Jang 4

1Xong ađek, xók Chuôq Jê-su n'nal chiên nek manưih Pha-ri-si ơi xâng kơi Ađó yuur tavaaih lơq têêng bap-teem đóng bơk môôn-đô lơh Jang 2(dhơ nek eh rau chênh Chuôq Jê-su têêng pheep bap-teem, bơơi nek nôôq môôn-đô ưng Ađó), 3nek Ađó tââi tââq Ju-đê lơq val chô lóóiq Ga-li-lê. 4Bơơi tarnêêng achêk yua chut Ađó phaai vôôiq hót Sa-ma-ri. 5Kơi ađek nek Ađó vôôiq tơk mưi charvaal mađó parah Sa-ma-ri đóók nek Si-kha, đan phơn katiêk đu Ja-kôôp ơi blah leq Jô-seep, akóón padruuih ađó. 6Dhiq ađô ve jiêng ưng Ja-kôôp. Xók ađek, taai Chuôq Jê-su ơi druôi nhưh taai tarnêêng parvôôiq, Ađó tơơt dhalam tóór jiêng. Bhêêl achêk nh'jau mơ jơ đu chapat. 7Mưi pađiil parkan mađó xưưq Sa-ma-ri tơk buôn dyêt đơơk, Chuôq Jê-su praaq palơq ađó: “Nhan đóng aku ơm đơơk.” 8Taai nôôq môôn-đô ưng Ađó ơi vôôiq mót kalóóng charvaal buôn piđó ve chóóm kơl chana padyơk. 9Xong ađek hayơq manưih pađiil parkan Sa-ma-ri móón palơq Ađó: “Ng'kơi têêng Amei, nek manưih Jo Thaaiq, kiêng nhan ơm đơơk tââq aku, nek mưi manưih pađiil parkan Sa-ma-ri?” (Taai manưih Jo Thaaiq kah tamóh tapraaq palơq manưih Sa-ma-ri.) 10Chuôq Jê-su ââi bóóp, lơq Ađó praaq palơq pađiil: “La amei ơi đơơp n'nal kaliim ưng Yaang Pleng, lơq ngaai nek manưih dyơq praaq palơq amei: ‘Nhan đóng aku ơm đơơk,’ nek amei alua dhakơi e nhan manưih ađek, lơq alua dhakơi ađó e đóng leq amei đơơk mamông.” 11Manưih pađiil parkan móón palơq Ađó: “Abhươp ơơi, amei kah ve chanik chik, lơq jiêng nek dhơuq. Kơi ađek, n'tââq hayơq amei ve đơơk mamông ađek? 12Ve kơq nek amei gamak lơh Ja-kôôp, abhươp avuôq nôôq yi, ađó ơi lơơi đóng nôôq yi jiêng ađô, hơq chênh tââq ađek, ađó ơi ơm nek palơq akóón anaaq ađó lơq bhanan ưng ađó.” 13Chuôq Jê-su ââi lơq Ađó móón leq pađiil: “Dhơ dhangaai ơm tââq đơơk jiêng ađô e dyơq rahaal, 14bơơi la ngaai ơm tââq đơơk đu aku đóng e kah ve mơ rahaal patơk taluôn luôn. Klóóih dhiq ađek, đơơk đu aku đóng e val xar tóm đơơk kalóóng manưih ađek bhlaai xưa parmông tơk taluôn luôn.” 15Manưih pađiil parkan móón palơq Ađó: “Abhươp ơơi, nhan đóng aku đơơk achêk hơq đóng aku yươq rau rahaal, lơq kung yươq kơng tơk ađôk buôn dyêt đơơk.” 16Ađó yua pađiil: “Phaai chô, dhaloong kayiik amei lơq val lóóiq leq ađô.” 17Manưih pađiil parkan móón kơơq, lơq ađó móón palơq Jê-su: “Aku kah ve kayiik.” Chuôq Jê-su móón leq ađó: “Amei móón dhalam bhlơng kơi: ‘Aku kah ve kayiik,’ 18Taai amei ơi ve xââng nak kayiik, lơq manưih đu amei ve xók đôk nek kung eh rau kayiik amei! Paraaq amei móón nek lalua!” 19Manưih pađiil parkan móón palơq Ađó: “Abhươp ơơi, aku lêi kơi amei nek mưi manưih đââng taruuih. 20Abhươp avuôq nôôq yi bhuôih haanh dhiq bôôl ađô, dyơq nôôq pe móón kơi dham đu palââng phaai bhuôih haanh nek dhiq Jê-ru-sa-leem.” 21Chuôq Jê-su praaq palơq ađó: “Nô anó, phaai huuiq aku, kơi jơ ravang tơk, nek bhêêl nôôq pe e bhuôih haanh Ama eh rau dhiq kakóóng ađô, kung eh rau dhiq Jê-ru-sa-leem. 22Nôôq pe bhuôih haanh rau ađêi kah n'nal. Nôôq yi bhuôih haanh rau nôôq yi n'nal, taai rau paq jóói nek tââq manưih Jo Thaaiq. 23Dhơ kơi ađek, jơ ravang tơk lơq xók đôk tơk, xók nôôq manưih bhuôih haanh lalua e bhuôih haanh Ama palơq lóóm ravaai lơq paraaq dhalam, taai Ama kung chik chêk nôôq manưih kơi ađek, nek nôôq ngaai bhuôih haanh Ađó. 24Yaang Pleng nek Yaang, hơq ngaai bhuôih haanh Ađó phaai bhuôih haanh palơq lóóm ravaai, lơq praaq dhalam.” 25Manưih pađiil parkan móón palơq Ađó kơi ađô: “Aku n'nal Yaang Bâân Xut Dhơu (Yaang bâân đóók nek Chuôq Paq Manưih) ravang bhral. Xók Ađó bhral, chênh Ađó e truuih pakah dyóp tarnêêng leq nôôq yi.” 26Chuôq Jê-su móón ađó: “Chênh nek aku, manưih dyơq praaq chiên palơq amei.”

