Jang 7

1Lơh nôôq tarnêêng ađek, Chuôq Jê-su vôôiq leq ađô leq tôôh kalóóng xưưq Ga-li-lê, taai Ađó kah ve kanóq vôôiq tơk Ju-đê taai manưih Jo Thaaiq dyơq tabâân kơi leng Ađó. 2Xók achêk, Bhiêk Pơơq Pađơ, mưi ganah bhiêk ưng manưih Jo Thaaiq, ơi tơk đan. 3Kơi ađek, nôôq adhi padruuih Ađó móón palơq Ađó: “Phaai xooq tââq đôk lơq vôôiq tơk Ju-đê, đóng nôôq môôn-đô ưng amei e kung lêi nôôq tarnêêng ưng amei đu amei chóóm têêng. 4Taai kah ngaai têêng mưi raurâ ađek kalóóng lalââp hơq tư chêk ađêi kala tơơt dhiq dham baang aang. La amei chóóm têêng nôôq tarnêêng kơi ađô, nek pakah amei kala đóng tabhơt hóng katiêk”. 5Ơi patơk nôôq adhi Ađó kung kah ve lóóm huuiq dhiq Ađó. 6Taai kơi ađek, Chuôq Jê-su praaq palơq piđó: “Jơ ưng aku kung kah ơi tơk, bơơi jơ ưng nôôq pe nek dyóp bhêêl kung ravang lơơi. 7Manưih hóng katiêk yươq chóóm chróót geet nôôq adhi, bơơi manưih hóng katiêk chróót geet aku, taai aku truuih móón leq manưih hóng katiêk kơi nôôq tarnêêng têêng ưng piđó nek lơt aak. 8Nôôq adhi phaai vôôiq đơk pơh bhiêk; aku biêh kah ơi vôôiq pơh bhiêk ađô taai jơ ưng aku kah ơi chóóm dyóp.” 9Xók achêk, xók xong praaq kơi ađek palơq piđó, Ađó bhiêk tơơt dhiq Ga-li-lê.

10Dhơ kơi ađek, xók nôôq adhi Ađó vôôiq đơk pơh bhiêk, hơq bhêêl achêk Ađó kung vôôiq, bơơi nek ting kơi lalââp, kah pakah. 11Taai kơi achêk, manưih Jo Thaaiq chik chêk Ađó kalóóng ganah bhiêk, lơq praaq: “N'dhiq Ađó ađek tơơt?” 12Ve bơk manưih dhiq m'pơng dhanuôr manưih m'bhoonh leq Ađó. Bơk manưih móón kơi ađô: “Ađó achêk nek manưih liêm.” Palâh lóóiq masôôq lââng móón: “Eh rau, bơơi, Ađó chêk keh kađââng dhanuôr manưih vôôiq lơt xraang.” 13Dhơ kơi ađek, kah ngaai praaq kơi rathaai pakah leq Ađó taai kamrôôn kakhin manưih Jo Thaaiq.

