Hê-bơ-rơ 1

1Kalóóng bơk ganah lơq palơq bơk kơi tââq đơơi hanua, xong Xók Yaang Pleng praaq palơq nôôq abhươp avuôq tââq nôôq chanak n'nal loom, 2nek leq nôôq tangêi xariêq ađôk, Ađó ơi praaq palơq nôôq he tââq Akóón Ađó, nek Yaang hơq Ađó ơi đóng têêng Manưih pei Đơơp dyóp rau n'dreh m'ma, kung tapâng Akóón ađek, Ađó ơi tavaaih nôôq klaang ganah; 3hơq Akóón achêk nek rau brương taklaaq cha-iil tabah lơq nek chan xaraq lalua pâng leq chak araang ưng Ađó, palơq hayuur tơq dyóp rau n'dreh m'ma tââq paraaq mataai karơ ưng ađêi, hơq xók ơi têêng tarnêêng kajut pasek matu lơt, Akóón achêk tơơt hót atươm Yaang Ma-um dhiq dham tơơt yaal; 4taai bâân val kơi đaang chap jalơh changaai nôôq dhơn pleng, Akóón ơi bâân pei đơơp dhanóók achak yaal bhơt yaal lơh bơk chu lơh nôôq dhơn pleng ađek. 5Taai Ađó ve glêh praaq palơq ngaai nak kalóóng nôôq dhơn pleng kơi ađô:

“Akóón nek Akóón ưng Aku.

Tangêi ađôk Aku ơi n'niên Akóón”?

Kung val praaq:

“Aku e nek Ama ting kơi palơq Amei,

lơq Amei e nek Akóón koom đóng Aku”?

6Bơơi dyơq lơh ađek, xók Ađó đââng Akóón N'niên Laloom dhaluônh hóng katiêk, Ađó praaq: “Tabhơt nôôq dhơn pleng ưng Yaang Pleng phaai bhuôih haanh Akóón achêk.” 7Ting kơi palơq nôôq dhơn pleng, Ađó praaq:

“Yaang têêng nôôq dhơn pleng ađêi xar ganhuh adhiiq,

lơq nôôq dhơn ratơơq ađêi xar nôôq par-aang óih.”

8Dyơq ting kơi palơq Akóón achêk, nek:

“Kakoh Yaang Pleng, tanơơt Amei dyơq patơk nh'chró taluôn luôn,

lơq mataai karơ bhơt liêm nek mataai karơ ưng katiêk Amei.

9Ađó nh'nhơr rau bhơt liêm lơq dyââng lêi rau aak.

Ơi taai ađek, Yaang Pleng, nek Yaang Pleng ưng Ađó, ơi xut đóng Ađó

dhơu bhuui marhaal bơk lơh nôôq parjơơk Ađó.”

10Lơq “Kakoh Chuôq, xók tââp tarnââp, Amei patơơt bhanơn pale katiêk,

lơq nôôq talaang pleng nek nôôq tarnêêng ưng têi Amei.

11Piđó e bhơt bil, bơơi Amei taluôn dyơq,

tabhơt piđó e ti rit kơi m'beq aau yaal,

12lơq kơi m'beq aau ng'guôk, Amei e puôl nôôq ađek lóóiq kơi aau chaguôk,

piđó e bâân lôh lơơi,

bơơi Amei nek dyơq kơi ađek,

lơq nôôq kamó ưng Amei e yươq chóóm bhơt.”

13Bơơi kơi ađek, Amei ve glêh praaq palơq mưi nak kalóóng nôôq dhơn pleng:

“Phaai tơơt hót tươm Aku

đóng tơk bhêêl Aku têêng nôôq brau ưng Akóón xar parđâq đóng dyung Akóón”?

14Kah alua tabhơt nôôq dhơn ađek nek nôôq yaang têêng yaauq, bâân dhaloong kayua đóng tarnêêng gamang taai malơơi ưng nôôq manưih ravang bâân đơơp rau paq jóói kah lua?