Skip to content
BibleKenya

Katu Bible Literal Text

Jang 19

Kơi chêk, dhalam xók ađek, Phi-laat đóng kóóp Chuôq Jê-su lơq m'bhiiq Ađó. Nôôq linh taanh mưi beq panơơng palơq axông. Piđó tapơơng leq koq Ađó, lơq paxơp đóng leq Ađó mưi beq aau yaal parhóm bhrôông ga-ong. Piđó tơk toom Ađó lơq móón: “Nhan chap yayar Bhua dhanuôr Jo Thaaiq!” hayơq đóng Ađó bơơr pe paleh m'pah. Mưi chu dyơq, Phi-laat vôôiq gluh lơq praaq palơq piđó: “Lêi nô, aku đââng manưih ađô gluh đóng nôôq pe đóng nôôq pe n'nal kơi aku kah bâân lêi rau matu lơt dhiq ađó ađô.” Hayơq Chuôq Jê-su vôôiq gluh, pơơng panơơng axông lơq xơp aau bhrôông ga-ong. Phi-laat móón palơq piđó: “Phaai lêi manưih ađô nek!” Kơi achêk nek, xók bhêêl nôôq takóh kadhâng bhanuôih bhơt liêm lơq kabhuh linh đương jư lêi Ađó, piđó lalơu karơ kơi ađô: “Teeng đinh ađó dhiq n'lóóng m'baang chatông! Teeng đinh Ađó dhiq n'lóóng m'baang chatông!” Phi-laat yua piđó: “Nôôq pe phaai tư kóóp ađó ađek lơq teeng đinh, taai aku kah bâân lêi ve matu lơt dhiq ađó ađek.” Manưih Jo Thaaiq ââi palơq Phi-laat: “Nôôq yi ve gani lơq ting kơi gani ađek, nek ađó phaai chêt taai ađó tư móón ađêi nek Akóón Yaang Pleng.” Taai ađek, xók Phi-laat xâng paraaq ađô, ađó ađek tatrul kơơq kakhin kapơn, ađó vil vôôiq mót kalóóng đong takóh kadhâng dhanuôr lơq móón palơq Chuôq Jê-su: “Amei n'đó tââq bhral?” Bơơi Chuôq Jê-su kah ââi đóng ađó ađek marau marâ. Taai kơi achêk, Phi-laat móón palơq Ađó: “Amei kah ââi bóóp aku? Amei kah n'nal kơi aku ve kataai paloh amei, lơq kung ve kataai teeng đinh amei dhiq n'lóóng m'baang chatông?” Chuôq Jê-su ââi lóóiq ađó ađek: “Amei kah ve kataai dhơ dharau nek palơq Aku, la kataai achêk ơi kah bâân đóng leq amei tââq m'piing yaal. Taai rau ađek, đu đââng pajaau aku leq amei ve matu haleng lơh.” Tââq paraaq achêk, Phi-laat tabâân kơi paloh Ađó, bơơi manưih Jo Thaaiq lalơu karơ kơi ađô: “La kuôn paloh ađó kuôn eh rau nek parjơơk ưng Sê-sa: Ngaai tư hayuur ađêi têêng bhua nek tarjơl palơq Sê-sa.” Taai ađek, xong xók xâng nôôq paraaq ađô, Phi-laat đóng đââng Chuôq Jê-su gluh leq nguôi hayơq ađó tơơt dhiq tanơơt xêi xanêi dhiq dham bâân đóók nek “Đong Bhanơn Dhơl” Dyơq kalóóng dhariêng Hi-baaq-laai nek “Ga-ba-tha”. (Xók achêk nek tangêi ravang đóng Bhiêk Jalơh. Bhêêl achêk nek mơ jơ đu chapat.) Phi-laat móón palơq manưih Jo Thaaiq: “Lêi aq, bhua ưng nôôq pe!” Bơơi piđó lalơu karơ: “Yông Ađó vóq! Yông ađó vóq! Teeng đinh ađó dhiq n'lóóng m'baang chatông!” Phi-laat tamóh piđó: “Aku teeng đinh bhua ưng nôôq pe kơi?” Nôôq takóh kadhâng bhanuôih bhơt liêm ââi: “Chapiên mưi Sê-sa, nôôq yi kah ve bhua.” Kơi achêk nek, xók bhêêl ađek, Phi-laat pajaau Ađó leq piđó đóng đơơp teeng đinh dhiq n'lóóng m'baang chatông. Hayơq piđó kóóp Chuôq Jê-su lơq đââng vôôiq.

