Pakah Đóng Lêi 1

1Rau tapakah ưng Jê-su Chuôq Paq Manưih đu Yaang Pleng ơi đóng leq Ađó buôn chaleq đóng nôôq dhơn ratơơq Ađó nôôq rau phaai avaaih tơk kơi đâh bhlơng. Ađó ơi pakah, lơh xók n'nal tââq dhơn pleng ưng Ađó pagơơi tơk leq Jang, dhơn ratơơq ưng Ađó, 2nek manưih ơi truuih đuui leq paraaq ưng Yaang Pleng lơq paraaq truuih ưng Jê-su Chuôq Paq Manưih, nek dyóp rau ađó ơi lêi xâng. 3Phươk đóng manưih đok lơq manưih xâng nôôq paraaq ưng bha-aar manưih đââng taruuih ađô, dhơ kơi ađek huuiq jư nôôq rau ơi bâân xaraq kalóóng ađek, taai tangêi kaxe đan aq.

4Jang pagơơi đóng tapól Kabhuh Akóón Dhơn Chuôq dhiq xưưq A-si: Rââm adhi anó bâân ơơn phươk liêm palơq yươq rauha tââq Yaang ađôk ve, ơi ve, lơq dyơq tơk, kung kơi tââq tapól yaang toom tanơơt ưng Ađó, 5lơq tââq Jê-su Chuôq Paq Manưih, nek Manưih Truuih Kah Tadhơ, Yaang n'niên laloom tââm tââq akan chêt, lơq Yaang kadhâng koq nôôq bhua dhiq katiêk. Malóóm leq Yaang nh'nhơr nôôq he, ơi jóói paloh nôôq he tââq matu lơt ưng nôôq he tââq haam Ađó, 6lơq Ađó ơi têêng nôôq he vaaih mưi katiêk, xar kơi nôôq takóh kadhâng bhanuôih đóng Yaang Pleng, Ama ưng Ađó, nhan cha-iil tabah lơq mataai raman chô leq Ađó patơk nh'chró. A-meen!

7Lêi tôôh, Ađó bhral kung palơq nôôq garboq dhaluk;

lơq dyóp mat e chaling lêi Ađó,

tabhơt lơq nôôq đu ơi tak Ađó,

hayơq dyóp dhanuôr manưih dhiq katiêk e kalau nhiim ơi taai Ađó.

Dhalam kơi achêk, A-meen!

8Chuôq nek Yaang Pleng praaq: “Aku nek An-pha lơq Ô-mê-ga, Yaang ađôk ve, ơi ve, lơq dyơq bhral, Yaang Bhơt Mataai Têêng Koq.”

9Aku nek Jang, manưih adhi anó lơq manưih ting paak blah palơq adhi anó leq rau hadhơơp jarnah, katiêk karuung, lơq rau jarnah xarngaat đơơp jruôn kalóóng Chuôq Jê-su, aku tơơt dhiq m'beq kôông bâân đóók nek Baat-mô ơi taai paraaq ưng Yaang Pleng lơq paraaq taruuih ưng Chuôq Jê-su. 10Mót tangêi ưng Chuôq, aku tơơt kalóóng Yaang Liêm, lơq aku xâng hót hóng ađêi mưi dhariêng praaq karơ kơi dhariêng karyóól, 11kơi ađô: “Phaai xaraq leq panuôl bha-aar nôôq rau akóón lêi lơq pagơơi tơk tapól kabhuh Akóón Dhơn Chuôq, đóng Ê-phê-sô, Si-miêk-nơ, Beet-gam, Thi-a-ti-rơ, Saat-đe, Phi-la-đeen-phi, lơq Laau-đi-xê.” 12Aku palâh lóóiq buôn lêi dhariêng đu biêh dyơq praaq palơq ađêi, hayơq xong xók palâh lóóiq, aku chalaang lêi tapól dyung dhơu palơq vaang, 13lơq tơơt dhiq m'pơng nôôq dyung dhơu ve Yaang thê kơi Akóón Manưih, xơp aau yaal tơk dyung, kung palơq mưi beq xaneet palơq vaang bâân xeet dhiq tadhưa. 14Akoq lơq xok ưng Ađó nek bhóók pakơi xok trưưu, bhóók kơi dhaluk ng'koq, mat Ađó hayơq nek thê par-aang óih, 15dyung Ađó pakơi kóng tabah chalóng, kơi ơi bâân tôk bơt kalóóng bóng óih, dhariêng Ađó thê kơi dhariêng ưng bơk jarhu đơơk, 16ve tapól beq chatur dhiq têi atươm ưng Ađó, lơq mưi pala bhươt bơơr pla xaan lơp gluh tââq bóóp Ađó, dyơq mat Ađó nek kơi mat tangêi cha-iil chadhóng xók ađó klaaq brương bhơt brương. 17Xók aku lêi Ađó, aku tampoh dhiq dyung Ađó kơi manưih chêt, hayơq Ađó kadhâng têi atươm ưng Ađó dhiq aku, praaq: “Óóq kapơn. Aku nek Yaang tââq tarnââp lơq tatun xariêq, 18kung nek Yaang taluôn mamông. Aku ơi đơơp chêt, lơq lêi nô, Aku mamông patơk nh'chró kah bil! Aku kadhâng kaliêng kliêng ưng akan chêt lơq bóng maraaih. 19Taai kơi achêk, phaai xaraq lóóiq nôôq rau akóón ơi lêi, nôôq tarnêêng ađôk ve lơq nôôq rau ravang vaaih tơk lơh nôôq tarnêêng ađô. 20Ađôk nek kadrêi lââp ưng tapól beq chatur đu akóón ơi lêi kalóóng têi tươm ưng Aku, palơq tapól dyung dhơu vaang: Tapól beq chatur nek nôôq dhơn pleng ưng tapól kabhuh Akóón Dhơn Chuôq, lơq tapól dyung dhơu nek tapól kabhuh Akóón Dhơn Chuôq.