Skip to content
BibleKenya

Katu Bible Literal Text

Ma-thi-ơ 24

Xong xók gluh tââq đong bhanuôih, Chuôq Jê-su yuur vôôiq kơơq. Hayơq nôôq môôn-đô Ađó tơk đan buôn chaleq đóng Ađó lêi nôôq tarnêêng ưng đong bhanuôih. Bơơi xók ââi lóóiq, Chuôq móón piđó: “Adhi anó kah ve lêi dyóp rau ađek alua? Alua, thêi praaq palơq adhi anó, dhiq ađôk dhơ dhakơi e kah ve dyơq bhangôh dhơl ađô dhiq bhangôh dhơl tôôh hơq kah pâng pahư haglêh.”

Xók achêk, xók Ađó dyơq tơơt dhiq bôôl Ô-liiu, nôôq môôn-đô vôôiq n'tua pađan Ađó tamóh: “Nhan đóng nôôq yi n'nal n'đó bhêêl nôôq rau tarnêêng achêk e yuur avaaih, lơq pakanal xók bhral ưng thêi lơq ưng tangêi marngi bhơt nek hau?” Xók ââi, Chuôq Jê-su praaq palơq piđó: “Phaai chagơn buôn yươq ngaai ve chóóm têêng đóng adhi anó lơt xraang. Ơi bơk ngaai e bhral kalóóng dhanóók thêi, đóók: ‘Aku nek Chuôq Paq Manưih,’ lơq e têêng đóng bơk manưih lơt xraang. Kơi lââng, adhi anó ravang xâng leq tarvei tarjeng lơq nôôq taruuih đââr leq tarvei tarjeng. Adhi anó phaai hêch lêi, óóq ting nhok karnóq, ơi tarnêêng achêk phaai yuur vaaih, bơơi kah ơi alua nek tatun xariêq. Ơi dhanuôr ađô e yuur vaaih jơl lóóiq dhanuôr tôôh, katiêk ađô huông lóóiq katiêk tôôh, hayơq e ve ha-ul cha lơq dha-ơr katiêk vaaih bơk dhiq. Bơơi tabhơt nôôq tarnêêng ađô nek hơq tââp tarnââp ưng nôôq garluh ka-ai ayaai ravang n'niên akóón. Tââq ađek, palââng e đââng adhi anó leq xâng jarnah xarngaat hayơq leng adhi anó vóq, lơq adhi anó e bâân dyóp dhanuôr gaam geet ơi taai dhanóók thêi. Hayơq bơk ngaai e bâân têêng lơt, tamôôp xóng ađêi lơq gaam geet xóng ađêi. Bơk manưih đââng taruuih chachââr e bâân yuur vaaih lơq têêng đóng bơk ngaai lơt xraang. Taai yuur vaaih kah magani nek n'dhương bơk, lóóm tanhơr ưng bơk ngaai e nek achriêt Bơơi ngaai mưng lóóm patơk tatun xariêq, manưih ađek e bâân paq. Taruuih Liêm ađô leq katiêk pleng e bâân truuih đuui plok dhiq talaang katiêk buôn têêng mưi paraaq truuih đóng dyóp dhanuôr, lơq hayơq rau tatun xariêq e tơk.

Taai ađek, xók adhi anó lêi rau harek haper rau dhơơm bhahi bhaha, nek rau ơi Đa-ni-êên manưih đââng taruuih loom paraaq, patơơt dhiq kalóóng liêm” (ngaai đok phaai n'nal), “Bhêêl ađek, ngaai kalóóng parah Ju-đê phaai mut klôôn tơk parah kakóóng, ngaai tơơt dhiq pabhung đong, óóq vôôiq dhaluônh buôn pei ve rau tââq đong ađêi, lơq ngaai tơơt dhiq hare óóq val chô buôn pei aau chaguôk ađêi. Bơơi alua xaryô đóng manưih pađiil bhaq đađââng lơq nôôq ngaai xók đóng akóón mam kalóóng nôôq tangêi ađek! Bơơi phaai gavơh nhan buôn rau mut kadrêi ưng adhi anó óóq yuur vaaih xók nil ha-ót, môôiq pâng tangêi Sa-baat. Ơi bhêêl achêk e ve rau bhrê hư gamak, kah glêh yuur vaaih thê kơi achêk tââq bhêêl tââp tarnââp pleng katiêk patơk tangêi ađôk, lơq dhakơi kung e kah ve. La nôôq tangêi achêk kah chóóm ha-ơt, hơq dhakơi nek dyóp achak araang nek kah bâân paq. Bơơi ơi taai nôôq manưih bâân chââih, nôôq tangêi ađek e bâân n'dhương bil. Bhêêl ađek, la ve ngaai ađek móón palơq adhi anó: ‘Lêi tôôh, Chuôq Paq Manưih tơơt dhiq ađô!’ môôiq ‘Tơơt dhiq tôôh!’ nek adhi anó óóq huuiq. Ơi nôôq chuôq paq galơơk palơq nôôq manưih đââng taruuih galơơk e bâân yuur vaaih lơq pakah nôôq kanal palơq nôôq raman chrih gamak bhlơng tơk mơ têêng đóng lơt xraang, la ve đuôh, chênh nôôq manưih bâân chââih. Lêi nô, Aku ơi praaq loom leq adhi anó ađek. Kơi achêk, la palââng móón palơq adhi anó: ‘Lêi tôôh, Ađó xók dhiq kalóóng kruung vơng,’ nek adhi anó kah chóóm vôôiq leq ađek. Môôiq ‘Lêi nô, dhiq nôôq buông lââp,’ nek adhi anó kah chóóm huuiq. Ơi briil kamlaaq yuur chaach tââq charhóóng mat blo hayơq bliich brương tơk dhiq charhóóng mat blót n'đó kơi, nek rau bhral tơk ưng Akóón Manưih e nek kơi achêk. Hơq n'đó dhiq ve xaak chêt, kêên-kêên prơu lóóiq dhiq ađek.

