Ma-thi-ơ 21

1Xók piđó đan tơk kanóón Jê-ru-sa-leem, lơq vôôiq tơk Bê-pha-jê, malóóm leq bôôl Ô-liiu, bhêêl achêk Chuôq Jê-su kayua bơơr môôn-đô, 2yua piđó: “Phaai vôôiq mót leq bhươl toom mat adhi anó, hayơq adhi anó e lêi dhalam mưi panong axeh kan bâân tadhâng, palơq mưi axeh akóón tơơt palơq ađó. Xong xók lêh tarlêi tadhâng, nek đââng tơk leq thêi. 3Lơq la ve ngaai ađek rau móón palơq adhi anó, nek adhi anó e praaq kơi ađô: ‘Chuôq ve kiêng vech ađó,’ hayơq manưih ađek e n'drươh lơơi piđó vôôiq.” 4Kơi lââng, tarnêêng ađô yuur vaaih buôn đóng paraaq ơi bâân praaq tapâng dhiq manưih đââng taruuih ve chóóm bâân tajaap kơi ađô:

5“Phaai móón akóón pađiil ưng Si-ôôn:

Lêi tôôh, Bhua amei vôôiq palơq amei,

pa-êêp ađêi lơq dhââng axeh

hơq nek dhiq mưi axeh akóón, akóón ưng axeh kan.”

6Xók achêk, nôôq môôn-đô, xong xók vôôiq lơq têêng i kơi Chuôq Jê-su ơi chaleq pachóóm piđó, 7ơi đââng axeh kan palơq axeh akóón chô, lơq bhalêêp aau chaguôk ưng ađêi dhiq axeh, hayơq Ađó dhââng dhiq ađek. 8Xók achêk, Bơk bhlơng nôôq manưih dhanuôr bhalêêp aau chaguôk ưng ađêi dhiq kalơng, hayơq masôôq lââng nek têch nôôq đóóng n'lóóng lơq yuur bhalêêp dhiq kalơng. 9Kơi achêk hayơq, nôôq tanóói bơk vôôiq laloom Ađó lơq ting tatun ơi yuur driêu, kơi ađô:

“Hô-sa-na Akóón bhua Đa-viit!

Đaang bhi haanh Yaang tơk kalóóng dhanóók Chuôq!

Hô-sa-na tơơt dhiq bhơt yaal!”

10Xong xók Ađó mót kalóóng kanóón Jê-ru-sa-leem, bhơt kanóón bâân nhôôn nhaauq, tamóh: “Ađek nek ngaai?” 11Kơi achêk hayơq tanóói dhanuôr ââi: “Achêk nek Jê-su manưih đââng taruuih, tââq Na-xa-reet, xưưq Ga-li-lê.”

12Chuôq Jê-su vôôiq mót kalóóng đong bhanuôih, hayơq Ađó đuôi tabhơt nôôq đu kơl baan kalóóng đong bhanuôih, lơq talâh tantoh baang ưng kabhuh raxal jêên palơq tanơơt ưng kabhuh baan paraap. 13Ađó praaq palơq piđó: “Paraaq ơi bâân xaraq: ‘Đong Aku e bâân đóók nek đong gavơh nhan,’ bơơi nôôq pe ơi têêng ađó xar gơơp tatông papei.” 14Hayơq nôôq manưih kabaang lơq manưih khuch tơk đan Ađó kalóóng đong bhanuôih, lơq Ađó payươh đóng piđó. 15Bơơi nôôq takóh kala kadhâng bhanuôih lơq nôôq manưih pachóóm gani, xong ơi lêi nôôq tarnêêng chrih liêm hơq Ađó ơi têêng, lơq kabhuh akóón paniên driêu gahơ kalóóng đong bhanuôih, kơi ađô: “Hô-sa-na Akóón bhua Đa-viit,” piđó vaaih kabhróónh. 16Piđó praaq palơq Ađó: “Thêi ve xâng piđó praaq harau kah?” Bơơi Chuôq Jê-su ââi piđó: “Ve! Nôôq pe kah mơ glêh đok kơi ađô: ‘Chuôq ơi loom ravang lơơi rau bhi haanh tââq bóóp ưng nôôq paniên katưưiq lơq nôôq paniên dyơq mam,’ dhơq?” 17Xong ơi xooq lơơi piđó, Ađó vôôiq gluh tââq kanóón tơk Bê-tha-ni lơq dhêi hayum dhiq ađek.

