Pakah Đóng Lêi 2

1Phaai xaraq đóng dhơn Pleng ưng kabhuh akóón dhơn Chuôq dhiq Ê-phê-sô kơi ađô:

‘Yaang kadhâng tapól beq chatur kalóóng têi atươm Ađó, nek Yaang jađaang vôôiq dhiq m'pơng tapól dyung dhơu palơq vaang, praaq nô kơi: 2“Aku n'nal nôôq tarnêêng têêng ưng akóón, gleh gleeng, palơq rau jarnah xarngaat đơơp jruôn ưng akóón, Aku kung n'nal kakơi akóón kah đuôh đơơp parngau đu aak, akóón ơi klêêu nôôq đu tư móón nek sưưq-đô bơơi piđó eh rau nek kơi achêk, lơq akóón ơi bâân n'nal piđó nek galơơk chachââr; 3akóón kung ve rau đơơp parngau, lơq ơi đơơp jarnah ơi taai dhanóók Aku hơq kah nhưh nhok. 4Dhơ kơi ađek, Aku ve rau jươm akóón, ađek nek akóón ơi lơơi tabil lóóm tanhơr tââq tarnââp ưng ađêi. 5Taai kơi achêk, phaai hei lóóiq ađêi ơi dhur lóóm huuiq n'đó tââq, phaai klôôq lóóm kanóq lơt lơq têêng nôôq tarnêêng tââq tarnââp. Dyơq la kah, Aku e tơk leq akóón lơq Aku e pei lơơi dyung dhơu ưng akóón tââq dham ađó — la akóón kah klôôq lóóm kanóq lơt. 6Bơơi akóón ve rau ađô, ađek nek akóón geet nôôq tarnêêng têêng ưng kabhuh Ni-kô-la, nek nôôq tarnêêng đu Aku kung geet. 7Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq. Palơq manưih đươk lơh, Aku e đóng manưih achêk cha pale gluh tââq n'lóóng đu mamông tơơt kalóóng Ba-ra-đi ưng Yaang Pleng.”’

8Phaai xaraq đóng dhơn pleng ưng kabhuh akóón dhơn Chuôq dhiq Si-miêk-nơ kơi ađô:

‘Yaang tââq tarnââp lơq tatun xariêq, Yaang ơi đơơp chêt lơq ơi mamông lóóiq, Ađó praaq nô kơi: 9“Aku n'nal rau hadhơơp jarnah ưng akóón lơq rau ngeeo hadhơơp dhiq akóón (bơơi palâh lóóiq, akóón dyơq kavaan kabhôôq), palơq paraaq baauq uôn bhral tââq nôôq đu móón chênh piđó nek manưih Jo Thaaiq bơơi piđó eh rau, bơơi nek đong gươl ưng Sa-taan. 10Óóq kapơn marau marâ palơq nôôq rau đu akóón ravang phaai jruôn. Lêi tôôh, abhưi ravang król masôôq manưih kalóóng nôôq akóón mót đong kanam lơơi đóng nôôq akóón bâân klêêu lêi, lơq nôôq akóón e đơơp jarnah xarngaat kalóóng majêt tangêi. Phaai bhơt lóóm patơk chêt, hayơq Aku e đóng leq akóón panơơng charnap ưng parmông. 11Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq. Manưih đươk lơh e kah mơ ve bâân jarnah tââq akan chêt đu bơơr.”’

12Phaai xaraq đóng dhơn pleng ưng kabhuh akóón dhơn Chuôq dhiq Beet-gam kơi ađô:

