Ma-thi-ơ 22:37

1Lơq ââi lóóiq, Chuôq Jê-su mưi chu dyơq praaq palơq piđó lơq, paraaq babi kơi ađô: 2“Katiêk pleng bâân babi kơi mưi nak bhua, hơq bhua achêk ravang ravưa bhiêk nhan kađiêl đóng akóón padruuih ađêi. 3Bhua kayua nôôq dhơn ratơơq ưng ađêi vôôiq buôn yua nôôq manưih ơi bâân kayua vôôiq cha bhiêk, hơq palââng kah kiêng vôôiq. 4Bhua vil kayua nôôq dhơn ratơơq lââng, kơi ađô: ‘Phaai móón palơq nôôq manưih ơi bâân kayua: “Lêi tôôh, aku ơi dhoon bhiêk ưng aku. Nôôq karók lơq adhah ramaq ưng aku ơi bâân paxêêt, lơq dyóp rau ơi ravang lơơi. Nek vôôiq palơq cha bhiêk.”’ 5Bơơi piđó yuur xooq taai kah ming mang, manưih ađô gluh leq hare ađêi, manưih tôôh malóóm tơk tarnêêng têêng malơơi ưng ađêi. 6Hơq nôôq dyơq lóóiq, xong xók kadhâng jư nôôq dhơn ratơơq ưng bhua, nek praaq bharlưưk lơq leng vóq. 7Kơi achêk hayơq, bhua bâân kabhróónh, hayơq xong xók kayua linh ađêi vôôiq, ađó ơi đóng leng kabhuh leng manưih ađek lơq óch kanóón ưng piđó. 8Xong ađek, bhua kayua nôôq dhơn ratơơq ưng ađêi: ‘Dhơ bhiêk nhan mamaai ơi ravang lơơi, bơơi nôôq manưih glêh bâân kayua ađek nek kah ve đaang. 9Kơi achêk, nek vôôiq tơk nôôq charlah kalơng, hayơq la nôôq pe lum dhơ dhangaai dhơ dhamơ chanak, nek bhiêk kayua tơk cha bhiêk.’ 10Lơq nôôq dhơn ratơơq ađek, xong xók vôôiq leq dhiq nôôq paleh kalơng, ơi pajươk karong tabhơt nôôq ngaai hơq piđó lum, nôôq môôp palơq liêm, hayơq đong bhiêk ơi bâân bing libhleq nôôq manưih tamóói. 11Bơơi xók mót buôn lêi nôôq tamóói tơơt cha, bhua lêi mưi chanak tôôh kah xơp n'đóh kun aau cha bhiêk. 12Bhua móón manưih ađek: ‘Ni parjơơk, ng'kơi dhơq amei mót leq ađô chóóm kah ve kun aau cha bhiêk?’ Bơơi manưih ađek kah chóóm ââi. 13Tââq ađek, bhua kayua nôôq dhơn ratơơq: ‘Phaai klooiq têi dyung ưng manưih ađô lóóiq hayơq m'peq ađó leq dhiq kanam kajeem leq tôôh, dhiq e ve đu nhiim griit lơq takachik kaniêng.’ 14Ơi bơk manưih bâân dhaloong, bơơi m'bưưiq manưih bâân chââih.”

15Bhêêl ađek, xong xók yuur xooq, nôôq manưih Pha-ri-si tapraaq chik mangê karnóq ng'kơi đóng piđó ve chóóm paxruuk Ađó kalóóng paraaq praaq. 16Piđó kayua nôôq môôn-đô ađêi, palơq nôôq manưih mađó kabhuh Hê-rôôt, tơk palơq Ađó, móón: “Thêi ơơi, nôôq yi n'nal kơi thêi nek manưih bhơt lóóm lơq truuih pachóóm ploong kalơng ưng Yaang Pleng palơq paraaq dhalam, lơq yươq ve rau bharni tơơt dhiq thêi leq bhơt dhơ dhangaai, ơi thêi yươq lêi dhiq hót nguôi ưng akóón manưih. 17Taai kơi achêk, nhan đóng nôôq yi n'nal thêi kanóq n'đó kơi? Ve chóóm goop jêên leq Sê-sa môôiq kah?” 18Bơơi taai ơi n'nal luônh lóóm môôp lơt ưng piđó, Chuôq Jê-su praaq: “Nôôq manưih mơ paliêm hót nguôi tôôh, hau nôôq pe klêêu aku? 19Nek đóng aku lêi đông jêên pagoop.” Piđó đââng leq Chuôq đông mưi đơ-ni-ê. 20Chuôq praaq palơq piđó: “A-ô lơq dhanóók achak ađô nek ưng ngaai?” 21Piđó ââi: “Ưng Sê-sa.” Bhêêl achêk, Chuôq praaq palơq piđó: “Kơi achêk, nek pachô leq Sê-sa nôôq dhơơm ưng Sê-sa, lơq leq Yaang Pleng nôôq dhơơm ưng Yaang Pleng.” 22Xong xók xâng paraaq achêk, piđó lóng chrih xâng, hayơq piđó yuur xooq, lơơi Ađó lóóiq.

