Skip to content
BibleKenya

Katu Bible Literal Text

Ma-thi-ơ 27

Xók achêk, mót bhêêl yayóng tarưưp, tabhơt nôôq takóh kadhâng bhanuôih bhơt liêm lơq nôôq takóh bhươl kalóóng manưih dhanuôr ơi tapraaq mangê kanóq kơi jơl lóóiq Chuôq Jê-su buôn leng Ađó vóq. Xók ơi klooiq Ađó lóóiq, piđó đââng Ađó vôôiq lơq pajaau đââng leq Phi-laat kuôn têêng gamak.

Bhêêl ađek, xong xók Ju-đa, manưih baan Ađó, lêi kơi Ađó ơi bâân patu, nek ơi dhơ kanóq, ađó ơi pachô lóóiq pe jêt parleh baak leq nôôq takóh kadhâng bhanuôih bhơt liêm lơq nôôq takóh bhươl, praaq kơi ađô: “Aku ơi têêng matu lơt ơi baan pajaau ahaam kah ve matu.” Bơơi piđó móón: “Harau chóóm pâng tơk nôôq yi? Amei tư đơơp.” Lơq xong xók m'peq nôôq parleh baak leq kalóóng đong bhanuôih, ađó val xooq, lơq xók ơi vôôiq changaai, ađó n'dret tuôr leng ađêi kala. Xók achêk, xong ơi chââih nôôq parleh baak achêk, nôôq takóh kadhâng bhanuôih bhơt liêm móón: “Lơơi nôôq parleh baak ađô leq jơơng ưng đong bhanuôih nek kah kre dhalam taai achêk nek janaaq ưng ahaam.” Bơơi xók ơi yuur xêi praaq xong, piđó ơi kơl kalung klung ưng manưih thơơq maai katiêk palơq nôôq baak achêk pakoom đóng tarnêêng tơp buur nôôq tamóói chrih. Ơi kơi achêk, kalung klung ađek bâân đóók nek “Klung ahaam” patơk tangêi ađôk. Kơi achêk nek, rau bâân praaq truuih tââq Jê-rê-mi manưih đââng taruuih, ơi bâân tajaap, kơi ađô: “Piđó pei pe jêt parlek baak, nek janaaq ưng manưih ơi đóng pheep, nek manưih hơq ơi bâân yaap janaaq tư tââq akóón anaaq I-sơ-ra-êên, lơq piđó ơi đóng nôôq baak achêk buôn pei kalung klung ưng thơơq maai katiêk, i kơi Chuôq ơi kayua aku.”

