Ma-thi-ơ 15

1Tââq ađek, nôôq manưih Pha-ri-si lơq thêi pachóóm gani tââq Jê-ru-sa-leem tơk palơq Chuôq Jê-su, móón kơi ađô: 2“Hau kơi nôôq môôn-đô ưng thêi têêng lơt nôôq taruuih hanua ưng nôôq takóh taha? Taai kabhuh piđó kah raau têi xók chacha.” 3Bơơi xók ââi lóóiq, Ađó praaq palơq piđó: “Hau kơi nôôq pe vil têêng lơt gani pachóóm ưng Yaang Pleng ơi taai nôôq taruuih hanua ưng ađêi? 4Ơi Yaang Pleng ve truuih pachóóm kơi ađô: ‘Phaai bhi nh'nhơr akonh akan ưng amei,’ lơq ‘Ngaai đu tóh taaiq akonh môôiq akan phaai leng chêt ađó ađek.’ 5Bơơi nôôq pe móón: ‘Ngaai đu praaq palơq ama môôiq amêêq ađêi: “La hau rau tư tââq akóón ve chóóm malơơi đóng amêêq ama maar nek bhanuôih ơi yuur tapôông leq Yaang Pleng,”’ 6nek manưih ađek e tabhơt yươq rau bhi nh'nhơr ama ađêi. Kơi achêk, nôôq pe ơi m'peq lơơi paraaq Yaang Pleng ơi taai taruuih hanua ưng ađêi. 7Kabhuh paliêm hót nguôi tôôh! Ê-saai ơi loom móón lóng pâng leq nôôq pe, kơi ađô:

8‘Dhanuôr ađô bhi chap Aku dhiq bưưr bóóp kachrooch n'taak,

bơơi lóóm piđó nek changaai tââq Aku.

9Hơq piđó bhuôih haanh Aku kơi kah malơơi,

xók pachóóm nôôq paraaq taruuih nek nôôq gani ưng akóón manưih.’”

10Hayơq xong xók dhaloong tanóói dhanuôr tơk, Chuôq praaq palơq piđó: “Nek xâng lơq n'nal: 11Yươq hau rau vôôiq mót kalóóng bóóp têêng đóng anhuq mưi chanak. Bơơi nek rau tââq bóóp gluh, rau ađô têêng đóng anhuq manưih achêk.” 12Xong ađek, xók ơi tơk đan, nôôq môôn-đô móón palơq Ađó: “Thêi n'nal kơi nôôq manưih Pha-ri-si ơi lêi bâân têêng tamôôp xong xók xâng paraaq achêk kah?” 13Bơơi xók ââi bóóp Ađó praaq: “Dyóp n'lóóng hơq Ama dhiq pleng ưng thêi kah choh e bâân rôôq tabhơt. 14Kê piđó nek! Piđó nek nôôq manưih đu kađââng kabaang kapôk. Hơq la manưih kabaang kađââng manưih kabaang, nek miq bơơr e n'tôq leq harlaang.” 15Xók achêk xók ââi lóóiq, Phi-e-rơ móón palơq Chuôq: “Nhan lók đóng nôôq yi paraaq babi achêk.” 16Bơơi Ađó praaq: “Pađơq mơ tơk bhêêl ađô, adhi anó kung kah n'nal kơq? 17Adhi anó kah n'nal kơi dyóp rau vôôiq mót kalóóng bóóp nek vôôiq dhaluônh leq luônh hayơq bâân vôôiq gluh kalóóng đong kapóóng kah lua? 18Bơơi nôôq rau dhơơm gluh tââq bóóp vaaih gluh tââq kalóóng lóóm, lơq piđó têêng đóng anhuq akóón manưih. 19Ơi tââq lóóm vaaih gluh nôôq karnóq môôp lơt, leng manưih, têêng tapiing, têêng taniêt, tatông papei, truuih chachââr lơq nôôq paraaq kah matich. 20Ađek nek nôôq rau têêng đóng anhuq manưih, dyơq cha palơq têi kah raau nek yươq têêng đóng anhuq akóón manưih.”

