Katu Bible Literal Text
Jang 3
Kơi ađek bơơi, ve mưi nak manưih mađó kabhuh Pha-ri-si, mưi manưih têêng akoq ưng dhanuôr Jo Thaaiq, achak ađó nek Ni-kô-đeem. Abhươp ađô tơk lum Chuôq Jê-su xók hayum kanam, lơq praaq palơq Chuôq Jê-su: “Thêi ơơi, nôôq yi n'nal kơi Amei nek manưih pachóóm bhral tââq Yaang Pleng, taai kah ngaai manưih ve chóóm tavaaih nôôq kanal chrih ađô, nek nôôq rau Amei yuur têêng, la Yaang Pleng kah tơơt palơq manưih achêk.” Chuôq Jê-su ââi bóóp lơq praaq palơq ađó: “Alua, alua, Aku praaq palơq amei, la ngaai kah bâân n'niên lóóiq, nek manưih achêk kah ve chóóm bâân lêi katiêk ưng Yaang Pleng.” Ni-kô-đeem móón palơq Ađó: “Ng'kơi têêng mưi nak, xók nek mưi abhươp takóh, ve chóóm bâân n'niên lóóiq? Ve kơq manưih ađek ve chóóm mót kalóóng luônh amêêq ađêi chu đu bơơr hayơq bâân n'niên lóóiq hơ?” Chuôq Jê-su ââi: “Alua, alua, Aku praaq palơq amei, la ngaai manưih kah bâân yuur n'niên tââq đơơk lơq Yaang Liêm, nek manưih ađek kah chóóm mót leq kalóóng katiêk ưng Yaang Pleng. Hau rau bâân n'niên tââq achak araang nek achak araang, lơq hau rau bâân n'niên tââq Yaang Liêm nek yaang. Óóq chrih xâng xók aku ơi praaq palơq amei: ‘Rau kơng tââm đóng amei nek bâân n'niên lóóiq.’ Adhiiq pruung n'đó leq ađó kiêng, lơq amei bâân xâng dhariêng ưng ađó, bơơi amei kah n'nal adhiiq bhral n'đó tââq môôiq adhiiq vôôiq n'đó tơk. Nek kung kơi ađek nek palơq dhơ dhangaai bâân yuur n'niên tââq Yaang Liêm.” Ni-kô-đeem praaq kơơq lơq tamóh Ađó: “Ng'kơi têêng tarnêêng ađek ve chóóm bâân yuur vaaih?” Chuôq Jê-su ââi lóóiq lơq praaq palơq ađó: “Amei nek manưih pachóóm ưng dhanuôr I-sơ-ra-êên hơq amei kah n'nal nôôq rau ađek hơ? Alua, alua Aku praaq palơq amei kơi nôôq yi praaq leq rau đu nôôq yi ơi n'nal, lơq nôôq yi truuih đuui leq rau đu nôôq yi ơi lêi, dyơq nôôq pe kah pei đơơp paraaq truuih ưng nôôq yi. La aku ơi praaq đóng nôôq pe leq nôôq tarnêêng dhiq katiêk hơq nôôq pe dyơq kah huuiq, nek ng'kơi têêng nôôq pe e huuiq la aku praaq đóng nôôq pe leq nôôq tarnêêng dhiq pleng? Kah ngaai ơi glêh dyók leq pleng nguôi tââq Yaang ơi dhaluônh tââq pleng — achêk nek Akóón Manưih. Môôi-se ơi yuur yông kaxênh kalóóng kruung vơng n'đó kơi, nek Akóón manưih kơng phaai bâân yuur tayông i kơi achêk, đóng dyóp ngaai huuiq leq Ađó maar ve parmông taluôn luôn.
