Rô-ma 10

1Adhi anó ơơi, rââm mamââk kalóóng lóóm aku lơq paraaq gavơh nhan ưng aku palơq Yaang Pleng klóóih đóng piđó nek buôn piđó ve bâân paq jóói. 2Tââq aku truuih đuui leq piđó kơi piđó ve lóóm jêi tarang ting kơi palơq Yaang Pleng, bơơi kah ting kơi tabech n'nal dhalam. 3Taai kah đơơp n'nal rau bhơt liêm ưng Yaang Pleng, lơq tabhơt praan buôn têêng tavaaih rau bhơt liêm n'tua ưng ađêi, hayơq piđó ơi kah đơơp xâng dhiq rau bhơt liêm ưng Yaang Pleng. 4Taai Chuôq Paq Manưih nek rau paxong kanóq kaniêng ưng gani buôn đââng tơk rau bhơt liêm đóng dyóp manưih ve lóóm huuiq. 5Tââq Môôi-se xaraq leq rau bhơt liêm gluh tââq gani, kơi: “Ngaai chanak ơi têêng ting nôôq rau ađô, nek manưih achêk đươi ađek e mamông.” 6Bơơi rau bhơt liêm tââq lóóm huuiq praaq nô kơi: “Óóq praaq kalóóng lóóm ađêi kơi: ‘Ngaai e dyók tơk leq Pleng?’ (kiêng móón nek, buôn đââng Chuôq Paq Manưih dhaluônh); 7môôiq: ‘Ngaai e dhaluônh tơk bóng dhơuq?’” (kiêng móón nek, buôn đââng Chuôq Paq Manưih yuur tââq akan chêt.) 8Palâh lóóiq, rau achêk praaq ng'kơi dhơq? “Paraaq tơơt đan akóón, kalóóng bóóp akóón lơq kalóóng lóóm akóón.”

Ađek nek paraaq lóóm huuiq hơq nôôq yi truuih karơ. 9Ơi la adhi anó đơơp đóók Jê-su nek Chuôq palơq bưưr bóóp ađêi, lơq adhi anó huuiq kalóóng lóóm ađêi kơi Yaang Pleng ơi payuur Ađó mamông lóóiq tââq akan chêt, nek adhi anó e bâân paq. 10Ơi ngaai tââq lóóm huuiq ganơơm nek đââng tơk rau bhơt liêm, dyơq ngaai tââq bóóp đóók chanót nek đââng tơk rau paq jóói. 11Taai Bha-aar Paraaq Yaang Pleng móón: “Dyóp ngaai huuiq dhiq Ađó e yươq bâân kachiit mat.” 12Ơi yươq ve rau pantua dhiq m'pơng manưih Jo Thaaiq lơq manưih Hi-laap; ơi mađó mưi Yaang nek Chuôq ưng tabhơt, karvaan ơơn ting kơi palơq tabhơt nôôq ngaai dhaloong gavơh Ađó. 13Taai “dyóp ngaai, hơq nek tabhơt mak ngaai ơi dhaloong gavơh dhanóók Chuôq, e bâân paq.” 14Kơi achêk nek, palơq ng'kơi kiq piđó ve chóóm dhaloong gavơh tơk Yaang hơq piđó kah ơi huuiq? Hayơq ng'kơi têêng piđó ve chóóm huuiq Yaang hơq piđó kah ơi xâng? Hơq ng'kơi têêng hơq piđó ve chóóm xâng xók kah ve manưih truuih đuui? 15Bơơi ngaai dhơơm achêk truuih đuui ng'kơi kiq la piđó kah bâân kayua? Kơi paraaq ơi xaraq, kơi ađô: “Tapaang dyung ưng nôôq manưih truuih đuui Taruuih liêm, liêm kre n'nal mơ!”

16Dhơ kơi ađek, eh rau tabhơt ơi xâng ting Taruuih liêm. Taai Ê-saai móón: “Kakoh Chuôq, ngaai ơi huuiq paraaq truuih đuui ưng nôôq yi?” 17Kơi achêk hayơq, lóóm huuiq tơk tââq bâân xâng, hơq bâân xâng achêk tapâng dhiq paraaq ưng Chuôq Paq Manưih. 18Bơơi, aku nhan tamóh: “Ve kơq nek piđó ơi kah bâân xâng?” Praaq padrêh kơq nek,

“Dhariêng ưng nôôq manưih achêk ơi yuur tanđôôr tơk plok katiêk,

lơq paraaq ưng piđó tơk nôôq dhiq xariêq ưng talaang katiêk.”

19Dhơ kơi achêk, aku nhan tamóh: “Ve kơq nek manưih I-sơ-ra-êên ơi kah ve n'nal?” Laloom tââm, Môôi-se móón:

“Chênh Aku e têêng đóng nôôq pe tatrô môôp lóóm tââq ngaai ađek eh rau nek mưi dhanuôr.

Aku e ơơr đóng nôôq pe yuur pagrâ palơq mưi dhanuôr kah ve chóóm n'nal rarau.”

20Hayơq Ê-saai kung nhóól lóóm, lơq ađó praaq:

“Aku ơi bâân tarlum tââq nôôq ngaai kah chik chêk Aku,

Aku ơi hayơq pakah padrêh đóng nôôq ngaai kah gavơh tamóh Aku.”

21Dyơq palơq dhanuôr I-sơ-ra-êên, Ađó praaq:

“Bhluuch matangêi, Aku dhương têi ađêi malóóm leq mưi dhanuôr kah xâng bóóp lơq lalak huông.”