Skip to content
BibleKenya

Katu Bible Literal Text

Jang 6

Lơh nôôq tarnêêng ađek, Chuôq Jê-su yuur vôôiq kalơng chaang tóór hót tôôh ưng Taxiiq Ga-li-lê, (nek parah Ti-bê-ri-aat). Mưi tanóói dhanuôr bơk bhlơng vôôiq ting Ađó, taai piđó ơi biêh bâân lêi nôôq raman chrih đu Ađó têêng dhiq nôôq manưih ka-ai dhuôr. Xók achêk, Chuôq Jê-su yuur đơk leq kakóóng, lơq dhiq ađek Ađó joon tơơt nek palơq nôôq môôn-đô ưng Ađó. (Xók achêk, Bhiêk Jalơh, ganah bhiêk ưng manưih Jo Thaaiq, ơi đan tơk.) Xong ađek, xók angơơq mat yuur lơq lêi kơi dhanuôr manưih bơk bhlơng dyơq pajươk vôôiq leq ađêi, Chuôq Jê-su praaq palơq Phi-liip: “Nôôq he ve chóóm kơl beng n'tââq đóng nôôq manưih ađô cha?” (Bơơi Ađó tamóh kơi ađek đóng klêêu Phi-liip, taai Ađó ơi n'nal rau ađêi ravang têêng.) Phi-liip ââi bóóp Ađó: “Bơơr hariêng đơ-ni-ê beng kah dyóp đóng piđó buôn mưi chanak ve chóóm đơơp m'bưưiq m'bưưiq.” En-rê, mưi kalóóng nôôq môôn-đô Ađó, adhi padruuih ưng Si-môôn Phi-e-rơ, móón palơq Ađó: “Dhiq ađôk ve mưi paniên padruuih hơq ađó ađek ve xââng beq beng aviq met lơq bơơr panong kadhóóng, bơơi nôôq rau ađô ve nek leq tơk praang marchơng palơq sôôq manưih kuôq bơk?” Chuôq Jê-su praaq: “Nek ralap rapaq đóng palââng tơơt chok leq.” (Xók chêk ve bơk bhơơi chat dhiq ađek.) Kơi chêk, nôôq padruuih tơơt chok leq, parbơk mơ xââng ngaan. Tââq ađek Chuôq Jê-su kadhâng nôôq beq beng lơq xong xók tapôông paraaq ma-ơ, Ađó nh'xóóng đóng leq nôôq manưih dyơq tơơt cha, lơq kung têêng kơi ađek palơq kadhóóng, mak mơ palââng kiêng. Hayơq xók dhanuôr manưih ơi kabhôôq kajrê, Ađó yua nôôq môôn-đô ađêi: “Phaai chêk karong nôôq beng lêêk dyơq xưa, đóng kah ve dha rau bâân m'peq pahư.” Kơi ađek piđó chêk karong lơq chrooq bing majêt bơơr jong beng lêêk dyơq xưa lóóiq tââq xââng beq beng aviq met, đu dhanuôr manưih ơi cha. Taai ađek, nôôq manưih đương lêi raman chrih Ađó ơi têêng, móón kơi ađô: “Ađô dhalam nek manưih đââng taruuih phaai bhral kalóóng hóng katiêk.” Kơi ađek, ơi đâh n'nal kơi piđó kanóq tơk lơq pa-eep ađêi đóng padyók yuur têêng bhua, hơq Chuôq Jê-su róch lóóiq đơk leq kakóóng mưi ađêi.

Xók chêk, bhêêl pleng ravang blót, nôôq môôn-đô Ađó dhuônh leq taxiiq, hayơq xók ơi dyók leq bhuông, piđó vôôiq chaang hót tôôh taxiiq malóóm leq Ka-bê-na-um, lơq pleng ơi val vaaih kanam kanheet aq, hơq Chuôq Jê-su kung kah tơk leq piđó. Taai mưi garnhuh adhiiq karơ pruung lalơh, hơq taxiiq yuur gar-uul. Xók ơi avơq đuôh mơ bơơr jêt xââng môôiq pe jêt êch-ta-đơ, nôôq môôn-đô lêi Chuôq Jê-su vôôiq dyung piing taxiiq lơq tơk đan bhuông, hơq piđó bâân kakhin kapơn. Bơơi Ađó móón piđó: “Nek thêi nô! Óóq kakhin.” Kơi ađek hơq, piđó kiêng tơq Ađó dyók leq bhuông, nek n'drươh bhuông tơk leq tóór, dhiq piđó kiêng vôôiq tơk.

