Lu-ka 2

1Tarnêêng ơi vaaih kalóóng nôôq tangêi achêk, ađek nek mưi tala bha-aar tââq Xê-xa Au-guut-tơ ơi praaq pakarơ plok dyóp katiêk đóng yaap lêi dhanuôr. 2Ganhuh yaap lêi dhanuôr laloom ađô ơi vaaih xók Kui-ri-ni-u kadhâng lêi xưưq Si-ri. 3Tabhơt maar yuur vôôiq đóng xaraq achak leq bha-aar, dyóp nak chô leq kanóón ưng ađêi kala. 4Jô-seep kung vôôiq tââq xưưq Ga-li-lê, lơơi kanóón Na-xa-reet tơk xưưq Ju-đê, mót leq kanóón Đa-viit, dham bâân đóók nek Bêêt-lê-heem, taai ađó mađó leq kabhuh lơq dhong nooi Đa-viit, 5đóng xaraq achak leq bha-aar palơq Ma-ri, nek manưih đu ơi hươq tarđơơp palơq ađêi, xók ve đađââng. 6Tarnêêng val vaaih xók bhêêl nhiđó dyơq tơơt dhiq ađô, ađek nek tangêi ađó ayaai ơi tơk. 7Ađó n'niên mưi akóón padruuih, nek akóón tame ưng ađêi, lơq ađó oom akóón palơq nôôq tala bhaai, hayơq tabêch akóón n'niên dhiq mưi taloong abhơơi, taai kah ve dham đóng nhiđó kalóóng đong tơơt.

8Kung kalóóng parah ađek, ve nôôq manưih jư trưưu xók tơơt dhiq klung, kalóóng hayum đương jư kabhuh trưưu ưng piđó. 9Mưi dhơn pleng ưng Chuôq tabhral palơq piđó, cha-iil tabah Chuôq dyóól xirvir piđó, lơq piđó bâân kadrêq lêi palơq kakhin kapơn bhlơng. 10Dhơn pleng móón palơq piđó: “Óóq kakhin, nek xâng nô, aku đââng leq nôôq pe taruuih liêm bhuui marhaal bhlơng, taruuih achêk e đóng leq dyóp nak. 11Ơi tangêi mađôk, dhiq kanóón Đa-viit, Yaang Paq Jóói ơi bâân n'niên đóng nôôq pe, Ađó nek Chuôq Paq Manưih, nek Chuôq! 12Lơq ađô nek kanal đóng nôôq pe: Nôôq pe e chêk lum mưi akóón par-aang oom palơq nôôq tala bhaai, bêch dhiq taloong bhơơi.” 13N'drươh ađek, ve mưi tanóói dhơn pleng tabhral nek palơq dhơn pleng achêk babóóch haanh Yaang Pleng, kơi ađô:

14“Brương cha-iil chô leq Yaang Pleng kalóóng dhiq đu bhơt yaal,

lơq dhiq katiêk, yươq rau ha kalóóng nôôq manưih chô leq karnóq liêm kre ưng Chuôq.”

15Tarnêêng vaaih drươh xók nôôq dhơn pleng ơi xooq tââq piđó chô leq pleng, nôôq manưih jư trưưu tapraaq xóng piđó: “Lalua kơi ađek, nôôq he phaai vôôiq tơk leq Bêêt-lê-heem lơq lêi taruuih achêk nek rau tame vaaih, đu Chuôq ơi pakah đóng nôôq he.” 16Piđó tahươk tahââm yuur vôôiq, hayơq bâân lum miq Ma-ri lơq Jô-seep, palơq akóón paniên par-aang bêch dhiq kalóóng taloong bhơơi. 17Xong xók bâân lêi, piđó truuih đuui leq taruuih ơi bâân truuih đóng ađêi leq akóón paniên ađô. 18La ngaai xâng kung maar bâân hêq xâng leq rau dhơơm bâân truuih lóóiq leq ađêi tââq nôôq manưih jư trưưu. 19Dyơq Ma-ri bhiêk katiêu dyóp paraaq achêk, kanóq kalóóng lóóm ađêi. 20Hayơq nôôq manưih jư trưưu val chô, bhi haanh lơq babóóch haanh Yaang Pleng ơi dyóp rau đu piđó ơi xâng lơq lêi, dhalam kơi taruuih bhuui ơi bâân truuih leq piđó.

21Xók bhêêl takóól tangêi đóng iêt ng'kar leq akóón paniên ơi bâân têêng, nek achak akóón paniên achêk bâân đóók nek Jê-su, nek achak ơi bâân đóók tââq dhơn pleng xók loom akóón paniên kah ơi vaaih kalóóng luônh amêêq.

22Lơq xók nôôq tangêi têêng pasek ưng piđó ting kơi gani Môôi-se ơi bâân têêng, nhiđó đââng akóón paniên leq Jê-ru-sa-leem đóng tapôông leq Chuôq 23(kơi ơi xaraq kalóóng gani ưng Chuôq, kơi ađô: “Dyóp akóón padruuih n'niên laloom e bâân đóók nek tabah liêm leq Chuôq”), 24lơq đóng tapôông bhanuôih dhah ting kơi rau bâân pachóóm kalóóng gani ưng Chuôq: “makap achim paraap môôiq bơơr panong achim katru akóón”. 25Lơq lêi tôôh, ve mưi nak dhiq Jê-ru-sa-leem, achak ưng ađó nek Si-mê-ôôn, manưih padruuih ađô bhơt liêm lơq jêi tarang, xók đương rââm rau tabhơơl lóóm dhanuôr ưng I-sơ-ra-êên, lơq Chuôq Yaang Liêm jaq dhiq ađó. 26Rau ơi bâân pakah leq ađó tââq Chuôq Yaang Liêm nek e yươq lêi kan chêt laloom xók ađó ve bâân lêi Yaang Paq Manưih ưng Chuôq. 27Lơq tââq Yaang Liêm, ađó vôôiq mót leq đong bhanuôih, xók akonh akan đââng akóón paniên Jê-su tơk đóng palââng têêng tarnêêng ting kơi kaxu bâân xêi kalóóng gani tapâng tơk akóón paniên achêk, 28ađó gabê akóón paniên dhiq têi, bhi haanh Yaang Pleng, lơq ađó móón:

29“Kakoh Chuôq, xók ađôk, Amei đóng dhơn ratơơq Amei yuur vôôiq kalóóng yươq rauha ting kơi paraaq ưng Amei.