27Bhêêl ađôk, nôôq môôn-đô Ađó val chô, lơq piđó lêi chrih taai Ađó dyơq praaq chiên palơq mưi pađiil parkan. Dhơ kơi ađek, kah ngaai tamóh: “Hau rau Thêi chêk?” môôiq: “Hau kơi Thêi praaq chiên palơq pađiil ađek?” 28Kơi ađek hayơq, manưih pađiil parkan lơơi lóóiq angóók đơơk ưng ađêi, ađó val mót kalóóng charvaal, lơq móón palơq dhanuôr manưih: 29“Hêq vôôiq, lum mưi nak, đu manưih achêk ơi praaq leq aku tabhơt dyóp chiên aku biêh têêng. Kah alua ađek nek Chuôq Paq Manưih?” 30Piđó pajươk gluh tââq charvaal lơq tơk palơq Ađó. 31Kalóóng mơ ganah ađek, nôôq môôn-đô panhel Ađó, móón: “Ra-bi ơơi, nhan nek cha.” 32Bơơi Jê-su praaq palơq piđó: “Thêi ve tarmông buôn cha hơq adhi anó kah n'nal.” 33Kơi achêk hayơq, nôôq môôn-đô praaq palơq xóng ađêi: “Ve kơq mưi ngaai ađek ơi đââng tơk đóng Thêi cha?” 34Chuôq Jê-su praaq palơq piđó: “Chana padyơk ưng thêi ađek nek thêi têêng karnóq kiêng ưng Yaang kayua thêi lơq paxong tarnêêng ưng Ađó. 35Kah alua adhi anó móón kơi ađô: ‘Dyơq puôn kaxe dyơq, hayơq nil chaxóót tơk’ hơ? Nô, aku praaq palơq adhi anó, phaai angơơq mat ađêi lơq yuur lêi nôôq hare aviq, taai piđó xók bhóók ravang đóng nil chaxóót! 36Manưih xóót đơơp jêên chaner lơq xóót peh rau mayưưm đóng parmông taluôn luôn, buôn hayơq manưih chóói lơq manưih xóót bhơt maar bhuui marhaal. 37Taai paraaq xók đôk alua pâng, kơi ađô: ‘Manưih ađô nek đu chóói, lơq manưih lââng nek đu xóót.’ 38Thêi kayua adhi anó xóót leh rau đu adhi anó kah rau gleh gleeng. Nôôq manưih lââng ơi gleh gleeng, dyơq adhi anó jađaang mót đươi kông praan ưng piđó.”

