Skip to content
BibleKenya

Katu Bible Literal Text

Pakah Đóng Lêi 13

Xong tơk, aku lêi mưi panong adhah yuur gluh tââq taxiiq, ve majêt tagê lơq tapól akoq lơq dhiq nôôq tagê ưng ađó nek majêt beq panơơng charnap, hơq m'piing nôôq akoq ưng ađó mưi dhanóók praaq chôlô. Akóón adhah đu aku lêi nek thê kơi akóón m'bhiêng, tapaang dyung ưng ađó thê kơi ưng jarươm, dyơq bóóp ađó nek thê bóóp sư tư, lơq akóón karông pajaau praan karơ ađêi đóng ađó, kung palơq tanơơt ađêi lơq têêng kala gamak bhlơng. Mưi kalóóng nôôq akoq ưng ađó kơi ngóq ơi glêh bâân m'bhiiq leng tơk chêt, bơơi dham bhrê ngơn bhlơng ưng ađó ơi bâân payươh. Bhơt katiêk maar driim bhi hơq vôôiq ting akóón adhah, lơq palââng bhuôih kakoh akóón karông taai ađó ơi đóng mataai raman leq akóón adhah, piđó kung bhuôih kakoh akóón adhah, kơi ađô: “Ngaai thê kơi akóón adhah lơq ngaai ve chóóm tarjeng tarvei jaklâk lóóiq ađó đuôh?” Mưi beq bóóp praaq paraaq parlaach lơq praaq chôlô bâân đóng leq akóón adhah, mataai raman kung bâân đóng leq ađó đóng praaq têêng kalóóng puôn jêt bơơr kaxe. Kơi ađek nek, akóón adhah pơơh bóóp ađó praaq nôôq paraaq tamôôp jơl jaklâk Yaang Pleng, praaq paxê dhanóók Ađó lơq đong bhanuôih pađơ ưng Ađó — nôôq manưih tơơt mamông m'piing pleng. Akóón adhah bâân pheep tavaaih tarvei palơq nôôq đu huuiq lơq đươk lơh piđó, mataai raman kung bâân đóng leq ađó dhiq dyóp dhong nooi, dhanuôr manưih, dhariêng paraaq lơq katiêk karuung. Dyóp dhanuôr manưih dhiq katiêk e bhuôih kakoh ađó, nek dhơ dhangaai hơq achak ưng manưih achêk ơi kah bâân xaraq kalóóng Bha-aar Parmông ưng Trưưu Akóón, Yaang ơi bâân taleng, tââq xók tââp tavaaih hóng katiêk. La ngaai ve katór, nek phaai xâng.

La ngaai bâân kóóp đââng katiêk lââng,

manưih ađek alua phaai vôôiq kalơng ađô,

la ngaai e bâân taleng palơq bhươt kóóih,

manưih ađek phaai bâân taleng palơq bhươt kóóih.

Ađôk nek rau jarnah đơơp juôn lơq lóóm huuiq ưng nôôq đu huuiq.

Hayơq aku lêi mưi akóón adhah lââng dharơ yuur tââq katiêk, lơq ađó ve bơơr tagê thê kơi akóón trưưu nhuum, hơq ađó praaq têêng kơi akóón karông. Ađó n'dróh vech dyóp mataai raman ưng akóón adhah đu tarnââp toom mat akóón adhah achêk, lơq ađó yuur têêng mataai ađô kơi đóng katiêk palơq dhanuôr tơơt dhiq katiêk e bhuôih kakoh akóón adhah đu tarnââp, nek akóón adhah ve dham bhrê ngơn bhlơng ơi bâân payươh yươh. Ađó yuur têêng nôôq kanal chrih tabhlơng, tơk mơ ađó patơk ve chóóm têêng đóng óih n'toh tââq m'piing pleng leq katiêk dhalam toom mat akóón manưih. Palơq nôôq kanal chrih đu ađó bâân pheep yuur têêng toom mat akóón adhah, ađó bhlơp galơơk dhanuôr tơơt dhiq katiêk, xók yua dhanuôr tơơt dhiq katiêk têêng a-ô kabhêi akóón adhah ve dham tabhrê palơq bhươt bơơi dyơq mamông. Ađó bâân pheep đóng parhââm leq a-ô kabhêi ađek ưng akóón adhah, đóng a-ô kabhêi akóón adhah patơk mơ chóóm praaq, lơq têêng ngaai manưih kah bhuôih kakoh a-ô kabhêi akóón adhah phaai bâân taleng chêt. Ađó kung têêng dyóp ngaai, paniên kung kơi taha, karvaan kung kơi ngeeo, rathaai palơq têêng xól, kơi đóng ve chóóm nh'xóóng leq akóón manưih mưi kanal dhiq tapaang têi atươm ưng piđó hamôôiq dhiq maang piđó, đóng kah ve dhơ dhangaai ve chóóm kơl môôiq chóóm baan la manưih ađek kah ve kanal achêk, nek achak ưng akóón adhah, hamôôiq sôôq ưng achak ađó. Rau tabech galang nek ađôk: Ngaai ve rau tarbech n'nal, manưih ađek phaai yaap sôôq ưng akóón adhah. Taai ađó nek sôôq ưng mưi chanak, lơq sôôq ưng ađó nek chapat hariêng chapat jêt chapat.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.