Tangêi tatun, manưih ganơr biêh bhiêk tơơt tóór taxiiq hót ađek lêi kơi nguôi tââq mưi beq bhuông hơq kah ve m'beq bhuông đu lââng dhiq ađek, lơq lêi kơi Chuôq Jê-su ơi kah mót kalóóng m'beq bhuông palơq nôôq môôn-đô Ađó, hơq chapiên ve nôôq môôn-đô Ađó yuur vôôiq. Dhơ kơi ađek, nôôq bhuông lââng ơi bhral tââq Ti-bê-ri-aat đan dhiq đu piđó ơi cha beng xong xók Chuôq ơi ma-ơơn. Taai kơi ađek, xók ganơr manưih lêi kơi Chuôq Jê-su kah tơơt dhiq ađek, nôôq môôn-đô Ađó kung kah, nek piđó dyók leq bhuông lơq vôôiq tơk Ka-bê-na-um chik chêk Chuôq Jê-su. Xong xók bâân lêi Ađó hót tóór tôôh taxiiq, piđó tamóh Jê-su: “Ra-bi, thêi tơk leq ađô n'đó bhêêl?” Chuôq Jê-su ââi bóóp piđó lơq Ađó praaq: “Alua, alua, aku praaq palơq adhi anó, adhi anó chêk aku eh rau taai adhi anó ơi bâân lêi nôôq raman chrih, bơơi taai adhi anó ơi cha beng lơq bâân kabhôôq kajrê. Óóq têêng tarnêêng taai chana pardyơk buôn ma-ih, bơơi taai chana pardyơk dyơq lóóiq tơk parmông taluôn luôn đu Akóón Manưih e đóng leq adhi anó, taai Yaang Pleng, nek Ama, ơi tabóq kanal dhiq Ađó.” Kơi achêk hayơq piđó móón palơq Ađó: “Hau rau nôôq yi kơng têêng đóng nôôq yi ve chóóm têêng tarnêêng ưng Yaang Pleng?” Chuôq Jê-su ââi bóóp lơq Ađó kayua piđó: “Ađôk nek tarnêêng ưng Yaang Pleng, achêk nek adhi anó tabóq lóóm huuiq ganơơm dhiq Yaang đu Ađó ơi kayua bhral.” Kơi ađek, piđó móón palơq Ađó: “Kơi achêk nek thêi têêng mataai chrih n'đó đóng nôôq yi lêi lơq huuiq thêi? Thêi têêng harau tarnêêng? Abhươp avuôq ưng nôôq yi cha ma-na kalóóng kruung vơng, kơi ve xaraq kơi ađô: ‘Ađó đóng leq piđó beng tââq pleng đóng cha.’” Hayơq Chuôq Jê-su ââi lóóiq piđó: “Alua, alua, aku praaq palơq adhi anó, Môôi-se kah glêh đóng leq adhi anó beng tââq pleng, bơơi Ama aku đóng leq adhi anó beng alua tââq pleng. Taai beng ưng Yaang Pleng nek beng dhaluônh tââq pleng lơq đóng parmông leq hóng katiêk.” Kơi ađek hơq, piđó móón palơq Ađó: “Thêi ơơi, nhan đóng leq nôôq yi beng achêk taluôn luôn.” Chuôq Jê-su praaq palơq piđó: “Aku nek beng ưng parmông, ngaai tơk leq aku dhakơi e yươq ha-ul, lơq ngaai huuiq ganơơm dhiq aku dhakơi e kah ve mơ rahaal. Bơơi aku ơi móón adhi anó kơi adhi anó ơi lêi aku hơq adhi anó kah huuiq. Tabhơt nôôq ngaai đu Ama đóng leq aku e tơk palơq aku, lơq manưih tơk palơq aku, hơq aku alua dhakơi e kah lơơi leq nguôi. Taai aku tââq pleng dhaluônh eh rau đóng aku têêng ting karnóq ưng ađêi, bơơi ting karnóq ưng Yaang kayua aku. Bơơi ađôk nek karnóq kiêng ưng Yaang kayua aku, achêk nek aku kah lơơi bil manak manâ kalóóng tabhơt nôôq manưih đu Ama ơi đóng leq aku, bơơi aku e têêng manưih ađek mamông lóóiq leq tangêi xariêq parlưch. Taai ađôk nek karnóq kiêng ưng Ama aku, kơi dhơ dhangaai lêi Akóón lơq huuiq leq Akóón nek ve bâân parmông taluôn luôn, dyơq aku e têêng manưih ađek mamông lóóiq leq tangêi xariêq parlưch.”

Kơi achêk hayơq, manưih Jo Thaaiq m'bhoonh leq Ađó taai Ađó praaq: “Aku nek beng dhuônh tââq pleng.” Piđó móón: “Kah alua ađô nek Jê-su, akóón padruuih ưng Jô-seep đu nôôq he n'nal drêh ama lơq amêêq ưng ađó achêk? Kơi achêk hau xók đôk ađó móón kơi ađô: ‘Aku dhuônh tââq pleng’?” Chuôq Jê-su ââi bóóp lơq móón piđó: “Nek óóq m'bhoonh palơq xóng ađêi dyơq. Kah ngaai ve chóóm tơk palơq aku la Ama, Yaang kayua aku, kah kađââng manưih achêk tơk, dyơq aku e têêng manưih achêk mamông lóóiq leq tangêi xariêq palưch. Ađek nek rau bâân xaraq kalóóng nôôq bha-aar manưih đââng taruuih: ‘Hayơq tabhơt e bâân Yaang Pleng pachóóm.’ Dhơ dhangaai ơi xâng lơq ơi hok tââq Ama hayơq tơk palơq Aku. Ơi taai kah manak manâ glêh lêi Ama, nguôi tââq Yaang tơơt kalóóng xók ve mat ưng Yaang Pleng — Ađó ơi lêi Ama. Alua, alua, Aku praaq palơq adhi anó, ngaai đu huuiq nek bâân parmông taluôn luôn. Aku nek beng ưng parmông. Abhươp avuôq ưng adhi anó ơi cha ma-na kalóóng kruung vơng, hayơq piđó chêt. Ađôk nek beng tââq pleng dhuônh, nek đóng tư tââq beng achêk ngaai cha nek yươq chêt. Aku nek beng mamông tââq pleng dhuônh. La ngaai đu cha beng ađô, manưih achêk e mamông patơk taluôn luôn. Kơi lââng, achak Aku kung chênh nek beng đu Aku e đóng taai parmông ưng hóng katiêk.”

