Katu Bible Literal Text
Jang 1:5
Verse 5 is marked below, with the whole chapter around it. Read from the start
Tarnââp ve Paraaq, Paraaq tơơt palơq Yaang Pleng, lơq Paraaq nek Yaang Pleng. Ađó ơi ve tââq tarnââp palơq Yaang Pleng. Dyóp rau ganơơm Ađó bâân tavaaih, lơq xók kah bâân tavaaih tââq Ađó, hayơq kah marau marâ bâân vaaih. Kalóóng Ađó nek parmông, lơq parmông nek rau brương ưng akóón manưih Rau brương dyóól kalóóng bóng kanam, lơq bóng kanam kah đươk lơh rau brương.
Ve mưi chanak bâân kayua tââq Yaang Pleng, achak ưng ađó nek Jang. Ađó ơi bhral kalóóng tarnêêng manưih truuih buôn ađó ve chóóm truuih đuui leq rau brương, hơq đóng tââq ađó, dyóp ngaai ve chóóm huuiq. Chênh ađó achêk eh rau nek rau brương, bơơi ađó ơi bhral đóng ađó truuih đuui leq rau brương. Rau brương lalua, nek rau brương dyóól brương dyóp manưih, ơi bhral leq kalóóng hóng katiêk. Ađó ơi tơơt kalóóng hóng katiêk, lơq hóng katiêk bâân tavaaih tââq Ađó, hơq hóng katiêk kah đơơp n'nal Ađó. Ađó ơi vôôiq tơk dhiq mađó leq Ađó, hơq dhanuôr mađó leq Ađó kah pơh đơơp Ađó. Bơơi tabhơt nôôq manưih pơh đơơp Ađó, nek Ađó đóng leq piđó mataai val xar akóón anaaq ưng Yaang Pleng, nek đóng leq nôôq ngaai huuiq dhiq dhanóók Ađó. Nôôq manưih achêk eh rau bâân n'niên tââq parhââm ahaam, kung eh tââq rââm kiêng achak araang, môôiq tââq karnóq akóón manưih, bơơi nek tââq Yaang Pleng. Paraaq ơi val xar achak araang lơq tơơt jaq m'pơng nôôq he, lơq nôôq he ơi ngel móng cha-iil tabah ưng Ađó, i kơi cha-iil tabah ưng Akóón Mưi bhral tââq Ama, bing bhlaai ơơn phươk liêm nek palơq paraaq dhalam. Jang truuih đuui leq Ađó lơq karơ dhariêng, praaq kơi ađô: “Ađô nek Yaang đu aku ơi móón: ‘Yaang bhral tatun aku ơi val xar bhi chap lơh aku, ơi Ađó biêh ve loom aku.’” Ơi yuur bhral tââq rau xưa raai ưng Ađó, tabhơt nôôq he pei đơơp bhơt ơơn phươk liêm ađô tơk ơơn phươk liêm tôôh. Taai gani ơi bâân pajaau đóng dhiq Môôi-se; ơơn phươk liêm lơq paraaq dhalam ơi bhral tââq Jê-su Chuôq Paq manưih. Kah ngaai glêh móng lêi Yaang Pleng. Chapiên Akóón Mưi Yaang Pleng, Yaang tơơt kalóóng lóóm Ama, chênh Yaang achêk lók pakah leq Ama.
Ađô nek paraaq truuih ưng Jang xók manưih Jo Thaaiq kayua nôôq takóh kadhâng bhanuôih lơq manưih Lê-vi tââq Jê-ru-sa-leem tơk buôn tamóh ađó: “Amei nek ngaai?” Ađó đơơp pakah truuih karơ — kah mơ ve dyiin bơơi đơơp móón — kơi ađô: “Aku eh rau nek Chuôq Paq Manưih.” Palââng tamóh ađó: “Kơi ađek nek ng'kơi? Amei alua nek Ê-li?” Ađó ââi: “Aku eh rau.” “Amei alua nek Manưih Đââng Taruuih?” Ađó ââi: “Eh.” Kơi ađek hayơq, piđó móón palơq ađó: “Amei nek ngaai, đóng nôôq yi ve chóóm ve xayar ââi bóóp leq nôôq manưih ơi kayua nôôq yi vôôiq? Hau amei praaq leq amei kala?” Ađó ââi:
“Aku nek dhariêng praaq yuur tar-auq kalóóng kruung vơng:
‘Phaai têêng tapat charhóóng ploong kalơng ưng Chuôq,’
kơi Ê-saai manưih loom đââng taruuih ơi móón.” Nôôq manưih bâân kayua biêh mađó kabhuh manưih Pha-ri-si, piđó tamóh padhiêr ađó, lơq praaq palơq ađó: “La amei eh rau nek Chuôq Paq Manưih, kung eh rau Ê-li, môôiq Manưih Loom Đââng Taruuih, kơi ađek nek hau kơq amei têêng bap-teem?” Jang ââi bóóp piđó, kơi ađô: “Aku têêng bap-teem palơq đơơk. Bơơi Yaang ơi dyương dhiq m'pơng nôôq pe hơq nôôq pe kah n'nal, nek Yaang bhral tatun aku; Yaang đu aku kah chóóm đaang buôn lêh tarlêi chauq jêi ưng Ađó.” Nôôq tarnêêng achêk yuur vaaih dhiq Bê-tha-ni hót tôôh karuung Jô-đen, dhiq đu Jang biêh dyơq têêng bap-teem. Tangêi tatun, Jang lêi Chuôq Jê-su vôôiq leq hót ađêi, hơq móón kơi ađô: “Lêi tôôh, Trưưu Akóón ưng Yaang Pleng, Yaang pei lơơi matu lơt ưng akóón manưih aq! Chêk nek leq Yaang ađek đu aku ơi móón: ‘Manưih bhral tatun aku nek Yaang biêh bhi chap lơh aku, taai Ađó ơi biêh ve loom aku.’ Aku kah n'nal Ađó, bơơi buôn Ađó bâân tapakah leq dhanuôr I-sơ-ra-êên, aku bhral têêng bap-teem palơq đơơk taai rau tarnêêng achêk.” Jang ơi truuih đuui, xók praaq kơi ađô: “Aku ơi lêi Yaang Liêm tââq pleng dhaluônh jaq kơi achim paraap, lơq bóq dhiq Ađó. Aku kung kah n'nal ngaai Ađó, bơơi Yaang kayua aku têêng bap-teem palơq đơơk, Yaang achêk praaq palơq aku: ‘Dhiq m'piing dhơ dhangaai đu akóón lêi Yaang Liêm dhaluônh jaq lơq bóq dhiq ađó, nek manưih achêk nek Yaang têêng Bap-teem palơq Chuôq Yaang Liêm.’ Hayơq aku ơi móng lêi lơq truuih đuui kơi ađô, ađôk nek Akóón Yaang Pleng.”
