Katu Bible Literal Text
Ma-thi-ơ 23
Tââq ađek, Chuôq Jê-su praaq palơq manưih dhanuôr lơq nôôq môôn-đô ađêi, kơi ađô: “Nôôq manưih pachóóm gani lơq nôôq manưih Pha-ri-si tơơt dhiq tanơơt ưng Môôi-se. Taai ađek, la piđó truuih pachóóm adhi anó tabhơt dhơ dharau, nek yuur têêng lơq đuui jư tabhơt. Bơơi óóq ting têêng nôôq tarnêêng lơt ưng piđó, ơi piđó praaq hơq kah têêng. Piđó pagưi nôôq ganưi haleng haluq lơq hadhơơp gưi, hayơq piđó chalôôm dhiq charlaang palââng, bơơi ađêi kala piđó kah kiêng paveq chabô têi ađêi leq ađek. Piđó têêng dyóp tarnêêng ưng ađêi đóng bâân palââng lêi. Ơi piđó têêng nôôq trap kađôôq bha-aar gani ưng ađêi đóng pagamak lơq têêng nôôq grưưi aau ađêi đóng payaal. Piđó lóng kiêng dhiq dham đu yaal tââm kalóóng bhiêk đaam, lơq nôôq dhiq tơơt bhi chap tââm kalóóng đong gươl, palơq nôôq paraaq chap yayar dhiq manưih bơk dhiq chơơq, lơq bâân dhanuôr manưih đóók ađêi nek ‘Ra-bi.’ Bơơi adhi anó kah chóóm đóng đóók ađêi nek ‘Ra-bi,’ ơi thêi ưng adhi anó chapiên ve mưi, hayơq tabhơt adhi anó nek bhóng ađêi. Lơq adhi anó óóq đóók bhơt dhơ dhangaai dhiq katiêk nek ‘ama’ ơi adhi anó chapiên ve mưi Ama dhiq pleng. Kung óóq đóng ađêi bâân đóók nek ‘kala tavaaih,’ ơi kala tavaaih ưng adhi anó chapiên ve mưi — hơq nek Chuôq Paq Manưih. Bơơi manưih gamak tââm dhiq kalóóng adhi anó e nek dhơn ratơơq adhi anó. Hayơq ngaai tư hayuur ađêi payaal e bâân bhlêh pa-êêp; lơq ngaai tư pa-êêp ađêi e bâân hayuur payaal.
Bơơi ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm hót nguôi tôôh! Taai nôôq pe kađơp palóng katiêk pleng lóóiq toom mat palââng. Ơi nôôq pe nek kah mót kalóóng, kung kah lơơi đóng ngaai bâân ting jađaang mót leq kalóóng. (Ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm dhiq bóóp tôôh! Taai nôôq pe đah galuôn đong nôôq dharit kamaai, hơq gavơh nhan kơi pađươnh val vôôiq kalóóng galơơk pathê. Ơi taai achêk, nôôq pe e đơơp bha-aar patu haleng lơh.) Ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm hót nguôi tôôh! Taai nôôq pe vôôiq praang taxiiq palơq katiêk góh buôn têêng đóng mưi chanak ting taruuih ađêi, lơq xók manưih ađek ơi val xar kơi achêk, nôôq pe hajuuk têêng manưih achêk xar panong akóón ưng bóng óih lơh bơơr chu nôôq pe.
Ayô ka-er đóng nôôq pe, nôôq đu đââng kalơng kabaang kapôk, hơq nek nôôq đu móón: ‘Ngaai đu ng'kóh taai đong bhanuôih nek yươq rau kơi. Bơơi ngaai đu ng'kóh taai vaang ưng đong bhanuôih achêk nek mơk dhakơi.’ Nôôq đu ngôôk abhưưl lơq kabhuh kabaang kapôk tôôh! Ơi n'đó rau nek kiiq lơh, vaang môôiq đong bhanuôih têêng vaang bâân liêm? Hayơq vil: ‘Ngaai đu ng'kóh taai para bhanuôih nek yươq rau kơi. Bơơi ngaai đu ng'kóh taai bhanuôih hót piing para bhanuôih nek achêk dhakơi mơk.’ Nôôq đu ngôôk abhưưl lơq kabhuh kabaang kapôk tôôh! Ơi n'đó rau kiiq lơh, bhanuôih môôiq para bhanuôih têêng bhanuôih bâân liêm? Taai ađek, ngaai ơi ng'kóh taai para bhanuôih nek ng'kóh taai para bhanuôih lơq taai dyóp rau hót piing ađek. Ngaai ơi ng'kóh tââq đong bhanuôih nek ng'kóh tââq đong bhanuôih lơq tââq Yaang jaq kalóóng ađek. Lơq ngaai ơi ng'kóh tââq pleng nek ng'kóh tââq tanơơt ưng Yaang Pleng lơq tââq Yaang jaq dhiq ađek.
Ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm hót nguôi tôôh! Ơi nôôq pe goop maphơn majêt bak ha, thi-la lơq bhơơi kơng, hơq palơh lơơi nôôq rau đu kiiq lơh ưng gani — hơq nek rau bhơt liêm, lóóm ka-er kayô lơq rau bhơt lóóm. Kơi lââng, achêk nek rau đu tââm buôn yuur têêng nôôq tarnêêng ađô, lơq yươq palơh lơơi nôôq tarnêêng tôôh. Kabhuh đââng kalơng kabaang kapôk tôôh, hơq nek nôôq đu dyreng m'peq mưi panong raróói katưưiq katit, bơơi galuôn lơh mưi panong kamel!
Ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm hót nguôi tôôh! Ơi nôôq pe kaxaal pasek hót nguôi ưng choom lơq dhia, bơơi hót kalóóng nek piđó bing rau n'drooih pei lơq mak mơ. Nôôq manưih Pha-ri-si abhơơm kabaang tôôh! Laloom kơ, phaai kaxaal pasek hót kalóóng choom lơq dhia, buôn hót nguôi ưng piđó kung val xar sek se.
Ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm hót nguôi tôôh! Ơi nôôq pe thê nôôq beq ping bâân n'dha tabhóók, nek nôôq rau dhơ pakah liêm kra hót nguôi, bơơi hót kalóóng nek bing ng'haang ng'glóng manưih chêt lơq dyóp rau khung anhuq. Kung tarvaai thê kơi achêk, dhơ hót nguôi nôôq pe lóng thê bhơt liêm nek palơq palââng, bơơi hót kalóóng nôôq pe nek bing keen galơơk chachââr lơq kah magani.
Ayô ka-er đóng nôôq pe, nôôq manưih pachóóm gani lơq manưih Pha-ri-si, kabhuh paliêm hót nguôi tôôh! Ơi nôôq pe têêng ping agrup ưng nôôq manưih đââng taruuih lơq klôôq paliêm ping xaal ưng nôôq manưih bhơt liêm. Nôôq pe móón: ‘La nôôq yi tơơt kalóóng klaang ưng nôôq abhươp avuôq ađêi, hơq dhakơi nek nôôq yi ơi kah têêng nôôq đu ting tapâng palơq piđó dhiq ahaam ưng nôôq manưih đââng taruuih.’ Kơi achêk hayơq, nôôq pe tư truuih móón leq ađêi kơi ađêi nek akóón chachau ưng nôôq đu ơi leng nôôq manưih đââng taruuih, lơq nôôq pe nek têêng liêm bing m'beq bhanang matu aak ưng abhươp avuôq ađêi! Kabhuh kaxênh chapââr tôôh, dhong nooi ưng kaxênh karviêng, nôôq pe e mut paloh tââq rau xanêi janah ưng bóng óih palơq n'đó kơi? Ơi taai rau ađô, nek lêi tôôh, aku kayua nôôq manưih đââng taruuih, manưih tabech galang lơq manưih pachóóm gani bhral palơq nôôq pe. Tââq m'pơng kalóóng piđó, nôôq pe e leng chêt lơq teeng đinh, kung tââq m'pơng kalóóng piđó, nôôq pe e m'bhiiq vei kalóóng nôôq đong gươl ađêi lơq viêng dharuuh tââq kanóón ađô tơk kanóón tôôh, ng'kơi đóng ve chóóm tơk dhiq nôôq pe tabhơt ahaam bhơt liêm ơi bâân tantoh dhiq katiêk, tââq ahaam ưng A-bêên, manưih bhơt liêm, patơk ahaam ưng Xa-cha-ri, akóón padruuih Ba-ra-chi, manưih hơq nôôq pe ơi leng chêt m'pơng đong bhanuôih lơq para bhanuôih. Alua, aku praaq palơq nôôq pe, dyóp tarnêêng ađek e avaaih tơk dhiq klaang đơơi ađôk.
Jê-ru-sa-leem, Jê-ru-sa-leem, amei ơi leng chêt nôôq manưih đââng taruuih lơq glơm dhơl nôôq manưih bâân kayua tơk palơq amei! N'đó mơ chu aku kiêng panhoom karong akóón anaaq ưng amei lóóiq, ting kơi hơq atưưch kan kakrok akóón ađêi dhiq nanang, hơq amei kah đươi! Lêi nô, đong ưng nôôq pe e bâân lơơi lóóiq bhahi bhatoong đóng nôôq pe. Ơi aku praaq palơq nôôq pe, nôôq pe dhơ dhakơi e kah lêi Aku tââq ađôk patơk xók bhêêl nôôq pe praaq: ‘Bhi haanh Yaang bhral kalóóng dhanóók Chuôq!’”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.