3 Jang 1

1Takóh bhươl pagơơi đóng Gaai-uut nh'nhơr bơk, manưih đu aku nh'nhơr kalóóng paraaq dhalam.

2Anó aku nh'nhơr, kalóóng dyóp rau, aku gavơh nhan đóng amei bâân karvaan kabhôôq, tơk mơ ve phơn achak mamông karơ dhiêp kơi phơn ravaai amei dyơq bâân karvaan kabhôôq. 3Taai aku lóng tagah bhuui marhaal xók nôôq adhi anó tơk lơq truuih đuui rau lalua leq amei, ting pakơi amei biêh dyơq jađaang vôôiq kalóóng paraaq dhalam. 4Aku kah ve lóóm bhuui n'đó gamak lơh nôôq rau ađô, ađek nek aku ve bâân xâng akóón anaaq ưng ađêi dyơq jađaang vôôiq kalóóng paraaq dhalam.

5Anó aku nh'nhơr, amei dyơq matêêng kalóóng lóóm huuiq dhơ dharau đu amei ve chóóm têêng đóng nôôq adhi anó, tơk mơ rau ađek đóng nôôq tamóói chrih, 6nek nôôq manưih ơi truuih đuui leq lóóm tanhơr ưng amei toom mat akóón dhơn Chuôq. Amei e têêng kơi bhơt lóóm xók ting chalaang piđó yuur vôôiq ting kơi targlap palơq Yaang Pleng, 7tââq piđó ơi yuur vôôiq taai Dhanóók achêk, xók kah đơơp marau marâ tââq nôôq dhanuôr katiêk lââng. 8Hayơq nôôq he kơng phaai pơh yaauq nôôq manưih kơi achêk, đóng nôôq he xar vaaih nôôq manưih ting têêng tarnêêng đóng paraaq dhalam.

9Aku ơi xaraq bơơr pe paraaq đóng akóón dhơn Chuôq, bơơi Đi-ô-treep, đu kiêng têêng akoq dyóp ngaai, kah đơơp đươi nôôq yi. 10Ơi taai rau ađô, la aku tơk, aku e chamet lêi nôôq tarnêêng ưng ađó ađek đu ađó ađek dyơq têêng xók baauq uôn nôôq yi palơq nôôq paraaq aak môôp. Lơq xók biêh kah ơi iêm lóóm palơq nôôq tarnêêng ađek, ađó achêk kah đơơp pơh yaauq nôôq adhi anó, hayơq ađó ađek kung gróóng kajơq nôôq ngaai ve lóóm pơh yaauq lơq chuih piđó gluh tââq akóón dhơn Chuôq. 11Anó aku nh'nhơr, óóq ting đuui rau môôp, bơơi phaai ting đuui rau liêm. Ngaai têêng liêm nek mađó leq Yaang Pleng; đu têêng môôp nek kah ơi glêh lêi Yaang Pleng. 12Đê-mê-triiu bâân paraaq truuih liêm tââq dyóp ngaai manưih lơq tââq chênh paraaq dhalam. Mat lââng, nôôq yi kung truuih đuui dyơq, lơq amei n'nal kơi paraaq truuih ưng nôôq yi nek rau lalua.

13Aku ve bơk rau kiêng xaraq đóng amei, bơơi aku kah kiêng pei mưk lơq kabhiêk đóng xaraq leq amei. 14Bơơi aku rââm đâh tarlum amei, lơq nôôq he e praaq chiên mat talêi mat. 15Nhan rau yươq rauha tơơt palơq amei. Nôôq parjơơk dhiq ađô tamóh tham amei. Nhan pagơơi paraaq tamóh tham nôôq parjơơk dhiq ađek chanót ting chanak manưih.