Lu-ka 24

1Hayơq, yayóng tarưưp marư rư ưng tangêi laloom mưi tun, piđó vôôiq tơk leq ping, đââng janươu thum đu piđó ơi ravang. 2Bơơi piđó lêi bhangôh dhơl ơi bâân tachir tââq ping, 3dhơ kơi ađek, xók mót leq kalóóng, piđó kah rau lêi xaak Chuôq Jê-su. 4Tarnêêng vaaih xók piđó dyơq kah n'nal kơi kanóq leq chiên ađô nek, lêi tôôh, bơơr nak manưih padruuih xơp aau brương cha-iil dyương tóór piđó. 5Xók piđó bhrơn kadrêq lơq chip mat leq katiêk nek bơơr nak achêk móón palơq piđó: “Hau nôôq pe chik chêk manưih mamông bhlưa kalóóng manưih chêt? 6Ađó kah tơơt dhiq ađô, bơơi Ađó ơi mamông lóóiq! Nek hei lóóiq Ađó ơi praaq ng'kơi palơq adhi anó xók dyơq tơơt dhiq Ga-li-lê, 7móón kơi ađô Akóón Manưih phaai bâân pajaau leq têi nôôq manưih matu lơt lơq phaai bâân tateeng đinh dhiq n'lóóng baang chatông, hayơq tơk tangêi đu pe, nek mamông lóóiq.” 8Piđó hei lóóiq paraaq Ađó, 9lơq xók tââq ping val chô, piđó truuih lóóiq dyóp rau chiên leq majêt mưi sưưq-đô palơq tabhơt nôôq manưih đu lââng. 10Nôôq pađiil achêk dhơơm nek Ma-ri Ma-đơ-leen, Jaan-nơ, Ma-ri amêêq Ja-kơ, lơq nôôq pađiil đu lââng nek palơq piđó, truuih lóóiq leq nôôq sưưq-đô nôôq tarnêêng achêk. 11Nôôq paraaq truuih ađek xâng ngóq kơi paraaq bhông haau palơq nôôq sưưq-đô, hayơq piđó kah huuiq nôôq pađiil ađô. 12Dhơ kơi achêk, Phi-e-rơ yuur dyương mut tơk ping, lơq kóp akoq bhange leq kalóóng, ađó chapiên lêi bhaai raleng giêl. Kơi ađek nek ađó val chô leq đong, tư tamóh hau chiên ơi vaaih.

13Tôôh, chênh kalóóng tangêi achêk, bơơr chanak dhiq kalóóng nôôq môôn-đô xók vôôiq leq mưi bhươl changaai achak nek Em-ma-uut, tââq Jê-ru-sa-leem chapat jêt êch-ta-đơ, 14lơq nhiđó xók tapraaq xóng ađêi leq dyóp rau tarnêêng ơi vaaih. 15Tarnêêng vaaih xók nhiđó praaq chiên lơq tapraaq, nek chênh Chuôq Jê-su tơk pađan vôôiq mandrươh palơq nhiđó. 16Bơơi mat nhiđó bâân tapađơp đóng kah n'nal Ađó. 17Xók achêk, Ađó móón palơq piđó: “Nôôq chiên achêk nek hau hơq bơơr nhưa tapraaq xóng nhưa xók vôôiq kalơng ha?” Nhiđó dyương parngau dhiq ađek, ranguôq rabaang bhlơng. 18Hayơq xók ââi, mưi nak achak nek Kơ-lê-ô-ba móón palơq Ađó: “Ve alua chapiên mưi amei nek tamóói tham Jê-ru-sa-leem kah n'nal nôôq chiên ơi vaaih dhiq ađek nôôq tangêi ađôk?” 19Ađó tamóh nhiđó: “Hau rau chiên kơi ađek?” Hayơq nhiđó móón palơq Ađó: “Chiên pâng tơk Jê-su manưih Na-xa-reet, hơq ađek nek mưi manưih, mưi manưih đââng taruuih bing mataai raman kalóóng tarnêêng lơq bóóp paraaq toom mat Yaang Pleng palơq luch manưih dhanuôr, 20lơq ng'kơi hơq nôôq takóh kala bhanuôih palơq kabhuh kuôn gamak ưng nôôq he ơi pajaau Ađó đóng đơơp tabóq matu leng, lơq ơi teeng đinh Ađó dhiq baang chatông. 21Dyơq nôôq yi biêh đương rââm kơi Ađó ađek nek Yaang tơk đóng paq jóói I-sơ-ra-êên. Palâh lóóiq, eh rau mandrươh palơq tabhơt nôôq tarnêêng piing, tarlum achêk ơi lơh tơk tangêi mađôk nek tangêi đu pe, tââq tââp xók nôôq tarnêêng tôôh vaaih. 22Bơơi, nôôq manưih pađiil bhlưa kalóóng nôôq yi lalua têêng nôôq yi phaai hêq xâng, xong xók piđó tơơt dhiq ping bhêêl yayóng tarưưp 23lơq xók kah rau bâân lêi xaak Chuôq, piđó chô, truuih lóóiq nek ơi lêi rau tapalêi leq nôôq dhơn pleng móón Chuôq dyơq mamông. 24Nôôq manưih kalóóng nôôq yi vôôiq leq ping lơq ơi lêi dhalam kơi ađek, pâng kơi nôôq manưih pađiil ơi móón, bơơi piđó kah rau lêi Ađó.” 25Hayơq Ađó móón palơq piđó: “Ơơi, nôôq manưih ngôôk ngaak lơq nôôq manưih kah đâh n'nal kalóóng lóóm đóng huuiq dhiq dyóp rau đu nôôq manưih đââng taruuih ơi móón! 26Eh dhơq Chuôq Paq Manưih kơng đơơp nôôq rau ađek, đóng mót leq kalóóng cha-iil tabah ưng Ađó ha?” 27Hayơq tarnââp tââq Môôi-se lơq tââq tabhơt nôôq manưih đââng taruuih, Ađó lók kluôh đóng nhiđó rau dhơơm pâng tơk leq Ađó kalóóng luch Bha-aar Paraaq Yaang Pleng. 28Nhiđó vôôiq đan tơk bươl dhiq nhiđó kanóq vôôiq, nek Ađó têêng pakơi kiêng vôôiq changaai lơh. 29Kơi ađek nek nhiđó chut kayua Ađó, kơi ađô: “Nhan tơơt lóóiq palơq bơơr yưa, taai pleng ơi đan blót lơq tangêi ravang luch.” Ađó vôôiq mót đóng tơơt lóóiq palơq nhiđó. 30Tarnêêng vaaih xók Ađó ơi tơơt leq baang palơq nhiđó, pei kadhâng beng, Ađó ma-ơơn, lơq xong xók veh, Ađó pađơơp leq nhiđó. 31Xók achêk, mat nhiđó tapơơh lơq nhiđó n'nal nek Chuôq, hayơq Chuôq ơi xooq tabil tââq nhiđó. 32Nhiđó tapraaq xóng nhiđó: “Eh dhơq lóóm ưng nhang puih karxaal lóóm xók Ađó praaq chiên palơq nhang xók vôôiq kalơng, kung kơi xók Ađó lók kluôh Bha-aar Paraaq Yaang Pleng đóng nhang alua?” 33Kơi ađek nek xók yuur dyương kung leq chênh jơ achêk, nhiđó val chô tơk leq Jê-ru-sa-leem. Lơq nhiđó chik chêk lum majêt mưi sưưq-đô xók nhoom madhiq, palơq nôôq manưih ve mat palơq piđó, 34truuih kơi ađô: “Chuôq ơi mamông lóóiq lalua, lơq Ađó ơi bâân Si-môôn lêi.” 35Hayơq nhiđó truuih đuui dyóp rau chiên dhiq kalơng vôôiq, lơq ng'kơi Ađó ơi pakah leq nhiđó n'nal bhêêl xók veh beng.