Xók achêk, Chuôq Jê-su dyương toom mat kuôn gamak, lơq chanak kuôn achêk tamóh Ađó, kơi ađô: “Alua kơq Amei nek Bhua dhanuôr Jo Thaaiq?” Hayơq Chuôq Jê-su praaq palơq ađó: “Amei đu móón achêk.” Lơq bhêêl xók Ađó bâân takaauq matu tââq nôôq takóh kadhâng bhanuôih bhơt liêm lơq nôôq takóh bhươl, nek Ađó kah ââi lóóiq marau marâ. Tââq ađek, Phi-laat móón palơq Ađó: “Amei kah xâng n'nal mơ rau piđó xók truuih móón jơl lóóiq amei nek?” Lơq Chuôq ơi kah ââi bóóp ađó, patơk mơ palơq mưi parleh kung kah, tơk mơ kuôn gamak lêi lóng chrih bhlơng. Xók achêk, dhalam tangêi bhiêk, kuôn gamak biêh ve kơi kaxu paloh đóng manưih dhanuôr mưi chanak matu đu piđó ơi chââih. Kơi lââng, xók bhêêl ganah ađek, palââng dyơq król mưi chanak tơơt đong kanam tanđôôr huông tatông bâân đóók nek Ba-ra-ba. Kơi achêk, xong xók piđó bâân nhoom karong, Phi-laat praaq palơq piđó: “Nôôq pe kiêng aku paloh ngaai đóng nôôq pe? Ba-ra-ba, môôiq Jê-su, manưih bâân đóók nek Chuôq Paq Manưih?” Ơi ađó n'nal kơi piđó ơi đââng pajaau Chuôq leq ađó taai lóóm dyââng lêi. Xók achêk, xók bhêêl ađó dyơq tơơt dhiq tanơơt xêi xanêi, kađiêl ưng ađó ơi kayua pató bóóp tơk ađó kơi ađô: “Nhan yươq rau chiên vaaih tơk leq amei lơq leq manưih bhơt liêm ađek. Ơi mađôk, aku kaxaal lóóm bhlơng taai m'pó lêi leq manưih ađô.” Hayơq nôôq takóh kadhâng bhanuôih bhơt liêm lơq nôôq takóh bhươl paxuq kayua manưih dhanuôr buôn piđó nhan paloh Ba-ra-ba hơq leng Chuôq Jê-su. Bơơi buôn ââi lóóiq, kuôn gamak praaq palơq piđó: “Nôôq pe kiêng ngaai aku paloh kalóóng bơơr chanak ađô leq nôôq pe?” Hayơq piđó móón: “Ba-ra-ba.” Phi-laat praaq palơq piđó: “Kơi achêk, aku kơng têêng harau palơq Jê-su, manưih bâân đóók nek Chuôq Paq Manưih?” Tabhơt kabhuh piđó ââi: “Ađó phaai bâân teeng đinh dhiq n'lóóng m'baang chatông.” Bơơi ađó praaq: “Ơi n'đó hơq rau aak Ađó achêk ơi têêng?” Dhơ kơi ađek, piđó n'dhương lalơu karơ lơh, kơi ađô: “Ađó phaai bâân teeng đinh dhiq n'lóóng m'baang chatông.” Xók achêk, Phi-laat, xong xók lêi kơi ađêi kah chóóm poor rau, bơơi klóóih dhiq ađek, mưi ganơt panhôôn panhaauq xók ravang vaaih, nek bhêêl đóng pei đơơk hayơq, ađó raau têi ađêi toom mat dhanuôr manưih, praaq: “Aku kah tapâng dhiq ahaam ưng manưih ađô. Nôôq pe tư đơơp.” Lơq xók ââi lóóiq, tabhơt manưih dhanuôr praaq: “Ahaam ưng ađó n'toh dhiq nôôq yi lơq dhiq akóón chachau nôôq yi.” Xong ađek, ađó paloh Ba-ra-ba leq piđó, hayơq xók ơi đóng m'bhiiq Chuôq Jê-su, ađó đóng đââng Chuôq vôôiq buôn đơơp teeng đinh dhiq n'lóóng m'baang chatông.

Bhêêl achêk, xong xók đââng Chuôq Jê-su mót kalóóng đong kuôn gamak, nôôq kabhuh linh ưng kuôn gamak ơi kaboq karong lóóiq toom mat Chuôq tabhơt pe jêt linh. Xong xók lôh aau Chuôq, piđó yuur paxơp mưi beq aau chaguôk parhóm bhrôông ar leq Ađó. Bhêêl taanh mưi beq panơơng palơq axông hayơq, piđó tapơơng leq akoq Ađó, palơq n'dreh karbho pakadhâng leq têi atươm Ađó, lơq xong xók chakoh toom mat Ađó, piđó ajóóch bharlưưk Ađó, kơi ađô: “Bhi kakoh Bhua dhanuôr Jo Thaaiq!” Hayơq xong xók kathui havi leq Ađó, piđó pei karbho lơq bhiêk m'bhiiq leq akoq Ađó. Xók piđó praaq ajóóch Ađó xong, piđó lôh aau chadhoop lơq paxơp đóng leq Ađó aau ưng Ađó, hayơq galôôi Ađó vôôiq buôn teeng đinh dhiq n'lóóng m'baang chatông.

