Jang 15

1“Thêi nek tââm nho lalua, lơq Ama thêi nek manưih choh nho. 2Xók n'đó đóóng kalóóng thêi kah bóóng pale, nek Ađó têch m'peq ađó; dyơq n'đó đóóng bóóng pale, nek Ađó chapech dhoon đóóng achêk đóng ađó ve chóóm bóóng pale bơk lơh. 3Adhi anó bâân sek aq ve paraaq đu thêi ơi truuih đóng adhi anó. 4Phaai bhiêk tơơt kalóóng thêi, lơq thêi kalóóng adhi anó. N'đó kơi đóóng nho kah ve chóóm đuôh tư ađó bóóng pale la ađó kah bhiêk tơơt kalóóng tââm nho, nek kung kơi achêk, adhi anó kah chóóm tư ađêi bóóng pale la adhi anó kah bhiêk tơơt kalóóng thêi. 5Thêi nek tââm nho; adhi anó nek đóóng. Ngaai bhiêk tơơt kalóóng thêi, lơq thêi kalóóng ađó, nek manưih achêk bóóng pale bơk, ơi taai taklah bil tââq thêi, adhi anó kah ve chóóm rau têêng đuôh. 6La ngaai kah bhiêk tơơt kalóóng thêi, nek ađó achêk bâân m'peq lơơi leq nguôi thê kơi đóóng bâân rang; palââng chââih karong piđó lơq m'peq leq óih, hayơq piđó bâân róh bhơt. 7La adhi anó bhiêk tơơt kalóóng thêi, lơq paraaq thêi bhiêk tơơt kalóóng adhi anó, phaai nhan rau hau ađêi kiêng, nek rau ađek e bâân têêng đóng adhi anó. 8Ama thêi bâân bhi haanh kalóóng rau ađô, achêk nek adhi anó bóóng pale bơk lơq adhi anó val xar môôn-đô ưng thêi. 9Ama ơi nh'nhơr thêi ng'kơi, thêi kung nh'nhơr adhi anó kơi achêk. Phaai bhiêk tơơt kalóóng lóóm tanhơr ưng thêi. 10La adhi anó jư nôôq gani pachóóm ưng thêi, nek adhi anó e bhiêk tơơt kalóóng tanhơr ưng thêi, thê kơi thêi ơi jư nôôq gani pachóóm ưng Ama lơq bhiêk tơơt kalóóng tanhơr ưng Ađó. 11Thêi ơi praaq nôôq rau đôk đóng adhi anó, buôn lóóm marhaal ưng thêi tơơt kalóóng adhi anó, lơq lóóm marhaal ưng adhi anó bâân bing dyóp. 12Ađôk nek gani pachóóm ưng thêi, achêk nek adhi anó tanhơr xóng ađêi kơi thêi ơi nh'nhơr adhi anó. 13Kah ngaai ve lóóm nh'nhơr gamak lơh kơi ađô — ađek nek mưi nak đơơp chêt parmông ađêi klóóih đóng nôôq parjơơk ưng ađó achêk. 14Adhi anó nek parjơơk liêm ưng thêi la adhi anó têêng nôôq rau thêi truuih pachóóm đóng adhi anó. 15Thêi kah đóók adhi anó nek dhơn ratơơq dyơq, taai dhơn ratơơq kah n'nal tarnêêng kala ađêi têêng. Bơơi thêi ơi đóók adhi anó nek parjơơk liêm, taai dyóp tarnêêng đu thêi ơi xâng tââq Ama thêi, nek thêi pakah đóng adhi anó n'nal. 16Eh rau adhi anó ơi chââih thêi, bơơi thêi ơi chââih adhi anó lơq patóóng kayua adhi anó, buôn adhi anó vôôiq, bóóng pale, lơq pale ưng adhi anó bâân dyơq lóóiq, đóng dhơ dharau đu adhi anó vơn dhanóók thêi nhan gavơh Ama, nek Ađó đóng leq adhi anó. 17Thêi truuih pachóóm đóng adhi anó nôôq paraaq ađô, buôn đóng adhi anó tanhơr xóng ađêi. 18La hóng katiêk geet adhi anó, nek phaai n'nal kơi hóng katiêk ơi geet aku laloom adhi anó. 19La adhi anó mađó leq manưih hóng katiêk, nek manưih hóng katiêk alua dhakơi ơi nh'nhơr manưih mađó leq ađó. Bơơi taai adhi anó kah mađó leq manưih hóng katiêk, hơq palâh lóóiq, thêi ơi chââih adhi anó tââq m'pơng manưih hóng katiêk, taai ađek manưih hóng katiêk geet adhi anó. 20Phaai hei lóóiq paraaq đu aku ơi praaq palơq adhi anó: ‘Dhơn ratơơq nek kah gamak lơh kala ưng ađêi.’ La piđó m'bhiiq vei thêi, nek piđó kung e m'bhiiq vei adhi anó; la piđó jư paraaq thêi, nek piđó kung e jư paraaq ưng adhi anó. 21Bơơi ơi taai dhanóók ưng thêi, piđó e têêng dyóp tarnêêng achêk palơq adhi anó, taai piđó kah ve đơơp n'nal Yaang đu kayua thêi. 22La thêi kah tơk lơq praaq truuih đóng piđó, nek piđó kah ve matu; bơơi xók đôk, piđó kah dyơq chóóm kadrêi palââp đóng matu lơt ưng chênh piđó. 23Manưih geet thêi nek kung geet Ama thêi. 24La thêi ơi kah têêng m'pơng piđó nôôq tarnêêng đu kah ve ngaai lââng chóóm têêng, nek piđó kah ve matu; bơơi xók đôk piđó ơi lêi hayơq dyơq geet bhơt thêi palơq Ama thêi. 25Dhơ kơi ađek, achêk nek lơơi đóng bâân tajaap paraaq bâân xaraq kalóóng gani ưng piđó, kơi ađô: ‘Kah rauriq piđó geet thêi.’ 26Xók Yaang Bhơơl Lóóm tơk, hơq nek Yaang tââq dhiq Ama đu thêi e kayua tơk đóng adhi anó — nek Yaang Dhalam gluh tââq Ama — Ađó e truuih đuui leq thêi. 27Hơq adhi anó kung truuih đuui dyơq, taai adhi anó tơơt palơq thêi tư tââq tarnââp.”