Jang 5

1Xong nôôq tarnêêng achêk, ve mưi ganah bhiêk ưng manưih Jo Thaaiq, lơq Chuôq Jê-su yuur đơk tơk kanóón Jê-ru-sa-leem. 2Xók achêk, dhiq Jê-ru-sa-leem, hót Palóng Trưưu, ve mưi beq atông, bâân đóók nek Bê-têêt-đa kalóóng paraaq Hi-baaq-laai, ve xââng tanól japơơq tarpương. 3Mưi kabhuh ganơr nôôq manưih ka-ai dhuôr, kabaang kapôk, khuch ke, rabóót dyung têi dyơq bêch dhiq nôôq dham kaang garvau ađô. 4(Taai mưi dhơn pleng ưng Chuôq, mót mưi ganah liêm kre, dhaluônh jaq leq atông lơq avơq paveq đơơk, kơi achêk hơq ngaai manưih jađaang dhaluônh laloom xók đơơk veq n'dhươi nek bâân yươh, dhơ mơk ka-ai dhơ dha kơi bhêêl achêk) 5Dhiq ađek ve mưi nak tôôh, mamông pe jêt takóól kamó mamông kalóóng dhuôr ka-ai ưng ađêi. 6Xók Chuôq Jê-su lêi manưih ađô dyơq bêch dhiq ađek, lơq n'nal nek ađó ađek gleh mưi ganah ơi đươnh bhlơng, Chuôq praaq palơq ađó: “Amei kiêng bâân yươh kah?” 7Manưih ka-ai ââi bóóp Ađó: “Abhươp ơơi, aku kah ngaai ve đóng xók đơơk n'dhươi nek manưih achêk ve chóóm đââng aku dhuônh leq atông. Kơi lââng, xók bhêêl aku dyơq vôôiq dhaluônh leq atông, nek manưih lââng bhiêk dhaluônh laloom aku.” 8Chuôq Jê-su kayua ađó: “Nek yuur dyương, đuôl chong ưng amei yuur lơq jađaang vôôiq.” 9N'drươh, manưih padruuih parkonh achêk val vaaih khe karơ kơi kaxu, ađó đuôl chong ađêi yuur, lơq jađaang vôôiq. Tangêi ađek nek tangêi Sa-baat.

10Kơi ađek nek manưih Jo Thaaiq móón palơq ađó ơi bâân payươh yươh: “Mađôk nek tangêi Sa-baat, lơq kah đóng pheep amei đuôl chong ađêi.” 11Bơơi ađó ââi lóóiq piđó: “Manưih ơi têêng đóng aku khe karơ, chênh manưih achêk kayua aku: ‘Phaai đuôl chong amei yuur lơq jađaang vôôiq.’” 12Piđó tamóh ađó: “Ngaai nek manưih ơi kayua amei ‘Phaai đuôl chong yuur lơq jađaang vôôiq’?” 13Dhơ kơi ađek, manưih bâân payươh yươh kah n'nal ađek nek ngaai, taai Chuôq Jê-su ơi karluk mót leq ganơr manưih dyơq ve mat dhiq dham ađek. 14Lơh nôôq tarnêêng achêk, Chuôq Jê-su lum ađó kalóóng đong bhanuôih lơq Chuôq praaq palơq ađó: “Tôôh, amei ơi val vaaih khe karơ aq! Óóq têêng matu lơt dyơq, hơq đóng rau đu môôp lơh yươq vaaih tơk leq amei.” 15Manưih padruuih parkonh ađô yuur vôôiq lơq móón palơq manưih Jo Thaaiq kơi ađek nek Chuôq Jê-su, manưih ơi têêng đóng ađêi khe karơ. 16Taai rau ađek, manưih Jo Thaaiq kóóp róp Chuôq Jê-su, taai Ađó ơi têêng nôôq tarnêêng achêk kalóóng tangêi Sa-baat. 17Bơơi Chuôq Jê-su ââi lóóiq piđó: “Ama aku biêh dyơq têêng tarnêêng patơk xók đôk, aku kung têêng tarnêêng kơi ađek.” 18Taai paraaq ađô, hơq manưih Jo Thaaiq val kaang tabâân kơi leng Ađó taai Ađó eh chapiên rơh pahư tangêi Sa-baat, bơơi dyơq đóók Yaang Pleng nek Ama ađêi, tư têêng đóng ađêi marđơq palơq Yaang Pleng.