Xók phaai tư đuôl n'lóóng m'baang chatông, Ađó vôôiq tơk dhiq bâân đóók nek “Dhiq Paliing Akoq”, dhiq ađek kalóóng dhariêng Hi-baaq-laai bâân đóók nek “Gô-gô-tha.” Palââng teeng đinh Ađó dhiq ađek, nek palơq Ađó bơơr nak lââng, tơơt hót ađô lơq hót tôôh, dyơq Chuôq Jê-su tơơt m'pơng. Xók chêk, Phi-laat kung đóng xaraq mưi kalơng chư hayơq tabóq dhiq n'lóóng m'baang chatông. Kalơng chư bâân xaraq: JÊ-SU MANƯIH NA-XA-REET, BHUA DHANUÔR JO THAAIQ. Taai ađek, bơk manưih Jo Thaaiq chóóm đok kalơng chư ađô taai dhiq đu Chuôq Jê-su bâân tateeng đinh nek đan dhiq kanóón bhươh. Kalơng chư bâân xaraq palơq dhariêng Hi-baaq-laai, dhariêng La-tinh lơq dhariêng Hi-laap. Taai kơi achêk, nôôq takóh kadhâng bhanuôih bhơt liêm manưih Jo Thaaiq móón palơq Phi-laat: “Nhan óóq xaraq nek ‘Bhua dhanuôr Jo Thaaiq,’ hơq xaraq nek ‘Ađó móón kơi “Aku nek Bhua dhanuôr Jo Thaaiq.”’” Phi-laat ââi: “Paraaq aku ơi xaraq, nek aku xong ơi xaraq.”

Xong ađek, mót bhêêl kabhuh linh teeng đinh Chuôq Jê-su leq n'lóóng m'baang chatông, piđó pei aau ưng Ađó hayơq blah têêng puôn phơn — mưi nak linh mưi phơn — lơq aau yaal. Aau chêk nek kah ve kalơng par-ih, nek mưi tala bhaai ter tââq m'piing tơk n'raal. Taai kơi achêk, piđó praaq palơq xóng piđó: “Óóq n'teek aau pahư, bơơi phaai dhơơch leq ađó, lêi ađó e nek ưng ngaai.” Achêk nek đóng paraaq Bha-aar Yaang Pleng bâân tajaap kơi ađô: “Piđó blah xóng piđó aau aku, thuôt padhơơch pei aau aku.” Kơi achêk nek, kabhuh linh ơi têêng kơi achêk.

Xók achêk, bơơi manưih dyơq dyương tóór n'lóóng m'baang chatông ưng Chuôq Jê-su nek amêêq ưng Ađó, lơq adhi anó ưng amêêq Ađó, nek Ma-ri kađiêl ưng Kơ-lê-ô-ba, palơq Ma-ri Ma-đơ-leen. Kơi achêk nek, xók Chuôq Jê-su chalaang lêi amêêq ađêi lơq môôn-đô đu Ađó nh'nhơr dyương tóór ađek, nek Ađó praaq palơq amêêq: “Amêêq ơơi, lêi tôôh, akóón padruuih ưng amei!” Hayơq Ađó móón palơq manưih môôn-đô: “Lêi tôôh, amêêq ưng amei!” Tââq bhêêl ađek, môôn-đô achêk đââng ađó chô leq đong ađêi.