14Xók achêk, mót bhêêl m'pơng ganah bhiêk ơi, Chuôq Jê-su vôôiq leq đong bhanuôih lơq truuih pachóóm. 15Kơi achêk nek manưih Jo Thaaiq lóng chrih lêi xók praaq: “Ng'kơi têêng manưih ađô dyóp n'nal nôôq paraaq ma-um mayaang achêk, dhơ kah hok đuui dhiq đong parhok?” 16Kơi achêk hayơq, Chuôq Jê-su ââi bóóp piđó, lơq Ađó praaq: “Paraaq pachóóm ưng aku eh rau nek ưng aku, bơơi nek ưng Yaang kayua aku. 17La ngaai đu rahaal ra-ơh têêng ting karnóq kiêng Ađó, manưih achêk e n'nal leq paraaq pachóóm ađô ve alua nek bhral tââq Yaang Pleng môôiq nek tââq tư aku yuur praaq. 18Ngaai đu tââq chênh ađêi hayơq praaq, ađó achêk tabâân gavơh cha-iil tabah đóng mơ ađêi, bơơi manưih tabâân cha-iil tabah ưng Yaang kayua ađêi ađek nek manưih liêm dhalam, lơq kah ve rau kah liêm tơơt kalóóng manưih achêk. 19Eh dhơq Môôi-se ơi đóng gani leq nôôq pe? Hơq kah ngaai kalóóng nôôq pe xâng jư gani. Kơi nôôq pe val tabâân kơi đóng leng aku?” 20Dhanuôr manưih ââi lóóiq: “Amei pâng abhưi bóq aq! Ngaai kiêng leng Amei?” 21Chuôq Jê-su ââi bóóp, lơq Ađó móón piđó: “Aku ơi têêng mưi tarnêêng, lơq tabhơt nôôq pe maar chrih lêi. 22Taai rau ađô, Môôi-se ơi đóng pheep iêt ng'kar leq nôôq pe (eh rau pheep ađek ve tââq Môôi-se, bơơi nek tââq nôôq abhươp avuôq), lơq nôôq pe têêng iêt ng'kar đóng manưih padruuih kalóóng tangêi Sa-baat. 23La mưi nak đơơp pheep iêt ng'kar mót tangêi Sa-baat đóng yươq têêng lơt gani Môôi-se, kơi nôôq pe val yuur pagrâ palơq aku taai aku têêng đóng mưi nak bâân yươh khe karơ mót tangêi Sa-baat? 24Óóq xêi xanêi ting kơi hót nguôi, bơơi phaai xêi xanêi palơq đơơp n'nal bhơt liêm.”

25Dharing ađek, nôôq manưih kalóóng dhanuôr Jê-ru-sa-leem móón kơi ađô: “Eh dhơq ađôk nek manưih đu palââng dyơq tabâân đóng leng kah lua? 26Tôôh, Ađó achêk praaq kơi rathaai pakah hơq palââng kah rau móón palơq Ađó ađek. Ve kơq kabhuh têêng gamak alua đơơp n'nal kơi manưih ađô nek Chuôq Paq Manưih? 27Dhơ kơi ađek, nôôq he ơi n'nal manưih ađô gluh n'đó tââq. Bơơi xók Chuôq Paq Manưih bhral, kah ngaai n'nal n'tââq Ađó bhral.” 28Xong ađek, kalóóng đong bhanuôih, Chuôq Jê-su truuih pachóóm karơ dhariêng lơq praaq: “Nôôq pe tame n'nal aku, tame n'nal aku gluh n'đó tââq. Aku kah tư ađêi bhral, bơơi Yaang kayua aku nek dhalam lalua, nek Yaang đu nôôq pe kah n'nal. 29Aku n'nal Ađó taai aku gluh tââq Ađó, lơq Ađó ơi kayua aku.” 30Kơi achêk hơq, piđó tabâân kóóp Ađó, hơq kah ngaai khin paglêh têi dhiq Ađó taai jơ Ađó kah ơi tơk. 31Dhơ kơi ađek, bơk manưih kalóóng dhanuôr tabóq lóóm huuiq dhiq Ađó lơq piđó móón: “Xók Chuôq Paq Manưih bhral, kah kơq Ađó e têêng bơk karnal chrih lơh nôôq rau manưih ađô ơi têêng?” 32Manưih Pha-ri-si xâng dhanuôr manưih dhaxi dhaxó nôôq paraaq ađô leq Chuôq Jê-su, nek nôôq takóh kadhâng bhanuôih bhơt liêm palơq manưih Pha-ri-si kayua nôôq linh jư vôôiq đóng piđó kóóp Ađó. 33Kơi ađek hơq, Chuôq Jê-su praaq: “Aku tơơt kơơq palơq nôôq pe mưi ganah gađóq dyơq, hayơq aku vôôiq tơk Yaang kayua aku. 34Nôôq pe e chêk aku bơơi nôôq pe e kah lum aku, lơq dhiq aku tơơt nôôq pe kah kơi tơk chóóm.” 35Taai kơi ađek, manưih Jo Thaaiq tamóh xóng piđó: “Manưih ađô kanóq ravang vôôiq leq hơq nôôq he e kah bâân lêi ađó ađek? Ve kơq ađó ađek kanóq ravang vôôiq palơq dhanuôr xraang xruk kalóóng kabhuh manưih Hi-laap hayơq pachóóm đóng dhanuôr Hi-laap? 36Paraaq ađô hau kiêng móón hơq ađó ađek ơi praaq: ‘Nôôq pe e chêk aku bơơi nôôq pe e kah lum, lơq dhiq aku tơơt nôôq pe kah kơi tơk chóóm’?”