Xók achêk, dyơq xók vôôiq gluh, piđó lêi mưi chanak tââq Si-reen, achak Si-môôn, hơq piđó pa-eep buôn ađó đuôl n'lóóng m'baang chatông ưng Ađó. Xong xók vôôiq tơk mưi dhiq ngi đóók nek Gô-gô-tha, hơq dhiq achêk kiêng móón nek Dhiq “Paliing akoq.” Piđó đóng Chuôq ơm alak bâân luk palơq mơt atang. Xók ơi tadyep xâng, nek Ađó kah đơơp ơm. Xók achêk, bhêêl teeng đinh Ađó dhiq n'lóóng m'baang chatông hayơq, piđó nh'xóóng xóng piđó aau ưng Ađó palơq kơi thuôt padhơơch, lơq piđó đương jư Ađó, xók tơơt dhiq ađek. Dhiq m'piing akoq Ađó, piđó lơơi kơơq kaauq patu ưng Ađó, bâân xaraq kơi ađô: “Ađô nek Jê-su, bhua dhanuôr Jo Thaaiq.” Bhêêl ađek, ve bơơr chanak manưih tatông bâân tateeng đinh palơq Ađó, mưi nak tơơt hót atươm lơq mưi nak tơơt hót ađaai. Nôôq manưih vôôiq lalơh praaq bharlưưk Ađó, tangơr akoq ađêi lơq praaq: “Đu chanak têêng pahư đong bhanuôih lơq têêng lóóiq kalóóng pe tangêi atêêh, nek tư paq ađêi nek! La Amei nek Akóón Yaang Pleng, hơq nek dhaluônh tââq n'lóóng m'baang chatông!” Kung i kơi achêk, nôôq takóh kadhâng bhanuôih bhơt liêm, nek palơq nôôq manưih pachóóm gani lơq nôôq takóh bhươl, xók praaq ajóóch Ađó, ơi móón: “Ađó ơi paq nôôq đu lââng; Ađó nek kah ve chóóm đuôh tư paq Ađêi. Ađó nek Bhua ưng I-sơ-ra-êên. Xók ađôk, Ađó phaai dhaluônh tââq n'lóóng m'baang chatông, nek nôôq he e huuiq dhiq Ađó. Ađó huuiq ganơơm dhiq Yaang Pleng; ađôk nek phaai lơơi Yaang Pleng trôông paq Ađó la Yaang Pleng kiêng Ađó. Taai Ađó ơi praaq kơi ađô: ‘Aku nek Akóón Yaang Pleng.’” Kơi lââng, chênh nôôq manưih tatông, nek nôôq đu bâân tateeng đinh palơq Ađó, kabhuh piđó kung praaq bharlưưk Ađó.