18Tơk brương, xók val chô leq kanóón, nek Ađó ha-ul. 19Xong xók lêi mưi tââm tarung tóór kalơng, Ađó vôôiq tơk n'lóóng achêk lơq lêi na kah ve rau dhiq ađó chapiên axơq hơq giêl. Chuôq praaq palơq ađó: “Pale kah mơ ve dyơq dhiq amei patơk nh'chró,” lơq N'drươh, n'lóóng tarung ađek yoot rang. 20Lêi kơi achêk hayơq, nôôq môôn-đô chrih lêi, móón: “Ng'kơi têêng hơq n'lóóng tarung ơi n'drươh yoot rang?” 21Hayơq xók ââi, Chuôq Jê-su praaq palơq piđó: “Alua, thêi praaq palơq adhi anó, la adhi anó ve lóóm huuiq lơq yươq paangra, nek adhi anó e chóóm têêng eh mơ rau ađô leq n'lóóng tarung, hơq patơk mơ la adhi anó kayua palơq bôôl ađô: ‘Phaai bâân tahayuur lơq bâân m'peq leq taxiiq,’ nek tarnêêng achêk e yuur vaaih. 22Dyóp rau, tabhơt nôôq dhơ dharau n'đó adhi anó mââl nhan kalóóng paraaq gavơh nhan, nek adhi anó e bâân đơơp xók huuiq ganơơm.”

23Lơq xók Ađó ơi mót kalóóng đong bhanuôih, nôôq takóh kadhâng bhanuôih bhơt liêm palơq nôôq takóh bhươl kalóóng manưih dhanuôr tơk lum Ađó dyơq xók Ađó truuih pachóóm, tamóh: “N'đó tââq karơ mataai thêi têêng nôôq tarnêêng ađô? Lơq ngaai ơi đóng thêi karơ mataai achêk?” 24Bơơi buôn ââi paraaq, Chuôq Jê-su praaq palơq piđó: “Aku kung nek tamóh nôôq pe mưi xayar, hơq la nôôq pe ve chóóm ââi paraaq Aku, nek Aku kung e praaq đóng nôôq pe n'nal xók Aku têêng nôôq rau ađô n'đó tââq karơ mataai. 25Pheep bap-teem ưng Jang — pheep achêk nek n'đó tââq? Tââq pleng môôiq tââq akóón manưih?” Kơi achêk hayơq, piđó tapraaq palơq xóng piđó, kơi: “La nôôq he móón: ‘Tââq pleng,’ nek ađó e praaq palơq nôôq he: ‘Kơi achêk ơi taai hau hơq nôôq pe kah huuiq ađó?’ 26Hayơq la nôôq he ââi: ‘Tââq akóón manưih,’ nek nôôq he kakhin manưih dhanuôr, ơi tabhơt piđó lêi Jang nek mưi manưih đââng taruuih.” 27Hayơq xók ââi paraaq Chuôq Jê-su, piđó móón: “Nôôq yi kah n'nal.” Ađó kung ââi piđó: “Aku kung kah đóng nôôq pe n'nal Aku têêng nôôq tarnêêng ađô n'đó tââq karơ mataai. 28Kơi achêk bơơi, nôôq pe kanóq ng'kơi? Mưi chanak ve bơơr akóón padruuih, lơq xong xók tơk palơq chanak đu mưi, ađó kayua: ‘Avok ơơi, mađôk amei nek vôôiq têêng tarnêêng dhiq bhươn nho.’ 29Hơq xók ââi lóóiq, ađó móón: ‘Aku kah vôôiq,’ bơơi xong ađek, xók ơi dhơ karnóq, nek ađó vôôiq. 30Hayơq xong xók tơk lum chanak đu bơơr, akonh praaq i kơi achêk. Hayơq xók ââi paraaq, ađó móón: ‘Ve akóón, ơơq ama,’ hơq ađó ađek kah vôôiq. 31Ngaai kalóóng bơơr akóón padruuih ađek ơi têêng kơi karnóq kiêng ưng akonh ađêi?” Piđó ââi: “Chanak đu laloom.” Chuôq Jê-su praaq palơq piđó: “Alua, Aku móón nôôq pe kơi, nôôq đu pagoop jêên lơq pađiil baan achak vôôiq mót kalóóng katiêk ưng Yaang Pleng laloom nôôq pe. 32Ơi Jang ve bhral palơq nôôq pe kalóóng kalơng đu bhơt liêm, hơq nôôq pe kah huuiq ađó. Hayơq nôôq đu pagoop jêên lơq pađiil baan achak nek huuiq ađó. Bơơi nôôq pe, dhơ ve lêi, ơi kah klôôq lóóm xong ađek buôn huuiq ađó.

