Pakah Đóng Lêi 11

1Dha ring ađek, mưi n'dreh karbho makơi m'beq dhanang đang ơi bâân pađơơp leq aku, xók ve dhariêng praaq: “Phaai yuur dyương lơq đang đong bhanuôih ưng Yaang Pleng palơq baang bhanuôih, palơq nôôq manưih bhuôih kakoh kalóóng ađek. 2Dyơq leq taang, nek phơn hót nguôi đong bhanuôih, phaai châng lơơi, óóq đang ađó, taai ađó ơi bâân pajaau leq nôôq dhanuôr katiêk lââng lơq piđó e đâq grơl kanóón liêm kalóóng puôn jêt bơơr kaxe. 3Hayơq Aku e patơơt lơơi bơơr manưih truuih taruuih ưng Aku, lơq piđó e praaq loom taruuih kalóóng mưi ngaan bơơr hariêng chapat jêt tangêi, xók biêh xơp aau bhaai ramaanh.” 4Bơơr manưih truuih ađô nek bơơr tââm ô liiu lơq bơơr dyung dhơu dyương toom mat Chuôq ưng katiêk. 5La ngaai kanóq têêng mahaai nhiđó, hơq óih vaaih gluh tââq bóóp nhiđó hayơq óch róh nôôq têêng brau ađêi, hơq la ngaai manưih kiêng tabhrê pahư nhiđó, nek manưih achêk phaai bâân taleng chêt kơi achêk. 6Nhiđó ve kataai kađơp pleng lóóiq đóng kah ve bó ruuh leq katiêk kalóóng nôôq tangêi ting paraaq loom truuih ưng nhiđó, lơq nhiđó ve kataai dhiq nôôq jarhu đơơk đóng tavaaih piđó xar ahaam lơq đóng janah pahư katiêk palơq dyóp rau bhrê hư, leq dhơ n'đó bhêêl nhiđó kiêng. 7Xók nhiđó ơi xong bhơt paraaq taruuih ưng nhiđêi, nek akóón adhah yuur đơk tââq bóng luôh luông e tavaaih tarjeng tarjơl palơq nhiđó, lơq ađó e đươk lơh nhiđó hayơq leng nhiđó vaq. 8Xaak ưng nhiđó e bêch dhiq kalơng bhươh ưng kanóón gamak (nek kanóón bâân đóók kiêng móón nek Sô-đôôm lơq Ai Kơp), nek kung dhiq đu Chuôq ưng nhiđó ơi bâân tateeng đinh dhiq baang chatông. 9Kalóóng pe tangêi m'pơng, manưih tââq plok nôôq dhanuôr, nôôq dhong nooi, nôôq dhariêng paraaq lơq nôôq katiêk kruung maar lêi xaak ưng nhiđó lơq palââng kah đóng pheep nôôq xaak ưng nhiđó bâân tơp kalóóng ping. 10Dhanuôr tơơt dhiq katiêk bhuui sương leq nhiđó lơq cha đah marhaal, piđó e pagơơi kaliim xóng ađêi taai bơơr nak loom đââng taruuih ađek ơi têêng đóng dhanuôr tơơt dhiq katiêk jarnah xarngaat. 11Hayơq lơh pe tangêi m'pơng, parhââm hââm parmông tââq Yaang Pleng mót leq kalóóng nhiđó, lơq nhiđó yuur dyương dhiq dyung nhiđêi, kơi ađek nek rau kakhin kapơn gamak bhlơng n'toh leq nôôq đu chalaang lêi nhiđó. 12Hayơq nhiđó xâng mưi dhariêng karơ tââq pleng, praaq palơq nhiđêi: “Đơk leq ađô!” Kơi ađek nek, nhiđó đơk leq pleng kalóóng mưi garboq dhaluk, lơq nôôq têêng brau ưng nhiđó maar chaling lêi nhiđó. 13Mót ganah achêk, mưi dharơp dha-ơr katiêk gamak vaaih, lơq mưi phơn majêt ưng kanóón hakơh halơm. Kalóóng dharơp dha-ơr katiêk, dhanóók ưng tapól ngaan manưih bâân chêt bil, lơq nôôq đu dyơq mamông val vaaih kakhin kapơn hơq đóng cha-iil tabah leq Yaang Pleng dhiq pleng.

14Rau jarnah xarngaat đu bơơr ơi lơh. Lêi tôôh, rau jarnah xarngaat đu pe dyơq tơk kơi đâh bhlơng.

15Mưi dhơn pleng đu tapól plong karyóól, nek nôôq dhariêng praaq karơ talóng gluh tââq têêh pleng, kơi ađô:

“Katiêk karuung ưng hóng katiêk ơi val xar katiêk karuung ưng Chuôq nôôq he lơq Yaang đơơp xut dhơu ưng Ađó.

Ađó e kadhâng akoq patơk nh'chró, taluôn luôn.”

16Hayơq bơơr jêt puôn takóh bhươl dyơq tơơt dhiq tanơơt ưng piđó toom mat Yaang Pleng, ơi chip mat ađêi leq katiêk lơq bhuôih kakoh Yaang Pleng, 17praaq:

“Kakoh Chuôq nek Yaang Pleng, Yaang Bhơt Mataai, Yaang đôk ve lơq ơi ve, nôôq yi ma-ơơn Amei

taai Amei ơi kadhâng jư mataai raman gamak bhlơng ưng Amei lơq kadhâng akoq.

18Nôôq katiêk yuur grâ,

bơơi ganơt pagrâ ưng Amei ơi tơk,

lơq xók ganah đóng nôôq đu chêt bâân xêi lơt,

palơq đóng chaner leq nôôq dhơn ratơơq Amei,

nek nôôq manưih đââng truuih lơq nôôq manưih huuiq,

palơq nôôq manưih bhi kakhin dhanóók Amei,

manưih paniên lơq manưih taha,

lơq leng kaxiêt nôôq đu dyơq leng kaxiêt katiêk.”

19Hayơq đong bhanuôih ưng Yaang Pleng tơơt dhiq pleng bâân tarlóng lơơi lơq taraang raket bóóp ưng Chuôq bâân chalaang lêi kalóóng đong bhanuôih Ađó. Dharing ađek, ve nôôq chaach kamlaaq, nôôq dhariêng grưng grưng, lơq dhariêng grơm tar-auq, mưi dharơp dha-ơr katiêk palơq garnhuh bó dhơl gamak.