Lu-ka 3

1Mót kamó đu majêt xââng raal bhua Sê-sa Ti-be-rơ — xók dyơq Bôôn-xơ Phi-laat têêng kuôn gamak kadhâng xưưq Ju-đê, Hê-rôôt têêng bhua katưưiq xưưq Ga-li-lê, dyơq Phi-liip, adhi padruuih ađó ađek têêng bhua katưưiq xưưq I-tu-rê palơq xưưq Tra-kô-niit, lơq Li-sa-ni-a têêng bhua katưưiq xưưq A-bi-leen, 2xók ganah An-ne lơq Kaai-phe jư tarnêêng takóh kadhâng bhanuôih bhơt liêm — paraaq Yaang Pleng ơi tơk palơq Jang, akóón padruuih Xa-cha-ri, dhiq kruung vơng. 3Lơq kơi ađek, ađó vôôiq tơk plok parah paroong karuung Jô-đen, truuih pachóóm pheep bap-teem leq rau klôôq lóóm đóng bâân ơơn lơơi matu. 4Kơi rau ơi bâân xaraq kalóóng bha-aar leq nôôq paraaq ưng abhươp Ê-saai manưih đââng taruuih:

“Ve dhariêng lalơu karơ kalóóng kruung vơng:

‘Phaai dhoon kalơng ưng Chuôq,

têêng tapat nôôq kalơng ưng Ađó.

5Dyóp dhaluq klung e bâân bhơn tabing,

dyóp bôôl bang e bâân bhlêh pa-êêp,

kalơng vang ving e xar tapat liêm,

kalơng bhachuq bhachơp e xar klung bhang,

6lơq dyóp ng'kar m'bech e lêi rau paq jóói ưng Yaang Pleng.’”

7Kơi ađek, Jang praaq palơq tanóói manưih ganơr tơk đóng đơơp ađó têêng bap-teem: “Dhong nooi kaxênh karviêng tôôh, ngaai ơi loom kamêch leq nôôq pe đóng mut klôôn tââq rau jarnah ravang tơk? 8Taai kơi ađek, phaai machak maraang đóng ađaang palơq rau klôôq lóóm, lơq óóq bhiêk jư karnóq tư ađêi kala móón: ‘Nôôq he ve Ap-ra-haam nek abhươp avuôq,’ nek aku móón palơq nôôq pe kơi Yaang Pleng ve chóóm yuur paxar akóón chachau Ap-ra-haam tââq nôôq kaliêng dhơl ađô. 9Kơi lââng, pla chuung kung ơi ng'gơq đan tââm n'lóóng. Taai ađek, n'đó n'lóóng kah bóóng pale liêm nek bâân takươl lơq m'peq leq óih.” 10Manưih dhanuôr tamóh ađó kơi ađô: “Kơi ađek, Harau nôôq yi phaai têêng?” 11Đóng ââi bóóp, ađó móón palơq piđó: “Ngaai ve bơơr beq aau phaai nh'xóóng đóng leq manưih kah ve, lơq ngaai ve tarmông, manưih achêk kung phaai têêng kơi ađek.” 12Kabhuh pagoop jêên kung tơk đóng đơơp têêng bap-teem; lơq piđó móón palơq ađó: “Nhan tamóh thêi, harau nôôq yi phaai têêng?” 13Ađó ââi palơq piđó: “Óóq pei bơk lơh meen ơi bâân móón leq adhi anó.” 14Masôôq linh kung tamóh ađó, kơi ađô: “Dyơq nôôq yi, harau nôôq yi phaai têêng?” Ađó móón palơq piđó: “Óóq pei jeng mak rau, kung óóq baauq uôn ngaai, lơq nek phaai iêm lóóm palơq mơ jêên chaner ưng ađêi.”

15Kơi lââng, taai manưih dhanuôr xók đương rââm lơq taai tabhơt maar kanóq kalóóng lóóm ađêi leq Jang, kah n'nal kơi ađó ve lua nek Chuôq Paq Manưih kah, 16Jang ơi móón đóng n'nal xók praaq palơq dyóp ngaai: “Aku têêng bap-teem đóng adhi anó palơq đơơk, bơơi Yaang ravang bhral ve mataai raman lơh aku, nek Yaang hayơq aku kah ve đaang lêh tarlêi jêi đóng Ađó. Ađó e têêng bap-teem đóng adhi anó palơq Chuôq Yaang Liêm lơq palơq óih, 17nek Yaang ve kanaau dhiq têi Ađó đóng kaau pasek taang aviq ađêi, lơq ha-ơu aviq mi leq jơơng ưng ađêi, bơơi Ađó e óch pasek n'drang palơq óih kah đuôh chóóm tapat.”

