Jang 17

1Chuôq Jê-su praaq nôôq paraaq achêk hayơq chaling mat leq Pleng, Ađó praaq: “Kakoh Ama, jơ ơi tơk. Nhan têêng cha-iil tabah Akóón ưng Ama, đóng Akóón ve chóóm têêng cha-iil tabah Ama, 2taai Ama ơi đóng leq Akóón mataai karơ dhiq dyóp rau achak araang, đóng nôôq ngaai đu Ama ơi pajaau đóng Akóón, nek Akóón đóng leq nôôq manưih achêk rau parmông nh'chró chró. 3Dyơq ađô nek rau parmông nh'chró chró, chênh nek đóng nôôq manưih achêk đơơp n'nal Ama, Yaang Pleng lalua dhalam mưi giêl, lơq Chuôq Paq Manưih Jê-su, nek Yaang Ama ơi kayua tơk. 4Akóón ơi têêng cha-iil tabah Ama dhiq katiêk, têêng paxong tarnêêng đu Ama ơi pajaau đóng Akóón đóng Akóón têêng. 5Ama ơơi, xók đôk nhan Ama têêng cha-iil tabah Akóón toom mat Ama palơq rau cha-iil tabah đu Akóón biêh ve tóór Ama xók kah ơi hóng katiêk avaaih. 6Akóón ơi pakah dhanóók Ama leq nôôq manưih đu Ama ơi pajaau đóng Akóón m'pơng hóng katiêk. Piđó mađó leq Ama, Ama pajaau piđó leq Akóón, lơq piđó ơi pei jư paraaq Ama. 7Xók ađôk, piđó ơi n'nal kơi tabhơt dyóp rau Ama ơi đóng leq Akóón nek tââq Ama, 8taai Akóón ơi đóng leq piđó nôôq paraaq đu Ama ơi đóng leq Akóón. Piđó đơơp nôôq paraaq achêk lơq lalua n'nal kơi Akóón tơk tââq Ama, lơq piđó huuiq kơi chênh Ama ơi kayua Akóón. 9Akóón gavơh nhan đóng piđó. Akóón kah gavơh nhan đóng hóng katiêk, bơơi nek đóng nôôq manưih đu Ama ơi pajaau leq Akóón, taai piđó mađó leq Ama. 10Tabhơt ưng Akóón nek ưng Ama; kung kơi ưng Ama nek ưng Akóón, lơq Akóón bâân cha-iil tabah dhiq m'pơng piđó. 11Akóón kah tơơt kalóóng hóng katiêk dyơq, hơq piđó tơơt kalóóng hóng katiêk, dyơq Akóón chô palơq Ama. Kakoh Ama Tabah Liêm, nhan jư lêi piđó kalóóng dhanóók Ama đu Ama ơi đóng leq Akóón, đóng piđó ve chóóm xar mưi, kơi Nôôq He. 12Dyơq xók Akóón dyơq tơơt palơq piđó, Akóón jư lêi piđó kalóóng dhanóók Ama đu Ama ơi đóng leq Akóón. Akóón ơi jư lêi piđó hơq yươq manak manâ kalóóng nôôq piđó bâân chêt bil, chapiên panong akóón ưng rau hư bil, đóng paraaq Yaang Pleng bâân tajaap. 13Bơơi xók đôk, Akóón chô palơq Ama, lơq akóón praaq nôôq rau ađô kalóóng hóng katiêk đóng piđó ve lóóm marhaal ưng Akóón bâân dyóp liêm kalóóng piđó. 14Akóón ơi đóng paraaq Ama leq piđó, lơq manưih hóng katiêk geet piđó taai piđó kah mađó leq manưih hóng katiêk, kung kơi Akóón kah mađó leq manưih hóng katiêk. 15Akóón kah gavơh nhan đóng Ama pagluh piđó gluh tââq hóng katiêk, bơơi nek đóng Ama jư lêi piđó tââq đu aak. 16Piđó kah mađó leq hóng katiêk, kung kơi Akóón kah mađó leq hóng katiêk. 17Nhan Ama têêng pasek piđó palơq praaq dhalam, paraaq Ama nek paraaq dhalam. 18Ama ơi kayua Akóón mót kalóóng hóng katiêk ng'kơi, nek Akóón kung kayua piđó mót kalóóng hóng katiêk kơi achêk. 19Ơi taai piđó Akóón ơi tư têêng liêm tabah, đóng chênh piđó kung bâân liêm tabah kalóóng paraaq dhalam. 20Bơơi Akóón kah chapiên gavơh nhan đóng nôôq manưih ađô, hơq dyơq đóng nôôq ngaai huuiq tââq Akóón dhiq paraaq ưng piđó dyơq, 21đóng tabhơt piđó val xar mưi, kơi Ama kalóóng Akóón lơq Akóón kalóóng Ama, buôn đóng piđó kung tơơt kalóóng Nôôq He, đóng manưih hóng katiêk huuiq kơi Ama ơi kayua Akóón tơk. 22Cha-iil tabah đu Ama ơi đóng leq Akóón, nek Akóón kung đóng leq piđó, buôn piđó ve chóóm nek mưi, kơi Nôôq He nek mưi; 23Akóón tơơt kalóóng piđó, lơq Ama tơơt kalóóng Akóón buôn đóng piđó bâân dyóp liêm val xar mưi, đóng manưih hóng katiêk n'nal kơi Ama ơi kayua Akóón tơk, lơq Ama ơi nh'nhơr piđó kơi Ama ơi nh'nhơr Akóón. 24Ama ơơi, ngaai manưih hơq Ama ơi pajaau đóng Akóón, Akóón kiêng kơi n'dhiq Akóón tơơt nek piđó kung tơơt dhiq ađek palơq Akóón, đóng móng lêi cha-iil tabah ưng Akóón, nek cha-iil tabah Ama ơi đóng leq Akóón, taai Ama ơi nh'nhơr Akóón xók kah ơi tavaaih hóng katiêk. 25Ama Bhơt Liêm ơơi, dhơ nek manưih hóng katiêk kah n'nal Ama, bơơi Akóón n'nal Ama; lơq nôôq manưih ađô n'nal kơi Ama ơi kayua Akóón tơk. 26Akóón ơi pakah dhanóók Ama đóng piđó, lơq Akóón e pakah dyơq, đóng lóóm nh'nhơr đu Ama ơi nh'nhơr Akóón tơơt kalóóng piđó, lơq Akóón kung tơơt kalóóng piđó.”