21Hayơq xong xók vôôiq gluh tââq ađek, Chuôq Jê-su róch chô leq nôôq xưưq ưng Ti-rơ lơq Si-đôôn. 22Lơq lêi tôôh, mưi pađiil parkan manưih Ka-na-aan, xong xók tââq xưưq ađek bhral, ơi dhaloong lalơu, kơi ađô: “Kakoh Chuôq, Akóón bhua Đa-viit, nhan kayô ka-er aku! Akóón pađiil aku bâân abhưi bóq lóng xaryô bhlơng.” 23Bơơi Chuôq kah ââi lóóiq ađó m'paleh m'palâ. Xong xók tơk đan Chuôq, nôôq môôn-đô gavơh nhan Chuôq, kơi ađô: “Nhan thêi kayua pađiil ađek vôôiq aq, taai ađó bhiêk dhaloong lalơu hót hóng nôôq he.” 24Hayơq bhêêl ââi bóóp Chuôq praaq: “Thêi ơi yươq bâân kayua tơk, la eh rau đóng nôôq trưưu xraang ưng đong I-sơ-ra-êên.” 25Bơơi xong xók tơk, ađó achêk chakoh tarkól toom Chuôq, móón: “Kakoh Chuôq, nhan paq jóói aku.” 26Xók achêk, xók ââi lóóiq, Chuôq praaq: “Pei beng ưng akóón anaaq hayơq bhơt đóng akóón anuq nek kah kre.” 27Bơơi akan achêk ââi: “Kakoh Chuôq, pâng kơi achêk, chapiên nek chênh tabhơt nôôq akóón anuq nek bâân cha tââq nôôq paleh lêêk ruuh n'tôq tââq baang kala ưng piđó.” 28Bhêêl ađek, buôn ââi lóóiq, Chuôq Jê-su praaq palơq ađó: “Nô manưih pađiil tôôh, lóóm huuiq ưng amei gamak bhlơng. Tarnêêng phaai bâân vaaih đóng amei ting kơi amei kiêng.” Lơq akóón pađiil ưng ađó bâân payươh tââq bhêêl ađek.

29Xong xók yuur vôôiq lơh parah achêk, Chuôq Jê-su vôôiq chóók taxiiq Ga-li-lê, lơq bhêêl đơk dhiq mưi kachruôch bôôl hayơq, Ađó tơơt dhiq ađek. 30Hayơq nôôq tanóói dhanuôr bơk vôôiq đơk palơq Ađó, ve nôôq manưih khuch, manưih kabaang, manưih dyóói arool, manưih bơq, lơq bơk manưih lââng nek palơq piđó. Palââng đââng lơơi nôôq manưih ađek dhiq dyung Ađó lơq Ađó payươh đóng piđó, 31Tơk mơ, tanóói dhanuôr hêq lêi xók lêi manưih bơq chóóm praaq, manưih dyóói arool nek yươh liêm, manưih khuch jađaang vôôiq lơq manưih kabaang chóóm lêi, hayơq piđó bhi haanh Yaang Pleng ưng I-sơ-ra-êên.

32Xók achêk, xong xók dhaloong nôôq môôn-đô vôôiq leq ađêi, Chuôq Jê-su praaq: “Thêi kayô ka-er palơq tanóói dhanuôr, taai piđó ơi tơơt palơq thêi pe tangêi ơi hơq kah ve rau buôn cha. Thêi kah kiêng đóng piđó chô luônh ha-ul, vaaih piđó e nek chabươp dhiq chóók kalơng.” 33Nôôq môôn-đô ââi palơq Ađó: “Kalóóng kruung vơng nek tââq ve gluh bơk beng kơi achêk buôn nôôq yi đóng tanóói dhanuôr bơk kơi tôôh cha kabhôôq?” 34Chuôq Jê-su praaq palơq piđó: “Adhi anó ve mơ beq beng?” Hayơq piđó ââi: “Tapól beq, lơq nôôq panong kadhóóng katưưiq.” 35Lơq xong xók kayua đóng tanóói dhanuôr tơơt chok leq katiêk, 36Ađó kadhâng tapól beq beng lơq nôôq panong kadhóóng, lơq xong xók ma-ơơn, Ađó veh pađơơp đóng nôôq môôn-đô, hayơq nôôq môôn-đô chêk-nh'xóóng đóng tanóói dhanuôr. 37Dhanuôr piđó maar cha lơq bâân kabhôôq kajrê. Piđó karong tapól jong bing phơn xưa ưng nôôq beng lêêk. 38Xók achêk, parbơk manưih cha nek puôn ngaan manưih padruuih, kah kê pađiil parkan lơq akóón paniên. 39Xók ơi đóng manưih dhanuôr chô, Ađó mót kalóóng bhuông lơq vôôiq tơk parah Ma-ga-đaan.