Katu Bible Literal Text
Pakah Đóng Lêi 6
Hayơq aku chalaang lêi xók Trưưu Akóón plók mưi kalóóng tapól kanal let kiêr, lơq aku xâng mưi kalóóng puôn panong akóón adhah praaq kơi dhariêng grơm kaglư, kơi ađô: “Phaai bhral!” Kơi ađek nek, aku chalaang lêi lơq tôôh mưi panong axeh bhóók! Manưih dhââng m'piing axeh achêk ve mưi beq panenh, lơq bâân đóng mưi panơơng charnap leq ađó, hayơq manưih achêk gluh đuôh jeng đóng đươk lơh.
Xók Trưưu Akóón plók kanal let kiêr đu bơơr, aku xâng akóón adhah đu bơơr yua: “Phaai bhral!” Kơi ađek nek mưi panong axeh lââng tabhral, parhóm bhrôông kơi óih. Palơq manưih dhââng m'piing axeh ađô nek ơi bâân đóng leq ađêi kataai pei lơơi khe liêm tââq katiêk, đóng palââng e tartak tarleng xóng ađêi, lơq mưi pala bhươt lóng gamak ơi bâân đóng leq manưih achêk.
Xók Trưưu Akóón plók kanal let kiêr đu pe, Aku xâng panong akóón adhah đu pe praaq: “Phaai bhral!” Kơi ađek nek aku chalaang lêi lơq tôôh, mưi panong axeh tam, lơq manưih dhââng m'piing axeh ađô ve mưi beq kanơng dhiq têi ađêi. Hayơq aku xâng kơi ve dhariêng dhiq m'pơng puôn panong akóón adhah, kơi ađô: “Mưi arê aviq mi palơq mưi đơ-ni-ê; pe arê aviq met palơq mưi đơ-ni-ê. Lơq óóq têêng ramuôh pahư dhơu lơq buôh.”
Xók Trưưu Akóón plók kanal let kiêr đu puôn, aku xâng dhariêng ưng akóón adhah đu puôn praaq: “Phaai bhral!” Kơi ađek nek aku chalaang lêi lơq tôôh, mưi panong axeh taviêng mlaang. Manưih dhââng m'piing axeh ađô chak ađó nek “Akan Chêt”, lơq bóng maraaih ting vôôiq tapun hóng ađó. Mataai Raman dhiq m'piing mưi phơn puôn mat katiêk ơi bâân đóng leq piđó, đóng leng đet palơq bhươt chabhaam, ha-ul kró, ka-ai parluh, lơq tââq nôôq adhah booiq dhiq katiêk.
Xók Trưưu Akóón plók kanal let kiêr đu xââng, aku lêi karum baang bhanuôih ravaai ưng nôôq manưih ơi bâân taleng taai paraaq ưng Yaang Pleng lơq taai paraaq truuih đu piđó ơi jư. Piđó mandrươh dhariêng dhaloong karơ kơi ađô: “Kakoh Yaang Kala Bhơt, Yaang tabah liêm lơq dhalam lalua, patơk n'đó bhêêl đu Amei biêh kah ơi xêi lơt lơq chróót bharang đóng ahaam ưng nôôq akóón tââq nôôq đu dyơq mamông dhiq katiêk?” Hayơq ting chanak kalóóng piđó bâân đóng mưi aau yaal bhóók, lơq piđó bâân kayua kơi piđó biêh kơng đương lêi m'bưưiq đươnh dyơq patơk xók bâân dyóp sôôq nôôq parjơơk marau tarnêêng ưng piđó lơq nôôq adhi anó ưng piđó nek nôôq manưih ravang bâân taleng chêt, kung thê kơi piđó.
Xók Trưưu Akóón plók kanal let kiêr đu chapat, aku yaam lêi lơq ve mưi dharơp dha-ơr katiêk gamak, hayơq mat tangêi vaaih xar kanam kanheet kơi aau bhaai ramaanh palơq xok adhah, dyơq tabhơt mat bharương nek val xar thê kơi ahaam, lơq nôôq chatur xamenh dhiq pleng n'tôq leq katiêk, dhiêp kơi n'lóóng tarung rung pale taviêng ưng ađó xók bâân adhiiq gamak ng'kơr ganhưk. Talaang pleng bil tich kơi mưi panuôl bha-aar bâân tapuôl lóóiq lơq dyóp bôôl kakóóng palơq kôông taxiiq maar bâân patââi tââq dham ưng piđó. Hayơq nôôq bhua dhiq katiêk palơq nôôq kuôn gamak, nôôq takóh linh, kabhuh đong karvaan, kabhuh têêng kala, lơq dyóp manưih têêng xól lơq manưih rathaai, maar kadrêi ađêi klôôn kalóóng nôôq gơơp bóng lơq dhiq m'pơng nôôq bhangôh dhơl dhiq nôôq bôôl kakóóng; piđó móón palơq nôôq bôôl kakóóng lơq nôôq bhangôh dhơl: “Phaai hakơh leq m'piing nôôq yi lơq kadrêi palââp nôôq yi tââq mat ưng Yaang tơơt dhiq tanơơt lơq tââq ganơt pagrâ jar-ââih ưng Trưưu Akóón, taai tangêi garâ ja-ââih gamak ưng nôôq Yaang achêk ơi bhral, hơq ngaai ve chóóm đuôh jruôn?”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.