Rô-ma 13

1Tabhơt ting chanak phaai xâng bóóp nôôq takóh kala kataai dhiq piing ađêi, taai kah karơ kataai n'đó chóóm dyơq la kah tââq Yaang Pleng, dyơq nôôq karơ kataai xók ađôk nek bâân đóng pheep tââq Yaang Pleng. 2Kơi achêk hayơq, ngaai patơơt ađêi jơl jaklâk karơ kataai ađek nek jaklâk jơl lóóiq paraaq kayua ưng Yaang Pleng, hơq nôôq manưih jơl jaklâk achêk nek tư pei đơơp rau xêi janah đóng ađêi. 3Taai nôôq manưih kala kataai eh rau nek avaaih kakhin kapơn ting kơi palơq tarnêêng liêm, bơơi nek đóng tarnêêng aak. Dyơq adhi anó kiêng yươq phaai kakhin manưih kala kataai achêk? Phaai têêng rau liêm, nek adhi anó e đơơp rau bhi haanh tââq manưih manưih kala kataai, 4ơi taai manưih achêk nek dhơn ratơơq ưng Yaang Pleng malóóm tơk rau kre liêm đóng adhi anó. Bơơi la adhi anó têêng tarnêêng aak, nek phaai kakhin kapơn, taai ađó yươq kadhâng bhươt kơi kah machak maraang, taai ađó nek dhơn ratơơq ưng Yaang Pleng, hơq nek manưih chróót charóót buôn ganhuh pagrâ janah pakoom đóng manưih yuur têêng tarnêêng aak. 5Taai ađek, rau kơng bhlơng nek đơơp xâng bóóp, eh mưi taai ganhuh pagrâ janah, hơq dyơq ơi taai lóóm kanóq. 6Tââq kung taai rau ađek hayơq adhi anó goop paklóóih; taai piđó nek dhơn ratơơq ưng Yaang Pleng, tabhơt praan xalia ting kơi palơq chênh tarnêêng ađô. 7Phaai chróót đóng dyóp ngaai rau ađêi manơơq piđó: paklóóih đóng manưih pagoop paklóóih, jêên đóng manưih pagoop jêên, kakhin manưih đaang phaai kakhin, bhi manưih đaang phaai bhi.

8Óóq manơơq ngaai dhơ dharau, lơh tââq tanhơr palơq xóng ađêi, taai ngaai nh'nhơr manưih đan tóór ađêi nek têêng dyóp gani. 9Taai rau ađô: “Akóón óóq têêng matu tapiing, akóón óóq leng manưih, akóón óóq tatông papei, akóón óóq n'thaam jahaam,” lơq la dyơq dhơ dharau paraaq kayua n'đó lââng, nek dyóp rau achêk bâân pantoom kalóóng paraaq ađô: “Akóón phaai nh'nhơr manưih đan tóór ưng akóón kơi chênh ađêi.” 10Lóóm tanhơr kah têêng mahaai manưih đan tóór ađêi. Kơi achêk, nh'nhơr nek rau têêng dyóp gani.

11Lơq kơi achêk, taai n'nal bhêêl ganah, kơi ơi tơk bhêêl đóng adhi anó phaai yuur meh tââq bhanêch bêch. Taai xók ađôk rau paq jóói ưng nôôq he ơi đan machơng palơq bhêêl nôôq he tame huuiq. 12Hayum n'dhương lơh, dyơq tangêi đan tơk. Kơi achêk, nôôq he phaai m'peq lơơi nôôq tarnêêng ưng rau kanam kajeem, hayơq pei bak pluung panenh ưng rau brương. 13Nôôq he phaai jađaang vôôiq kơi đóng tagap, kơi dhiq m'pơng tangêi, kah ơm cha, lơq ból plơ; kah mamông tapiing taniêt lơq mak mơ, kah tarkaai tarlak lơq dyââng lêi. 14Palâh lóóiq, phaai pei xơp Chuôq, nek Jê-su Chuôq Paq Manưih, lơq óóq têêng vôôiq ting mangê kanóq loom ưng manưih ti malóóm leq nôôq malóóch kiêng.