Ma-thi-ơ 25

1Kơi achêk, katiêk pleng e bâân babi kơi majêt pađiil kamór, nek nôôq manưih kadhâng đong dhơu ađêi yuur vôôiq tơk dham đương kêch chaxaau. 2Bơơi xââng chanak kalóóng nôôq piđó nek ngôôk, lơq xââng chanak nek tabech. 3Ơi xââng chanak ngôôk, xong xók kadhâng đong dhơu ưng piđó vôôiq, ơi kah đââng dhơu ting palơq ađêi. 4Hayơq nôôq pađiil tabech nek ơi đââng dhơu ting kalóóng toq nek palơq đong dhơu ađêi. 5Xók achêk, taai chaxaau kah bhênh bhral, tabhơt piđó ơi val xar bêch ngangơơt hayơq bêch kơơq. 6Bơơi mót m'pơng hayum, ve dhariêng dhaloong: ‘Tôôh, chaxaau bhral! Nek vôôiq gluh tơk pơh kêch ađó.’ 7Bhêêl ađek, tabhơt nôôq pađiil kamór achêk bâân payuur blââk lơq ravang ravưa dhơu ađêi. 8Xók achêk, nôôq pađiil ngôôk móón palơq nôôq pađiil tabech: ‘Nhan đóng nôôq yi mưi phơn dhơu ưng nôôq pe, taai dhơu ưng nôôq yi kiêng pat.’ 9Bơơi xók ââi lóóiq, nôôq pađiil tabech móón: ‘Kakhin nek e kah mơ chóóm ve dyóp đóng nôôq yi lơq nôôq pe. Nh'jang tha, nek vôôiq tơk nôôq manưih baan dhơu hơq kơl leq ađêi.’ 10Dhơ kơi ađek, xók bhêêl piđó vôôiq kơl, chaxaau ơi bhral, lơq nôôq ngaai ravang lơơi nek palơq chaxaau hơq mót kalóóng cha đaam bhiêk, hayơq palóng bâân kađơp lóóiq. 11Hayơq xong ađek, nôôq pađiil kamór tôôh kung tơk, móón: ‘Kala ơơi, Kala ơơi, Nhan lóng palóng leq nôôq yi.’ 12Bơơi xók ââi lóóiq, kala praaq: ‘Alua, aku praaq palơq nôôq pe, aku kah n'nal nôôq pe.’ 13Kơi achêk, phaai đương meh, ơi adhi anó kah n'nal tangêi môôiq jơ.

14Ơi thê kơi mưi chanak ravang vôôiq changaai, Ađó ơi dhaloong nôôq dhơn ratơơq ưng ađêi lóóiq lơq pajaau piđó drươp karvaan ưng ađó. 15Ađó đóng manưih ađô xââng ta-lơng, manưih tôôh bơơr ta-lơng manưih lââng dyơq mưi ta-lơng — nek palơq dyóp chanak ting mơ ađêi đuôh têêng. Hayơq ađó n'drươh yuur vôôiq leq changaai. 16Xók ađó ơi vôôiq, manưih đơơp xââng ta-lơng ơi têêng malơơi tââq jêên ađek lơq ve bâân xââng ta-lơng lââng. 17Kung kơi ađek, manưih ve bơơr ta-lơng kung ve bâân bơơr ta-lơng lââng. 18Bơơi manưih ơi đơơp mưi ta-lơng, xong ơi vôôiq gluh, ơi uôch katiêk lơq kadrêi jêên ưng kala ađêi. 19Xók achêk, xong mưi ganah đươnh, kala ưng nôôq manưih dhơn ratơơq achêk chô lơq yaap bha-aar bhatơ palơq piđó. 20Xong xók tơk đan, manưih đơơp xââng ta-lơng ơi đââng xââng ta-lơng lââng, móón kơi ađô: ‘Abhươp ơơi, abhươp ơi pajaau leq aku xââng ta-lơng. Bơơi nhan lêi nô, aku ơi têêng malơơi kơơq xââng ta-lơng.’ 21Kala ưng ađó praaq palơq ađó: ‘Chóóm bhlơng, amei dhơn ratơơq liêm kre lơq bhơt lóóm! Amei ơi bhơt lóóm dhiq nôôq tarnêêng. Aku e patơơt amei lêi kadhâng dhiq bơk tarnêêng. Nek mót kalóóng đu bhuui ưng kala ađêi.’ 22Manưih ve bơơr ta-lơng, xong xók tơk đan, kung ơi móón: ‘Abhươp ơơi, abhươp ơi pajaau leq aku bơơr ta-lơng, bơơi nhan lêi nô, aku ơi têêng malơơi kơơq bơơr ta-lơng.’ 23Kala ưng ađó praaq palơq ađó: ‘Chóóm bhlơng, amei dhơn ratơơq liêm kre lơq bhơt lóóm! Amei ơi bhơt lóóm dhiq nôôq tarnêêng. Aku e patơơt amei kadhâng lêi dhiq bơk tarnêêng. Nek mót kalóóng đu bhuui ưng kala ađêi.’ 24Hayơq manưih đơơp mưi ta-lơng, kung vôôiq tơk, ơi móón: ‘Abhươp ơơi, aku n'nal amei, kơi amei nek mưi manưih kơi praaq kơi têêng, xóót tââq dham ađêi kah chóói lơq karong chô tââq dham ađêi kah gluh vươk. 25Taai kakhin kapơn, hayơq xong xók vôôiq gluh, aku ơi kadrêi ta-lơng ưng amei dhiq katiêk. Nhan lêi nô, amei pakala phơn ưng ađêi.’ 26Bơơi bhêêl ââi lóóiq, manưih kala ưng ađó achêk praaq palơq ađó: ‘Tadhươm dhơn ratơơq lơt aak lơq đu dyââng tôôh! Amei biêh ơi n'nal kơi aku xóót tââq dham aku kah chóói lơq karong chô tââq dham aku kah gluh vươk. 27Kơi achêk nek, parpâng amei kơng phaai đââng lơơi jêên ưng aku dhiq đong jêên, hayơq xong xók chô, hơq dhakơi nek aku e đơơp lóóiq bhôôn ưng aku palơq jêên lơơi. 28Kơi achêk, phaai pei ta-lơng tââq tadhươm ađô lơq đóng ađó leq manưih đu ve majêt ta-lơng. 29Ơi palơq manưih xók ve, nek dyóp rau e bâân đóng kơơq — patơk mơ e bâân xưa raai. Bơơi nek palơq manưih kah ve, nek chênh rau ađó ve e bâân pei paxooq tââq ađó. 30Lơq nek m'peq tadhươm dhơn ratơơq kah matich ađek leq dhiq kanam kajeem hót nguôi, nek dhiq e ve nhiim griit lơq takachik kaniêng.’

