Pakah Đóng Lêi 12

1Hayơq mưi kanal chrih gamak bâân đơơp lêi tơơt dhiq pleng: mưi pađiil parkan ng'guôk leq achak mat tangêi, lơq mat bharương dhiq n'raal dyung ađó, palơq mưi panơơng charnap majêt bơơr beq chatur dhiq koq ađó, 2lơq taai dyơq ve đađââng, ađó lalơu lalaang kalóóng ganhuh ka-ai ayaai, lơq xók karuôq chaliêq đóng n'niên akóón. 3Lơq mưi kanal chrih lââng bâân đơơp lêi m'piing pleng: Lêi têêh, mưi kaxênh karông gamak parhóm bhrôông ve tapól akoq, majêt tagê, palơq tapól panơơng charnap dhiq nôôq akoq ưng ađó. 4Xóói ưng ađó galôôi mưi phơn pe nôôq chatur xamenh dhiq pleng hayơq m'peq piđó leq katiêk. Hayơq akóón karông dyương toom manưih pađiil parkan ravang n'niên akóón, đóng xók ađó n'niên akóón nek karông e pei lâân akóón ưng ađó. 5Ađó n'niên mưi akóón padruuih, akóón paniên nek manưih e kadhâng akoq dyóp katiêk palơq tarlââng bhaxêi. Hayơq akóón ưng ađó bâân n'drooih pei đóng Yaang Pleng lơq patơk kakloq tanơơt Ađó, 6dyơq manưih pađiil parkan nek mut klôôn mót leq kruung vơng, dhiq đu ađó ve mưi dham bâân Yaang Pleng ravang lơơi dhiq ađek, đóng ve nôôq manưih gamang lêi ađó tơơt dhiq ađô kalóóng mưi ngaan bơơr hariêng chapat jêt tangêi.

7Hayơq ve mưi dharơp tarjơl m'piing pleng. Mi-ka-êên lơq nôôq dhơn pleng ưng manưih tarjeng tarjơl palơq akóón karông; lơq akóón karông palơq nôôq abhưi kamóch ađó tarvei tajơl. 8Kơi ađek hayơq ađó kah dyóp praan chróót tarjơl, dham đóng piđó kung kah dyơq bâân lêi dhiq pleng dyơq. 9Kơi ađek nek akóón karông gamak bâân m'peq leq katiêk, — akóón kaxênh hanua, bâân đóók nek abhưi bhóch môôiq Sa-taan, đu bhlơp galơơk bhơt hóng katiêk — ađó bâân m'peq leq katiêk, nôôq abhưi kamóch ưng ađó kung bâân m'peq leq katiêk kung palơq ađó. 10Hayơq aku xâng mưi dhariêng praaq karơ m'piing pleng, kơi ađô:

“Xók ađôk, rau paq jóói, mataai raman,

lơq katiêk karuung ưng Yaang Pleng nôôq he ơi bhral,

kung palơq têêng kala ưng Yaang Đơơp Xut Dhơu ưng Ađó,

ơi taai đu kaauq adhi anó ưng nôôq he,

nek đu tangêi hayum kaauq piđó toom mat Yaang Pleng nôôq he, ơi bâân m'peq leq katiêk.

11Piđó ơi đươk lơh ađó ve ahaam Trưưu Akóón lơq ve paraaq truuih đuui ưng ađêi,

piđó kah châq hiin parhââm mamông ađêi tơk mơ đơơp chêt.

12Taai kơơq ađek, phaai yuur bhuui marhaal, nôôq talaang pleng

palơq nôôq ngaai tơơt mamông dhiq ađek ơơi!

Ayô xarngaat đóng katiêk lơq taxiiq,

taai abhưi bhóch ơi dhaluônh dham nôôq pe,

xók dyơq ve ganơt pagrâ tabhlơng,

taai ađó n'nal ađó dyơq m'bưưiq bhlơng tangêi kaxe!”

13Xók akóón karông bâân n'nal kakơi ađó ơi bâân m'peq leq katiêk, nek ađó ting viêng manưih pađiil parkan, nek manưih ơi n'niên akóón paniên tôôh. 14Hayơq bơơr nanang ưng achim kalaang adhuuk gamak bâân đóng leq manưih pađiil parkan ađek đóng ađó par tơk kruung vơng, tơk dham ưng ađêi, dhiq đu ađó bâân gamang lêi dhiq ađek kalóóng mưi ganah, nôôq ganah lơq m'pơng ganah — changaai bhlưa mat akóón kaxênh. 15Kơi ađek nek akóón kaxênh próih đơơk gluh tââq kalóóng bóóp ađó kơi paloong karuung ting tapun manưih pađiil parkan, đóng ađó ve chóóm têêng pađiil bâân đơơk tuh palóóng bil. 16Hayơq katiêk pơh jóói manưih pađiil parkan, katiêk ahuôq bóóp lơq lâân galuôn parloong karuung đu akóón karông ơi próih pagluh tââq bóóp ađó. 17Kơi achêk nek akóón karông yuur pagrâ palơq manưih pađiil parkan hayơq ađó yuur vôôiq kalơng tavaaih tarjơl palơq phơn dyơq lóóiq kalóóng dhong nooi ưng ađó ađek, nek nôôq manưih huuiq jư gani pachóóm ưng Yaang Pleng lơq ve paraaq taruuih ưng Chuôq Jê-su. 18Hayơq ađó dyương dhiq bhalua xuôr dhiq tóór taxiiq.