19Kơi ađek hơq, Chuôq Jê-su ơi tar-ââi lơq praaq palơq piđó: “Alua, alua, aku praaq palơq nôôq pe, Akóón kah chóóm taai achak ađêi kala đóng têêng dhơ dharau tarnêêng, nguôi tââq hau dhơơm đu Akóón lêi Ama têêng, taai dhơ dharau tarnêêng Ama têêng nek nôôq tarnêêng achêk Akóón kung têêng kơi ađek. 20Taai Ama nh'nhơr Akóón lơq pakah đóng Akóón dyóp rau đu chênh Ama têêng, hayơq Ađó e pakah đóng Akóón nôôq tarnêêng gamak lơh kơi ađôk dyơq đóng nôôq pe phaai chrih lêi. 21Taai Ama têêng manưih chêt yuur dyương lơq đóng leq piđó parmông n'đó kơi, nek Akóón kung đóng parmông leq ngaai manưih Akóón kiêng kơi achêk. 22Taai patơk mơ Ama kung kah praaq xêi ngaai, bơơi Ađó ơi pajaau bhơt mataai praaq xêi leq Akóón, 23đóng dyóp ngaai bhi chap Akóón kơi piđó bhi chap Ama. Ngaai kah bhi chap Akóón nek kah bhi chap Ama, nek Yaang ơi kayua Akóón. 24Alua, alua, aku praaq palơq nôôq pe, ađek nek ngaai xâng paraaq aku lơq huuiq Yaang kayua aku nek bâân parmông taluôn luôn, lơq manưih achêk yươq vôôiq tơk leq rau praaq xêi, bơơi ơi jalơh tââq kan chêt đóng tơk parmông. 25Alua, alua, aku praaq palơq nôôq pe kơi nek jơ ravang tơk, lơq bhêêl achêk nek xók đu manưih chêt e xâng dhariêng ưng Akóón Yaang Pleng, lơq nôôq ngaai xâng e mamông. 26Taai Ama ve parmông kalóóng Ađó n'đó kơi, nek Ama kung đóng leq Akóón đóng ve parmông kalóóng Akóón kơi achêk, 27lơq Ama ơi đóng leq Akóón mataai têêng rau praaq xêi taai Akóón nek Akóón Manưih. 28Óóq chrih lêi leq rau ađô, ơi e tơk jơ đu mót bhêêl ađek, dyóp ngaai kalóóng ping xaal e xâng dhariêng ưng Ađó 29lơq piđó e gluh leq nguôi — nôôq ngaai ơi têêng rau liêm nek malóóm tơk rau mamông lóóiq đóng parmông, dyơq nôôq đu ơi têêng rau aak nek malóóm tơk rau mamông lóóiq đóng leq rau xêi xanêi.

30Aku kah chóóm ganương dhiq ađêi kala đóng têêng dhơ dharau tarnêêng. Aku xêi xanêi ting kơi aku xâng, lơq rau xêi xanêi ưng aku nek bhơt liêm taai aku kah tabâân karnóq kiêng lalei ưng ađêi, bơơi nek karnóq kiêng ưng Yaang kayua ađêi. 31La aku tư truuih đuui leq ađêi, nek paraaq truuih ưng aku nek kah đaang huuiq. 32Ve mưi chanak lââng, nek manưih truuih đuui leq aku, lơq aku n'nal kơi paraaq truuih đu manưih ađek móón lalua leq aku nek alua dhalam. 33Nôôq pe ơi kayua manưih vôôiq lum Jang, lơq Jang ơi truuih đuui đóng rau lalua. 34Dhơ aku kah đơơp paraaq truuih tââq akóón manưih, bơơi aku praaq nôôq rau ađô nek đóng nôôq pe ve chóóm bâân paq. 35Jang biêh nek par-aang dhơu dyơq róh lơq dyóól brương, dyơq nôôq pe ơi kiêng bhuui sương dhiq taklaaq brương ưng ađó achêk kalóóng mưi ganah. 36Bơơi aku ve paraaq truuih gamak lơh paraaq truuih ưng Jang: achêk nek nôôq tarnêêng đu Ama ơi pajaau leq aku đóng aku têêng padyóp piđó — chênh nek nôôq tarnêêng đu aku têêng — truuih đuui leq aku kơi Ama ơi kayua aku. 37Chênh Ama, Yaang kayua aku ơi truuih đuui leq aku. Nôôq pe kah ơi machu machâ xâng dhariêng Ađó, kung kah ơi móng lêi dyaang a-ô Ađó. 38Nôôq pe kah ve paraaq Ađó tơơt taluôn kalóóng ađêi, taai Yaang đu Ađó ơi kayua, nek nôôq pe kah ve lóóm huuiq dhiq Yaang achêk. 39Nôôq pe chamet lêi Bha-aar Yaang Pleng, taai nôôq pe ngóq đươi ađek nek ve parmông taluôn luôn, lơq nôôq paraaq ađek nek nôôq paraaq truuih đuui leq aku, 40lơq nôôq pe kah kiêng tơk palơq aku đóng ve bâân parmông. 41Aku kah pei đơơp cha-iil tabah tư tââq akóón manưih, 42dhơ kơi ađek, aku n'nal leq nôôq pe kơi lóóm nh'nhơr Yaang Pleng kah ve kalóóng nôôq pe. 43Aku ơi bhral kalóóng dhanóók Ama aku, lơq nôôq pe kah pơh đơơp aku. Bơơi la ngaai lââng bhral palơq dhanóók lalei ưng ađêi, nek nôôq pe pơh đơơp manưih ađek. 44Ng'kơi têêng nôôq pe ve chóóm huuiq, xók dyơq pei jư cha-iil tabah tââq manưih lââng lơq kah chik chêk cha-iil tabah bhral tââq Yaang Pleng mưi giêl? 45Óóq kanóq kơi chênh aku e patu nôôq pe toom mat Ama. Manưih patu nôôq pe nek Môôi-se, manưih đu nôôq pe tabóq lóóm rââm tââq ađó. 46Taai la nôôq pe huuiq Môôi-se, hơq nôôq pe alua nek huuiq aku, achêk nek taai ađó achêk ơi xaraq leq aku. 47Bơơi la nôôq pe kah huuiq nôôq paraaq xar karvech ưng ađó achêk, nek ng'kơi têêng hơq nôôq pe e huuiq paraaq aku?”