Maak 14

1Xók achêk, xong bơơr tangêi dyơq nek bhiêk Jalơh lơq bhiêk Beng Kah Ve Piêng, nôôq takóh kadhâng bhanuôih palơq thêi pachóóm gani xók tabâân n'đó kơi, buôn xong xók kóóp jư Ađó kơi lalââp, piđó ve chóóm leng Ađó vaq. 2Ơi piđó praaq: “Kah chóóm têêng kalóóng tangêi bhiêk, kakhin nhôôn nhaauq e yuur vaaih kalóóng manưih dhanuôr.”

3Xók bhêêl Chuôq tơơt dhiq Bê-tha-ni, kalóóng đong ưng Si-môôn, manưih ka-ai tơơt bhơơi, Ađó xók tơơt dhiq baang chacha nek mưi pađiil vôôiq tơk, đââng katiêu m'beq klóng dhơu lơq ngok kađôôq dhơu kaam tung yươq taklaai, lóng mat jêên. Xong xók m'poh bhriq m'beq klóng, pađiil haling dhơu ađek leq akoq Ađó. 4Bơơi m'pơng kalóóng piđó, ve masôôq manưih vaaih pagrâ: “Ơi ng'hau hơq ve chiên ramuôh pahư dhơu thum ađô? 5Taai dhơu ađô ve chóóm baan bâân lơh pe hariêng đơ-ni-ê hayơq đóng nh'xóóng leq manưih ngeeo.” Piđó trêh teng pađiil. 6Bơơi Chuôq Jê-su praaq: “Phaai lơơi pađiil achêk tem. Hau adhi anó têêng pagei pađiil achêk? Ađó ơi yuur têêng mưi tarnêêng liêm đóng thêi. 7Ơi adhi anó taluôn ve manưih ngeeo tơơt palơq ađêi, lơq dhơ dhaxók adhi anó kiêng adhi anó ve chóóm têêng tarnêêng liêm đóng piđó, bơơi adhi anó e kah ve thêi taluôn. 8Ađó ơi têêng tarnêêng hơq ađó ve chóóm. Ađó ơi ravang laloom buôn xut xaak thêi leq tơk tarnêêng tơp buur. 9Alua, thêi praaq palơq adhi anó, dhơ dharau Taruuih Liêm bâân truuih pachóóm n'đó dhiq leq plok hóng katiêk nek tarnêêng hơq pađiil ađô ơi têêng kung e bâân truuih lóóiq kalóóng rau hei tơk leq ađó.”

10Hayơq Ju-đa Ich-ka-ri-ôôt, mưi kalóóng majêt bơơr sưưq-đô, yuur vôôiq tơk palơq nôôq takóh kadhâng bhanuôih buôn ađó ve chóóm pajaau Chuôq leq piđó. 11Xók achêk, xong xók xâng kơi achêk, piđó lóng yayar lơq hươq đóng ađó baak. Hayơq ađó tabâân ng'kơi đu kre buôn tamôôp pajaau Chuôq.

12Leq tangêi đu tarnââp ưng bhiêk Beng Kah Ve Piêng, xók palââng tapôông bhanuôih adhah trưưu akóón bhiêk Jalơh, nôôq môôn-đô Ađó praaq palơq Ađó: “Thêi kiêng nôôq yi vôôiq ravang n'đó dhiq đóng thêi ve chóóm cha bhiêk Jalơh?” 13Hayơq Ađó kayua bơơr kalóóng nôôq môôn-đô ađêi, lơq praaq palơq nhiđó: “Phaai vôôiq mót kalóóng kanóón, lơq mưi manưih kadyaaq angóók đơơk e lum adhi anó. Phaai vôôiq ting ađó ađek. 14La ađó ađek mót n'đó đong, phaai praaq palơq kala đong kơi ađô: ‘Thêi kayua: “Buông tamóói ưng aku, dhiq aku ve chóóm cha bhiêk Jalơh palơq nôôq môôn-đô ađêi, tơơt n'đó dhiq?”’ 15Kala đong e chaleq adhi anó mưi beq buông gamak dhiq gaak ơi bâân rapaq ravang lơơi, lơq phaai ravang đóng nôôq yi dhiq ađek.” 16Kơi achêk nek nôôq môôn-đô yuur vôôiq lơq vôôiq mót leq kanóón, hayơq piđó lêi dyóp tarnêêng i-kơi Ađó ơi praaq palơq piđó, lơq piđó ravang vaar cha bhiêk Jalơh.