Ơi Yaang Pleng kuôq nh'nhơr manưih hóng katiêk tơk mơ Ađó đóng Akóón Mưi ưng Ađó, hơq đóng tabhơt manưih huuiq leq Akóón achêk yươq bâân leng kaxiêt, bơơi ve bâân parmông taluôn luôn. Ơi Yaang Pleng kah kayua Akóón dhaluônh leq manưih hóng katiêk đóng tabóq matu manưih hóng katiêk, bơơi buôn paq manưih talaang katiêk dhiq Akóón achêk. Manưih huuiq dhiq Akóón achêk nek yươq bâân tabóq matu, dyơq ngaai kah huuiq nek ơi bâân tabóq matu aq, taai ơi kah huuiq tơk dhanóók Akóón Mưi ưng Yaang Pleng. Kơi lââng, ađô nek bha-aar matu, ađek nek: rau brương ơi mót leq hóng katiêk, bơơi palââng malóóch kiêng bóng kanam lơh rau brương ơi nôôq tarnêêng têêng ưng piđó nek môôp aak. Taai dyóp ngaai têêng aak nek geet rau brương, lơq kah tơk palơq rau brương, buôn đóng nôôq tarnêêng têêng ưng ađêi yươq bâân tapakah. Dhơ kơi ađek, ngaai têêng rau pâng dhalam nek tơk palơq rau brương, đóng nôôq tarnêêng ưng ađêi bâân tapakah kơi piđó bâân yuur têêng kalóóng Yaang Pleng.”
Xong nôôq tarnêêng ađek, Chuôq Jê-su lơq nôôq môôn-đô Ađó vôôiq mót parah Ju-đê. Ađó tơơt lóóiq dhiq ađek palơq piđó lơq têêng bap-teem. Dhơ kơi ađek, Jang kung dyơq têêng bap-teem dhiq At-nôôn đan Sa-liim, taai dhiq ađek ve bơk đơơk, dhanuôr manưih pơh tơk lơq đơơp bap-teem — ơi Jang biêh kah ơi bâân kóóp tamót leq đong kanam. Kơi achêk nek, mưi garluh tarkaai yuur vaaih gluh tââq nôôq môôn-đô ưng Jang palơq mưi nak Jo Thaaiq leq dhale n'tót kajut pasek. Hayơq piđó tơk leq Jang lơq móón palơq ađó: “Ra-bi, manưih ơi glêh tơơt palơq thêi hót tôôh karuung Jô-đen, đu thêi ơi truuih đuui leq manưih achêk, phaai lêi tôôh, ađó ađek xók têêng bap-teem, lơq tabhơt dhanuôr manưih xók pơh tơk leq ađó achêk.” Jang ââi lóóiq lơq praaq: “Palââng kah chóóm bâân đơơp rau, mưi rau kung kah, la eh rau ađek nek rau ơi bâân tađóng leq manưih achêk tââq pleng. Chênh adhi anó truuih đuui đóng aku nek aku ơi móón: ‘Aku eh rau nek Chuôq Paq Manưih,’ bơơi ađek nek ‘aku nek manưih bâân kayua bhral laloom Yaang achêk.’ Ngaai nhan mamaai hơq nek chaxaau. Dyơq parjơơk ưng chaxaau, nek manưih dyương lơq tameng xâng ađó, hơq bâân đơơp rau bhuui taai dhariêng ưng chaxaau. Kơi chêk hơq, rau bhuui achêk ưng aku ơi bâân dyóp liêm. Rau phaai têêng palơq Yaang achêk nek yuur bhi chap, dyơq palơq aku nek bhlêh pa-êêp.
Yaang bhral tư tââq yaal nek dhiq m'piing pabhơt. Manưih gluh tââq katiêk nek mađó leq katiêk lơq praaq nôôq chiên mađó leq katiêk. Yaang bhral tââq pleng nek tơơt papiing pabhơt. Ađó truuih đuui leq rau đu Ađó ơi lêi lơq xâng, bơơi kah ngaai pei đơơp paraaq truuih ưng Ađó. Manưih ơi pei đơơp paraaq truuih đuui ưng Ađó hayơq móón kơi Yaang Pleng nek lalua dhalam. Tââq Yaang đu Yaang Pleng ơi kayua bhral nek praaq paraaq ưng Yaang Pleng. Taai Ađó đóng Yaang Liêm ting kơi kah magađơq. Ama nh'nhơr Akóón lơq ơi pajaau dyóp rau leq têi Akóón. Ngaai huuiq dhiq Akóón hơq ve parmông taluôn luôn, dyơq ngaai kah xâng bóóp Akóón e kah ve lêi parmông, bơơi rau pagrâ janah ưng Yaang Pleng bhiêk tơơt dhiq manưih ađek.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.