang; kiêng têêng kalóóng lóóm karnóq; yaauq têêng tarnêêng Chuôq; 12bhuui marhaal kalóóng lóóm rââm; jruôn parngau kalóóng bhrê hư; markơi-kơi dhiq rau gavơh nhan. 13Paak blah nôôq rau tabhuch tapiêl ưng nôôq manưih huuiq liêm; ting tađuui lóóm nh'nhơr tamóói. 14Phaai nhan phươk đóng nôôq manưih têêng pahư adhi anó; phaai nhan phươk, lơq óóq tóh đua; 15buôn bhuui nek palơq nôôq manưih bhuui; buôn nhiim nek palơq nôôq manưih nhiim; 16xók ve mađó mưi kanóq pakoom đóng xóng ađêi, óóq ve kanóq parlaach pajơơr, bơơi nek jruôn đơơp đươi nôôq manưih kah dyóp kanóq. Óóq val kơi tabech galang ganơơm dhiq chênh ađêi; 17xók yươq chróót charóót rau aak palơq rau aak đóng dhơ mak ngaai, pajêi gamang nôôq rau liêm kre toom mat dyóp ngaai; 18la ve đuôh, dhiq n'đó dham mađó leq ađêi, nek jư lêi rau paliêm palơq dyóp ngaai; 19adhi anó bơk nh'nhơr ơơi, óóq tư ađêi chróót charóót, bơơi phaai châng dham đóng ganơt janah ưng Yaang Pleng, taai rau ơi bâân xaraq: “‘Tarnêêng chróót charóót pakoom đóng Aku; Aku e chróót charóót,’ Chuôq praaq kơi ađek.”

20“Dhơ kơi ađek, la manưih brau adhi anó ve ha-ul, phaai đóng ađó cha.

La ađó ađek rahaal, phaai đóng ađó ơm.

Ơi xók têêng kơi ađek, adhi anó e kaboq rahââng óih róh dhiq akoq ađó.”

21Óóq lơơi ađêi bâân ting tađuui tââq rau aak, bơơi phaai đươk lơh rau aak palơq rau liêm.