39Xók achêk, bơk manưih Sa-ma-ri tââq charvaal ađek tabóq lóóm huuiq dhiq Ađó ve paraaq manưih pađiil parkan truuih đuui, kơi ađô: “Ađó praaq palơq aku dyóp tarnêêng đu aku ơi têêng.” 40Kơi ađek hơq xók nôôq manưih Sa-ma-ri tơk lum Ađó, piđó nhan Ađó tơơt lóóiq palơq piđêi, lơq Ađó tơơt lóóiq dhiq ađek bơơr tangêi. 41N'dhương tatrul bơk manưih huuiq taai paraaq ưng Ađó. 42Piđó móón palơq manưih pađiil parkan kơi ađô: “Nôôq yi kah dyơq huuiq ganơơm leq paraaq ưng amóóq dyơq, taai chênh nôôq yi ơi xâng, lơq nôôq yi n'nal kơi manưih ađô lalua nek Chuôq Paq ưng manưih hóng katiêk.”

43Bơơr tangêi tatun, Ađó xooq tââq ađek vôôiq leq Ga-li-lê. 44Taai chênh Chuôq Jê-su ơi móón alua kơi mưi manưih đââng taruuih kah bâân bhi chap dhiq xưưq xaang ađêi. 45Kơi achêk hayơq, xók Ađó vôôiq tơk Ga-li-lê, dhanuôr Ga-li-lê pơh kêch Ađó, taai glêh lêi tabhơt dyóp tarnêêng Ađó ơi têêng dhiq Jê-ru-sa-leem kalóóng ganah bhiêk, tââq piđó kung ơi vôôiq tơơt bhiêk.

46Xong ađek, Ađó vôôiq lóóiq leq Ka-na kalóóng parah Ga-li-lê, dhiq đu Ađó ơi tavaaih đơơk xar buôh, lơq ve mưi chanak kuôn đong bhua achêk, akóón padruuih ưng ađó biêh dyơq vaaih ka-ai dhiq Ka-bê-na-um. 47Xók xâng kơi Chuôq Jê-su tââq Ju-đê ơi chô tơk Ga-li-lê, akonh achêk vôôiq lum Ađó lơq nhan gavơh kơi đóng Ađó ve chóóm dhuônh lơq payươh đóng akóón padruuih ađêi, taai akóón n'niên ađek kanóq chêt. 48Kơi achêk hayơq, Chuôq Jê-su praaq palơq ađó: “La nôôq pe kah lêi nôôq karnal chrih lơq nôôq tarnêêng chrih liêm, nek nôôq pe alua dhakơi kah huuiq.” 49Manưih kuôn đong bhua móón palơq Ađó: “Thêi ơơi, nhan nek dhuônh xók akóón aku yươq ơi chêt.” 50Chuôq Jê-su kayua ađó: “Nek chô aq, akóón padruuih amei dyơq mamông.” Manưih padruuih parkonh ađô huuiq paraaq đu Chuôq Jê-su ơi praaq palơq ađêi, lơq ađó yuur chô. 51Xók bhêêl ađó dyơq vôôiq kalơng, nôôq dhơn ratơơq ưng ađó tơk lum ađó lơq truuih móón, móón kơi ađô akóón padruuih amei biêh dyơq mamông. 52Kơi ađek, ađó tho tamóh tââq piđó mót n'đó jơ hơq akóón n'niên ađek tââp xâng n'jang. Kơi achêk nek piđó ađek ââi palơq ađó kơi ađô: “Manua, mót jơ đu tapól, ka-ai kahiir gluh tââq akóón n'niên.” 53Ve kơi ađek, manưih akonh bâân n'nal kơi ađek nek mót bhêêl jơ đu Chuôq Jê-su praaq palơq ađó: “Akóón padruuih amei biêh mamông.” Chênh ađó huuiq nek palơq bhơt manưih đong ađêi. 54Hayơq Chuôq Jê-su ơi val têêng kanal chrih đu bơơr ađô, xong xók vôôiq tââq Ju-đê tơk Ga-li-lê.