30Ơi mat akóón ve lêi rau paq jóói ưng Amei,

31đu Amei ơi ravang toom mat dyóp dhanuôr:

32Brương đóng rau tapakah tơk palơq nôôq dhanuôr katiêk lââng, lơq cha-iil tabah đóng dhanuôr I-sơ-ra-êên ưng Amei.”

33Akonh lơq akan akóón paniên nek hêq xâng đu rau dhơơm abhươp praaq leq akóón paniên. 34Hayơq Si-mê-ôôn nhan phươk đóng piđó lơq móón palơq Ma-ri, amêêq akóón paniên: “Xâng ađô, akóón paniên ađô ơi chaleq đóng đu kalơm môôiq yuur dyương ưng bơk nak kalóóng I-sơ-ra-êên, lơq têêng mưi karnal bâân palââng praaq tamôôp — 35Kơi lââng, mưi pala bhươt e tak tơk leq ravaai ưng chênh amei — hơq đóng lóóm karnóq hót kalóóng bơk lóóm bâân tapakah.” 36Dhiq ađek kung ve pađiil An-ne manưih đââng taruuih, akóón pađiil Pha-nu-êên, mađó dhong nooi A-se. Amooq yaal tuôi bhlơng, ơi mamông palơq kayiik tapól kamó xong tââq ganah dyơq kamór ưng amooq, 37hayơq amooq tơơt kamaai tơk ađôk ơi takóól jêt puôn tuôi, hơq kah ve xooq tââq đong bhanuôih, bhiêk yaauq tangêi lơq hayum palơq tarnêêng điêng cha lơq nhan gavơh. 38Xók ve mat leq chênh xók ađek, amooq pơơh bóóp ma-ơ Yaang Pleng, lơq praaq leq akóón paniên đóng dyóp ngaai xók đương rââm đu paq jóói ưng Jê-ru-sa-leem. 39Xók piđó ơi têêng xong dyóp tarnêêng ting kơi gani ưng Chuôq, piđó chô lóóiq leq xưưq Ga-li-lê, chô leq kanóón ưng ađêi nek Na-xa-reet.

40Akóón paniên gamak taha lơq vaaih praan karơ, bâân bing rau tarbech, lơq ơơn phươk liêm ưng Yaang Pleng tơơt dhiq akóón paniên achêk.

41Dyóp kamó, amêêq ama Ađó đơk leq Jê-ru-sa-leem đóng tơơt bhiêk Jalơh. 42Xók Ađó đuôh majêt bơơr tuôi, piđó đơk leq ađek ting kơi kaxu ưng ganah bhiêk. 43Xong xók nôôq tangêi bhiêk ơi luch, bhêêl piđó xók vôôiq kalơng val chô, paniên Jê-su dyơq tơơt dhiq Jê-ru-sa-leem hơq amêêq ama Ađó kah ve n'nal. 44Bơơi ơi ngóq Ađó dhiq kalóóng tanóói manưih tââq changaai, hayơq nhiđó ơi vôôiq mưi tangêi kalơng, hayơq ve chik chêk Ađó bhlưa kalóóng kabhuh xóng lơq parjơơk. 45Lơq xók chêk kah ve lêi, nhiđó val lóóiq leq Jê-ru-sa-leem, bhiêk chik chêk Ađó. 46Chiên ơi vaaih ađek nek tatun pe tangêi, nhiđó bâân lêi Ađó kalóóng đong bhanuôih, xók tơơt dhiq m'pơng nôôq takóh tarbech, n'drươh tameng xâng piđó n'drươh tamóh piđó. 47Dyóp ngaai xâng Ađó maar hêq xâng leq rau n'nal kung kơi paraaq tar-ââi tamóh ưng Ađó. 48Akonh akan hêq lêi xók lêi Ađó, lơq akan Ađó móón palơq Ađó: “Avok ơơi, hau amei chóóm têêng palơq amêêq ama kơi ađô? Nek lêi, ama akóón lơq amêêq ơi ranguôq lóóm karaang bhlơng chik chêk akóón.” 49Ađó ââi palơq nhiđó: “Hau chóóm amêêq ama chik chêk aku? Amêêq ama kah ơi n'nal nek aku phaai tơơt kalóóng đong Ama ưng aku hơ?” 50Bơơi nhiđó kah n'nal paraaq đu Ađó móón palơq nhiđó. 51Hayơq Ađó dhaluônh palơq akonh akan, chô leq kanóón Na-xa-reet, lơq đơơp xâng bóóp nhiđó. Bơơi akan Ađó katiêu dyóp rau tarnêêng achêk kalóóng lóóm ađêi.

52Chuôq Jê-su bhiêk taha kalóóng rau tarbech lơq achak araang, kung kơi kalóóng đu liêm lóóm toom mat Yaang Pleng lơq palââng.