Katu Bible Literal Text
Ma-thi-ơ 14
Mót bhêêl ganah ađek, Hê-rôôt bhua katưưiq xâng tanđôôr leq Chuôq Jê-su. Bhua praaq palơq nôôq dhơn ratơơq ađêi: “Achêk nek Jang Bap-tiit. Ađó chêk ơi bâân têêng mamông lóóiq tââq kan chêt, hayơq taai ađek, nôôq tarnêêng mataai karơ xók vôôiq veq dhiq manưih ađô.” Taai Hê-rôôt, xong xók kóóp Jang, ơi đóng klooiq ađó lơq król leq đong kanam, ơi taai Hê-rô-đia, kađiêl ưng Phi-liip, adhi padruuih bhua. Taai Jang ơi praaq palơq bhua: “Leq phơn bhua, kah chóóm pheep pei akan ađek.” Lơq dhơ kiêng leng ađó achêk vóq, bơơi bhua kakhin manưih dhanuôr, taai palââng lêi Jang kơi mưi manưih đââng taruuih. Bơơi xók tơk cha bhiêk hei tangêi n'niên ưng Hê-rôôt, akóón pađiil ưng Hê-rô-đia tanâât yayaq dhiq m'pơng cha bhiêk lơq têêng iêm lóóm Hê-rôôt, taai kơi achêk, bhua ơi hươq nek palơq mưi paraaq ng'kóh buôn đóng leq akóón pađiil hơq hau rau đu akóón pađiil nhan. Xók achêk, xók ơi bâân paxuq laloom ađek tââq akan ađêi, akóón pađiil móón: “Nhan đóng akóón n'drươh dhiq ađôk, akoq ưng Jang Bap-tiit kađôôq dhiq pươih.” Lơq dhơ lóng ranguôq lóóm, bơơi ơi taai paraaq ng'kóh ưng ađêi lơq nôôq kuôn tamóói palơq tơơt cha, bhua ơi kayua buôn akóón pađiil bâân ve đóng. Xong xók kayua manưih vôôiq, bhua đóng têch akoq Jang kalóóng đong kanam. Akoq ưng ađó bâân đââng tơk kađôôq dhiq pươih hayơq bâân pajaau đóng akóón pađiil, lơq akóón pađiil đââng leq akan ađêi. Xók ơi bâân tarlum, nôôq môôn-đô ưng ađó pei xaak lơq tơp buur ađó. Lơq bhêêl ơi vôôiq tơk, palââng truuih lóóiq leq Chuôq Jê-su.
Xók achêk, xók bâân xâng, Chuôq Jê-su xooq tââq ađek kalóóng mưi beq bhuông vôôiq tơk dhiq bhahi bhatoong tơơt n'tua mưi ađêi. Taai xâng n'nal kơi achêk, nôôq tanóói dhanuôr tââq nôôq kanóón vôôiq dyung ting Ađó. Lơq xong xók yuur vôôiq, Ađó lêi mưi tanóói dhanuôr ganơr bơk, nek vaaih lóóm kayô ka-er palơq nôôq manưih dhanuôr lơq Ađó payươh nôôq manưih ka-ai dhur ưng piđó. Xók achêk, xók tơk habu blót, nôôq môôn-đô tơk palơq Ađó, móón: “Dhiq ađô nek bhahi bhatoong, lơq bhêêl ađô nek ơi ravang blót. Nhan thêi đóng tanóói dhanuôr buôn xók chô tơk nôôq bhươl hayơq, piđó ve chóóm kơl tarmông đóng ađêi.” Bơơi Chuôq Jê-su móón palơq piđó: “Piđó kah ve kiêng yuur chô. Adhi anó phaai đóng piđó chacha.” Bhêêl achêk, piđó móón palơq Ađó: “Dhiq ađô nôôq yi kah ve rau lơh tââq xââng beq beng lơq bơơr panong kadhóóng.” Hayơq Ađó kayua: “Nek đââng nôôq ađek tơk leq ađô đóng thêi.” Lơq xók kayua đóng tanóói dhanuôr tơơt chok leq dhiq bhơơi xong, bhêêl kadhâng xââng beq beng lơq bơơr panong kadhóóng, chaling mat leq pleng, Ađó ma-ơơn, lơq veh, Ađó pađơơp tarmông đóng nôôq môôn-đô, hayơq nôôq môôn-đô nh'xóóng đóng tanóói dhanuôr. Tabhơt dhanuôr piđó ơi cha lơq bâân kabhôôq kajrê. Hayơq palââng chââih phơn xưa lóóiq tââq nôôq beng veh lêêk — đuôh majêt bơơr jong bing. Xók achêk, nôôq manưih cha nek mơ xââng ngaan manưih padruuih, kah xêi pađiil parkan lơq paniên katưưiq.
