Pakah Đóng Lêi 5

1Hayơq aku lêi dhiq têi atươm ưng Yaang tơơt dhiq tanơơt mưi panuôl bha-aar ơi bâân xaraq hót kalóóng lơq hót nguôi, bâân let kiêr tââq tapól kanal. 2Aku kung lêi mưi dhơn pleng grâ karơ, karơ dhariêng yuur papraaq: “Ngaai targlap đaang lương panuôl bha-aar lơq plók nôôq kanal let kiêr ưng ađó?” 3Kah ngaai m'piing pleng môôiq n'raal katiêk hamôôiq hót raal katiêk ve chóóm lương panuôl bha-aar môôiq lêi leq ađó. 4Kơi ađek nek aku nhiim ka-ai karuôq taai kah ngaai bâân chamet lêi nek targlap đaang đóng lương panuôl bha-aar hamôôiq đok ađó. 5Hayơq mưi kalóóng nôôq takóh bhươl praaq palơq aku: “Óóq nhiim. Lêi tôôh! Sư Tư, Yaang gluh tââq kabhuh Ju-đa, Akóón Chachau ưng Đa-viit, Ađó ơi đươk lơh đóng lương panuôl bha-aar palơq tapól kanal let kiêr ưng ađó.” 6Lơq tơơt pa-ô m'pơng tanơơt palơq puôn panong akóón adhah lơq tơơt m'pơng nôôq takóh bhươl, aku lêi Trưưu Akóón dyơq dyương, kơi ơi bâân taleng, ve tapól tagê lơq tapól kaliêng mat, hơq nek tapól yaang ưng Yaang Pleng bâân kayua vôôiq plok katiêk. 7Ađó bhral lơq pei đơơp panuôl bha-aar tââq têi atươm ưng Yaang tơơt dhiq tanơơt. 8Xók Ađó ơi pei đơơp panuôl bha-aar, puôn panong akóón adhah lơq bơơr jêt puôn takóh bhươl chakoh tarkól leq katiêk toom mat Trưưu Akóón, ting chanak ve mưi beq tambhreh haak lơq mưi beq jahương palơq vaang kađôôq bing dhaak, hơq nek nôôq paraaq gavơh nhan ưng nôôq manưih huuiq. 9Piđó babóóch mưi guôp bhanóóch tame, kơi ađô:

“Ađó targlap đaang pei đơơp panuôl bha-aar

lơq lương nôôq kanal let kiêr ưng ađó.

Taai Ađó ơi bâân taleng lơq tââq haam ađêi Ađó kơl chô đóng Yaang Pleng

nôôq manưih tââq dyóp dhong nooi, dhariêng paraaq, dhanuôr manưih lơq katiêk karuung.

10Ađó ơi têêng piđó val vaaih mưi katiêk karuung lơq nôôq takóh kadhâng bhanuôih đóng Yaang Pleng nôôq he,

lơq piđó e kadhâng akoq dhiq katiêk.”

11Hayơq aku chalaang lêi lơq xâng dhariêng ưng bơk dhơn pleng xirvir praang tanơơt kung palơq nôôq akóón adhah lơq nôôq takóh bhươl, hơq tabhơt nôôq ưng piđó nek kaaq ngaan kaaq-bhaan, 12mandrươh yuur praaq karơ:

“Trưưu Akóón ơi bâân taleng, alua nek targlap đaang đóng pei đơơp mataai raman,

kavaan kabhôôq, tabech galang, praan karơ, bhi chap, cha-iil tabah, lơq babóóch haanh.”

13Hayơq aku xâng dyóp rau tavaaih m'piing pleng, n'raal katiêk, hót n'raal katiêk, dhiq taxiiq, lơq dyóp rau kalóóng piđó, praaq kơi ađô: “Nhan đóng Yaang tơơt dhiq tanơơt lơq Trưưu Akóón bâân babóóch haanh, bhi chap, cha-iil tabah, lơq têêng kala patơk nh'chró, taluôn luôn.”

14Puôn panong akóón adhah praaq: “A-meen!” dyơq nôôq takóh bhươl chakoh takól leq katiêk lơq bhuôih kakoh.