17Xók ơi tơk habu blót, Ađó vôôiq tơk nek palơq majêt bơơr sưưq-đô. 18Xók piđó tơơt tóór baang cha lơq chacha vaar, Chuôq Jê-su praaq: “Alua, thêi praaq palơq adhi anó kơi mưi chanak kalóóng adhi anó, nek manưih xók cha palơq thêi, e tamôôp thêi.” 19Piđó tââp ranguôq lóóm lơq manưih ađô tơk manưih tôôh tamóh palơq Ađó: “Dhakơi eh rau nek aku alua?” 20Bơơi Ađó praaq palơq piđó: “Ađek nek mưi kalóóng majêt bơơr adhi anó, manưih xók tươm beng leq choom nek palơq thêi. 21Ơi Akóón Manưih e vôôiq dhalam kơi paraaq ơi bâân xaraq leq Ađó, bơơi đaang ngi tóh đóng manưih hơq taai ađó, Akóón Manưih bâân tamôôp pajaau! Nh'jang ađó ađek óóq yuur vaaih nek kre lơh đóng ađó.”

22Xók dyơq piđó chacha, xong xók pei beng, ma-ơ, Ađó pei veh, pađơơp leq piđó lơq praaq: “Phaai pei đơơp. Ađô nek achak araang ưng thêi.” 23Lơq xong xók pei choom, ma-ơ, Ađó pađơơp leq piđó, lơq piđó maar ơm dhiq choom achêk. 24Ađó praaq palơq piđó: “Ađô nek ahaam raket bóóp ưng thêi, nek ahaam bâân n'toh đóng bơk manưih. 25Alua, thêi praaq palơq adhi anó, kơi thêi dhơ dhakơi kah dyơq ơm đơơk tââq pale ưng n'lóóng nho dyơq đóng tơk tangêi ađek, nek xók thêi ơm đơơk nho tame kalóóng katiêk Yaang Pleng.”

26Xong xók babóóch mưi guôp haanh Yaang Pleng, piđó yuur vôôiq malóóm tơk bôôl Ô-liiu. 27Chuôq Jê-su praaq palơq piđó kơi ađô: “Tabhơt adhi anó e n'đóih kalơm, kơi ve xaraq kơi ađô:

‘Aku e m'bhiiq manưih jư,

nek trưưu e bâân xooq xraang.’

28Bơơi xong xók thêi ơi bâân têêng đóng mamông lóóiq, thêi e vôôiq laloom adhi anó tơk Ga-li-lê.” 29Bơơi Phi-e-rơ móón palơq Ađó: “Patơk mơ dhơ dyóp ngaai e bâân n'đóih kalơm, bơơi aku nek kah mơ.” 30Chuôq Jê-su praaq palơq ađó: “Alua, thêi móón amei, kơi tangêi ađôk — dhalam hayum ađôk — laloom xók atưưch gôông takar bơơr guôp, amei e dyiin thêi pe chu.” 31Bơơi ađó móón kơi parâng: “La pa-eep aku chêt nek palơq thêi, aku dhakơi e kah dyiin thêi.” Xók achêk, tabhơt piđó kung maar móón kơi achêk.

