Jang 18

1Xók ơi praaq xong nôôq paraaq achêk, Chuôq Jê-su vôôiq gluh palơq nôôq môôn-đô ađêi chaang hót tôôh tóm Kêêt-rôôn, hơq dhiq ađô ve mưi dham bhươn, Ađó palơq nôôq môôn-đô ađêi vôôiq mót kalóóng ađek. 2Xók achêk, Ju-đa, manưih mangê tamôôp Ađó, kung n'nal dhiq ađô, taai chuôq Jê-su biêh karong hoop dhiq ađôk palơq nôôq môôn-đô ađêi. 3Taai kơi achêk, Ju-đa tơk dhiq ađek, đââng ting mưi kabhuh linh palơq kabhuh linh đương jư tââq dhiq nôôq takóh kadhâng bhanuôih bhơt liêm lơq tââq nôôq manưih Pha-ri-si, đââng lơq dhơu, dharương lơq kóóih bhươt. 4Bhêêl ađek, taai Chuôq Jê-su n'nal dyóp tarnêêng ravang vaaih tơk leq ađêi, hơq xók jađaang gluh, Ađó tamóh piđó: “Nôôq pe chik chêk ngaai?” 5Piđó ââi bóóp Ađó: “Jê-su manưih Na-xa-reet.” Ađó praaq palơq piđó: “Chênh nek Aku.” (Xók achêk, Ju-đa, manưih baan Ađó kung dyơq dyương palơq kabhuh piđó.) 6Kơi achêk hayơq, xók Ađó ơi praaq palơq piđó: “Chênh nek Aku,” nek piđó róch leq hót hóng lơq kalơm leq katiêk. 7Xong ađek, Ađó vil tamóh piđó: “Nôôq pe chik chêk ngaai?” Hayơq piđó móón: “Jê-su manưih Na-xa-reet.” 8Chuôq Jê-su ââi: “Aku ơi móón palơq nôôq pe kơi chênh nek aku. Kơi achêk hayơq, la nôôq pe dyơq chik chêk aku nek phaai đóng nôôq piđó ađô vôôiq.” 9(Achêk nek đóng bâân tajaap paraaq đu Ađó ơi praaq kơi ađô: “Leq nôôq manưih Ama ơi pajaau đóng Akóón, Akóón kah têêng tabil mưi ngaai kalóóng nôôq piđó.”) 10Bhêêl achêk, xók dyơq ve mưi pala bhươt, Si-môôn Phi-e-rơ, thuôt ađó gluh, hayơq ruul viêng manưih dhơn ratơơq ưng takóh kadhâng bhanuôih bhơt liêm lơq chapech tatươt katór tươm ưng manưih ađô. Achak manưih dhơn ratơơq nek Maan-chu. 11Kơi achêk hayơq Chuôq Jê-su yua Phi-e-rơ: “Phaai tamót bhươt leq kalóóng xóór! Choom đu Ama ơi đóng leq thêi, thêi ve chóóm kah kơng ơm ađó alua?”

12Xong ađek, kabhuh linh lơq manưih đââng akoq, palơq kabhuh linh đương jư ưng manưih Jo Thaaiq kóóp jư Chuôq Jê-su lơq klooiq Ađó lóóiq. 13Laloom tââm, piđó đââng Ađó tơk An-ne, taai abhươp achêk nek akonh kađiêl ưng Kaai-phe, hơq Kaai-phe nek takóh kadhâng bhanuôih bhơt liêm kalóóng kamó ađek. 14(Kơi lââng, Kaai-phe nek manưih ơi pahêêl manưih Jo Thaaiq kơi alua nek liêm lơh xók mưi nak chêt klóóih đóng tabhơt dhanuôr.)

15Xók achêk, Si-môôn Phi-e-rơ lơq mưi môôn-đô lââng vôôiq ting Chuôq Jê-su. Bơơi môôn-đô ađek biêh ve bâân keen n'nal palơq takóh kadhâng bhanuôih bhơt liêm, hơq manưih achêk vôôiq palơq Chuôq Jê-su mót kalóóng taang đong ưng takóh kadhâng bhanuôih bhơt liêm. 16Dyơq Phi-e-rơ bhiêk dyương dhiq palóng hót nguôi, kơi achêk hơq môôn-đô tôôh, nek manưih ve bâân keen n'nal palơq takóh kadhâng bhanuôih bhơt liêm, vôôiq gluh móón palơq pađiil đương palóng, hayơq đââng Phi-e-rơ mót. 17Xong ađek, pađiil dhơn ratơơq nek manưih đương palóng, móón palơq Phi-e-rơ: “Kah alua amei kung tơơt kalóóng kabhuh nôôq môôn-đô ưng manưih ađô?” Ađó ââi: “Eh rau aku.” 18Xók achêk, nôôq dhơn ratơơq lơq kabhuh linh đương jư dyơq dyương dhiq ađek, yuur padyunh mưi garboq óih rahââng taai pleng khau, lơq piđó dyơq tư haang ngan. Phi-e-rơ kung tơơt palơq piđó, dyương dhiq ađek lơq tư haang ngan.

