Skip to content
BibleKenya

Katu Bible Literal Text

Maak 15

Nham mót vaar yayóng tarưưp, bhêêl nôôq takóh kadhâng bhanuôih ơi tavaaih pahoop palơq nôôq takóh bhươl palơq nôôq thêi pachóóm gani palơq pabhơt Kabhuh xêi xanêi Jo Thaaiq, nek xong xók klooiq Chuôq Jê-su, piđó đââng Ađó vôôiq lơq pajaau đóng Phi-laat. Phi-laat tamóh Ađó: “Amei nek Bhua dhanuôr Jo Thaaiq eh alua?” Bơơi xók ââi ađó, Chuôq móón: “Chênh amei praaq kơi achêk.” Hayơq nôôq takóh kala kadhâng bhanuôih kaauq patu Ađó bơk rau. Xók achêk, Phi-laat vil tamóh Ađó, kơi ađô: “Amei kah ââi lóóiq marau marâ hơ? Phaai lêi, piđó xók kaauq patu amei bơk n'nal đơq!” Bơơi Chuôq Jê-su kah dyơq ââi lóóiq n'đó paraaq dyơq, tơk mơ Phi-laat lêi lóng chrih.

Mat lââng, mót dhalam bhiêk, ađó buôn đóók paloh đóng manưih dhanuôr mưi chanak tơơt đong kanam hơq piđó gavơh nhan. Xók achêk, ve mưi chanak bâân đóók nek Ba-ra-ba xók bâân tơơt đong kanam nek palơq nôôq manưih têêng panhôôn, nek nôôq manưih têêng matu leng manưih kalóóng đu nhôôn nhaauq. Xong xók maru tơk, kabhuh bơk tââp nhan kayua ađó kơi ađó buôn têêng đóng piđó. Xók achêk, Phi-laat tamóh piđó, kơi ađô: “Nôôq pe kiêng aku paloh Bhua dhanuôr Jo Thaaiq đóng nôôq pe kah?” Ơi ađó ađek n'nal kơi nôôq takóh kadhâng bhanuôih ơi đââng pajaau Ađó taai lóóm geet makhinh. Bơơi nôôq takóh kadhâng bhanuôih paxuq manưih dhanuôr buôn klóóih leq ađek, ađó ađek phaai paloh Ba-ra-ba đóng piđó. Dhơ kơi ađek, xók tamóh lóóiq, Phi-laat praaq palơq piđó: “Kơi achêk nek, hau aku phaai têêng palơq manưih hơq nôôq pe đóók nek Bhua dhanuôr Jo Thaaiq ađôk?” Xók achêk, manưih dhanuôr vil lalơu karơ: “Phaai teeng đinh ađó dhiq n'lóóng m'baang chatông.” Bơơi, Phi-laat praaq palơq piđó: “Taai hau rau đu aak manưih ađô ơi têêng?” Dhơ kơi ađek, palââng dhaang treeh karơ lơh: “Phaai teeng đinh ađó dhiq n'lóóng m'baang chatông.” Xók achêk, taai kiêng têêng iêm lóóm manưih ganơr, Phi-laat ơi paloh Ba-ra-ba đóng piđó lơq ađó đóng đââng Chuôq Jê-su vôôiq buôn xong xók m'bhiiq, nek Ađó bâân teeng đinh.

Bhêêl ađek, kabhuh linh garuiq Ađó mót kalóóng đong kuôn (chênh nek đong kuôn gamak) lơq dhaloong tabhơt kabhuh linh karong kaboq lóóiq, hayơq piđó paguôk leq Ađó mưi beq aau parhóm bhrôông ngót, hayơq tapơơng đóng Ađó mưi beq panơơng palơq axông piđó ơi gavương, lơq piđó tââp chap yayar Ađó: “Driêu gahơ Bhua dhanuôr Jo Thaaiq!” Kơi achêk hayơq, piđó m'bhiiq leq akoq Ađó palơq tarlââng lơq gahaak kathui leq Ađó, lơq chakoh takól leq katiêk bhuôih haanh Ađó. Bhêêl kabhuh piđó ơi ajóóch Ađó xong, piđó lôh m'peq tââq Ađó beq aau parhóm bhrôông ngót lơq paxơp aau ưng Ađó đóng leq Ađó, hayơq đââng Ađó vôôiq buôn piđó teeng đinh Ađó dhiq n'lóóng m'baang chatông. Piđó kóóp mưi nak vôôiq dhiq kalơng tôôh, achak nek Si-môôn, manưih Si-reen (ama ưng A-lek-xan-đơ lơq Ru-phu), tââq bhươl đơk, buôn ađó đuôl n'lóóng m'baang chatông ưng Chuôq.