32Hayơq piđó vôôiq tơk mưi dhiq, achak dham ađek nek Gêêt-sê-ma-nê, lơq Ađó praaq palơq nôôq môôn-đô ađêi: “Phaai tơơt dhiq ađôk xók bhêêl thêi nhan gavơh.” 33Ađó đââng Phi-e-rơ, Ja-kơ, lơq Jang ting vôôiq palơq Ađó, hayơq Ađó tââp vaaih ranguôq karnóq lơq pabhlơng nhok nhói. 34Ađó praaq palơq piđó: “Yaang ravaai ưng thêi xók ranguôq bhlơng, patơk mơ chêt vaq. Phaai bhiêk tơơt dhiq ađôk lơq meh lóóm.” 35Hayơq vôôiq changaai kơơq lơh m'bưưiq, Ađó gim mat leq katiêk lơq nhan gavơh kơi, la ve chóóm đuôh, nhan bhêêl ađek lơh tââq Ađó. 36Ađó móón: “A-ba, Ama ơơi, palơq Ama dyóp tarnêêng maar nek ve chóóm. Nhan pei lơơi choom ađô tââq akóón. Bơơi eh rau nek rau akóón kiêng, hơq nek rau Ama kiêng.” 37Hayơq Ađó val lóóiq lơq lêi piđó dyơq bêch, hayơq Ađó payuur Phi-e-rơ: “Si-môôn, Amei bêch hơ? Amei kah đuôh meh lóóm mưi jơ chóóm alua? 38Phaai meh lóóm lơq nhan gavơh, buôn adhi anó yươq mơk leq dharơơl galơơk. Lóóm karnóq nek lalua kiêng, bơơi achak araang vil druôi nhưh.” 39Mưi chu dyơq, xók ơi yuur vôôiq, Ađó nhan gavơh, móón nôôq paraaq markơi ahei. 40Lơq machu dyơq, xók val lóóiq, Ađó lêi piđó xók bêch, ơi mat piđó haleng jarliq, lơq piđó kah n'nal rau đóng ââi paraaq Ađó. 41Hayơq Ađó tơk machu đu pe lơq praaq palơq piđó: “Adhi anó dyơq bhiêk bêch lơq dhêi drơq hơ? Dyóp aq! Jơ ơi tơk. Phaai lêi aq! Akóón Manưih ravang bâân tamôôp pajaau leq têi manưih ve matu. 42Phaai yuur dyương, hêq vôôiq. Lêi tôôh, manưih tamôôp aku ơi tơk đan.” 43N'drươh ađek, xók Ađó bhiêk dyơq papraaq, Ju-đa, mưi kalóóng majêt sưưq-đô, vôôiq tơk lơq nek palơq ađó nek mưi kabhuh ting kadhâng bhươt dhaau lơq tarlââng bhaniiq, yuur vôôiq tââq dham nôôq takóh kadhâng bhanuôih, nôôq thêi pachóóm gani lơq nôôq takóh bhươl. 44Xók achêk, manưih têêng tamôôp Ađó ơi đóng piđó mưi kanal, kơi ađô: “Ngaai n'đó hơq aku chum nek chênh nek ađó ađek. Phaai kóóp ađó ađek lơq đââng vôôiq kơi chagơn.” 45Kơi achêk nek, bhêêl ơi tơk dham, n'drươh, xong xók ruul tơk Chuôq, ađó móón: “Ra-bi,” hayơq ađó chum Chuôq. 46Xók achêk, nôôq piđó kadhâng têi dhiq Ađó lơq kóóp kađaai Ađó. 47Bơơi mưi chanak tôôh kalóóng nôôq manưih dyương đan, xong xók thuôt pagluh bhươt, ơi ruul m'preh dhơn ratơơq ưng takóh kadhâng bhanuôih lơq têch tatươt katór ađó ađek. 48Ââi lóóiq tarnêêng kóóp kađaai, Chuôq Jê-su praaq palơq piđó: “Nôôq pe yuur vôôiq nek palơq bhươt kóóih lơq tarlââng bhaniiq buôn kóóp aku kơi ngóq tajơl lóóiq mưi manưih papei alua? 49Dyóp tangêi aku tơơt palơq nôôq pe bhêêl truuih pachóóm kalóóng đong bhanuôih, hơq nôôq pe kah kóóp aku. Dhơ kơi ađek, ađôk nek buôn paraaq Bha-aar Yaang Pleng bâân tarjaap.” 50Xong xók lơơi lóóiq Ađó, tabhơt piđó maar mut klôôn.

51Mưi n'dhóm tôôh vôôiq ting Chuôq, biêh chapiên xơp m'beq aau chaguôk bhaai lenh dhuum praang achak, lơq piđó kóóp kađaai ađó, 52bơơi xong xók m'peq lóóiq m'beq aau chaguôk, ađó ađek lalôh lalut mut xooq.

