Pakah Đóng Lêi 14

1Hayơq aku chalaang lêi, lơq tôôh, Trưưu Akóón dyương dhiq kakóóng Si-ôôn, lơq kung palơq Ađó nek mưi hariêng puôn jêt puôn ngaan ve dhanóók Ađó lơq dhanóók Ama Ađó bâân xaraq dhiq maang ưng piđó. 2Lơq aku xâng dhariêng praaq tââq têêh pleng kơi dhariêng ra-uul ưng bơk jarhu đơơk, kơi dhariêng grơm karơ, lơq dhariêng aku ơi xâng nek thê kơi nôôq manưih chóóm peh tambhreh haak ađêi. 3Piđó babóóch mưi guôp bhanóóch tame toom tanơơt lơq toom puôn panong akóón adhah palơq nôôq takóh bhươl, hơq kah ngaai ve chóóm hok n'nal guôp babóóch ađek lơh tââq mưi hariêng puôn jêt puôn ngaan manưih ơi bâân pók kơl tư tââq hóng katiêk. 4Ađôk nek nôôq manưih kah ơi glêh anhuq palơq pađiil, taai piđó nek nôôq manưih sek se. Ađôk nek nôôq manưih vôôiq ting Trưưu Akóón n'đó leq đu Ađó vôôiq. Nôôq manưih ađô ơi bâân pók tââq m'pơng akóón manưih kơi pale tââp bóóng đóng Yaang Pleng lơq đóng Trưưu Akóón, 5kah paraaq galơơk chachââr n'đó bâân lêi tââq bóóp piđó, taai piđó kah ve dham dhôôn.

6Hayơq aku lêi mưi dhơn pleng lââng par dhiq m'pơng pleng, ve taruuih liêm nh'chró đóng truuih praaq leq dhanuôr tơơt dhiq katiêk — patơk mơ đóng dyóp katiêk karuung, dhong nooi, rau dhariêng lơq dhanuôr manưih — 7dhaloong karơ dhariêng: “Phaai bhi kakhin Yaang Pleng lơq tapôông cha-iil tabah đóng Ađó. Taai tangêi xêi lơt ưng Ađó ơi tơk. Phaai bhuôih kakoh Yaang têêng tavaaih pleng, katiêk, taxiiq lơq nôôq tóm đơơk.”

8Mưi chanak lââng, dhơn pleng đu bơơr, tapun hóng, praaq kơi ađô: “Ađó preh hachươp aq, Ba-bi-lôôn gamak ơi preh hachươp, hơq nek đu paxuq chut tabhơt nôôq katiêk ơm tư tââq buôh pagrâ leq rau tapiing taniêt ưng ađó.”

9Mưi dhơn pleng lââng, chanak đu pe, tapun hóng piđó, praaq karơ dhariêng, kơi ađô: “La ngaai đu bhuôih kakoh akóón adhah palơq a-ô kabhêi ađó, lơq đơơp kanal dhiq maang hamôôiq dhiq têi ađêi, 10hơq manưih ađek kung e ơm buôh pagrâ ưng Yaang Pleng, nek rau buôh kah klaai tóóng leq choom grâ jar-ââih ưng Ađó, lơq manưih ađek e bâân chanaaq janah palơq óih lơq lưưu hunh toom mat nôôq dhơn pleng liêm lơq toom mat Trưưu Akóón. 11Gayươk tââq dham jarnah achak ưng piđó yuur par patơk nh'chró, taluôn luôn, lơq piđó kah ve rau dhêi drơq xók tangêi lơq xók hayum, nek nôôq đu bhuôih kakoh akóón adhah palơq a-ô kabhêi ađó, lơq ngaai đu pei đơơp kanal achak ưng ađó. 12Ađôk nek rau jarnah xarngaat đơơp jruôn ưng nôôq manưih đu huuiq, nôôq manưih huuiq jư nôôq gani pachóóm ưng Yaang Pleng lơq lóóm huuiq dhiq Chuôq Jê-su.”

13Aku xâng dhariêng praaq tââq pleng, kơi ađô: “Phaai xaraq: Tââq ađôk leq tabhêêl, phươk đóng manưih chêt nek manưih chêt kalóóng Chuôq.” Yaang Liêm praaq: “Alua, đóng piđó e dhêi drơq tââq nôôq têêng nhưh ưng ađêi, taai nôôq tarnêêng ưng piđó tapun hóng kung palơq piđó.”

14Hayơq aku chalaang lêi, lơq tôôh, mưi garboq dhaluk bhóók, lơq tơơt dhiq dhaluk nek ngaai ađek thê Akóón Manưih, ve panơơng charnap palơq vaang dhiq akoq Ađó, lơq mưi beq ganat lơp dhiq têi Ađó. 15Hayơq mưi dhơn pleng lââng yuur gluh tââq đong bhanuôih, karơ dhariêng dhaloong Yaang dyơq tơơt dhiq dhaluk: “Nhan đóng ganat Amei gluh lơq gat, taai ganah nil đóng gat ơi tơk taai nil aviq dhiq hóng katiêk ơi kriing.” 16Kơi ađek nek Yaang tơơt dhiq dhaluk havơng ganat Ađó dhiq katiêk, lơq katiêk bâân tagat.

17Hayơq mưi dhơn pleng lââng yuur gluh tââq đong bhanuôih m'piing pleng; ađó ađô kung ve mưi beq ganat lơp. 18Mưi dhơn pleng lââng dyơq, nek chanak ve têêng mataai m'piing óih, gluh tââq baang bhanuôih, lơq ađó karơ dhariêng dhaloong chanak ve m'beq ganat lơp, kơi ađô: “Phaai pađơơp ganat lơp ađêi gluh lơq gat peh nôôq m'bhô nho tââq nôôq tââm nho dhiq katiêk, taai nôôq m'bhô nho ưng piđó ơi đóm.” 19Kơi ađek nek chanak dhơn pleng havơng ganat ađêi leq katiêk lơq gat peh bhươn nho dhiq katiêk, hayơq m'peq leq goq galiq nho gamak ưng garnhuh pagrâ ưng Yaang Pleng. 20Goq galiq nho bâân đâq hót nguôi kanóón lơq ahaam kalóóng goq galiq achêk yuur tantoh yaal tơk janoom axeh, yaal mưi ngaan chapat hariêng êt-ta-đơ.