Pakah Đóng Lêi 3

1Phaai xaraq đóng dhơn pleng ưng kabhuh akóón dhơn Chuôq dhiq Saat-đe kơi ađô:

‘Yaang ve tapól yaang ưng Yaang Pleng lơq tapól beq chatur praaq nô kơi: “Aku n'nal nôôq tarnêêng têêng ưng akóón. Akóón ve tanđôôr nek mamông, bơơi akóón nek chêt. 2Phaai meh lóóm lơq têêng đóng mưng karơ nôôq rau dyơq lóóiq, hơq nek nôôq rau kanóq chêt, taai Aku kah ơi lêi nôôq tarnêêng têêng ưng akóón bâân m'bhraach xong toom mat Yaang Pleng ưng Aku. 3Kơi achêk hơq, phaai hei lóóiq nôôq rau akóón ơi đơơp lơq ơi xâng. Phaai huuiq ting ađek hơq klôôq lóóm kanóq lơt. Dyơq la akóón kah meh n'taach, Aku e bhral kơi đu tatông, lơq akóón dhakơi e kah n'nal n'đó bhêêl Aku bhral jơl jaklâk akóón. 4Dhơ kơi ađek, akóón ve nôôq manưih dhiq Saat-đe, nek nôôq manưih ơi kah têêng bóq anhuq kun aau ađêi, lơq piđó e ting vôôiq palơq Aku kalóóng kun aau bhóók, taai piđó targlap đaang. 5Manưih đươk lơh e bâân xơp leq aau yaal bhóók thê kơi achêk, Aku e kah mơ ve tabil achak manưih achêk tââq Bha-aar Parmông, lơq Aku e chanót achak ưng manưih achêk toom mat Ama Aku lơq toom mat nôôq dhơn Pleng Ađó. 6Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq.”’

7Phaai xaraq đóng dhơn pleng ưng kabhuh akóón dhơn Chuôq dhiq Phi-la-đeen-phi kơi ađô:

‘Yaang Tabah, Yaang Alua Dhalam,

Yaang kadhâng kaliêng kliêng ưng Đa-viit,

Yaang lóng hơq kah ngaai e kađơp,

lơq kađơp hơq kah ngaai lóng,

praaq nô kơi:

8“Aku n'nal nôôq tarnêêng ưng akóón (Lêi tôôh, Aku ơi tabóq mưi palóng bhươh talóng toom mat akóón bơơi kah ngaai ve chóóm đuôh kađơp ađó), taai akóón ve m'bưưiq praan karơ, bơơi akóón ơi huuiq jư paraaq Aku, lơq kah dyiin lơơi dhanóók Aku. 9Lêi anô, Aku e têêng nôôq đu mađó đong gươl ưng Sa-taan, nek nôôq đu tư móón ađêi nek manưih Jo Thaaiq bơơi eh rau kơi achêk, palâh lóóiq, piđó chapiên nek dyơq praaq chachââr — Lêi tôôh, Aku e têêng piđó kơi đóng piđó e tơk lơq chakoh tarkól dhiq hót laloom dyung akóón, lơq piđó ve chóóm n'nal kakơi Aku nh'nhơr akóón. 10Taai akóón ơi jư paraaq kah tadhơ ưng Aku, hơq Aku e kung jư akóón tââq ganah klêêu lêi kanóq tơk dhiq plok hóng katiêk, đóng klêêu nôôq ngaai dyơq mamông dhiq katiêk. 11Aku dyơq bhral kơi đâh bhlơng. Phaai jư tamưng rau akóón ve đóng kah ngaai ve chóóm pei bil panơơng charnap ưng akóón. 12Manưih đu đươk lơh, Aku e têêng manưih achêk val xar tanól kalóóng đong bhanuôih ưng Yaang Pleng Aku. Manưih achêk e kah mơ ve gluh tââq ađek dyơq, lơq Aku e xaraq dhiq ađó dhanóók ưng Yaang Pleng Aku, achak kanóón ưng Yaang Pleng Aku (Jê-ru-sa-leem tame dhaluônh jaq tââq dhiq pleng, tââq Yaang Pleng ưng Aku), lơq dhanóók tame ưng Aku. 13Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq.”’

14Phaai xaraq đóng dhơn pleng ưng kabhuh akóón dhơn Chuôq dhiq Laau-đi-xê, kơi ađô:

‘Yaang A-meen, Manưih Truuih đaang huuiq lơq alua dhalam, Tââq Tarnââp rau tavaaih ưng Yaang Pleng praaq nô kơi: 15“Aku n'nal nôôq tarnêêng ưng akóón, kơi akóón kah chriêt, kung kah puih. Rââm hau akóón chriêt rabhi chriêt môôiq puih rabhi puih! 16Kơi ađek nek, taai akóón xa-ơr kah puih kung kah chriêt hơq Aku kiêng kata akóón gluh tââq bóóp Aku. 17Tââq akóón móón kơi ađô: "Aku karvaan, aku ơi xar vaaih xưa raai, lơq aku kah ve marau marâ kanóq kiêng," kơi ađek hơq akóón kah n'nal kơi akóón alua jarnah xarngaat, đaang nh'nhơr, ngeeo ha-ul, bhơơm kabaang lơq lalôh lalut. 18Aku pachóóm akóón kơl tư tââq Aku vaang ơi bâân tôk bơt kalóóng óih đóng akóón xar vaaih kavaan kabhôôq, kơl aau yaal bhóók chadhah đóng akóón xơp bơơi kah dyơq pakah gluh rau kachiit mat taai rau lalôh lalut ưng ađêi, lơq kơl janươu chalóóng mat đóng xut mat ưng akóón buôn đóng akóón chóóm bâân lêi. 19La nôôq ngaai đu Aku nh'nhơr, hơq Aku teng trêh lơq klôôq phaak. Nek hayơq, phaai bhơt lóóm lơq klôôq lóóm karnóq lơt aq. 20Lêi tôôh, Aku dyương dhiq palóng lơq takóq. La ngaai xâng dhariêng Aku lơq lóng palóng, hơq Aku e mót palơq manưih ađek, cha vaar palơq ađó, lơq ađó palơq Aku. 21Manưih đu đươk lơh, Aku e đóng manưih achêk tơơt palơq Aku dhiq tanơơt Aku, kơi Aku kung ơi đươk lơh lơq tơơt palơq Ama Aku dhiq tanơơt Ađó. 22Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq.”’”