19Xók achêk, takóh kadhâng bhanuôih bhơt liêm tamóh Chuôq Jê-su leq nôôq môôn-đô Ađó lơq leq rau taruuih pachóóm ưng Ađó. 20Chuôq Jê-su ââi bóóp ađó ađek: “Aku ơi praaq kơi kah pađơp đóng dyóp ngaai. Aku taluôn truuih pachóóm kalóóng gươl lơq kalóóng đong bhanuôih, nek dhiq dyóp manưih Jo Thaaiq nhoom karong palơq xóng piđó, lơq Aku kah praaq rau kadrêi palââp bhơt. 21Hau amei tamóh aku? Phaai tamóh nôôq manưih ơi xâng paraaq đu aku ơi praaq palơq piđó. Lêi tôôh, nôôq manưih achêk n'nal aku ơi praaq hau rau.” 22Xók Ađó praaq kơi achêk, nek mưi nak kalóóng kabhuh linh đương jư dyơq dyương dhiq ađek đóng Chuôq Jê-su mưi paleh m'pah, móón kơi ađô: “Amei ââi bóóp takóh kadhâng bhanuôih bhơt liêm chêk kơi alua?” 23Chuôq Jê-su ââi bóóp ađó: “La aku praaq lơt, nek chaleq n'đó dhiq lơt achêk. Dyơq la nek pâng, taai hau amei m'pah aku?” 24Hayơq xók biêh dyơq taklooiq, An-ne đóng đââng Ađó vôôiq tơk takóh kadhâng bhanuôih bhơt liêm Kaai-phe.

25Xók achêk, Si-môôn Phi-e-rơ bhiêk dyơq dyương lơq tư haang ngan. Kơi achêk hayơq, palââng móón palơq ađó: “Kah alua amei kung tơơt kalóóng kabhuh nôôq môôn-đô ưng manưih ađek alua?” Phi-e-rơ dyiin lơq ââi: “Eh rau aku.” 26Mưi nak kalóóng kabhuh nôôq dhơn ratơơq ưng takóh kadhâng bhanuôih bhơt liêm, nek bhuh xóng palơq manưih đu Phi-e-rơ ơi têch kakut katór, móón: “kah alua aku ơi lêi amei tơơt kalóóng bhươn palơq manưih ađek alua?” 27Kơi achêk nek Phi-e-rơ dyiin machu dyơq, hayơq n'drươh nek atưưch takar.

28Tââq ađek, piđó đââng Chuôq Jê-su tââq dhiq Kaai-phe tơk đong takóh kadhâng dhanuôr. (Xók achêk, bhêêl dyơq yayóng yayương, piđó kah vôôiq mót kalóóng đong takóh kadhâng dhanuôr đóng piđó óóq bâân anhuq, hơq đươi kơi achêk piđó ve chóóm bâân cha Bhiêk Jalơh.) 29Kơi achêk hơq, Phi-laat ơi vôôiq gluh lum piđó lơq móón: “Nôôq pe ting đââng hau rau paraaq kaauq patu jơl lóóiq manưih ađô?” 30Piđó ââi lóóiq lơq móón palơq ađó: “La manưih ađô kah ve têêng rau lơt aak, nek alua dhakơi nôôq yi ơi kah pajaau đââng ađó leq kuôn.” 31Taai kơi achêk, Phi-laat praaq palơq piđó: “Nôôq pe phaai đââng manưih ađô chô hayơq xêi ađó ting gani ưng nôôq pe.” Manưih Jo Thaaiq móón palơq ađó ađek: “Kah ve pheep đóng nôôq yi karchêt dhơ dhangaai.” 32(Achêk nek đóng tajaap paraaq Chuôq Jê-su, hơq Ađó ơi praaq đóng chaleq leq kar chêt ng'kơi Ađó ravang phaai đơơp)

33Kơi achêk nek Phi-laat vil chô mót kalóóng đong takóh kadhâng dhanuôr, lơq yua dhaloong Chuôq Jê-su tơk hayơq Phi-laat móón palơq Ađó: “Amei ve alua nek Bhua dhanuôr Jo Thaaiq?” 34Chuôq Jê-su ââi lóóiq: “Amei tư ađêi praaq rau ađô môôiq ngaai lââng ơi móón đóng amei leq aku?” 35Phi-laat ââi bóóp: “Aku ve alua nek manưih Jo Thaaiq dhơq? Chênh manưih dhanuôr ưng amei lơq nôôq takóh kadhâng bhanuôih bhơt liêm pajaau đââng amei leq aku. Amei ơi têêng hau rau?” 36Chuôq Jê-su ââi bóóp: “Katiêk ưng aku kah mađó leq hóng katiêk ađô. La katiêk ưng aku mađó leq hóng katiêk ađô, nek alua dhakơi nôôq dhơn ratơơq ưng aku ơi tarjơl đóng aku yươq bâân pajaau đââng leq manưih Jo Thaaiq. Bơơi xók đôk katiêk ưng aku kah tơơt dhiq ađô.” 37Kơi achêk hayơq Phi-laat móón palơq Ađó: “Kơi achêk ve alua amei nek bhua?” Chuôq Jê-su ââi: “Amei móón kơi aku nek bhua. Aku ơi bâân n'niên taai rau ađô, lơq aku ơi tơk kalóóng hóng katiêk kung taai rau ađek, achêk nek đóng truuih đuui leq paraaq dhalam, Ngaai đu mađó leq paraaq dhalam nek xâng dhariêng ưng aku.” 38Phi-laat móón palơq Ađó: “Paraaq dhalam nek harau?” Praaq xong paraaq achêk, Phi-laat vil vôôiq gluh lum manưih Jo Thaaiq lơq móón palơq piđó: “Aku kah ve lêi rau matu lơt dhiq manưih ađô. 39Dhơ kơi ađek, ting kơi kaxu ưng nôôq pe nek aku paloh đóng nôôq pe mưi nak mót tangêi Bhiêk Jalơh. Kơi achêk, nôôq pe kiêng aku paloh Bhua ưng manưih Jo Thaaiq đóng nôôq pe kah?” 40Kơi achêk hayơq piđó vil yuur lalơu, kơi ađô: “Eh rau ađó ađô, hơq nek Ba-ra-ba.” Xók achêk, Ba-ra-ba nek mưi nak tatông.