Machu dyơq, dhiq tangêi patet kơơq, Jang dyơq dyương palơq bơơr kalóóng sôôq nôôq môôn-đô ưng ađêi, lơq xók lêi Chuôq Jê-su vôôiq lalơh, ađó móón: “Lêi tôôh, Trưưu Akóón ưng Yaang Pleng!” Bơơr môôn-đô achêk ưng Jang xâng móón kơi achêk hơq nhiđó vôôiq ting Chuôq Jê-su. Xók Chuôq Jê-su hangiêk lóóiq lơq lêi nhi bơơr dyơq ting ađêi, Ađó tamóh nhi bơơr: “Bơơr nhưa chêk ngaai?” Nhi bơơr ââi paraaq Ađó: “Ra-bi (dhanóók ađô bâân lók kiêng móón nek ‘Thêi’), Thêi tơơt n'dhiq?” Ađó praaq palơq nhi bơơr: “Nek vôôiq hayơq adhi anó e lêi.” Kơi achêk nek nhi bơơr vôôiq, lêi dham Ađó dyơq tơơt, lơq nhi bơơr ơi tơơt lóóiq palơq Ađó xók tangêi ađek. Bhêêl achêk nek mơ jơ đu majêt. Mưi kalóóng bơơr nak ơi xâng tââq Jang lơq vôôiq ting Chuôq Jê-su nek En-rê, adhi padruuih ưng Si-môôn Phi-e-rơ. Laloom tabhơt, ađó chêk lum anó ưng ađêi nek Si-môôn hayơq truuih lóóiq palơq anó, kơi ađô: “Nôôq yi ơi lum Yaang Bâân Xut Dhơu” (dhanóók ađô bâân lók nek Chuôq Paq Manưih). Ađó đââng anó ađêi tơk leq Chuôq Jê-su. Kơi xók lêi ađó, Chuôq Jê-su móón: “Amei nek Si-môôn, akóón ưng Jang. Amei e bâân đóók nek Sê-pha” (achak achêk bâân lók nek Phi-e-rơ).
Tangêi tatun, Chuôq Jê-su kiêng xooq tââq ađek vôôiq leq Ga-li-lê, lơq Ađó chêk lum Phi-liip hayơq kayua ađó ađek: “Amei ting Aku.” Phi-liip manưih gluh tââq Bêêt-saai-đa, nek tââq kanóón ưng En-rê lơq Phi-e-rơ. Phi-liip chêk lum Na-tha-na-êên lơq móón palơq ađó ađek: “Nôôq yi tame bâân n'nal Yaang đu Môôi-se ơi xaraq kalóóng gani lơq nôôq manưih loom đââng taruuih kung kơi chêk — nek Jê-su, akóón ưng Jô-seep, tââq Na-xa-reet.” Bơơi Na-tha-na-êên ââi lóóiq ađó: “Ve chóóm vaaih hau rau parhei gluh tââq Na-xa-reet hơ?” Phi-liip móón palơq ađó: “Hêq vôôiq lơq lêi.” Chuôq Jê-su lêi Na-tha-na-êên xók tơk leq Ađó, nek Ađó praaq lơq akonh ađek: “Lêi nô, mưi manưih I-sơ-ra-êên dhalam tapat, kah ve rau galơơk chachââr dhiq kalóóng manưih ađô!” Na-tha-na-êên tamóh Ađó: “N'đó tââq Amei n'nal aku?” Chuôq Jê-su ââi, Ađó praaq palơq akonh ađek kơi ađô: “Xók kah ơi Phi-liip dhaloong amei, bhêêl dyơq tơơt jaruh tââm tarung, hayơq Aku ơi lêi amei.” Na-tha-na-êên ââi palơq Ađó: “Ra-bi, Amei nek Akóón Yaang Pleng! Amei nek Bhua ưng I-sơ-ra-êên!” Chuôq Jê-su ââi lóóiq lơq praaq palơq ađó: “Ve alua amei huuiq taai Aku ơi móón palơq amei kơi ađô: ‘Aku ơi lêi amei dhiq jaruh tââm tarung’? Amei e lêi nôôq tarnêêng đu chrih liêm lơh kơi ađôk dyơq.” Hayơq Chuôq praaq palơq ađó: “Alua, alua, Aku móón palơq adhi anó, adhi anó e lêi pleng yuur tayaah, lơq nôôq dhơn ưng Yaang Pleng dyók dhaluônh dhiq Akóón Manưih.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.