18Kơi ađek, lalua xók praaq pachóóm bơk rau lââng, ađó truuih pachóóm taruuih liêm đóng manưih dhanuôr. 19Bơơi Hê-rôôt bhua katưưiq, xong xók bâân Jang teng trêh leq chiên Hê-rô-đia, kađiêl ưng adhi ađêi, lơq leq dyóp rau tarnêêng aak lââng đu Hê-rôôt ơi têêng, 20patơk mơ ơi tagơơn tarnêêng ađô leq tabhơt tarnêêng aak ưng ađêi: chêk nek ađó đóng kóóp Jang król leq đong kanam.

21Dhơ kơi ađek xók dyóp ngaai đơơp bap-teem, tarnêêng val vaaih ađek nek Chuôq Jê-su kung đơơp bap-teem, lơq xók Ađó nhan gavơh, nôôq klaang pleng bâân talương, 22hayơq Chuôq Yaang Liêm dhaluônh jaq dhiq Ađó kalóóng a-ô hót nguôi thê kơi achim paraap, lơq mưi dhariêng tơk tââq pleng: “Akóón nek Akóón nh'nhơr ưng Aku. Aku iêm lóóm leq Akóón.”

23Xók tââp têêng tarnêêng, Chuôq Jê-su ađó kala bâân mơ pe jêt tuôi, (ting kơi palââng dyơq kanóq) Ađó nek akóón ưng Jô-seep, Jô-seep akóón Hê-li, 24Hê-li akóón Maat-taat, Maat-taat akóón Lê-vi, Lê-vi akóón Mêên-chi, Mêên-chi akóón Ja-nê, Ja-nê akóón Jô-seep, 25Jô-seep akóón Ma-ta-thia, Ma-ta-thia akóón A-môôt, A-môôt akóón Na-huum, Na-huum akóón Êch-li, Êch-li akóón Na-gê, 26Na-gê akóón Ma-aat, Ma-aat akóón Ma-ta-thia, Ma-ta-thia akóón Sê-mê-iin, Sê-mê-iin akóón Jô-sêch, Jô-sêch akóón Jô-đa, 27Jô-đa akóón Jô-a-naan, Jô-a-naan akóón Rê-sa, Rê-sa akóón Xô-rô-ba-bêên, Xô-rô-ba-bêên akóón Sa-la-thi-êên, Sa-la-thi-êên akóón Nê-ri, 28Nê-ri akóón Mêên-chi, Mêên-chi akóón A-đi, A-đi akóón Kô-saam, Kô-saam akóón Êên-ma-đaam, Êên-ma-đaam akóón Ê-rơ, 29Ê-rơ akóón Jô-suê, Jô-suê akóón Ê-li-ê-se, Ê-li-ê-se akóón Jô-riim, Jô-riim akóón Maat-thaat, Maat-thaat akóón Lê-vi, 30Lê-vi akóón Si-mê-ôôn, Si-mê-ôôn akóón Ju-đa, Ju-đa akóón Jô-seep, Jô-seep akóón Jô-naam, Jô-naam akóón Ê-li-a-kiim, 31Ê-li-a-kiim akóón Mê-lê-a, Mê-lê-a akóón Meen-na, Meen-na akóón Maat-ta-tha, Maat-ta-tha akóón Na-thaan, Na-thaan akóón Đa-viit, 32Đa-viit akóón Je-sê, Je-sê akóón Ô-bêêt, Ô-bêêt akóón Bô-ô, Bô-ô akóón Sanh-môôn, Sanh-môôn akóón Na-et-soon, 33Na-et-soon akóón A-mi-na-đaap, A-mi-na-đaap akóón At-miin, At-miin akóón A-rơ-ni, A-rơ-ni akóón Êch-rôôm, Êch-rôôm akóón Pha-rê, Pha-rê akóón Ju-đa, 34Ju-đa akóón Ja-kôôp, Ja-kôôp akóón I-saak, I-saak akóón Ap-ra-haam, Ap-ra-haam akóón Tha-rê, Tha-rê akóón Na-kô, 35Na-kô akóón Sê-ruk, Sê-ruk akóón Rê-hu, Rê-hu akóón Bê-leek, Bê-leek akóón Hê-be, Hê-be akóón Sa-la, 36Sa-la akóón Kaai-naam, Kaai-naam akóón A-baat-saat, A-baat-saat akóón Seem, Seem akóón Nô-ê, Nô-ê akóón Lê-meek, 37Lê-meek akóón Mê-tu-sê-la, Mê-tu-sê-la akóón Hê-nok, Hê-nok akóón Jê-rêêt, Jê-rêêt akóón Ma-ha-la-êên, Ma-ha-la-êên akóón Kê-naan, 38Kê-naan akóón Ê-noot, Ê-noot akóón Sêêt, Sêêt akóón A-đaam, A-đaam akóón Yaang Pleng.