N'drươh ađek, Ađó hôôiq kayua nôôq môôn-đô jađaang mót kalóóng bhuông lơq vôôiq loom Ađó chaang tóór hót tôôh, xók bhêêl Ađó dyơq kayua tanóói dhanuôr chô. Bhêêl ơi đóng manưih dhanuôr chô, Ađó vôôiq đơk leq bôôl buôn tư praaq chiên n'tua. Tơk kanam, Ađó tơơt dhiq ađek mưi ađêi. Hayơq beq bhuông tơơt dhiq m'pơng taxiiq ơi nek bâân ga-uul đơơk n'dhươi karơ taai adhiiq chachriik. Xók achêk, mót đan brương hayum achêk, Ađó tơk palơq piđó, xók vôôiq dyung dhiq taxiiq. Bơơi xong xók lêi Ađó bhadyaang vôôiq dhiq taxiiq, nôôq môôn-đô bâân kakhin bhlơng, móón kơi ađô: “Ađek nek abhưi,” hayơq piđó yuur reen dheek kalóóng kakhin kapơn bhlơng. Kơi achêk nek, Chuôq Jê-su n'drươh yuur praaq lơq piđó kơi ađô: “Tamưng lóóm nek! Nô thêi ađôk. Óóq kakhin!” Xók achêk, xók ââi lóóiq Ađó, Phi-e-rơ móón: “Kakoh Chuôq, la nek thêi, nhan kayua đóng aku vôôiq dhiq đơơk tơk palơq thêi.” Hayơq Ađó kayua: “Nek vôôiq aq.” Lơq xong xók jađaang lơh tââq bhuông, Phi-e-rơ ơi jađaang vôôiq dhiq đơơk buôn tơk palơq Chuôq Jê-su. Bơơi xók lêi adhiiq karơ, ađó kakhin bhlơng, lơq bhêêl tââp ravang klêch n'dhương, ađó yuur lalơu kơi ađô: “Chuôq ơơi, nhan trôông aku!” N'drươh nek, xong xók yuur jarơ têi, Chuôq Jê-su pei dyuôch Phi-e-rơ lơq móón ađó: “Ađô manưih m'bưưiq lóóm huuiq, ơi taai harau hơq amei paangra?” Bhêêl piđó jađaang dyók leq bhuông hayơq, adhiiq parngau pruung. Hayơq nôôq manưih kalóóng bhuông nek bhuôih kakoh Ađó, kơi ađô: “Alua, thêi nek Akóón Yaang Pleng.”
Bhêêl vôôiq kóh hót tôôh ơi, piđó tơk leq tóór dhiq Gê-nê-xa-rêêt. Xong xók n'nal Ađó, manưih dhanuôr tơơt dhiq achêk kayua manưih đââng truuih tơk plok parah paroong praang xirvir ađek, lơq palââng đââng tơk leq Ađó dyóp ngaai đu dhuôr ka-ai. Piđó nhan Ađó mơ buôn ađêi ve chóóm xuui leq grưưi aau ưng Ađó, lơq nek dhơ dhangaai mơ xuui nek bâân yươh ka-ai.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.