Maak 12

1Ađó tââp praaq palơq piđó palơq babi: “Mưi manưih tôôh choh bhươn nho, gróóng garóóng praang xirvir, uôch bóng galiq buôh, têêng mưi móóng đương jư, lơq đóng nôôq manưih choh nho muôt lóóiq bhươn, hayơq yuur vôôiq leq changaai. 2Tơk nil leh pale, ađó kayua mưi dhơn ratơơq tơk palơq kabhuh choh nho buôn tââq nôôq manưih ađô, ađó ve chóóm đơơp mưi phơn yưưm malơơi ưng bhươn. 3Hơq xong xók kóóp kadhâng ađó ađek, nôôq piđó m'bhiiq m'bhah hayơq viêng chô têi kagóh. 4Ađó vil kayua mưi dhơn ratơơq đu lââng tơk palơq nôôq piđó, lơq palơq manưih ađek, piđó m'bhiiq leq akoq lơq tóh taaiq ađó. 5Hayơq ađó kayua dhơn ratơơq lââng dyơq, palơq ađó achêk, nôôq piđó leng chêt, lơq palơq bơk manưih lââng — bhêêl m'bhiiq m'pah manưih ađô, xók leng chêt manưih tôôh. 6Ađó ve mưi nak dyơq, nek akóón padruuih nh'nhơr bhlơng, ađó kayua ađó achêk, manưih tatun kiêt, tơk palơq nôôq piđó, kanóq kơi ađô: ‘Nôôq piđó e bhi chap akóón padruuih ađêi.’ 7Bơơi kabhuh choh nho ađek tapraaq palơq xóng piđó kơi ađô: ‘Ađôk nek akóón đơơp karvaan. Hêq vôôiq, nôôq he phaai leng ađó, hayơq drươp karvaan e nek ưng nôôq he.’ 8Kơi achêk nek xong xók kóóp jư, kabhuh piđó leng akóón padruuih achêk, hayơq m'peq ađó pagluh leq nguôi bhươn nho. 9Kơi achêk hayơq, kala bhươn nho e hau têêng? Ađó e tơk leng kaxiêt kabhuh choh nho lơq pajaau bhươn nho đóng nôôq manưih lââng. 10Nôôq pe kah glêh đok paraaq ađô kalóóng Bha-aar Yaang Pleng hơ?

‘Kaliêng dhơl hơq thơơq têêng đong m'peq lơơi,

dhơl ađek ơi bâân val xar dhơl n'tól đong.

11Tarnêêng ađô tơk tââq Chuôq,

lơq achêk nek tarnêêng mataai chrih kalóóng mat nôôq he.’”

12Kơi achêk nek piđó tabâân kơi kóóp Ađó hơq piđó kakhin manưih dhanuôr, ơi piđó n'nal kơi Ađó truuih babi ađek galeeng leq piđó. Hayơq xók xooq tââq Ađó, piđó yuur vôôiq.

13Hayơq piđó kayua nôôq manưih mađó kabhuh Pha-ri-si lơq mađó kabhuh Hê-rôôt tơk palơq Ađó buôn kabhuh piđó paxruuk Chuôq kalóóng bóóp praaq. 14Xók tơk, piđó móón palơq Ađó: “Thêi ơơi, nôôq yi n'nal kơi thêi nek manưih dhalam tapat lơq dhiq thêi, kah ve chiên patui ting dhơ dhangaai, taai thêi yươq lêi leq hót nguôi ưng palââng, klóóih leq ađek, thêi pachóóm pató kalơng ưng Yaang Pleng pâng ting paraaq dhalam. Ve pâng gani môôiq kah xók pagoop jêên đóng Sê-sa? Nôôq he chóóm pagoop môôiq kah chóóm pagoop?” 15Bơơi taai n'nal keen paliêm bóóp hót nguôi ưng piđó, Ađó praaq palơq piđó: “Hau nôôq pe vil klêêu aku? Phaai đââng đóng aku mưi đơ-ni-ê buôn aku lêi.” 16Kơi achêk nek piđó đââng tơk mưi đông jêên. Hayơq Ađó praaq palơq piđó: “A-ô lơq dhanóók achak ađô nek ưng ngaai?” Piđó ââi palơq Ađó: “Ưng Sê-sa.” 17Xók achêk, Chuôq Jê-su praaq kayua piđó: “Phaai pachô đóng Sê-sa rau dhơơm ưng Sê-sa, lơq pachô đóng Yaang Pleng rau dhơơm ưng Yaang Pleng.” Piđó maar hêq lêi toom Ađó.