Piđó đââng Ađó tơk Gô-gô-tha (mưi dhiq dham hơq ađó ve kiêng móón nek “Dham Paliing Akoq”). Piđó đóng Ađó ơm buôh bâân kaluk palơq dyet thum, bơơi Ađó kah ơm. Hayơq piđó teeng đinh Ađó lơq tablah xóng ađêi aau ưng Ađó palơq kơi thuôt padhơơch đóng ađêi, lêi ngaai bâân n'đó phơn. Bhêêl ađôk nek jơ đu pe, piđó teeng đinh Ađó. Ađôk nek tala papaan xaraq matu ưng Ađó, ơi bâân xaraq: “Bhua Dhanuôr Jo Thaaiq.” Piđó kung teeng đinh bơơr chanak tatông nek palơq Ađó, mưi nak tơơt hót atươm, hayơq manak tôôh tơơt hót ađaai Ađó. (Paraaq Bha-aar Yaang Pleng ơi bâân tarjaap, kơi ađô: “Ađó bâân xêi madhiq palơq nôôq manưih kah vaaih gani.”) Nôôq manưih val vôôiq praaq bharlưưk Ađó, tangơr akoq ađêi lơq praaq: “Ơ hơ! Đu panong pahư đong bhanuôih hayơq têêng lóóiq kalóóng pe tangêi, phaai tư paq ađêi palơq dhaluônh tââq n'lóóng m'baang chatông aq!” Kung kiêng markơi achêk, nôôq takóh kadhâng bhanuôih palơq nôôq thêi pachóóm gani, markơi ting praaq ajóóch Ađó, piđó praaq: “Ađó paq chóóm bơk manưih lââng, bơơi ađó kah chóóm tư pei paq ađêi. Chuôq Paq Manưih, Bhua ưng I-sơ-ra-êên, bhêêl ađôk phaai dhaluônh tââq n'lóóng m'baang chatông aq, buôn nôôq yi lêi hơq huuiq.” Nôôq manưih bâân tateeng đinh nek palơq Ađó kung praaq ajóóch Ađó.

Tơk jơ đu chapat, đu kanam kanheet yuur vaaih dhuum plok katiêk đóng tơk jơ đu takiêh. Mót jơ đu takiêh, Chuôq Jê-su lalơu karơ dhariêng: “Ê-lô-i, Ê-lô-i, la-ma sa-bech-tha-ni?” paraaq achêk ve kiêng móón nek: “Yaang Pleng aku ơơi, Yaang Pleng aku ơơi, hau taai Amei chóóm lơơi aku?” Xók xâng kơi achêk, nôôq manưih dyương đan ađek praaq: “Lêi tôôh, ađó nek dhaloong Ê-li.” Kơi achêk hayơq, mưi nak ađek, xong xók yuur mut tươm bing đơơk kadyuôq leq tapô taxiiq, tabóq dhiq tóóng ale, ađó achêk đóng leq Ađó ơm, móón: “Phaai bhiêk lơơi mak kơi ađó, lêi Ê-li ve tơk đââng ađó dhaluônh kah.” Xók achêk, xong xók ơi yuur lalơu mưi dhariêng karơ, Chuôq Jê-su pat parhââm xariêq. Lơq bhaai paryoong kalóóng đong bhanuôih bâân tanteek têêng bơơr tââq piing leq raal. Bhêêl ađôk manưih kadhâng akoq linh, ađó dyương dhiq hót toom Chuôq, xók ơi lêi kơi Chuôq pat parhââm xariêq kơi achêk, ađó praaq: “Lalua, manưih ađôk nek Akóón ưng Yaang Pleng.” Kung ve nôôq manưih pađiil dyương lêi tââq changaai, kalóóng sôôq piđó ve Ma-ri Ma-đơ-leen, Ma-ri (amêêq Ja-kơ katưưiq lơq Jô-sê) nek palơq Sa-lô-mê, nek nôôq manưih hơq xók Ađó dyơq tơơt dhiq Ga-li-lê, piđó ơi vôôiq ting Ađó lơq têêng yaauq Ađó, hayơq bơk pađiil lââng dyơq ơi ting vôôiq đơk palơq Ađó tơk Jê-ru-sa-leem.

Bhêêl ơi tơk habu blót aq, taai tangêi ađek nek Tangêi Ravang Ravưa, hơq nek tangêi laloom tangêi Sa-baat, Jô-seep, nek manưih tââq xưưq A-ri-ma-thê, mưi chanak đaang bhi kalóóng Kabhuh Xêi Xanêi, kung chênh nek manưih xók đương rââm katiêk ưng Yaang Pleng, xók ơi tơk dham, ađó grâ lóóm mót lum Phi-laat lơq tamóh nhan xaak Chuôq Jê-su. Xók achêk, Phi-laat lóng chrih xâng la alua nek Ađó ơi chêt aq, lơq xong xók dhaloong manưih kadhâng akoq linh, ađó tamóh manưih achêk lêi kơi Chuôq ơi chêt mơ đươnh. Bhêêl ơi n'nal giit rau tarnêêng tââq manưih kadhâng akoq linh, ađó ađek pajaau xaak đóng Jô-seep. Xong xók kơl bhaai lenh, đââng Ađó padhaluônh tââq n'lóóng m'baang chatông, ađó pươr Chuôq lóóiq palơq bhaai achêk, lơq tabêch Chuôq leq mưi beq ping ơi bâân phaaq kalóóng bhangôh dhơl. Hayơq ađó talâh mưi bhangôh dhơl kađơp palóng ping. Bhêêl achêk, Ma-ri Ma-đơ-leen lơq Ma-ri amêêq ưng Jô-sê ơi ting lêi dham Ađó bâân tơp buur.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.