Bơơi chênh xong garluh bhrê hư ưng nôôq tangêi ađek, mat tangêi e bâân têêng đóng kanam kajeem, mat bharương e kah klaaq kalaaq brương ưng ađó, nôôq chatur xamenh e tââq pleng ruuh n'tôq, lơq nôôq kataai karơ ưng nôôq klaang pleng e bâân veq dha-ơr. Bhêêl ađek, kanal leq Akóón Manưih e bâân pakah dhiq talaang pleng, lơq hayơq tabhơt nôôq dhanuôr manưih dhiq katiêk e kalau nhiim. Piđó e lêi Akóón Manưih bhral dhiq nôôq garboq dhaluk pleng palơq mataai raman lơq cha-iil tabah gamak. Ađó e kayua nôôq dhơn pleng ưng Ađó nek palơq dhariêng karyóól karơ, lơq piđó e karong kaboq lóóiq nôôq manưih bâân chââih ưng Ađó tââq puôn charhóóng, tââq xriêq parah pleng ađô tơk leq xariêq parah pleng tôôh.

Kơq lââng, phaai hok n'nal paraaq babi ađô tââq n'lóóng tarung. Xók đóóng ađó val xar ramaanh lơq ơi chamat axơq, nek adhi anó n'nal kơi nil hapaang đan tơk. Kung ting kơi ađek, xók adhi anó lêi dyóp rau ađô, nek adhi anó n'nal kơi Ađó xók tơơt đan, dhalam dhiq palóng. Alua, Aku praaq palơq adhi anó, kơi klaang đơơi ađô dhơ dhakơi e kah lơh bil patơk xók bhêêl tabhơt nôôq rau achêk ơi yuur vaaih. Pleng lơq katiêk e lơh bil, bơơi nôôq paraaq ưng thêi dhơ dhakơi e kah lơh bil. Dyơq tapâng tơk leq tangêi lơq jơ ađek nek kah ngaai n'nal, dhơ bhơt nôôq dhơn pleng dhiq pleng môôiq Akóón, chapiên Ama hơq giêl. Bơơi klaang Nô-ê n'đó kơi, nek rau bhral ưng Akóón Manưih e nek kung kơi achêk. Ơi kơi kalóóng nôôq tangêi n'loom garluh đơơk tuh, palââng biêh cha ơm, póói đóng patơk tangêi Nô-ê mót kalóóng bhuông, lơq piđó kah n'nal patơk bhêêl đơơk tuh tơk lơq palóóng piđó lóóng — rau bhral ưng Akóón Manưih kung e nek kơi achêk. Bhêêl achêk, bơơr chanak padruuih xók tơơt dhiq hare — mưi chanak bâân đââng vôôiq, mưi chanak bâân lơơi lóóiq. Bơơr pađiil xók xe tapal — mưi chanak bâân đââng vôôiq, mưi chanak bâân lơơi lóóiq. Taai kơi achêk, phaai hêch lêi ơi adhi anó kah n'nal n'đó bhêêl tangêi Chuôq ađêi e bhral. Bơơi adhi anó phaai n'nal tarnêêng ađô, kơi la kala đong ơi n'nal manưih tatông bhral xók n'đó bhêêl ưng hayum, hơq dhakơi nek ađó chêk ơi đương hêch lơq nek kah lơơi đóng đong ađêi bâân đu tatông mót. Ơi taai rau ađô, adhi anó kung phaai val xar ravang lơơi, ơi Akóón Manưih e bhral xók bhêêl adhi anó kah bharnê.

Hayơq, ngaai nek dhơn ratơơq bhơt lóóm lơq tabech galang, hơq kala chaleq patơơt jư lêi dhiq manưih đong ưng kala buôn đóng blah tarmông leq piđó mót dhalam xók vaar? Phươk đóng nek manưih dhơn ratơơq ađek, nek manưih hơq kala ưng ađó, xong tââq chô, e lêi ađó xók matêêng kơi achêk. Alua, thêi praaq palơq adhi anó, kơi kala e patơơt đóng ađó ađek jư lêi dhiq dyóp rau đu kala ve. Bơơi la chanak dhơn ratơơq lơt aak ađek praaq kalóóng lóóm ađêi: ‘Kala aku kah bhênh chô,’ hayơq nek yuur m'bhiiq póh nôôq manưih mađó nek dhơn ratơơq palơq ađêi, hơq cha ơm palơq kabhuh ból alak, nek manưih kala ưng chanak dhơn ratơơq ađek e chô xók tangêi hơq ađó kah rââm đương lơq xók bhêêl hơq ađó kah n'nal. Abhươp achêk e m'bhiiq lêêk achak ađó kơi kah ka-er lơq e patơơt dham ưng ađó madhiq palơq kabhuh paliêm hót nguôi giêl, dhiq dham ađek e ve đu nhiim griit lơq kakreet kaniêng.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.