Xong ađek, taai Chuôq Jê-su n'nal kơi dyóp tarnêêng ơi bâân xong luch aq, nek hayơq đóng paraaq Bha-aar Yaang Pleng bâân tajaap, nek Ađó praaq: “Aku rahaal.” Mưi beq alooch kađôôq bing đơơk kadyuôq bâân patơơt dhiq ađek, taai kơi achêk, palơq kơi tabóq leq đóóng n'lóóng janươu mưi panuôl môôp bing đơơk kadyuôq, palââng đââng haluôch leq bóóp Ađó. Kơi achêk, bhêêl Chuôq Jê-su kadyeep đơơk kadyuôq achêk, Ađó praaq: “Dyóp tarnêêng ơi bâân xong!” Hayơq ngói akoq chok leq, Ađó pat parhââm ađêi.

Xong tơk, taai vaar ađek nek tangêi ravang, đóng hayơq lơơi nôôq xaak manưih kah bhiêk tơơt dhiq m'baang chatông bhluuch tangêi Sa-baat (taai tangêi Sa-baat ađek nek mưi tangêi bhơt liêm), manưih Jo Thaaiq nhan Phi-laat đóng bâân têêng plak chakuông dyung ưng nôôq manưih ađek hayơq nôôq xaak ve chóóm bâân đââng patââi. Taai kơi achêk, kabhuh linh vôôiq tơk lơq m'bhiiq plak chakuông dyung ưng manưih laloom tââm, hayơq ưng manưih đu bơơr, nek nôôq manưih pâng tateeng đinh palơq Ađó. Bơơi xók tơk dhiq Chuôq Jê-su, piđó lêi Ađó ơi chêt aq, hơq kah m'bhiiq plak dyung Ađó. Dhơ kơi ađek, mưi chanak kalóóng kabhuh linh tak hót naar Ađó palơq kóóih, hơq nek ahaam lơq đơơk hóói kabhruk. Manưih ơi lêi tarnêêng achêk ơi truuih đuui lóóiq, lơq paraaq truuih ưng ađó ađô nek lalua dhalam. Manưih achêk n'nal kơi ađêi praaq rau lalua, đóng adhi anó kung huuiq. Taai nôôq rau achêk ơi yuur vaaih đóng têêng tajaap paraaq Bha-aar Yaang Pleng: “Yươq ve n'đó ng'haang ưng Ađó e bâân plak.” Mưi dhiq lââng kalóóng Bha-aar Yaang Pleng vil móón: “Piđó e chaling lêi Yaang đu ađêi ơi tak.”

Xong nôôq tarnêêng ađek, Jô-seep manưih tââq A-ri-ma-thê, nek mưi môôn-đô ưng Chuôq Jê-su (bơơi kadrêi palââp taai kakhin manưih Jo Thaaiq), ađó nhan Phi-laat đóng đââng xaak Chuôq Jê-su vôôiq. Phi-laat đóng pheep. Kơi achêk, Jô-seep vôôiq lơq đââng xaak ưng Chuôq Jê-su xooq. Ni-kô-đeem kung tơk — ađó nek manưih bhêêl tââp tơk lum Chuôq Jê-su xók hayum — đââng ting nôôq janươu dyet thum lơq xrơu palơq dhaak galơu, mơ mưi hariêng dhanang kanơng La-ma. Kơi achêk piđó đââng xaak Chuôq Jê-su xooq lơq pươr xaak palơq bhaai len nek palơq janươu thum, achêk nek ting kơi pheep takóh ưng manưih Jo Thaaiq đóng raleng xaak. Mat lââng, dhiq dham đu Ađó bâân tateeng đinh ve mưi dham bhươn; lơq kalóóng dham bhươn ve mưi beq ping tame, hơq kalóóng ađek kah ve ngaai glêh bâân tơp. Kơi achêk hơq, ơi taai tangêi ravang ưng manưih Jo Thaaiq lơq taai xaal ping nek dhiq đan, hơq piđó tơp buur Chuôq Jê-su dhiq ađek.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.