Pakah Đóng Lêi 4

1Lơh nôôq tarnêêng ađek, aku chalaang lêi lơq tôôh mưi beq palóng bâân tarlóng dhiq pleng, hayơq dhariêng tarnââp đu aku ơi xâng praaq palơq aku kơi dhariêng karyóól, móón kơi ađô: “Phaai đơk leq ađô, hayơq Aku e chaleq đóng akóón lêi nôôq tarnêêng phaai avaaih bhral tatun nôôq tarnêêng ađô.” 2N'drươh ađek nek, aku tơơt kalóóng Yaang Liêm, lơq lêi tôôh, mưi tanơơt bâân lơơi dhiq pleng, lơq ve mưi Yaang dyơq tơơt dhiq tanơơt. 3Yaang tơơt dhiq tanơơt palơq lêi parliêm thê kơi ngok dhơl bhreh bhrel lơq ngok manaau, palơq nek mưi gavương mariêng xirvir praang tanơơt palơq lêi parliêm thê kơi ngok taviêng axơq n'lóóng. 4Xirvir praang tanơơt ve bơơr jêt puôn beq tanơơt, lơq tơơt dhiq tanơơt nek bơơr jêt puôn takóh bhươl bâân pei xơp aau yaal bhóók, palơq panơơng charnap palơq vaang dhiq akoq piđó. 5Tââq tanơơt yuur vaaih nôôq chaach kamlaaq, dhariêng grưng grưng, palơq dhariêng grơm. Tapól beq dhơu óih dyơq róh toom tanơơt, hơq nek tapól yaang ưng Yaang Pleng. 6Toom tanơơt thê kơi mưi tala xamil chadhah makơi phalê, dyơq dhiq pa-ô m'pơng tanơơt lơq xirvir praang tanơơt nek puôn panong akóón adhah, bing nôôq kaliêng mat, hót lóóm palơq hót hóng. 7Akóón adhah đu tarnââp thê sư tư, akóón adhah đu bơơr thê karók akóón, akóón adhah đu pe ve moh mat kơi ưng manưih, lơq akóón adhah đu puôn thê achim kalaang adhuuk dyơq par. 8Puôn panong akóón adhah dyóp panong kalóóng sôôq piđó ting panong ve chapat nanang xirvir praang, hót kalóóng bing nôôq kaliêng mat, lơq tangêi lơq hayum, piđó kah ve rau dhêi drơq xók praaq kơi ađô:

“Tabah liêm, Tabah liêm, Tabah liêm nek Chuôq, Yaang Pleng Bhơt Mataai,

Yaang ơi ve, ađôk ve lơq dyơq tơk.”

9La n'đó xók nôôq akóón adhah tapôông cha-iil tabah, rau bhi chap, lơq paraaq ma-ơơn đóng Yaang tơơt dhiq tanơơt, nek Yaang mamông patơk nh'chró, taluôn luôn, 10nek bơơr jêt puôn takóh bhươl e chakoh takól toom mat Yaang tơơt dhiq tanơơt, lơq bhuôih kakoh Yaang mamông patơk nh'chró, taluôn luôn, lơq piđó lơơi panơơng charnap ađêi leq toom tanơơt, praaq kơi ađô:

11“Kakoh Chuôq lơq Yaang Pleng nôôq yi,

Amei alua targlap đaang pei đơơp cha-iil tabah, rau bhi chap, lơq bhơt mataai,

taai Amei ơi tavaaih dyóp rau;

kung tââq karnóq kiêng Amei hơq piđó chaq ching lơq bâân tavaaih.”