Maak 13

1Xók bhêêl Ađó xooq tââq đong bhanuôih, mưi kalóóng nôôq môôn-đô Ađó móón palơq Ađó: “Thêi ơơi, lêi tôôh! Nôôq bhangôh dhơl pơq gamak n'nal mơ lơq nôôq tarnêêng liêm kre n'nal đơq!” 2Chuôq Jê-su praaq palơq môôn-đô achêk: “Amei lêi nôôq dhanong đong mangi magrauq ađô kah? E kah dyơq talơơi mưi n'đó bhangôh dhơl tơơt dhiq ađôk bâân lơơi tagơơn dhiq bhangôh dhơl lââng hơq dhơl achêk e yươq bâân pahư halơm.”

3Lơq xók bhêêl Ađó tơơt dhiq bôôl Ô-liiu chaang-gan đong bhanuôih, Phi-e-rơ, Ja-kơ, Jang lơq En-rê tamóh pantua Ađó: 4“Nhan thêi praaq đóng nôôq yi, n'đó bhêêl nôôq tarnêêng achêk e yuur vaaih? Lơq ve kanal harau xók dyóp rau ađek ravang bâân tarjaap?” 5Xók achêk, Chuôq Jê-su gluh paraaq praaq palơq piđó: “Phaai chagơn, óóq buôn ngaai kađââng chơơng adhi anó vôôiq lơt xraang. 6Bơk manưih e tơk vơn dhanóók thêi, praaq kơi ađô: ‘Nek aku ađôk,’ lơq piđó e kađââng chơơng bơk manưih vôôiq lơt xraang. 7Hayơq xók adhi anó xâng leq tarvei taleng lơq taruuih tanđôôr leq tarvei taleng, nek óóq karaang kakhin; rau ađek phaai yuur vaaih, bơơi eh rau nek tatun xariêq. 8Ơi dhanuôr ađô e yuur dyương jaklâk lóóiq dhanuôr lââng, lơq katiêk ađô jaklâk lóóiq katiêk tôôh. E ve dha-ơr katiêk dhiq bơk dham, e ve bơk ganah ha-ul. Bơơi tarnêêng ađek nek tââp tarnââp ưng nôôq bhêêl ka-ai ayaai.

9Mat lââng, chênh adhi anó phaai hêch lêi. Palââng e pajaau adhi anó đóng kabhuh xêi xanêi lơq đóng leq đong gươl, adhi anó e bâân vei m'bhiiq, e dyương toom kabhuh têêng gamak lơq nôôq bhua ơi taai thêi, kơi mưi paraaq truuih đuui đóng piđó. 10Lơq laloom tââm, Taruuih Liêm phaai bâân truuih pachóóm đóng dyóp dhanuôr manưih. 11Xók palââng kóóp đââng adhi anó vôôiq pajaau, óóq karaang leq paraaq ađêi phaai praaq. Dhơ kơi ađek, la n'đó paraaq bâân đóng leq adhi anó kalóóng bhêêl ađek, nek phaai praaq paraaq achêk; ơi adhi anó eh rau nek manưih xók praaq, bơơi nek Chuôq Yaang Liêm. 12Anó e pajaau adhi leq dham chêt, ama nek pajaau akóón. Hayơq akóón anaaq e yuur vaaih jaklâk tajơl ama amêêq lơq têêng piđó bâân leng chêt. 13Adhi anó e bâân dyóp ngaai gaam geet taai dhanóók ưng thêi. Bơơi ngaai mưng lóóm đóng tơk tatun xariêq, manưih ađek e bâân paq.