36Xók achêk, xók piđó dyơq praaq nôôq chiên achêk, chênh Ađó dyương dhiq m'pơng piđó, lơq móón palơq piđó: “Yươq rauha leq adhi anó.” 37Bơơi taai kakhin kapơn lơq kadrêq lêi, piđó ngóq nek xók lêi yaang. 38Ađó móón piđó: “Hau adhi anó nhok karnóq lơq ơi taai hau hơq rau paangra yuur vaaih kalóóng lóóm adhi anó? 39Nek lêi têi ưng thêi lơq dyung ưng thêi, kơi chênh nek thêi ađôk. Nek xuui leq thêi lơq chamet lêi. Taai yaang kah ve m'bech lơq ng'haang, kơi adhi anó lêi thêi nek ve.” 40Praaq xong paraaq ađek, Ađó đóng piđó lêi têi lơq dyung ađêi. 41Xók bhêêl piđó dyơq kah ơi khin huuiq lơq hêq lêi taai bhuui marhaal bhlơng, Ađó tamóh piđó: “Dhiq ađôk, adhi anó ve rau chóóm cha kah?” 42Xók achêk, piđó pađơơp leq Ađó mưi paleh kadhóóng boh; 43Xong xók pei kadhâng, Ađó đah toom mat piđó.

44Hayơq Ađó praaq palơq piđó: “Ađô nek nôôq paraaq ưng thêi đu thêi ơi praaq palơq adhi anó xók dyơq tơơt palơq adhi anó, nek dyóp rau ơi xaraq leq thêi dhiq kalóóng gani Môôi-se, nôôq bha-aar manưih đââng taruuih lơq nôôq bha-aar Haanh Pleng maar phaai bâân tajaap.” 45Bhêêl achêk, Ađó lóng lóóm karnóq piđó đóng n'nal Bha-aar Paraaq Yaang Pleng, lơq Ađó móón piđó: 46kơi ađô: “Kơi ve paraaq xaraq: Chuôq Paq Manưih phaai đơơp janah, lơq tââq akan chêt mamông lóóiq leq tangêi đu pe, 47hayơq rau klôôq lóóm đóng bâân lơơi matu phaai bâân truuih pachóóm vơn achak Ađó đóng tabhơt nôôq dhanuôr, tââp tââq Jê-ru-sa-leem. 48Adhi anó nek manưih truuih đuui leq nôôq tarnêêng ađek. 49Thêi ravang pagơơi rau ơi hươq ưng Ama thêi tơk leq adhi anó. Bơơi adhi anó phaai tơơt kalóóng kanóón đóng tơk xók adhi anó bâân pei xơp mataai raman tââq piing yaal.”

50Hayơq Ađó đââng piđó gluh leq nguôi đóng tơk leq Bê-tha-ni, lơq xók hayuur têi ađêi yuur, Ađó đóng phươk leq piđó. 51Tarnêêng vaaih xók Ađó đóng phươk leq piđó, Ađó xooq tââq piđó lơq bâân đââng padyók leq pleng. 52Xong xók bhuôih kakoh Ađó, piđó val chô leq Jê-ru-sa-leem palơq lóóm bhuui marhaal bơk bhlơng, 53lơq tabhơt piđó bhiêk tơơt dhiq kalóóng đong bhanuôih, bhi haanh Yaang Pleng.