‘Yaang ve pala bhươt bơơr pla xaan lơp praaq nô kơi: 13“Aku n'nal dhiq akóón mamông dhiq ađek nek tanơơt ưng Sa-taan, hơq akóón ơi kadhâng tamưng dhanóók Aku, lơq kah dyiin lơơi lóóm huuiq dhiq Aku, pamơ kalóóng nôôq tangêi ưng An-ti-ba, manưih truuih ưng Aku, manưih bhơt lóóm palơq Aku, nek manưih bâân taleng chêt toom mat nôôq akóón, dhiq đu Sa-taan jaq tơơt. 14Dhơ kơi ađek, Aku ve bơơr pe rau jươm akóón, achêk nek dhiq ađek, akóón ve nôôq đu pei dyuôch paraaq pachóóm ưng Ba-la-aam, nek đu ơi pachóóm Ba-laak patơơt khuk dhơl têêng n'đóih dyung toom mat akóón anaaq I-sơ-ra-êên đóng cha ađô bhanuôih leq yaang kabhêi lơq têêng chiên taniêt tapiing. 15Ting kơi dharing kơi ađek, akóón kung ve nôôq đu pei dyuôch paraaq parchóóm ưng kabhuh Ni-kô-la. 16Kơi ađek hơq, phaai klôôq lóóm kanóq lơt! Dyơq la kah, Aku e đâh bhlơng tơk leq akóón, lơq e tarvei tarjơl jaklâk palơq piđó palơq pala bhươt ưng bóóp Aku. 17Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq. Palơq manưih đươk lơh, Aku e đóng leq ađó ma-na kadrêi lââp, lơq Aku e đóng leq ađó mưi kaliêng dhơl bhóók hơq dhiq kaliêng dhơl achêk, mưi dhanóók tame ơi bâân xaraq, nek dhanóók đu kah ngaai n'nal lơh tââq manưih bâân đơơp ađó.”’

18Phaai xaraq đóng dhơn pleng ưng kabhuh akóón dhơn Chuôq dhiq Thi-a-ti-rơ kơi ađô:

‘Akóón Yaang Pleng, Yaang ve mat kơi par-aang óih lơq dyung kơi kóng tabah chalóng, praaq nô kơi: 19“Aku n'nal nôôq tarnêêng ưng akóón, lóóm tanhơr, lóóm huuiq, rau yaauq têêng, palơq lóóm mưng chaq kah tadhơ ưng akóón, lơq nôôq tarnêêng têêng ưng akóón tabhêêl nh'chró dyơq grơơt lơh nôôq tarnêêng xók n'loom. 20Bơơi Aku ve rau ađô jươm akóón, ađek nek akóón dyơq patui đóng kamór Jê-sa-bêên, đu tư móón ađêi nek pađiil đââng taruuih, lơq ađó pachóóm pahêêl palơq galơơk chachââr nôôq dhơn ratơơq ưng Aku têêng lơt taniêt tapiing lơq cha ađô bhanuôih yaang kabhêi. 21Aku ơi đóng ađó tangêi kaxe đóng ađó ve bâân klôôq lóóm kanóq lơt, bơơi ađó kah kiêng klôôq lóóm kanóq lơt leq rau taniêt tapiing ưng ađêi. 22Phaai lêi nô! Aku e m'peq ađó bêch arươp dharââng, lơq nôôq đu kung têêng lơt tapiing taniêt palơq ađó mót rau bhrê hư gamak, la piđó kah klôôq lóóm kanóq lơt leq nôôq tarnêêng têêng ưng ađó. 23Aku e m'bhiiq nôôq akóón anaaq ađó palơq kan chêt, hayơq tabhơt nôôq kabhuh akóón dhơn Chuôq e n'nal kơi Aku nek Yaang chamet lêi luônh lóóm, lơq Aku e đóng leq dyóp chanak kalóóng nôôq akóón mak mơ nôôq tarnêêng têêng ưng nôôq akóón. 24Bơơi Aku praaq palơq nôôq akóón sôôq dyơq lóóiq kalóóng nôôq manưih dhiq Thi-a-ti-rơ, la ngaai kah ting jư paraaq parchóóm achêk, hơq nek nôôq manưih kah n'nal nôôq tarnêêng lalââp dhơuq ưng Sa-taan, kơi masôôq đu đóók klóóih Aku kah tabóq n'đó ganưi haleng lââng dhiq nôôq akóón. 25Dhơ kơi ađek phaai pei jư tamưng nôôq rau ađêi ve patơk n'đó xók Aku bhral.

26Palơq manưih đươk lơh lơq bhiêk pei jư nôôq tarnêêng têêng ưng Aku patơk tatun xariêq, hơq Aku e đóng leq manưih achêk mataai raman dhiq nôôq katiêk.

27"Manưih ađek e kadhâng koq piđó palơq mưi beq tarlââng bhaxêi,

pakơi nôôq ajraai katiêk tet ơi m'bhiiq bhriq lêêk,"

28kung kơi Aku ơi bâân đơơp mataai raman tââq Ama Aku, hơq Aku e đóng leq manưih ađek m'beq chatur yayóng. 29Ngaai ve katór, phaai xâng paraaq Yaang Liêm praaq palơq nôôq kabhuh akóón dhơn Chuôq.”’