53Nôôq piđó đââng Chuôq Jê-su tơk dhiq takóh kadhâng bhanuôih bhơt liêm, lơq tabhơt nôôq takóh kala kadhâng bhanuôih, nôôq takóh bhươl, palơq nôôq thêi pachóóm gani maar karong gaboq lóóiq. 54Hayơq Phi-e-rơ ting Ađó tââq đu changaai, mót tơk dhiq hót kalóóng taang ưng takóh kadhâng bhanuôih bhơt liêm, hayơq ađó tơơt palơq nôôq linh đương jư lơq haang pangan tóór par-aang óih. 55Xók achêk, nôôq takóh kala kadhâng bhanuôih lơq pabhơt Kabhuh xêi xanêi Jo Thaaiq xók tabâân pakah lơt pâng jaklâk lóóiq Chuôq Jê-su buôn đââng Ađó mót dham chêt, hơq piđó kah rau bâân lêi. 56Ơi bơk ngaai truuih đuui chachââr jaklâk lóóiq Ađó, hơq paraaq truuih ưng piđó nek kah markơi xóng piđó. 57Bơơr pe chanak, xong xók yuur dyương, truuih đuui chachââr jaklâk lóóiq Ađó, xók praaq 58kơi ađô: “Nôôq yi xâng ađó ađek praaq nek ‘Aku e rơh pahư đong bhanuôih tââq têi manưih yuur têêng ađô, hayơq kalóóng pe tangêi aku e têêng mưi đong bhanuôih lââng eh tââq têi manưih chóóm têêng.’” 59Dhơ kơi achêk, chênh tabhơt leq tarnêêng ađô, nek paraaq truuih ưng piđó kung kah markơi. 60Hayơq xong xók yuur dyương dhiq m'pơng dyóp ngaai, takóh kadhâng bhanuôih bhơt liêm tamóh Chuôq Jê-su kơi ađô: “Hau amei kah ââi marau marâ? Nôôq manưih ađô truuih đuui jaklâk lóóiq amei hau rau?” 61Bơơi Ađó bhiêk parngau lơq kah ââi marau marâ. Takóh kadhâng bhanuôih bhơt liêm lóóiq tamóh Ađó, lơq ađó praaq palơq Chuôq: “Amei ve lua nek Chuôq Paq Manưih, Akóón ưng Yaang đaang bhi haanh, eh?” 62Xók achêk, Chuôq Jê-su praaq: “Chênh nek aku; hayơq nôôq pe e lêi Akóón Manưih tơơt hót tươm Yaang Mataai Karơ

lơq bhral dhiq m'pơng nôôq garboq dhaluk pleng.”

63Kơi achêk hayơq xong xók heek tanteek aau ađêi, takóh kadhâng bhanuôih bhơt liêm praaq: “Nôôq he hau hayơq đươi leq manưih truuih đuui dyơq? 64Nôôq pe ve xâng paraaq chôlô ơi. Nôôq pe ng'kơi kanóq?” Kơi achêk hayơq pabhơt maar yuur kaauq Chuôq nek manưih đaang chêt. 65Masôôq manưih tââp gahaak kathui leq Ađó, kapit mat Ađó lơq m'bhiiq m'bhah Ađó, hayơq praaq palơq Ađó: “Praaq taruuih loom ngi lêi!” Nôôq linh đương jư kung pei chabit Ađó hơq m'pah.

66Xók bhêêl Phi-e-rơ tơơt dhiq taang, mưi kalóóng nôôq dhơn ratơơq pađiil ưng takóh kadhâng bhanuôih bhơt liêm ruul tơk dham ađó. 67Bhêêl lêi Phi-e-rơ haang óih pangan, xók lêi pagiit ađó, pađiil achêk móón: “Amei kung tơơt palơq Jê-su, manưih Na-xa-reet.” 68Bơơi ađó dyiin, móón kơi ađô: “Aku kah n'nal, kung kah n'nal amei papraaq hau rau.” Hayơq ađó vôôiq gluh leq taang. 69Manưih ratơơq pađiil ơi ve lêi ađó vil tââp praaq palơq nôôq manưih xók dyương dhiq ađek kơi ađô: “Manưih ađô nek mađó kabhuh ađek!” 70Bơơi ađó dyiin machu dyơq. Maxưưiq tatun ađek, nôôq manưih dyương ađek vil praaq palơq Phi-e-rơ: “Dhakơi amei mađó leq kabhuh nôôq manưih ađek, ơi amei kung nek manưih Ga-li-lê.” 71Bơơi ađó tââp tóh lơq ng'kóh kơi ađô: “Aku kah n'nal manưih ađek, đu manưih hơq nôôq pe praaq tơk.” 72N'drươh atưưch gôông takar chu đu bơơr lơq Phi-e-rơ yuur hei paraaq hơq Chuôq Jê-su ơi praaq palơq ađó kơi ađô: “Xók loom atưưch gôông takar bơơr guôp, amei e dyiin thêi pe chu,” hayơq xók bhêêl karuôq luônh lóóm, ađó bhrêq nhiim.