Rô-ma 11

1Kơi achêk aku nhan tamóh: Ve kơq Yaang Pleng ơi kah đươi dhanuôr Ađó? Chiên ađek kah mơ chóóm yuur vaaih. Taai achak araang aku kung nek mưi manưih I-sơ-ra-êên, tââq dhong nooi Ap-ra-haam, mađó kabhuh Bêên-ja-miin. 2Yaang Pleng ơi yươq kah đươi dhanuôr Ađó, nek dhanuôr Ađó ơi n'nal loom. Môôiq adhi anó kah n'nal Bha-aar Yaang Pleng praaq harau leq Ê-li, xók ađó truuih đuui palơq Yaang Pleng kađiq lóóiq dhanuôr I-sơ-ra-êên? 3“Kakoh Chuôq, piđó ơi leng nôôq manưih đââng taruuih Amei, piđó ơi pahư lơơi para bhanuôih Amei, nek chapiên mưi akóón dyơq bâân tagaleq mamông, lơq piđó dyơq achêk tabâân parhââm mamông akóón.” 4Bơơi paraaq ââi tabah liêm praaq palơq ađó nek harau? “Aku ơi lơơi pakoom leq Aku tapól ngaan manưih padruuih, nek nôôq manưih ơi yươq chakoh takól toom Ba-en.” 5Kơi ađek kung ting kơi achêk kalóóng ganah bhêêl xók ađôk, ve dhiq dyơq mưi phơn tagaleq lóóiq ting rau tabâân chââih ưng ơơn phươk liêm. 6Bơơi la tââq ơơn phươk liêm, nek eh rau tââq tarnêêng têêng dyơq. La kah, ơơn phươk liêm kah dyơq nek ơơn phươk liêm. 7Kơi achêk nek ng'kơi? Rau hơq dhanuôr I-sơ-ra-êên chik-chêk, nek dhanuôr achêk ơi kah bâân tarlum ađó, hơq ngaai manưih bâân chââih nek bâân tarlum, bơơi maphơn dyơq lóóiq ơi bâân kađiq lóóm, 8kơi rau ơi bâân xaraq, kơi ađô: “Yaang Pleng ơi đóng leq piđó lóóm yaang ngôôk ngaak, mat kah lêi, katór kah xâng, đóng patơk tangêi ađôk.” 9Lơq Đa-viit nek móón:

“Phaai lơơi m'beq baang ưng piđó val xar jươl, biêng,

kaliêng dhơl n'đóih dyung, lơq rau chróót bharang pakoom đóng piđó.

10Phaai lơơi mat piđó bâân kanam abhơơm buôn óóq lêi.

Lơq nek têêng hóng piđó bhiêk vang ligong taluôn.”

11Kơi achêk, aku nhan tamóh: “Ve kơq piđó ơi n'đóih kalơm buôn hayơq m'bhuôh tatóp?” Chiên ađek kah mơ chóóm vaaih. Klóóih leq ađek, tââq rau têêng lơt ưng piđó, rau paq jóói tơk palơq dhanuôr katiêk lââng, buôn têêng đóng piđó tatrô môôp lóóm. 12Mat lââng, la rau têêng lơt ưng piđó đââng tơk rau karvaan kabhôôq ưng hóng katiêk, lơq rau hat tabhuch ưng piđó đââng tơk rau karvaan kabhôôq ưng nôôq dhanuôr katiêk lââng, nek rau dyóp liêm ưng piđó e dhaang karvaan kabhôôq xưa raai lơh n'nal mơ? 13Dyơq ađôk, aku nhan móón palơq adhi anó nek nôôq dhanuôr katiêk lââng. Kơi achêk, dyơq ơi taai chênh ađêi aku nek sưưq-đô đóng nôôq dhanuôr katiêk lââng, aku pei têêng tarhơơnh leq tarnêêng têêng ưng ađêi, 14dhơ đóng palơq n'đó kơi ađek, aku ve chóóm têêng đóng dhanuôr ting phơn achak ưng aku môôp lóóm lơq ve chóóm bâân paq mưi phơn manưih tââq dhiq piđó. 15Ơi la rau dhươih lơơi ưng piđó đââng tơk rau paliêm lóóiq ưng manưih hóng katiêk, nek tarnêêng piđó pei đơơp e nek ng'kơi la eh rau nek parmông gluh tââq akan chêt? 16Mat lââng, la phơn amun laloom tarnââp nek liêm, nek tabhơt bhôôk amun ađek kung kơi achêk. Lơq la riêh nek liêm, nek nôôq đóóng kung kơi achêk. 17Bơơi la mưi phơn đóóng ơi bâân veh lơơi, dyơq adhi anó, xók nek đóóng ô-liiu booiq, ơi bâân tabóq leq kalóóng dhiq piđó, lơq ơi val xar kơi manưih ting đơơp dyet mamông bhlaai bing tââq riêh ưng n'lóóng ô-liiu achêk, 18nek óóq laach ađêi lơh nôôq đóóng lââng. Bơơi dhơ adhi anó laach jơơr, nek hei kơi eh rau achak araang adhi anó đơơp tabóq riêh n'lóóng, hơq nek riêh n'lóóng đơơp tabóq adhi anó. 19Kơi achêk nek, adhi anó e móón: “Nôôq đóóng achêk ơi bâân veh lơơi, buôn chênh aku ve chóóm bâân mót tabóq.” 20Pâng kơi achêk! Piđó ơi bâân veh lơơi taai rau kah huuiq, hayơq chênh adhi anó nek dyương tamưng đươi lóóm huuiq. Óóq charngô tơk nôôq lóóm kanóq têêng ađêi ađêi, hơq phaai kakhin kapơn. 21Ơi la Yaang Pleng ơi kah châq lơơi nôôq đóóng kơi vaaih kaxu tôôh, nek Ađó kung e kah lơơi châq adhi anó. 22Kơi achêk, phaai lêi n'nal lóóm moor dha-iiq lơq rau pagat ưng Yaang Pleng: dhơ rau pagat nek palơq nôôq manưih ơi lơơi lóóm huuiq, bơơi lóóm moor dha-iiq ưng Yaang Pleng pakoom đóng adhi anó, la adhi anó bhiêk tơơt kalóóng lóóm moor dha-iiq Ađó. Hơq la kah, chênh adhi anó kung e bâân kut m'peq. 23Dyơq nôôq manưih tôôh kung kơi achêk, la piđó yươq pajêi kalóóng rau kah huuiq, nek piđó e bâân mót tabóq. Tââq Yaang Pleng ve mataai karơ buôn tabóq piđó mót lóóiq. 24Ơi la adhi anó ơi bâân chapech tââq mưi beq n'lóóng ting kơi vaaih kaxu nek n'lóóng ô-liiu booiq, lơq ơi bâân tabóq lơt palơq kơi vaaih kaxu leq tââm ô-liiu liêm, nek nôôq manưih achêk, hơq nek nôôq manưih đơơp ting kơi vaaih kaxu, e dhaang bâân tabóq leq n'lóóng ô-liiu ưng chênh ađêi bơk lơh n'nal mơ?