33Nek xâng mưi babi lââng. Ve mưi chanak kala katiêk, nek manưih ơi choh mưi bhươn nho, têêng garóóng praang xirvir bhươn achêk, uôch bóng galiq buôh kalóóng ađek, têêng pơơq đương jư lơq đóng kabhuh choh nho mươn ađó, hayơq ađó vôôiq leq changaai. 34Xók achêk, mót bhêêl nil leh pale nho đan tơk, ađó kayua nôôq manưih dhơn ratơơq ađêi tơk palơq kabhuh choh nho buôn pei phơn pale bhakó ưng ađó. 35Hơq xók kadhâng jư kabhuh dhơn ratơơq ưng kala ơi, kabhuh choh nho m'bhiiq chanak ađô, leng chanak tôôh, glơm dhơl chanak atêêh. 36Ađó vil kayua nôôq dhơn ratơơq lââng tơk, bơk lơh kabhuh laloom, hơq piđó têêng palââng i kơi achêk. 37Hayơq tatun kiêt, ađó kayua chênh akóón padruuih ađêi tơk palơq piđó, kơi ađô: ‘Piđó e bhi chap akóón padruuih ađêi.’ 38Bơơi kabhuh choh nho, xong xók lêi chanak akóón achêk, ơi tapraaq palơq xóng piđó: ‘Ađô nek chanak đu đơơp drươp. Vêq, nôôq he phaai leng ađó hayơq pei pakala drươp karvaan ưng ađó.’ 39Bhêêl kadhâng jư chanak akóón hayơq, piđó m'peq ađó pagluh tââq bhươn nho lơq leng vóq. 40Kơi achêk, xók manưih kala bhươn nho tơk, ađó e hau têêng palơq kabhuh choh nho achêk?” 41Piđó móón palơq Chuôq: “Ađó achêk e leng tabhơt kabhuh lơt aak tôôh kơi janah ka-ai, hayơq e đóng nôôq manưih choh nho lââng têêng bhươn, nek nôôq manưih e goop lóóiq đóng ađó phơn pale malơơi mót nil leh ưng piđó.” 42Chuôq Jê-su praaq palơq piđó: “Kah alua nôôq pe kah glêh đok kalóóng Bha-aar Yaang Pleng:

‘Khuk dhơl hơq nôôq thơơq têêng m'peq lơơi,

ađó ơi bâân val xar dhơl đu tââm ưng n'tól đong.

Tarnêêng ađô avaaih tơk tââq Chuôq,

lơq ađó alua nek kre liêm kalóóng mat nôôq he?’

43Ơi taai ađôk, Aku praaq palơq nôôq pe kơi katiêk ưng Yaang Pleng e bâân pei ha-ơu tââq nôôq pe lơq e bâân đóng leq mưi dhanuôr chaq jơr bóóng pale ưng katiêk achêk. 44Ngaai kalơm pâng khuk dhơl ađô e bâân bhriq lêêk. Hayơq khuk dhơl n'tôq pâng ngaai dhiq, ađó e đươn lêêk manưih ađek.” 45Xong xók xâng nôôq paraaq babi ưng Ađó, nôôq takóh kadhâng bhanuôih bhơt liêm lơq nôôq manưih Pha-ri-si xâng n'nal kơi Chuôq xók praaq leq piđó. 46Xók tabâân kơi kóóp Chuôq, piđó vil nek kakhin kabhuh bơk, taai manưih dhanuôr lêi Chuôq nek mưi manưih đââng taruuih.