18Hayơq kabhuh manưih Sa-đu-sê, nek nôôq manưih praaq kơi kah ve rau mamông lóóiq, tơk palơq Ađó lơq tamóh Ađó, kơi ađô: 19“Thêi ơơi, Môôi-se ơi xaraq đóng nôôq he kơi ađô: ‘La anó ưng mưi ngaai ađek chêt lơơi lóóiq kađiêl hơq kah ơi ve akóón, nek adhi ưng manưih anó phaai pei manưih kađiêl achêk lơq patet dhong nooi đóng anó ađêi.’ 20Ve tapól adhi anó achêk, manưih anó taha pei kađiêl hayơq chêt, kah ve akóón. 21Manưih tadhi đu bơơr pei pađiil achêk, hayơq chêt, kah ve akóón, lơq manưih đu pe kung kơi achêk. 22Luch tapól chanak maar kah ve akóón. Patơk xariêq, manưih pađiil kung chêt. 23Tơk bhêêl mamông lóóiq, xók piđó mamông lóóiq, pađiil tôôh e nek kađiêl ưng ngaai kalóóng nôôq piđó? Taai tapól nak maar ơi pei pađiil achêk têêng kađiêl.” 24Chuôq Jê-su praaq palơq piđó: “Kah alua nôôq pe bâân kađââng vôôiq xraang lơt taai rau ađô hơ, taai kah n'nal Bha-aar Yaang Pleng kung kơi mataai karơ ưng Yaang Pleng? 25Ơi xók palââng tââq akan chêt mamông lóóiq, palââng kah pei môôiq đơơp, bơơi piđó e thê kơi nôôq dhơn pleng dhiq pleng. 26Hayơq leq tarnêêng manưih chêt bâân mamông lóóiq, ve kơq nôôq pe kah ơi đok kalóóng bha-aar ưng Môôi-se, dhiq phơn xaraq truuih leq tââm xông, ng'kơi hơq Yaang Pleng praaq palơq ađó kơi ađô: ‘Aku nek Yaang Pleng ưng Ap-ra-haam, Yaang Pleng ưng I-saak, lơq Yaang Pleng ưng Ja-kôôp’? 27Ađó eh rau nek Yaang Pleng ưng manưih chêt, hơq nek ưng manưih mamông. Nôôq pe xók ađôk bâân lơt lóng gamak.”

