Skip to content
BibleKenya

Katu Bible Literal Text

Jang 16:33

Verse 33 is marked below, with the whole chapter around it. Read from the start

“Thêi ơi praaq nôôq rau ađek leq adhi anó, đóng adhi anó yươq n'đóih m'bhuôh. Piđó e têêng đóng adhi anó bâân tapagluh tââq gươl. Kơi achêk hơq ganah tangêi ravang tơk nek pakoom đóng dyóp ngaai leng karchêt adhi anó ngóq nek ađêi dyơq tapôông bhanuôih bhuôih haanh leq Yaang Pleng. Piđó e têêng nôôq tarnêêng achêk taai piđó kah n'nal Ama, kung kah n'nal thêi. Dhơ kơi achêk, thêi ơi praaq nôôq rau ađô leq adhi anó đóng xók tangêi ganah ưng kabhuh piđó tơk, adhi anó hei lóóiq nôôq paraaq đu thêi ơi truuih leq adhi anó. Kơi lââng, thêi kah truuih nôôq rau ađô leq adhi anó tư tââq tarnââp taai thêi biêh dyơq tơơt palơq adhi anó. Dyơq xók ađôk thêi vôôiq tơk Yaang đu kayua thêi, lơq kah ngaai kalóóng adhi anó tamóh thêi: ‘Thêi dyơq vôôiq n'leq?’ Palâh lóóiq, rau ranguôq rangóót ơi buur bing luônh lóóm ưng adhi anó taai thêi ơi praaq palơq adhi anó nôôq rau ađô. Dhơ kơi ađek, thêi praaq rau lalua palơq adhi anó, thêi yuur vôôiq achêk nek rau đââng malơơi malaai đóng adhi anó. Taai la thêi kah yuur vôôiq, nek Yaang Bhơơl Lóóm e kah tơk palơq adhi anó. Dyơq la thêi vôôiq, nek thêi e kayua Yaang achêk tơk palơq adhi anó. Xók ơi tơk, Yaang achêk e pakah manưih hóng katiêk leq matu lơt, leq rau bhơt liêm, lơq leq rau xêi xanêi — leq matu lơt, nek taai piđó kah huuiq dhiq aku; leq rau bhơt liêm, nek taai thêi chô paleq Ama, hayơq adhi anó e kah ve lêi thêi dyơq; dyơq leq rau xêi xanêi, nek taai manưih têêng kala hóng katiêk ađô ơi bâân taxêi. Thêi ve bơk rau lơh đóng praaq palơq adhi anó, bơơi xók đôk adhi anó kah đuôh chóóm n'nal bhơt. Bơơi xók Yaang achêk, nek Yaang Liêm Paraaq Dhalam tơk, Ađó e kađââng adhi anó mót kalóóng dyóp paraaq dhalam; taai Ađó kah tư ađêi e yuur praaq, hơq Ađó e praaq bhơt dhơ dharau Ađó xâng, lơq Ađó e truuih móón đóng adhi anó nôôq tarnêêng dyơq vaaih tơk. Yaang achêk e bhi haanh thêi, taai Ađó e pei đơơp nôôq rau tââq dhiq thêi hayơq e praaq pakah đóng adhi anó. Dyóp rau, bhơt dhơ dharau nôôq Ama ve, nek mađó leq thêi. Taai kơi achêk, thêi praaq kơi, Yaang achêk e pei đơơp nôôq rau ưng thêi lơq pakah đóng adhi anó. Kalóóng m'bưưiq đươnh dyơq, adhi anó kah dyơq lêi thêi, hayơq vil tatun m'bưưiq đươnh, adhi anó e lêi thêi.” Xong ađek, bơơr pe nak kalóóng nôôq môôn-đô Ađó praaq palơq xóng ađêi: “Tarnêêng ađô nek ng'kơi dhơq xók thêi praaq palơq nôôq he kơi ađô: ‘Kalóóng m'bưưiq đươnh dyơq adhi anó kah lêi thêi, hayơq vil tatun m'bưưiq đươnh, adhi anó e lêi thêi’ lơq: ‘Taai aku chô paleq Ama’?” Taai ađek, piđó móón: “‘M'bưưiq đươnh’ kiêng móón nek ng'kơi? Nôôq he kah n'nal rau thêi dyơq praaq.” Chuôq Jê-su n'nal kơi piđó kiêng tamóh Ađó, hơq Ađó praaq palơq piđó: “Kah alua adhi anó dyơq tư ađêi tabâân n'nal leq paraaq đu thêi ơi praaq: ‘Kalóóng m'bưưiq đươnh dyơq, adhi anó kah lêi thêi, hayơq vil tatun m'bưưiq đươnh, adhi anó e lêi thêi’? Alua, alua, thêi praaq palơq adhi anó kơi adhi anó e nhiim griit, m'bhoonh, dyơq manưih hóng katiêk e bhuui sương. Adhi anó e ranguôq rangóót, bơơi rau ranguôq rangóót ưng adhi anó e vaaih xar rau bhuui marhaal. La bhêêl manưih pađiil n'niên akóón nek ve galuh ka-ai karuôq taai jơ ađêi ơi tơk, bơơi xók ơi bâân n'niên akóón paniên, ađó yươq dyơq hei tơk galuh kadhaap jarnah ưng ađêi dyơq, ơi taai lóóm marhaal taai mưi nak ve bâân n'niên dhiq hóng katiêk. Kung kơi achêk, xók đôk adhi anó ve rau ranguôq rangóót, bơơi thêi e lum lóóiq adhi anó; hayơq lóóm adhi anó e bâân bhuui sương, lơq kah ngaai chóóm pei paxooq lóóm marhaal ưng adhi anó tââq adhi anó. Mót tangêi ađek adhi anó e kah tamóh thêi dhơ dharau. Alua, alua, thêi praaq palơq adhi anó, tabhơt dhơ dharau adhi anó gavơh nhan Ama vơn dhanóók thêi, Ađó e đóng leq adhi anó. Patơk ađôk, adhi anó kah ơi nhan gavơh dhơ dharau vơn dhanóók thêi. Phaai gavơh nhan aq, nek adhi anó e bâân đơơp, đóng lóóm marhaal ưng adhi anó bâân dyóp liêm.