Xók achêk, tââq jơ đu chapat, yuur vaaih kanam dhiq plok bhơt xưưq patơk jơ đu takiêh. Hayơq mơ jơ đu takiêh, Chuôq Jê-su dhaloong mưi parleh karơ, kơi ađô: “Ê-li, Ê-li, la-ma sa-bech-tha-ni?” nek kiêng móón “Yaang Pleng Aku ơơi, Yaang Pleng Aku ơơi, hau Amei xooq lơơi Aku?” Bơơi xong xók xâng kơi achêk, nôôq đu biêh dyương dhiq ađek móón kơi ađô: “Ađó dhaloong Ê-li.” N'drươh, mưi nak kalóóng nôôq piđó, xong xók mut vôôiq lơq pei parleh tapô taxiiq, n'drươh tươm bing đơơk kadyuôq, n'drươh tabóq leq karbho, hơq đââng leq Ađó ơm. Bơơi nôôq đu dyơq lóóiq móón: “Nek lơơi mak kơi Ađó. Nôôq he lêi e Ê-li ve tơk paq Ađó kah.” Kơi achêk hayơq, xong xók dhaloong lóóiq mưi parleh karơ, Chuôq Jê-su pat parhââm. Lơq lêi tôôh, bhaai yoong ưng đong bhanuôih bâân tanteek têêng bơơr tââq piing leq raal, hayơq katiêk bâân veq dha-ơr, lơq dhơl gamak bâân yuur havóh. Bơk ping xaal bâân tapơơh tarlóng lơq bơk achak ưng nôôq manưih liêm ơi chêt bâân têêng mamông lóóiq. Lơq bhêêl gluh lơh tââq ping xong rau mamông lóóiq ưng Ađó, piđó ơi mót kalóóng kanóón liêm lơq tabhral pakah leq bơk manưih. Xók achêk, xong xók lêi dha-ơr katiêk lơq nôôq tarnêêng yuur vaaih, bharlơng kađââng linh palơq nôôq đu xók đương jư Chuôq Jê-su madhiq palơq ađó ơi bâân kakhin kapơn bhlơng, móón kơi ađô: “Alua manưih ađô nek Akóón Yaang Pleng.” Hayơq ve bơk manưih pađiil dhiq ađek, lêi padrêh tââq changaai, nek nôôq manưih ơi vôôiq ting Chuôq Jê-su, têêng yaauq Ađó tââq xưưq Ga-li-lê. Kalóóng nôôq piđó ve Ma-ri Ma-đơ-leen, Ma-ri akan Ja-kơ lơq Jô-seep, palơq akan ưng nôôq akóón padruuih Xê-bê-đê.

Xók achêk, xók ơi tơk habu blót, mưi manưih karvaan, ơi bhral tââq A-ri-ma-thê, achak nek Jô-seep, hơq ađó kala achak kung đơơp têêng môôn-đô ting Chuôq Jê-su. Xong xók tơk lum Phi-laat, ađó nhan xaak Chuôq Jê-su. Bhêêl ađek, Phi-laat kayua buôn xaak bâân pajaau leq ađó. Bhêêl ơi pei xaak, Jô-seep pươr xaak achêk lóóiq kalóóng bhaai ramaanh sek, hayơq tabêch xaak leq ping tame ưng chênh ađêi đu ađó ơi têêng kalóóng bóng dhơl. Xók talâh mưi beq dhơl gamak kađơp palóng ping hayơq ađó yuur chô. Xók achêk, Ma-ri Ma-đơ-leen lơq mưi Ma-ri lââng dhiq ađek, tơơt chaang-gan palơq ping.

Hayơq tangêi rayiiu, hơq nek xong tangêi Ravang Ravưa, nôôq takóh kadhâng bhanuôih bhơt liêm lơq nôôq manưih Pha-ri-si ơi bâân karong nhoom lóóiq toom Phi-laat, móón kơi ađô: “Abhươp ơơi, nôôq yi hei kơi bhêêl dyơq mamông, chanak galơơk chachââr tôôh ơi praaq: ‘Xong pe tangêi, nek Aku bâân têêng mamông lóóiq.’ Taai kơi ađek, nhan kayua buôn ping bâân đương jư tamưng patơk tangêi đu pe. La kah, nôôq môôn-đô ưng ađó tơk hayơq, ve chóóm tông xaak ađó, hơq móón palơq manưih dhanuôr: ‘Ađó ơi bâân têêng mamông lóóiq tââq kan chêt,’ nek rau galơơk chachââr leq tatun e dyơq môôp lơh bhêêl tarnââp.” Kơi achêk hayơq Phi-laat praaq palơq piđó: “Nôôq pe ve linh đương. Vôôiq aq, phaai jư paliêm tamưng kơi nôôq pe n'nal.” Hayơq xong xók vôôiq, jư kađơl bhangôh dhơl nek palơq linh đương, piđó jư ping paliêm tamưng.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.