28Xók mưi kalóóng nôôq thêi pachóóm gani ơi tơk đan, bâân xâng piđó xók tarkaai xóng piđó, lêi kơi Ađó ââi nôôq manưih tôôh lóng parhei, nek ađó tamóh Chuôq: “N'đó nek gani pachóóm kiiq tââm kalóóng tabhơt gani?” 29Chuôq Jê-su ââi kơi ađô: “Gani pachóóm kiiq tââm nek: ‘I-sơ-ra-êên ơơi, phaai xâng ađô, Chuôq, Yaang Pleng nôôq he, nek Chuôq mưi giêl 30Akóón phaai nh'nhơr chap Chuôq nek Yaang Pleng ưng akóón palơq pabhơt kalóóng lóóm ađêi, palơq pabhơt yaang ravaai ađêi, palơq pabhơt karnóq ađêi, lơq palơq pabhơt praan karơ ađêi.’ 31Gani pachóóm đu bơơr nek ađôk: ‘Akóón phaai nh'nhơr manưih đan griêq ưng akóón kơi achak ađêi.’ Kah ve gani pachóóm đu lââng gamak lơh bơơr rau ađô.” 32Thêi pachóóm gani praaq palơq Chuôq: “Dhalam bhlơng, thêi ơơi! Thêi ơi praaq ting paraaq dhalam kơi Ađó nek mưi giêl, lơq kah ve chuôq đu lââng nguôi Ađó. 33Bhi nh'nhơr Ađó palơq bhơt luônh lóóm, palơq tabhơt tarbech n'nal, nek palơq tabhơt praan karơ, lơq tanhơr manưih đan griêq kơi chênh ađêi patơk mơ ve liêm lơh dyóp bhanuôih boh bhơt lơq adhah bhuôih.” 34Xong xók lêi ađó, taai ađó ơi ââi lóóiq kơi tarbech galang, Chuôq Jê-su praaq palơq ađó: “Amei yươq rau changaai tââq katiêk ưng Yaang Pleng.” Lơq kah ngaai hayơq khin tamóh Ađó dyơq.

35Buôn ââi lóóiq, xók bhêêl truuih pachóóm kalóóng taang đong bhanuôih, Chuôq Jê-su praaq: “N'đó kơi dhơq nôôq thêi pachóóm gani móón kơi Chuôq Paq Manưih nek akóón bhua Đa-viit? 36Chênh bhua Đa-viit, kalóóng Chuôq Yaang Liêm, ơi praaq:

‘Chuôq praaq palơq Chuôq aku:

“phaai tơơt hót atươm Aku,

đóng tơk n'đó xók Aku patơơt nôôq manưih brau Akóón raal dyung ưng Akóón.”’

37Chênh Đa-viit đóók Ađó nek ‘Chuôq,’ nek ng'kơi Ađó nek akóón ưng bhua chêk chóóm?” Tanóói dhanuôr bơk tameng xâng Ađó kơi bhuui lóóm.

38Kalóóng rau truuih pachóóm ưng ađêi, Ađó praaq: “Phaai hêch palơq nôôq thêi pachóóm gani, nek nôôq manưih malóóch kiêng vôôiq dyương kalóóng kun aau yaal, nôôq paraaq yayar tamóh m'pơng chơơq, 39dham tơơt dhiq tarhơơnh kalóóng đong gươl palơq dham hót malo dhiq bhiêk bhaan. 40Nôôq manưih ađek lâân đong ưng pađiil kamaai, têêng pathê nhan gavơh pađươnh. Nôôq manưih ađô e đơơp bha-aar xêi matu haleng lơh.”

41Hayơq xók ơi tơơt chaang-gan dham lơơi hôk kađôôq jêên ưng đong bhanuôih, Ađó chamet lêi manưih dhanuôr chrooq jêên leq hôk n'đó kơi. Bơk manưih kavaan tuul chrooq nôôq jêên gamak. 42Xók mưi pađiil kamaai ngeeo vôôiq tơk, amooq chrooq tuul bơơr đông jêên katưưiq, janaaq kiêng mađơq nek mưi xu. 43Xong xók dhaloong nôôq môôn-đô ưng ađêi lóóiq, Ađó praaq palơq piđó: “Alua, thêi praaq palơq adhi anó kơi pađiil kamaai ngeeo ađô ơi tapôông bơk lơh tabhơt nôôq manưih ơi chrooq jêên leq hôk tôôh. 44Ơi tabhơt piđó maar tapôông tââq rau xưa raai ưng ađêi, bơơi amooq achêk, tââq kalóóng rau ngeeo kadhaap, ưng ađêi, ơi tapôông luch tabhơt amooq ve, hơq dyóp rau koom lơơi buôn ban mamông ađêi.”