23Mót tangêi achêk, nôôq manưih Sa-đu-sê tơk pađan Ađó, taai đóók móón nek kah ve rau mamông lóóiq, hayơq piđó ơi tamóh Ađó, 24kơi ađô: “Thêi ơơi, Môôi-se móón: ‘La mưi chanak ngaai ađek chêt xók kah ve akóón, nek adhi padruuih manưih achêk e pei kađiêl ưng anó lơq n'niên akóón leq anó ưng ađêi.’ 25Bơơi m'pơng nôôq yi ve tapól adhi anó padruuih, manưih taha tââm, xong xók bâân kađiêl, nek ơi chêt. Lơq ađó lơơi lóóiq kađiêl ưng ađó leq adhi ađêi xók kah ve akóón. 26Manưih đu bơơr hayơq manưih đu pe, patơk manưih đu tapól, kung kơi achêk. 27Hayơq tatun leq xariêq, manưih pađiil kung chêt. 28Kơi achêk, kalóóng tangêi mamông lóóiq, ađó e nek kađiêl ưng ngaai kalóóng tapól adhi anó? Ơi tabhơt piđó ơi pei ađó.” 29Bơơi xók ââi, Chuôq Jê-su praaq palơq piđó: “Nôôq pe talơt xraang aq, taai kah n'nal Bha-aar Yaang Pleng palơq mataai raman ưng Yaang Pleng. 30Ơi xók mamông lóóiq, palââng kah nhan kađiêl kung kah đóng akóón. Bơơi piđó nek thê kơi nôôq dhơn pleng dhiq pleng. 31Dyơq leq mamông lóóiq ưng đu chêt, nôôq pe kah glêh đok paraaq ơi bâân Yaang Pleng praaq palơq ađêi, kơi ađô: 32‘Aku nek Yaang Pleng ưng Ap-ra-haam, Yaang Pleng ưng I-saak lơq Yaang Pleng ưng Ja-kôôp’? Yaang Pleng eh rau nek ưng đu chêt, bơơi nek ưng manưih mamông.” 33Bhêêl xâng kơi achêk, manưih dhanuôr lóng chrih xâng leq paraaq pachóóm ưng Ađó.

34Hayơq nôôq manưih Pha-ri-si xong xók xâng kơi Ađó ơi têêng nôôq manưih Sa-đu-sê pat paraaq, nek ơi karong madhiq palơq xóng piđó. 35Mưi chanak kalóóng nôôq piđó, nek manưih pachóóm gani, ơi tamóh buôn klêêu Ađó — 36“Nhan tamóh thêi, n'đó gani pachóóm gamak tââm kalóóng gani?” 37Hayơq Ađó praaq palơq ađó ađek: “‘Phaai bhi nh'nhơr Chuôq, nek Yaang Pleng ưng akóón, palơq tabhơt tââq lóóm akóón, palơq tabhơt ravaai akóón lơq tabhơt karnóq akóón.’ 38Ađek nek gani pachóóm gamak lơq đu akiiq tââm. 39Hayơq gani pachóóm đu bơơr kung thê kơi achêk — ‘Phaai nh'nhơr manưih đan tóór ưng akóón kơi achak araang ađêi.’ 40Tabhơt dyóp gani lơq nôôq manưih đââng taruuih bâân tamưng dhiq bơơr gani pachóóm ađô.”

41Xók achêk, xong xók nôôq manưih Pha-ri-si bâân karong palơq xóng piđó, Chuôq Jê-su tamóh piđó, 42kơi ađô: “Nôôq pe kanóq ng'kơi leq Chuôq Paq Manưih? Ađó nek akóón ưng ngaai?” Piđó ââi Ađó: “Ưng bhua Đa-viit.” 43Chuôq praaq palơq piđó: “Kơi achêk ng'kơi chóóm hơq Đa-viit, kalóóng Yaang Liêm, đóók Ađó nek Chuôq, xók praaq:

44‘Chuôq praaq palơq Chuôq aku:

“Phaai tơơt dhiq hót tươm Aku,

patơk xók bhêêl Aku patơơt nôôq manưih brau ưng akóón raal dyung akóón”’?

45Kơi achêk la Đa-viit đóók Ađó nek ‘Chuôq,’ nek ng'kơi chóóm Ađó nek akóón bhua achêk?” 46Kah ngaai ve chóóm ââi lóóiq Ađó parleh parlâ, kung kah mưi chanak chanâ khin tamóh Ađó dyơq tư tââq tangêi vaar ađek.