Katu Bible Literal Text
Ju-đe 1
Ju-đe, dhơn ratơơq ưng Jê-su Chuôq Paq Manưih lơq adhi padruuih ưng Ja-kơ, pagơơi đóng nôôq manưih bâân dhaloong kayua, nek đóng nôôq manưih bâân nh'nhơr bơk bhlơng kalóóng Yaang Pleng, nek Ama, lơq bâân jư lêi kalóóng Jê-su Chuôq Paq Manưih: Rââm nhan lóóm kayô ka-er lơq yươq rauha palơq lóóm tanhơr bâân grơơt bơk lơh đóng adhi anó.
Adhi anó bơk nh'nhơr ơơi, dyơq xók pei n'dróh dyóp praan karơ đóng xaraq đóng adhi anó leq rau paq jóói pachung ưng nôôq he, aku lêi rau kiêng phaai xaraq đóng adhi anó, pahêêl chut adhi anó tarjơl jeng đóng lóóm huuiq, nek rau ơi bâân pajaau đóng mưi chu dyóp aq đóng nôôq manưih huuiq liêm. Taai mưi phơn manưih ơi tông karluk mót leq m'pơng adhi anó, nôôq manưih tââq đươnh ơi bâân kanóq loom đóng rau xêi janah ađô, nôôq manưih kah huuiq raxal ơơn phươk liêm ưng Yaang Pleng nôôq he xar rau hư huông, kah pei huuiq Yaang Kala Mataai chapiên mưi lơq Chuôq nôôq he nek Jê-su Chuôq Paq Manưih.
Dhơ adhi anó ơi n'nal dyóp rau chiên mưi chu nek dyóp, aku kiêng pahei adhi anó kơi Chuôq Jê-su, xók ơi paq mưi dhanuôr gluh tââq katiêk Ai Kơp, hayơq xong ađek, Ađó ơi leng kaxiêt nôôq manưih kah huuiq. Kung kơi palơq nôôq dhơn Yaang Pleng, nek nôôq chanak ơi kah jư tarnêêng parvôôiq kataai karơ ưng chênh piđó, bơơi m'peq lơơi dham tơơt chô leq ađêi, hơq Ađó ơi kadhâng jư piđó kalóóng tarlêi xiêng tơk nh'chró, dhiq dham kanam kajók, koom đóng rau praaq xêi kalóóng tangêi bhơt gamak. Thê kơi Sô-đôôm lơq Gô-mô-rơ palơq nôôq kanóón parah tóór piđó, kung têêng lơt kơi bơơr kanóón tôôh, ơi lơơi ađêi leq rau tapiing taniêt lơq ơi mut tapun malóóch kiêng manưih ti n'tua lơq kaxu, Piđó bâân đươi têêng babi phaai đơơp janah palơq óih nh'chró. Dhơ kơi ađek, kung makơi achêk, nôôq manưih rachôh rachôônh ađô eh mơ têêng panhuq achak araang ađêi, bơơi piđó kung kah lêi nôôq yaang ve kataai karơ kah rauriq, val dyơq paraaq tamôôp nôôq yaang cha-iil tabah. Palâh lóóiq, Mi-chêên dhơn pleng taha, bhêêl xók tarjeng palơq abhưi, tarkaai leq xaak ưng Môôi-se, ađó achêk ơi kah khin pagluh paraaq praaq xêi ve lóóm praaq tamôôp đóng pagluh jaklâk leq ađó. Klóóih dhiq ađek, chanak dhơn pleng ơi praaq: “Rââm Chuôq trêh teng amei!” Bơơi kabhuh ađô praaq tamôôp mak kơi dhơ dharau piđó kah n'nal, dyơq tabhơt nôôq rau piđó n'nal ting lóóm kanóq kơi achim adhah kah n'nal rarau, nek piđó val bâân nôôq rau ađek pahư tabil. Ayô xarngaat đóng piđó! Taai piđó ơi tư vôôiq leq kalơng ưng Ka-iin, piđó ơi tư ruul mót têêng lơt ưng Ba-la-aam taai malơơi malôk, lơq piđó ơi bâân chêt bhơt kalóóng rau panhôôn panhaauq ưng Kô-rê. Kabhuh ađô nek nôôq manưih kalóóng nôôq bhiêk đaam