37Bơơi hayơq, mót tangêi xariêq, nek tangêi bhơt gamak kalóóng ganah bhiêk, Chuôq Jê-su yuur dyương hayơq karơ dhariêng praaq kơi ađô: “La ngaai rahaal phaai tơk palơq aku lơq ơm. 38Ngaai đu huuiq dhiq aku, nek dhiêp kơi Bha-aar Yaang Pleng truuih: ‘Karuung đơơk taluôn mamông e yuur hóói jahuk tââq lóóm ađêi.’” 39Xók achêk, Ađó praaq rau ađô leq Yaang Liêm, Yaang đu nôôq ngaai huuiq dhiq Ađó ravang bâân đơơp; taai Yaang Liêm kah ơi bhral taai Chuôq Jê-su biêh kah ơi bâân bhi haanh. 40Dharing ađek, xók xâng nôôq paraaq achêk, nôôq manưih kalóóng dhanuôr manưih móón: “Manưih ađô lalua dhalam nek manưih đââng taruuih.” 41Masôôq lââng móón: “Manưih ađô nek Chuôq Paq Manưih.” Bơơi masôôq móón: “Praaq padrêh, ve kơq Chuôq Paq Manưih gluh tââq Ga-li-lê? 42Kah alua Bha-aar Yaang Pleng truuih kơi Chuôq Paq Manưih e gluh tââq dhong nooi Đa-viit, lơq gluh tââq Bêêt-lê-heem, nek kanóón đu Đa-viit ơi mamông?” 43Taai kơi ađek, rau tatech tablah yuur vaaih kalóóng dhanuôr manưih ơi taai Ađó. 44Xók achêk, bơơr pe nak kalóóng kabhuh piđó kiêng kóóp Ađó, bơơi kah ngaai paglêh têi dhiq Ađó khin.

45Xong ađek, nôôq đương jư val chô lum nôôq takóh kadhâng bhanuôih bhơt liêm lơq manưih Pha-ri-si, nôôq manưih achêk tamóh piđó: “Taai kơi nôôq pe kah đââng ađó ađek chô?” 46Nôôq đương jư ââi: “Kah glêh ve ngaai truuih pachóóm kơi manưih ađô.” 47Kơi achêk nek, nôôq manưih Pha-ri-si ââi lóóiq piđó: “Ve kơq nôôq pe kung bâân galơơk galơm óh? 48Mơq ve ngaai kalóóng kabhuh têêng gamak môôiq kalóóng kabhuh manưih Pha-ri-si huuiq dhiq ađó ađek? 49Dhơ kơi ađek, ganơr dhanuôr kah n'nal gani ađô, kabhuh piđó alua đaang ngi tóh!” 50Ni-kô-đeem (manưih glêh tơk lum Ađó laloom hei, nek mưi manưih mađó leq kabhuh ađek) móón palơq piđó: 51“Gani ưng nôôq he kah đóng xêi xanêi mưi nak panâ, nguôi tââq laloom tââm tameng xâng tââq manưih achêk lơq n'nal manưih achêk têêng harau dhơơm, pâng kah?” 52Piđó ââi lóóiq, lơq praaq palơq ađó: “Ve kơq amei kung mađó leq dhanuôr Ga-li-lê? Phaai kanóq xâng lơq chamet lêi, kơi kah ve n'đó manưih đââng taruuih bâân yuur vaaih tââq Ga-li-lê.”

53(Hayơq dyóp ngaai chô leq đong ađêi.