25Taai adhi anó ơơi, aku kah kiêng adhi anó kah n'nal leq rau takadrêi ađô, buôn adhi anó kah ve rau tabech galang ting achak araang ađêi. Taai rau karđiq lóóm gluh tââq mưi phơn dhanuôr I-sơ-ra-êên ơi yuur vaaih, đóng patơk xók dyóp phơn nôôq dhanuôr katiêk lââng ting mót; 26lơq kơi achêk, tabhơt I-sơ-ra-êên e bâân paq, kơi ơi bâân xaraq kơi ađô:

“Yaang paq jóói e bhral tââq Si-ôôn;

Ađó e m'peq lơơi nôôq rau kah huuiq gluh lơh tââq Ja-kôôp.

27Lơq ađek nek raket bóóp patư tââq Aku pakoom đóng piđó,

xók Aku e m'peq lơơi matu lơt ưng piđó.”

28Dhơ ting Taruuih Liêm, piđó nek manưih brau makhich ơi taai malơơi ưng adhi anó. Bơơi ting rau tabâân chââih, hơq piđó nek manưih bâân nh'nhơr bhlơng ơi taai nôôq abhươp avuôq ưng piđó. 29Taai nôôq ơơn liêm lơq rau dhaloong kayua ưng Yaang Pleng nek nôôq rau kah ve chóóm tadhơ. 30Taai pamơ kơi chênh adhi anó n'loom ahei ơi kah xâng Yaang Pleng, hơq ađôk ơi bâân kayô ka-er dhiq rau kah xâng ưng nôôq manưih ađô, 31nek kung kơi achêk, nôôq manưih ađô xók ađôk ơi kah xâng bóóp dhiq rau kayô ka-er adhi anó, buôn xók ađôk piđó kung ve chóóm bâân kayô ka-er. 32Taai Yaang Pleng ơi król dyóp ngaai kalóóng rau kah xâng bóóp, buôn Ađó ve chóóm pakah lóóm kayô ka-er dyóp ngaai.

33Ơ, kre alua pardhơuq leq rau kabhôôq karvaan ve lơq rau tabech galang palơq rau bâân n'nal ưng Yaang Pleng! N'đó kơi nôôq paraaq pagat ưng Ađó kah đuôh chóóm chamet lêi, lơq kalơng vôôiq Ađó kah bhơt chóóm n'nal!

34“Ơi ngaai ơi n'nal lóóm karnóq ưng Chuôq?

Môôiq ngaai ơi val kơi manưih kađââng paraaq ưng Ađó?

35Hamôôiq ngaai ơi đóng Ađó laloom,

hayơq e bâân Ađó chróót lóóiq?”

36Taai dyóp rau gluh tââq Ađó, đươi tââq Ađó, lơq malóóm leq Ađó. Cha-iil tabah chô leq Ađó patơk nh'chró chró. A-meen.