tanhơr ưng adhi anó, kơi nôôq dhơl chrôh chrah kalóóng klong, ơm cha pa-iêm lơq adhi anó kơi kah n'nal rau kachiit, chapiên gamang ban paar ađêi; kabhuh ađek nek nôôq garboq dhaluk kah ve đơơk, bâân adhiiq đââng vôôiq; nek nôôq n'lóóng nil hapruôt kah ve pale, ơi chêt bơơr chu, taai bâân yuur rôôq tơk riêh; nek nôôq garnhuh ga-uul n'dhươi dhiq taxiiq, kaju tarpô pakah nôôq tarnêêng kachiit ưng ađêi; nek nôôq chatur lóóng chuul vuul hơq bóng kanam dhaluk dhangeng ơi bâân koom lơơi đóng piđó tơk nh'chró. Mat lââng, Hê-nok, chachau klaang đu tapól truuih tââq A-đaam, kung ơi praaq đââng taruuih leq kabhuh ađô, kơi ađô: “Nek lêi tôôh! Chuôq bhral lơq kaaq bhaan manưih huuiq liêm ưng Ađó, đóng têêng tarnêêng rau praaq xêi palơq dyóp ngaai, đóng xêi matu lơt ting ravaai leq tabhơt nôôq tarnêêng kah charnap ưng piđó, hơq nek nôôq rau đu piđó ơi têêng kơi kah charnap, lơq leq dyóp paraaq bil charnap đu nôôq manưih matu kah bhi chap ơi praaq huông palơq Ađó.” Kabhuh ađô nek nôôq manưih mabóóp pabhuk, nôôq manưih pambhoonh, vôôiq ting nôôq lóóm kiêng ưng ađêi, lơq bóóp n'taak piđó yuur praaq nôôq paraaq parlaach pajơơr, praaq paxơơk manưih lââng taai tabâân kamuuch malơơi.
Bơơi adhi anó, nôôq manưih bâân bơk nh'nhơr ơơi, phaai hei nôôq paraaq ơi bâân praaq laloom ahei tââq nôôq sưưq-đô ưng Chuôq nôôq he, nek Jê-su Chuôq Paq Manưih, kơi piđó ơi praaq palơq adhi anó: “Kalóóng ganah tatun xariêq e ve nôôq manưih ajóóch paxê ting vôôiq nôôq lóóm kiêng kah charnap ưng ađêi.” Kabhuh ađô chênh nek nôôq manưih tavaaih tablah; lóóm kanóq kơi achim adhah, kah ve Yaang Liêm. Bơơi adhi anó, nôôq manưih bâân bơk nh'nhơr ơơi, palơq tarnêêng tư hayuur kadhơng dhiq bhanơn lóóm huuiq bhơt liêm ưng ađêi, tââq Chuôq Yaang Liêm hơq gavơh nhan. Phaai jư ađêi kalóóng lóóm tanhơr ưng Yaang Pleng, xók đương rââm ơơn ayô ka-er ưng Chuôq nôôq he, nek Jê-su Chuôq Paq Manưih, đóng tơk rau parmông nh'chró. Hót tóór ađek, phaai ayô ka-er nôôq ngaai xók bâân paang-ra, hayơq nôôq manưih tôôh, phaai paq jóói, galôôi gluh tââq óih, lơq palơq nôôq manưih atêêh, nek kayô ka-er đââng palơq rau kakhin kapơn, tơk mơ geet lơơi m'beq aau ơi bâân dham anhuq tââq manưih ti.
Nhan Yaang ve mataai raman jư lêi adhi anó yươq n'đóih kalơm, lơq têêng adhi anó dyương mưng kalóóng rau bhuui marhaal tơơt toom cha-iil tabah kah madham madhôôn ưng Yaang Pleng, rââm cha-iil tabah, ma-um, praan karơ, lơq mataai karơ chô ưng Yaang Pleng chapiên mưi, Chuôq Paq ưng nôôq he, tââq Jê-su Chuôq Paq Manưih, Chuôq nôôq he, tââq klaang đơơi n'loom, xók đôk lơq đóng tơk bhluuch klaang nh'chró. A-meen.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.