Kơi achêk nek manưih Jo Thaaiq tarkaai palơq xóng piđó, kơi ađô: “Ng'kơi têêng manưih ađô ve chóóm đóng nôôq he đah achak ưng ađó?” Kơi achêk hơq, Chuôq Jê-su praaq palơq piđó: “Alua, alua Aku praaq palơq adhi anó, la adhi anó kah đah achak Akóón Manưih lơq ơm ahaam ưng Ađó, nek adhi anó e kah ve parmông kalóóng ađêi. Ngaai đu đah achak Aku lơq ơm ahaam Aku, hơq ve parmông taluôn luôn, dyơq Aku e têêng manưih ađek mamông lóóiq mót tangêi xariêq palưch. Taai achak Aku nek chana padyơk lalua, lơq ahaam Aku nek đơơk ơm lalua. Ngaai đah achak Aku lơq ơm ahaam Aku nek bhiêk tơơt kalóóng Aku, lơq Aku kung tơơt kalóóng manưih ađek. Kơi Ama taluôn mamông ơi kayua Aku, dyơq Aku mamông ganơơm Ama n'đó kơi, nek manưih đah achak Aku e kung mamông ganơơm Aku kơi achêk. Ađôk nek beng tââq pleng dhuônh, eh rau kơi beng nôôq abhươp avuôq ơi cha hayơq chêt. Ngaai đu cha beng ađô e mamông patơk taluôn luôn.” Ađó praaq nôôq paraaq achêk kalóóng đong gươl, xók truuih pachóóm dhiq Ka-bê-na-um.

Kơi achêk hayơq, xók bơk manưih kalóóng sôôq nôôq môôn-đô ưng Ađó xâng kơi ađek, piđó móón: “Paraaq ađô alua nek kadhaap, ngaai đu ve đuôh chóóm xâng ađó?” Bơơi taai Chuôq Jê-su tư n'nal kơi nôôq môôn-đô Ađêi dyơq m'bhoonh leq rau achêk. Ađó móón piđó: “Paraaq ađek praaq tamôôp adhi anó kơi? Kơi ađek la adhi anó lêi Akóón Manưih đơk dhiq Ađó tơơt n'loom hei nek ng'kơi? Yaang Liêm nek Yaang têêng đóng mamông; manưih ti kah rau malơơi malaai. Nôôq paraaq đu thêi ơi praaq palơq adhi anó nek yaang lóóm, lơq piđó nek parmông. Kơi achêk bơơi kalóóng nôôq adhi anó ve bơơr pe ngaai kah huuiq.” Taai Chuôq Jê-su ơi n'nal tââq tarnââp ngaai nek đu kah huuiq, lơq ngaai nek đu e palâh tamôôp Ađó. Lơq Ađó praaq: “Taai rau ađek, thêi ơi praaq palơq adhi anó kơi kah manak manâ ve chóóm tơk palơq thêi la ơơn phươk kah bâân Ama đóng leq manưih achêk.”

Tââq bhêêl achêk, bơk manưih kalóóng sôôq nôôq môôn-đô Ađó palâh jađaang val chô lơq kah dyơq vôôiq mandrươh palơq Ađó dyơq. Taai ađek, Chuôq Jê-su praaq palơq majêt bơơr sưưq-đô: “Kah hayang adhi anó kung kiêng yuur xooq?” Si-môôn Phi-e-rơ ââi bóóp Ađó: “Kakoh Chuôq, nôôq yi e vôôiq ting ngaai? Amei ve nôôq paraaq ưng parmông taluôn luôn, nôôq yi huuiq lơq đơơp n'nal kơi Amei nek Yaang Tabah ưng Yaang Pleng.” Chuôq Jê-su ââi lóóiq piđó: “Kah lua thêi ơi chââih adhi anó, nek majêt bơơr sưưq-đô, hơq mưi chanak kalóóng adhi anó nek abhưi.” Ađó praaq leq Ju-đa akóón padruuih ưng Si-môôn Ich-ka-ri-ôôt, taai chênh ađó, mưi kalóóng majêt bơơr chanak, ravang palâh jơl Ađó.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.