Thêi ơi praaq nôôq rau đôk palơq adhi anó palơq nôôq paraaq babi, xók tangêi ganah tơk, thêi e kah dyơq praaq palơq adhi anó palơq nôôq paraaq babi dyơq, klóóih leq ađek, thêi e pakah đóng adhi anó kơi drêh dróói leq Ama. Kalóóng tangêi ađek, adhi anó e gavơh nhan vơn dhanóók thêi, lơq thêi kah praaq palơq adhi anó kơi thêi e gavơh nhan Ama klóóih đóng adhi anó, Taai chênh Ama nh'nhơr adhi anó, taai adhi anó nh'nhơr thêi lơq huuiq kơi thêi ơi tơk tââq Ama. Thêi ơi bhral tââq Ama lơq ơi mót kalóóng hóng katiêk. Hayơq thêi vil xooq tââq hóng katiêk lơq vôôiq tơk paleq Ama.” Nôôq môôn-đô ưng Ađó móón: “Lêi tôôh, xók đôk thêi dyơq praaq kơi drêh dróói, hơq kah praaq palơq paraaq babi. Bhêêl đôk, nôôq yi n'nal kơi thêi bhluuch n'nal dyóp rau, lơq kah kơng phaai ve ngaai tamóh thêi. Tââq ađek, nôôq yi huuiq kơi thêi ơi bhral tââq Yaang Pleng.” Chuôq Jê-su ââi bóóp piđó: “Xók đôk adhi anó ve huuiq kah? Nek lêi, ađôk dyơq tơk — lơq ơi tơk — nek adhi anó bâân xooq gloong, dyóp chanak ting kalơng n'tua ađêi, dyơq thêi nek adhi anó lơơi lóóiq mưi ađêi. Dhơ kơi achêk, thêi yươq glêh bâân tơơt laleh, taai Ama tơơt palơq thêi. Thêi ơi praaq nôôq rau ađô đóng adhi anó buôn đóng adhi anó ve yươq rau ha dhiq thêi. Adhi anó lum bhrê hư kalóóng hóng katiêk, bơơi phaai mưng lóóm, thêi ơi đươk hóng katiêk aq.”

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.