Phi-lê-môôn 1

1Phaau-lô, manưih tơơt đong kanam ưng Jê-su Chuôq Paq Manưih, lơq manưih adhi anó Ti-mô-thê, pagơơi đóng Phi-lê-môôn, manưih adhi anó nh'nhơr lơq parjơơk marau tarnêêng ưng nôôq yi, 2đóng Ap-bi, manưih mamóóq adhi ưng nôôq yi; đóng A-chiip, parjơơk marau tarnêêng ưng nôôq yi; lơq đóng nôôq akóón dhơn Chuôq dhiq đong ưng amei: 3Rââm nhan ơơn phươk liêm lơq yươq rauha tââq Yaang Pleng, Ama nôôq he lơq Chuôq nôôq he, nek Jê-su Chuôq Paq Manưih, tơk dhiq adhi anó.

4Aku taluôn ma-ơơn Yaang Pleng ưng aku, xók hei tơk amei kalóóng paraaq gavơh nhan ưng aku, 5taai taluôn xâng leq lóóm tanhơr ưng amei kung palơq lóóm huuiq hơq amei ve kalóóng Chuôq Jê-su, lơq koom đóng tabhơt nôôq manưih huuiq liêm, 6tơk mơ rau blah đóng lóóm huuiq ưng amei ve chóóm xar kơi liêm kre kalóóng rau lóóm kanóq leq dyóp rau liêm kre malóóm tơk Chuôq Paq Manưih tơơt dhiq m'pơng nôôq he. 7Nôk manưih adhi anó, aku ơi ve bơk rau bhuui lơq rau tabhơơl ơi taai lóóm tanhơr ưng amei, tââq luônh lóóm ưng nôôq manưih huuiq liêm ơi bâân tame tabah tââq amei.

8Taai kơi ađek, dhơ ve bơk rau grâ nhóól kalóóng Chuôq Paq Manưih đóng yuur kayua đóng amei leq rau kiêng phaai têêng. 9Bơơi taai lóóm tanhơr, aku pagluh paraaq gavơh nhan nek n'jang, xók nek mưi chanak kơi Phaau-lô ađô, mưi abhươp takóh, hơq ađôk kung nek manưih tơơt đong kanam taai Jê-su Chuôq Paq Manưih. 10Aku mââl nhan amei klóóih đóng panong akóón ưng aku, manưih hơq aku ơi n'niên kalóóng ganah takađaai ưng aku, nek Ô-nê-siim. 11N'loom ahei, ađó ađek kah rau malơơi đóng amei, bơơi xók ađôk nek malơơi miq đóng amei, lơq đóng aku. 12Hơq nek manưih hơq aku kayua val chô lum amei, chênh ađó achêk, manưih ađô nek luônh lóóm ưng aku. 13Aku rââm kiêng kadhâng ađó achêk tơơt lóóiq palơq aku, đóng ađó achêk ve chóóm klóóih amei poor tarnêêng đóng aku dhiq m'pơng nôôq takađaai ơi taai Taruuih Liêm. 14Dhơ kơi ađek, aku kah kiêng têêng marau marâ hơq kah ve rau iêm lóóm ưng amei, đóng tarnêêng liêm ưng amei eh rau thê kơi nek taai kayua kajuq, bơơi tââq lóóm kiêng têêng. 15Ve n'jau ơi taai kơi ađôk hơq ađó ađek ơi bâân tablah palơq amei kalóóng mưi ganah, buôn đóng amei ve chóóm pei đơơp lóóiq ađó achêk taluôn luôn, 16kah dyơq kơi têêng xól dyơq, bơơi kiiq bhlơng lơh manưih têêng xól, mưi chanak adhi anó bơk nh'nhơr, liêm lơh ting kơi palơq aku, hơq val dhaang lơh dyơq palơq amei, miq kalóóng achak araang lơq kalóóng Chuôq. 17Taai kơi ađek, la amei lêi aku nek parjơơk marau tarnêêng, nhan pơh yaauq ađó ađek pakơi ngóq pơh yaauq aku. 18Dyơq la ađó ađek ơi têêng mahaai amei, hamôôiq manơơq amei dhơ dharau dhariq, nek phaai payaap rau ađek đóng aku. 19Aku Phaau-lô, ơi xaraq paraaq ađô palơq chênh têi aku: tư aku e chróót lóóiq, đóng eh rau phaai praaq palơq amei kơi amei patơk mơ manơơq aku chênh amei kala. 20Alua, manưih adhi anó, rââm aku bâân đơơp malơơi patư tââq amei kalóóng Chuôq; nhan amei phaai têêng tame tabah luônh lóóm ưng aku kalóóng Chuôq Paq Manưih.

21Taai ganơơm bhlơng leq rau huuiq bóóp ưng amei, hayơq aku ơi xaraq thơ đóng amei, n'nal kakơi amei e đơơp têêng patơk mơ dyơq lơh bhơt rau aku dyơq truuih pakah. 22Pei lơq, kung nhan ravang lơơi mưi dhiq tơơt đóng aku, taai aku rââm kơi đươi paraaq gavơh nhan ưng adhi anó, aku e bâân paloh chô palơq adhi anó.

23Ê-phaap-ra, manưih chandrươh tơơt đong kanam palơq aku kalóóng Jê-su Chuôq Paq Manưih, chap yayar amei. 24Maak, A-ri-taak, Đê-ma, lơq Lu-ka, nôôq parjơơk marau tarnêêng ưng aku, kung chap yayar amei.

25Nhan ơơn phươk liêm ưng Chuôq nôôq he, nek Jê-su Chuôq Paq Manưih tơơt palơq lóóm karnóq adhi anó. A-meen!