31Dyơq bhêêl Akóón Manưih bhral kalóóng brương cha-iil Ađó lơq tabhơt dhơn pleng nek palơq Ađó, nek xók achêk, Ađó e tơơt dhiq tanơơt brương cha-iil ađêi. 32Tabhơt nôôq dhanuôr e bâân karong toom mat Ađó, lơq Ađó e blah pantua palơq xóng piđó, kơi ngóq manưih jư blah pantua trưưu gluh tââq beeq. 33Ađó e lơơi trưưu tơơt hót atươm ađêi, hayơq beeq tơơt hót ađaai. 34Xong ađek, Bhua e móón nôôq ngaai tơơt hót atươm ađêi: ‘Nôôq manưih ơi bâân Ama Aku đóng phươk, tơk leq ađô, nek đơơp katiêk ơi bâân pasam lơơi đóng ađêi tââq bhêêl tââp tavaaih pleng katiêk. 35Ơi Aku ha-ul, nek nôôq akóón đóng Aku cha; Aku rahaal, nek nôôq akóón đóng Aku ơm; Aku nek tamóói chrih, nek nôôq akóón pơh yaauq Aku; 36Aku lalôh lalut, nek nôôq akóón paxơp đóng Aku; Aku ka-ai dreh, nek nôôq akóón gamang Aku; Aku tơơt kalóóng đong kanam, nek nôôq akóón tơk palơq Aku.’ 37Xók achêk, nôôq manưih bhơt liêm e ââi lóóiq Ađó, kơi ađô: ‘Kakoh Chuôq, nôôq akóón ve dhơq lêi Amei ha-ul hơq đóng cha, môôiq nek rahaal hơq đóng ơm n'đó bhêêl dhơq? 38Hayơq nôôq akóón ơi lêi Amei kơi tamóói chrih hơq pơh yaauq, môôiq lalôh lalut hơq paxơp đóng n'đó bhêêl dhơq? 39Lơq nôôq akóón ơi lêi Amei ka-ai dreh môôiq tơơt kalóóng đong kanam n'đó bhêêl hơq tơk palơq Amei?’ 40Xók ââi bóóp, Bhua e praaq palơq piđó: ‘Alua Aku praaq palơq nôôq akóón, lêi dhiq dyóp tarnêêng nôôq akóón ơi têêng đóng mưi kalóóng nôôq manưih paniên katưưiq tââm dhiq nôôq adhi anó ađô ưng Aku, nek nôôq akóón ơi têêng leq Aku.’ 41Hayơq nek, Bhua kung e praaq nôôq đu tơơt hót ađaai: ‘Nek xooq changaai tââq Aku, nôôq đu bâân ngi tóh tôôh, malóóm leq óih tơk nh'chró ơi pasam lơơi đóng abhưi abhóch lơq nôôq abhưi dhơn ưng ađó. 42Ơi Aku ha-ul hơq nôôq pe kah đóng Aku cha; Aku rahaal hơq nôôq pe kah đóng Aku ơm; 43Aku nek tamóói chrih, hơq nôôq pe kah pơh yaauq Aku; lalôh lalut nek nôôq pe kah paxơp đóng Aku; ka-ai dreh lơq tơơt kalóóng đong kanam, nek nôôq pe kah gamang Aku.’ 44Xók achêk, piđó kung e ââi, kơi ađô: ‘Chuôq ơơi, nôôq akóón mơq lêi Amei ha-ul, môôiq rahaal, môôiq kơi tamóói chrih, môôiq lalôh lalut, môôiq ka-ai dreh, môôiq tơơt kalóóng đong kanam n'đó bhêêl hơq kah têêng yaauq Amei?’ 45Kơi achêk hayơq, Bhua e ââi bóóp piđó, kơi ađô: ‘Alua, Aku praaq palơq nôôq pe, dhiq dyóp rau tarnêêng nôôq pe ơi kah têêng đóng mưi nak kalóóng nôôq manưih paniên katưưiq tââm dhiq nôôq manưih ađô, nek nôôq pe ơi kah têêng đóng Aku.’ 46Nôôq manưih ađek e vôôiq mót leq rau janah dyơq yayóóng, hayơq nôôq manưih bhơt liêm nek mót leq parmông tơk nh'chró.”