14Mat lââng, xók adhi anó lêi rau harek haper ưng tarlum bhahi bhatoong ve mat dhiq dham kah chóóm ve (manưih đok phaai n'nal), nek nôôq ngaai tơơt dhiq xưưq Ju-đê phaai mut klôôn leq bôôl, 15hayơq ngaai tơơt dhiq pabhung đong, óóq dhaluônh kung óóq mót kalóóng buôn pei dhơ dharau gluq tââq đong ađêi, 16lơq ngaai tơơt dhiq klung, óóq palâh val chô palơq nôôq rau dyơq hót hóng buôn pei aau chaguôk ưng ađêi. 17Bơơi ayô xarngaat đóng pađiil xók ve đađââng lơq pađiil đóng akóón mam kalóóng nôôq tangêi achêk! 18Palâh lóóiq, phaai nhan gavơh buôn tarnêêng ađek yươq yuur vaaih leq nil khau. 19Ơi kalóóng nôôq tangêi ađek e ve bhrê hư tơk meen kah glêh ve kơi achêk tư tââq tââp tarnââp tavaaih, nek xók Yaang Pleng tavaaih dyóp rau đóng tơk ađô, lơq kung e kah chóóm mơ ve lóóiq. 20Lơq la Chuôq kah karóch pa-êêp nôôq tangêi achêk, dyóp rau ve parhââm e kah bâân paq. Bơơi ơi taai nôôq manưih bâân chââih, nek nôôq manưih Ađó ơi chââih, Ađó kut paxruiq sôôq tangêi ađek. 21Bhêêl achêk, la ve ngaai praaq palơq adhi anó: ‘Lêi ađô, Chuôq Paq Manưih dhiq ađô! Lêi tôôh, dhiq hót tôôh!’ nek óóq huuiq. 22Ơi chuôq paq manưih chachââr lơq manưih đââng taruuih chachââr e bâân yuur vaaih, hayơq e yuur pakah nôôq kanal tame lơq mataai chrih buôn, la ve chóóm, têêng đóng lơt xraang nôôq manưih bâân chââih. 23Bơơi adhi anó phaai hêch lêi! Phaai lêi ađô, thêi ơi đóng adhi anó n'nal loom dyóp tarnêêng aq.

24Dhơ kơi ađek, mót nôôq tangêi achêk, xong đu bhrê hư ađek,

mat tangêi nek kanam kanheet,

mat bharương e kah pakah kalaaq brương dhiq ađó;

25nôôq xatur xamenh e tââq pleng n'tôq,

lơq nôôq praan karơ dhiq pleng e bâân dha-ơr dhakơp.

26Bhêêl xók achêk, palââng e lêi Akóón Manưih palơq mataai raman lơq cha-iil tabah gamak bhlơng jaq tơk m'pơng nôôq garboq dhaluk. 27Tatun ađek, Ađó e kayua nôôq dhơn pleng lơq Ađó e panhoom karong lóóiq nôôq manưih bâân chââih ưng Ađó plok puôn charhóóng, tââq xariêq katiêk đóng patơk parluch pleng.

28Mat lââng, phaai hok n'nal babi tââq n'lóóng tarung. Xók đóóng ađó val xar ramaanh lơq chamat xơq aq, adhi anó n'nal kơi nil hapaang ơi đan. 29Kung kơi achêk, xók adhi anó lêi nôôq tarnêêng ađek yuur vaaih, adhi anó n'nal kơi Ađó xók tơơt đan, pa-ô toom palóng. 30Alua, thêi praaq palơq adhi anó kơi klaang đơơi ađôk dhakơi e yươq lơh bil đóng patơk bhêêl dyóp tarnêêng achêk yuur vaaih. 31Pleng lơq katiêk e lơh bil, bơơi nôôq paraaq ưng Thêi dhakơi e yươq lơh bil. 32Hayơq leq tangêi ađek môôiq bhêêl ađek, chapiên Ama, nek kah ngaai bâân n'nal, patơk mơ nôôq dhơn pleng dhiq pleng kung kah, lơq Akóón kung kơi achêk.

33Phaai hêch lêi! Phaai meh lóóm lơq nhan gavơh, taai adhi anó kah n'nal xók bhêêl ađek nek nh'xók. 34Thê kơi mưi manưih tôôh yuur vôôiq changaai đong, xók ơi vôôiq tââq đong ađêi, lơq ơi pajaau đóng dyóp dhơn ratơơq ađêi kataai jư lêi tarnêêng ưng ađêi, nek ađó pató manưih jư palóng kơi ađó achêk phaai đương meh. 35Taai ađek, phaai meh lóóm, taai adhi anó kah n'nal n'đó xók kala đong chô tơk — môôiq leq habu hayum, môôiq bhêêl m'pơng hayum; môôiq xók atưưch takar môôiq leq yayóng yayương; 36e kơi xong xók parmat chô tơk, kala bâân lum adhi anó xók bêch. 37Bơơi rau hơq thêi praaq palơq adhi anó, thêi kung praaq palơq dyóp ngaai: ‘Phaai meh lóóm!’”